51
Sələmʋɣʋ sɩ pə́ hɩɩsɩ ɩsɑɣɑtʋ
1 Tɑfiiti yontu nti tə wɛ yonyoolɑɑ nyʋɣʋ tʋ
yontunɑɑ tɑɑ tɔɣɔlɔ.
2 Tə tɑɑ kɛ́ Tɑfiiti kɛɛsəɣɩ wɑɑtʋ wei ɩ nɑ Ulii ɑlʋ Pɑsepɑ pɑ lɑpɑ
Wɑsɑŋkɑlətʋ, nɑ Ɩsɔ kʋyɔɣɔtʋtʋ tɛləsʋlʋ
Nɑtɑŋ polo nɑ ɩ́ kɑlənɑ-ɩ tɔ pə tɔm.
Yontu ntəɣəlɛ sɩ:
3 Hɑɩ, Ɩsɔ, nyənɩ mɑ pətɔɔtəlɛ kɛ nyɑ́ kʋpɑntʋ tɔɔ.
Hɩɩsɩ mɑ kɑwɑlɑɣɑ kɛ nyɑ́ suulu sɔsɔ tɔɔ.
4 Nyɑɑlɩ mɑ ɩsɑɣɑtʋ təkpɑtɑkpɑtɑ,
hɩɩsɩ mɑ təpəntəlɛ nɑ mɑ́ wɛɛ tənɑŋŋ.
5 Mpi tɔ, mɑ nyəmɑ mɑ kɑwɑlɑɣɑ tɔɔ,
mɑ nɑɑkɩ mɑ təpəntəlɛ kɛ tɑm.
6 Nyɑ́ tike kɛ mɑ pəntənɑɑ,
mpi tɔ, mɑ lɑpɑ mpi pə fɛɩ-ŋ teu tɔ.
N wɛnɑ tɑmpɑnɑ kɛ timpi n hʋʋkənɑ-m tɔɣɔ,
n tɑ wɑkəlɩ tiili.
7 Mɑ kɛ́ kɑwɑlɑɣɑ tʋ kɛ hɑtoo kʋyɑŋku
mɑ too hɑɣɑ-m tɔɣɔ.
Ɩsɑɣɑtʋ tɑɑ kɛ́ ɩ lʋlɑ-m.
8 Amɑ n cɑɑ kɛ́ sɩ tɑmpɑnɑ ɩ́ wɛɛ mɑ lotu tɑɑ.
Tʋ ləmɑɣɑsɛɛ kɛ hɑtoo mɑ tɑɑ.
9 Hɩɩsɩ mɑ ɩsɑɣɑtʋ nɑ mɑ́ wɛɛ tənɑŋŋ.
Nyɑɑlɩ-m nɑ mɑ́ kəlɩ kponkpo mʋlʋm kɛ hʋlʋmʋɣʋ.
10 Kɛɛsɩ-m lɑŋhʋlʋmlɛ sɔsɔɔlɛ tɔm,
ɩlɛnɑ mɑ wei mɑ lɑŋlɛ kɑ wɑkəlɑɑ tətɔɣɔtɔɣɔ tɔ
tə́ hʋləmɩ təloiloi.
11 Kɛɛsɩ nyɑ́ ɩsɛ, tɑɑ nyənɩ mɑ ɩsɑɣɑtʋ,
hɩɩsɩ mɑ təwɑkəllɛnɑɑ.
12 Hɑɩ, Ɩsɔ tʋ mɑ tɑɑ kɛ́ ləmɑɣɑsəlɛ nɑŋŋ nyəntɛ.
Lɑɣɑsɩ-m kʋfɑlʋ nɑ mɑ́ nɩɩkənɑ-ŋ nɑ lotu kʋlʋmtʋ.
13 Tɑɑ lɔ-m nɑ mɑ́ hɑtələnɑ-ŋ,
yɑɑ ń ləsɩ nyɑ́ Feesuɣu Nɑŋŋtʋ kɛ mɑ tɑɑ.
14 Mələnɑ-m mɑ nyʋɣʋ yɑpʋ lɑŋhʋlʋmlɛ,
tʋ mɑ tɑɑ kɛ́ nɩɩnɑʋ ləmɑɣɑsəlɛ.
15 Ɩlɛnɑ mɑ́ hʋlɩ pəntəlɑɑ kɛ nyɑ́ mpɑɑŋ
nɑ pɑ́ təŋəɣɩ nɑ pɑ́ tɑɣɑnɩ kɛɛsʋɣʋ nɑ nyɑ́ tɔɔ.
16 Hɑɩ, mɑ nyʋɣʋ yɑtʋ Ɩsɔ, ləsɩ-m səm*fɑ* tɑɑ,
nɑ mɑ́ kpɑɑlənɑ lɑŋhʋlʋmlɛ kɛ nyɑ́ wɑɑsʋɣʋ tɔm.
17 Tɑcɑɑ kuli mɑ nɔɣɔ nɑ mɑ́ sɑ-ŋ.
18 Ye nyɑ́ luɣu kɑ wɛ kɔtɑsɩ mɑɑ lɑpɑ-ŋ.
Pɑɑ nsi kɔkɔ lusɑ sɩ tənɑ tɔ sɩ mɑɣɑmɑɣɑ,
n tɑ sɔɔlɩ.
19 Hɑɩ, Ɩsɔ kɔtɑɣɑ ŋkɑ kɑ wɛ-ŋ teu nɑ ń cɑɑkɩ tɔɣɔlɛ sɩ
yʋlʋ lɑŋlɛ nɑ ɩ lɑɑkɑlɩ ɩ́ wɑkələnɑ ɩ ɩsɑɣɑtʋ.
20 Lɑ nyɑ́ kʋpɑntʋ kɛ Siyɔŋ nyə́mɑ
kɛ nyɑ́ pɛɛlɛɛ tɔɔ.
Nɑ ń ŋmɑ Yosɑlɛm koloosi.
21 Wɑɑtʋ ɩnəɣɩ n kɑ́ sɔɔlɩ kɔtɑsɩ nsi
n sɩɩwɑ sɩ pɑ́ lɑ-ŋ tɔ, nɑ nsi kɔkɔ lusɑ sɩ tənɑ tɔ.
Ɩlɛnɑ pɑ́ lɑ-ŋ kɔtɑsɩ kɛ lɑtəcɛnɑɑ
kɛ nyɑ́ kɔtɑɣɑ təlɑtɛ tɔɔ.