81
Ye mɑ yəlɑɑ kɑ nɩɩnɑ-m
1 Asɑfɩ yontu nti pɑ yookinɑ sɑŋkʋ nɑ tə́ wɛ
yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Ɩ́ yoo tɑ́ kentilu Ɩsɔ kɛ́ yontu nɑ lɑŋhʋlʋmlɛ.
Ɩ́ wiliti Yɑkɔpʋ Ɩsɔ kɛ́ lɑŋhʋlʋmlɛ kɑwilitɑɣɑ.
3 Ɩ́ yoo-ɩ yontu nɑ ɑkilimɑnɑɑ
nɑ cəməŋ nɑ sɑŋkʋnɑɑ.
4 Ɩ́ hʋlɩ tutuuŋ kɛ ɩsɔtʋ kʋfɑlʋ ɑcimɑ kʋyɑkʋ wule,
nɑ ɩ hʋləməŋ ɑcimɑ nyəŋkʋ wule.
5 Mpi tɔ, pə kɛ́ Ɩsɛɣɛlɩ nyə́mɑ kɛ kiiu kɛ́.
Mpi Yɑkɔpʋ Ɩsɔ sɩɩwɑ tɔɣɔlɛ.
6 Nti ɩ tʋ Yosɛɛfʋ lʋlʋɣʋ nyə́mɑ kɛ
wɑɑtʋ wei ɩ tii Icipiti nyə́mɑ tɔɔ tɔɣɔlɛ.
Mɑ nɩɩwɑ nɔɣɔ ŋkɑ mɑ tɑ nyɩ tɔ sɩ:
7 Mɑ tisɑ səɣəlɑ yuŋ nyənɑ kɛ nyɑ́ nyʋɣʋ tɑɑ nɑ mɑ́ sɩɩ,
nɑ nyɑ́ niŋ yele tɔkʋ yuŋ nyəŋkʋ.
8 Lɑŋwɑkəllɛ mɑɣɑnɑ-ŋ nɑ ń mɑ́ kɑpukɑ nɑ mɑ́ yɑ-ŋ,
nɑ mɑ́ cɔ-ŋ tɛʋ holɑ tɑɑ.
Nɑ mɑ mɑɣɑsɩ-ŋ sɩ mɑ nɑɑ nyɑ́ wɑɑləɣɩ Melipɑ lʋm cɔlɔ.
9 Mɑ yəlɑɑ ɩ́ nɩɩ mɑ kʋkpɑɑlətʋ.
Ye Ɩsɛɣɛlɩ yəlɑɑ kɑ nɩɩkɑɣɑnɑ-m,
10 tʋɣʋ kʋlɑlɑɑʋ tɑɑ wɛɛ mə tɛ.
Pəyele ɩ́ tɑɑ luŋ tʋɣʋ nɑkʋlɩ.
11 Mɑɣɑlɛ Tɑcɑɑ mə Ɩsɔ wei ɩ ləsɑ-mɛɣɛ
Icipiti tɛtʋ tɑɑ tɔ.
Ɩ́ hɑɑ mə nɔɔsɩ nɑ mɑ́ suuli-sɩ.
12 Amɑ mɑ yəlɑɑ mɛ ɩ́ tɑ nɩɩ mɑ nɔɣɔ.
Ɩsɛɣɛlɩ nyə́mɑ tɑ nɩɩnɑ-m.
13 Ɩlɛnɑ mɑ́ɑ́ yele-mɛɣɛ mə lɑŋkpɩɩsəŋ ɩnɩ ɩ tɑɑ.
Nɑ ɩ́ təŋ mə mɑɣɑmɑɣɑ mə lɑɣɑtʋ.
14 Hɑɩ, ye mɑ yəlɑɑ Ɩsɛɣɛlɩ nyə́mɑ kɑ nɩɩkɑɣɑnɑ-m
nɑ pɑ́ tɔŋ mɑ mpɑɑʋ tɑɑ.
15 Mɑɑ tisɑ pɑ kolontunɑɑ təfɛ kɛ nɔɔnɔɔ
nɑ mɑ́ kʋlɩ pɑ tɔɔ.
16 Ɩlɛ Tɑcɑɑ mɑ́, mɑ kolontunɑɑ kɑ́ yele pɑ tɩ hɔm
nɑ Ɩsɛɣɛlɩ nyə́mɑ mɛ mɩɩ cɑɣɑnɑ mə təɣɩ tɑm tɔɔ.
17 Wɑɑtʋ ɩnəɣɩ mɑɑ cɑləɣɩ-mɛɣɛ tɔɣɔnɑɣɑ kʋpɑŋkɑ
nɑ mɑ́ cɛlɛ-mɛɣɛ kʋkpɑmʋɣʋ tɑɑ tɩɩŋ nɑ ɩ́ hɑɣɑ.