5
Ɩsɔ sənɑʋ pɛɛkʋɣʋ
1 Tɑfiiti Yontu nti pɑ yoonɑ həsɩ nɑ tə́ wɛ
Yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Hɑɩ Tɑcɑɑ, nɩɩ mɑ kʋyɔɣɔtʋtʋ nɑ mɑ mɔlɑ.
3 Nyɑɣɑlɛ mɑ wulɑʋ sɔsɔ nɑ mɑ Ɩsɔ.
Nɩɩ mɑ yɑɑʋ nɑ mɑ wiinɑʋ kɛ
4 tɑnɑŋ tɛɛ, hɑɩ Tɑcɑɑ.
Pə nyɑɑləɣɩ tɔɣɔ mɑ kɛɛsəɣənɑ nyɑ́ tɔɔ nɑ mɑ tɑŋɑɑ.
5 N tɑ kɛ Ɩsɔ wei ɩ lɑŋlɛ hɛɛkənɑ ɩsɑɣɑtʋ tɔ.
Ɩsɑɣɑʋ ɩɩ hikiɣi lonte kɛ́ nyɑ́ tɛ.
6 Nyɑ́ luɣu fɛɩ kɑlɑmpɑɑnɩ nyə́mɑ.
Pəyele nn cɑɑkɩ mpɑ pɑ pɛɛkəɣɩ lɛlɑɑ nɑ ɩsɑɣɑtʋ tɔ.
7 N kpiisiɣi kɑloolutʋnɑɑ kɛ́,
nɑ nyɑ́ tɑɑ kpɑɑkənɑ yʋlʋkʋlɑɑ nɑ ŋmɩɩlɑɑ.
8 Amɑ nyɑ́ kʋpɑntʋ sɔsɔɔntʋ tɔɔ
mɑ pəsəɣɩ mɑ sʋʋ nyɑ́ tɛ́ nɑ sɔɣɔntʋ
nɑ mɑ luŋ nyɑ́ təsɛɛlɛ ɩsɛntɑɑ.
9 Tɑcɑɑ tiiki-m nyɑ́ tɑmpɑnɑ tɑɑ kɛ́ mɑ kolontunɑɑ tɔɔ,
nɑ ń kpɑlɩ mpɑɑʋ nɑ mɑ́ təŋ.
10 Pə fɛɩ sɩ yʋlʋ ɩ́ lɑ nɑɑni nɑ pɑ kʋyɔɣɔtʋtʋ.
Wɑkəlʋɣʋ tike hʋwɛɛ hɑɣɑnɑ pɑ tɑɑ.
Pɑ nɔɣɔ tɑɑ wɛ ɩsɩɩ pəlɑɑʋ ŋku kʋ kulɑɑ tɔ.
Nɑ pɑ́ tʋsəɣɩ yəlɑɑ nɑ pɑ nsəmɑ.
11 Hɑɩ Ɩsɔ kʋ tɑsəkəlɛ nyəmɑ mpɛ pɑ tɔm
nɑ ń yele nɑ pɑ mɑɣɑmɑɣɑ pɑ kɑtɔsɩ kpɑ-wɛ.
Mpi tɔ, pɑ ɩsɑɣɑtʋ kəlɑ tɔɔʋ.
Pəyele pɑ kʋləɣɩ nyɑ́ tɔɔ.
12 Ɩlɛ mpɑ pɑ pɛtɑ-ŋ pɑ tɩ tɔ pɑ lɑŋɑ kɑ́ hɛɛ
nɑ pɑ́ wɛɛ ḿpʋɣʋ tɑm nɑ ń kentiɣi pɑ tɔɔ
nɑ nyɑ́ sɔɔllɑɑ yɔɔləɣənɑ-ŋ.
13 Tɑcɑɑ, ń kooliɣi kʋpɑntʋ kɛ nyɑ́ nɩɩntɑɑ kɛ́,
nɑ nyɑ́ pɛɛlɛɛ kentiɣi-wɛɣɛ kpɑntɛ.