60
Ɩsɔ nɩɩkɩ ɩ yəlɑɑ mpɑ pə kəlɑɑ tɔ pɑ wulɑ
(Kʋkɑlətʋ 7-14: Yontu 108:7-14)
1 Tɑfiiti yontu nti ɩ yoonɑ
sɑŋkʋ sɩ ɩ sɛɣɛsəɣənɑ tɔɣɔlɔ.
2 Tə tɑɑ kɛ́ Tɑfiiti kɛɛsəɣɩ ɩsənɑ ɩ yoonɑ
Silii nyə́mɑ mpɑ pɑɑ wɛ Mesopotɑmi
nɑ Sopɑ pə tɛtʋ tɑɑ tɔ.
Pɑ məlɑɣɑ kpente ɩlɛnɑ Sowɑpɩ nɑ́ɑ́ kʋ Ɩtɔm tɛtʋ
yoolɑɑ kɛ iyisi nɑɑnʋwɑ nɑ nɑɑlɛɣɛ (12.000) tɔm tɛtɛkəlɛ tɑɑ.
Yontu ntəɣəlɛ sɩ:
3 Hɑɩ, Ɩsɔ, nyɑ́ lɔnɑ-tʋ nɑ tə́ yɑ́ yem yem.
Hɛɛsɩ nyɑ́ pɑ́ɑ́nɑ́ nɑ ń məŋnɑ-tʋ.
4 N ciɣitɑ tɛtʋ nɑ tə́ yɑ́ pɔɣɔlɛɛ,
nyɑlɑ-yɛ, tɔfɔ tə tɔŋnɑ seluɣu kɛ́.
5 N mɑɣɑsɑ nyɑ́ yəlɑɑ tɑ́ nɑ toŋ,
nɑ ń cɑɑlɩ-tʋ nɑ tə́ nyɔɔ sʋlʋm kʋkʋkʋm.
6 N hʋlɑ nyɑ́ kʋpɑmɑ kɛ yɑɑsi wei pɑ́ nɑwɑ,
ɩlɛ pɑ se kolontu nyəmɑ́ kʋtɔtɔnɑ tɔ.
7 Hɑɩ, cɔ-tʋ nɑ ń kɔɔ tɑ́ wɑɑsʋɣʋ,
ɩlɛnɑ ń yɑ́ nyɑ́ kʋsɔɔllɑɑ tɑ́, nɑ nyɑ́ toŋ.
8 Ɩsɔ yɔɣɔtɑ ɩ təsɛɛlɛ nɑŋŋ nyəntɛ tɑɑ sɩ:
Mɑɑ tɔɣɔnɑ ɑkɑɩtʋ.
Mɑɑ tɑlɑ Sikɛm ɩcɑtɛ,
nɑ mɑ́ fɑɣɑ Sukɔtɩ tɛtɛkəlɛ kɛ hɔɣɔləŋ.
9 Mɑ́ tənnɑ Kɑlɑɑtɩ nɑ Mɑnɑsee.
Ɩfəlɑyim kɛlɛ mɑ yoou kɑhukɑ.
Yutɑ kɛlɛ mɑ kɑwulɑɣɑ kpɑ́tʋɣʋ.
10 Mowɑpʋ kɛlɛ tiyɑɣɑ ŋkɑ kɑ tɑɑ mɑ sɔɔ lʋm tɔ.
Mɑɑ ləsɩ Ɩtɔm tɔɔ kɛ́ ɑseetɑ
nɑ pə́ hʋlɩ sɩ mɑ́ tənnɑ-ɩ.
Mɑɑ yɑɣɑ yoou kɑkiisɑsɩ kɛ Filiisi nyə́mɑ tɔɔ.
11 Awe kɑ́ ponɑ-m Ɩtɔm nɑ ɩ́ cɛlɛ-m
pɑ koluŋɑ ɩcɑtɛ?
12 Ye pə tɑɣɑ Ɩsɔ nyɑ́, ɑwe?
Pəyele nyɑ́ lɔ-tʋ, n fɛɩ tɑ́ yoolɑɑ wɑɑlɩ.
13 Kɔɔ ń sənɑ-tʋɣʋ tɑ́ kolontu tɔm tɑɑ.
Mpi tɔ, yəlɑɑ wɑɑsʋɣʋ kɛ́ heelim kɛ yem kɛ́.
14 Ye Ɩsɔ n wɛ tɑ́ wɑɑlɩ tə lɑkɩ ɑkɑnɑɑ kɛ́.
Nyɑɑ nɑŋtənɑ tɑ́ kolontunɑɑ.