65
Ɩsɔ mʋnɑɑ sɩ pɑ́ sɑmɩ-ɩ
1 Tɑfiiti yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
2 Hɑɩ, Ɩsɔ, tɩɩ sɑ-ŋ Siyɔŋ tɑɑ kɛ́ nɑ nɑɑni,
nɑ tə́ lɑ́ ɩsɩɩ tə sɩɩʋ tɑ́ nɔɔsɩ tɔ.
3 Nyɑ́ nɩɩkənɑ sələməŋ.
Nyɑ́ cɔlɔɣɔ yəlɑɑ tənɑ kɑ́ kɔɔ.
4 Tɑ́ kɑwɑlɑɣɑ tɛɛ-tʋɣʋ toŋ kɛ́.
Amɑ nyɑɑ hɩɩsənɑ-kɛ.
5 Leleŋ nɩɩlʋ ntɛ́ wei n ləsɑɑ nɑ ń yɑɑ
sɩ ɩ́ cɑɣɑ nyɑ́ təyɑɣɑ tɑɑ kɛ́ nyɑ́ ɩsɛntɑɑ tɔ.
Tɩɩ tɔɣɔ nyɑ́ təyɑɣɑ nɑŋŋ nyəŋkɑ tɑɑ kʋpɑntʋ nɑ tə́ hɑɣɑ.
6 Tɑ́ nyʋɣʋ yɑ́tʋ Ɩsɔ nyɑ́ kʋpɑntʋ tɔɔ kɛ́
n nɩɩkɩ tɑ́ kʋsələmʋtʋ,
nɑ ń lɑkɩ-tʋɣʋ kɔkɔlɔ nyəmnɑɑ.
Nyɑɣɑ tɛtʋ nɑ lʋm pə tənɑsɩ yəlɑɑ tɛɛləɣɩ.
7 Ɩsɔ nyɑ́ sɩɩnɑ pɔɔŋ nɑ nyɑ́ toŋ,
nɑ ń suu nyɑ́ təɣɩ tomɑ.
8 Nɑ ń hɛɛsəɣɩ teŋku nɑ ɩ holɑ pɑ kɔkɔtɛ,
nɑ yəlɑɑ nyəntɛ tɔtɔ.
9 Antulinyɑ tənɑsɩ tɔɔ nyə́mɑ nɑ́
nyɑ́ kɔkɔlɔ nyəm nɑ pɑ́ nəɣəsəɣɩ,
nɑ lɑŋhʋlʋmlɛ nɑ́ɑ́ kʋɣɩ ilim
tətʋlɛ nɑ pə təlɩɩlɛ nyə́mɑ.
10 N pɑɑsənɑ tɛtʋ nɑ ń yele nɑ tɛʋ nɩɩ-təɣɩ sɔsɔm,
nɑ ń kɑɑ-təɣɩ kʋpɑntʋ nɑ lʋm su Ɩsɔ lɔɔŋ.
Nɑ ń yele nɑ tɛtʋ wɛɛ mʋsʋŋ
kɛ teu nɑ tɔɣɔnɑɣɑ nɑ́ɑ́ lɑkɩ.
11 N yɔɣɔləɣɩ lʋm kɛ ɑwɑsɑ nɑ ń yɔkəɣɩ tɑmpɑɣɑ,
n yeki nɑ tɛʋ nɩɩ nɑ pə́ hʋʋ,
nɑ ń kooli kʋpɑntʋ kɛ pə məhoo.
12 N kʋsəɣɩ pənɑɣɑ nyʋɣʋ nɑ nyɑ́ kʋpɑntʋ,
nɑ kʋpɑntʋ kpeŋ nyɑ́ mpɑɑʋ tɑɑ.
13 Tɛʋ nɩɩwɑ wʋlɑɣɑ tɛtʋ,
nɑ pulɑsɩ lɑŋɑ nɑ́ɑ́ hʋlʋmɩ.
14 Kɑləkəŋ wɑɑsɑ tətɔɣɔlɛ,
nɑ kʋtɔɣɔʋ nɑ́ɑ́ nyɑlɑ tɛtɛkɑ tɑɑ.
Lɑŋhʋlʋmlɛ kɑkiisɑsɩ nɑ yontu nɩɩkɩ.