77
Mɑ sələməɣɩ Ɩsɔ lɔŋtɑɑ kʋpɑntʋ kɛ lɑŋwɑkəllɛ kʋyɛɛŋ tɑɑ
1 Yetutum sɩ Asɑfɩ yontu nti tə wɛ
yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Mɑɑ wiinɑ Ɩsɔ nɑ mɑ́ heeli-ɩ mɑ tɔm,
mɑɑ wiinɑ-ɩ nɑ ɩ́ ké ŋkpɑŋʋɣʋ nɑ mɑ tɔɔ.
3 Ye mɑ lɑŋlɛ wɑkəlɑɑ,
mɑ pɛɛkəɣɩ Tɑcɑɑ kɛ́,
nɑ mɑ́ tɛkəɣɩ-ɩ niŋ kɛ ɑhoo, hɛɛsʋɣʋ fɛɩ,
mɑ luɣu fɛɩ sɩ pɑ́ puɣusi-m.
4 Ye mɑ tɔɔsɑ Ɩsɔ tɔɔ mɑ nəɣəsəɣɩ kɛ́,
ye mɑ kpɑɣɑ ləmɑɣɑsɛɛ ɩlɛ mɑ ɑpɑlʋtʋ yɔɔlɩ.
5 Tɑcɑɑ, nn tisiɣi sɩ mɑ́ kpətɩ ɩsəlɛ,
nɑ pə́ cɔɔsəɣɩ-m, mɑ nɔɣɔ tɑɑ fɛɩ kete.
6 Ye mɑ hʋʋ pɩɩsɩ kɑncɑɑlɑɣɑ nyənsɩ
nɑ kʋyɛɛŋ wei ɩ tɛɛwɑ tɔ ɩ tɔm,
7 mɑ tɔɔsəɣɩ mɑ yontunɑɑ tɔm kɛ ɑhoo kɛ́,
nɑ mɑ mɑɣɑsəɣɩ hɑtoo mɑ tɑɑ
nɑ mɑ́ pɛɛkəɣɩ mɑ hʋwɛɛ tɑɑ.
8 Tɑcɑɑ n kɑ́ lɔ-tʋɣʋ tɑm tɔɔ?
Nyɑ́ pɑɑ kɑɑ wɛɛnɑ-tʋ?
9 N yelɑ-tʋɣʋ kʋpɑntʋ lɑpʋ kɛ tɑm tɔɔ?
N kɑɑ tɑsɑ-tʋɣʋ nɑtələɣɩ heeluɣu kɛ pɑɑ wulee?
10 Ɩsɔ tɑ́ sɔɔ tɑ́ pətɔɔtəlɛ tɔɔ,
pəyele ɩ tɑ mʋ pɑ́ɑ́nɑ́ nɑ ɩ́ yele ɩ suulu hʋlʋɣʋ.
11 Mɑ yɔɣɔtɑ mɑ tɑɑ sɩ mpi pə tʋɣʋ-m wɑhɑlɑ tɔɣɔlɛ sɩ,
Ɩsɔtɑɑ Ɩsɔ Sɔsɔ ɩɩ tɑsəɣɩ-tʋɣʋ pɑɑsənɑʋ.
12 Mɑ tɔɔsɑ Tɑcɑɑ təmɑ tɔɔ.
Mpi tɔ, mɑ tɑ sɔɔ nyɑ́ lɔŋtɑɑ kʋpɑntʋ sɔsɔɔntʋ tɔɔ.
13 Mɑɑ yɔɣɔtɩ nyɑ́ kʋlɑpʋtʋ tənɑ tɔm,
nɑ mɑ́ kɛɛsɩ nyɑ́ təmɑ sɔsɔɔnɑ tɔm.
14 Hɑɩ, Ɩsɔ nyɑ́ mpɑɑʋ wɛɛ kɛ́ tənɑŋŋ.
Tʋɣʋ kʋlɑlɑɑʋ ŋku kʋ hɑŋnɑ-ŋ sɔsɔɔntʋ?
15 Nyɑɣɑlɛ Ɩsɔ wei ɩ lɑkɩ piti təmɑ tɔ,
n hʋlɑ nyɑ́ toŋ kɛ yəlɑɑ tɑɑ.
16 Nyɑ́ toŋ kɛ n yɑpənɑ nyɑ́ yəlɑɑ
Yɑkɔpʋ nɑ Yosɛɛfʋ pɑ lʋlʋɣʋ nyə́mɑ.
17 Hɑɩ, Ɩsɔ, lʋm nɑ-ŋ nɑ sɔɣɔntʋ kpɑ-wɩ,
nɑ pə́ sele nɑ pə́ kpɛŋnɑ hɑtoo pə tɑpʋɣʋ tɛɛ.
18 Ntɛnɑ tɛʋ kpe ɩsɩɩ lɔɔŋ lʋm nɑ kʋ holiɣi.
N tɔɔkɩ nyɑ́ nyəmɑ́ kɛ pɑɑ timpi.
19 Tɛʋ nyəɣəsʋɣʋ nyɑləməlɛ nɑɑkɩ ɑntulinyɑ kɛ holɑ ɑnɩ ɑ tɑɑ,
nɑ sɔɣɔntʋ pɩɩ tɛtʋ nɑ tə́ seliɣi.
20 Teŋku lʋm hɛkʋ tɑɑ kɛ́ n hɛɛ nyɑ́ təɣɩ mpɑɑʋ,
nɔɣɔlʋ ɩɩ nyəŋ kʋ lonte.
21 Moisi nɑ Alɔŋ kɛ n kpɑwɑ ɩsɩɩ tiikilɑɑ
nɑ pɑ́ pɑɑsəɣənɑ nyɑ́ yəlɑɑ.