TAKƎLAƔA NAALƐ NYƎŊKA
42
(Yontu 42–72)
Wei ɩ hɑtələnɑ Ɩsɔ təsɛɛlɛ tɔ ɩ wulɑ
1 Kolee yontu nti tə wɛ yonyoolɑɑ nyʋɣʋ tʋ
yontunɑɑ tɑɑ tɔɣɔlɔ.
2 Ɩsɩɩ lʋkɔtʋ pɩɩkʋɣʋ nɑm nɑ ɩ́ təŋəɣɩ lʋm ɑkpɑɑ tɔ,
ḿpʋɣʋ mɑ pɛɛkəɣɩ Tɑcɑɑ.
3 Mɑ nyɩɩləɣɩ weesuɣu tʋ Ɩsɔ nyɑɣɑ.
Pəlee kɛ́ mɑɑ kɔɔ nyɑ́ tɛ́ nɑ mɑ́ nɑ-ŋ?
4 Ɩsəlʋm kɛ mɑ tɔkɩ ilim nɑ ɑhoo.
Mpi tɔ, pɑ pɔɔsəɣɩ-m tɑm kɛ́ sɩ:
Leɣe nyɑ́ Ɩsɔ ɩnɩ ɩ wɛɛ?
5 Hɑlɩ pə lɑpɑ nɑ mɑ́ tɔɔsəɣənɑ lɑŋwɑkəllɛ kɛ
ɩsənɑ sɑmɑɑ tʋkɑɣɑ-m hɛkʋ nɑ lɑŋhʋlʋmlɛ sɔsɔɔlɛ,
nɑ tə́ pukinɑ Ɩsɔ təyɑɣɑ tɔɔ,
nɑ pɑ́ wilitiɣi nɑ pɑ́ sɑŋɩ-ɩ tɔ.
6 Pepe tɔɔ kɛ́ mɑ lɑŋlɛ wɑkələɣɩ mɑ tɩ tɔm tɔtɔ?
Pə kəlɑ teu sɩ mɑ́ tɛɛlɩ mɑ Ɩsɔ
nɑ mɑ́ tɑsɑ-ɩ sɑm tɔtɔ.
Ɩnəɣəlɛ mɑ wɑɑsʋlʋ Ɩsɔ.
7 Hɑɩ, Tɑcɑɑ, mɑ lɑŋlɛ wɑkəlɑɑ kɛ́ tətɔɣɔtɔɣɔ.
Pə tɔɔ kɛ́ mɑ tɔɔsəɣɩ nyɑnɑ Yɑɑtɑnɩ tɛtʋ mə tɔm,
nɑ nyɑ́ sɛɛlɑɑ nɑ Hɛɛmɔŋ pʋɣʋ nɑ Miseyɑɑ pulɑsi tɔm.
8 N yelɑɑ nɑ wɑhɑlɑnɑɑ təŋəɣɩ
təmɑɣɑ mɑ tɔɔ ɩsɩɩ lʋm holɑ.
Pɑ wɑɑsɑ mɑ tɔɔ kɛ́ təwisiwisi.
9 Tɑcɑɑ, lɑ-m kʋpɑntʋ kɛ ilim.
Ɩlɛnɑ mɑ́ yoo-ŋ yontu kɛ ɑhoo,
nɑ mɑ́ sələmɩ-ŋ.
Mpi tɔ, nyɑ́ hɑɑnɑ-m weesuɣu.
10 Mɑ kentulu Ɩsɔ,
n sɔɔ mɑ tɔɔ suwe nɑ pə́ nɩɩkɩ-m?
Nɑ ń yele mɑ kolontunɑɑ nɑ pɑ́ ŋmɑkələɣɩ-m?
11 Pɑ kʋtʋɣʋ nɩɩ-m kɛ́ təkpətɩɩ
nɑ pɑ́ yɔɣɔtəɣɩ ilim nɑ pə tɛm sɩ:
Leɣe nyɑ́ Ɩsɔ ɩnɩ ɩ wɛɛ?
12 Pepe tɔɔ kɛ́ mɑ lɑŋlɛ wɑkələɣɩ mɑ tɩ tɔm tɔtɔ?
Pə kəlɑ teu sɩ mɑ́ tɛɛlɩ mɑ wɑɑsʋlʋ Ɩsɔ,
nɑ mɑ́ tɑsɑ-ɩ sɑm tɔtɔ.