92
Tɑcɑɑ, pɑ sɑŋɩ-ŋ tɔ pɑ lɑkɩ teu kɛ́
1 Kʋyɑkʋ kʋhɛɛsʋɣʋ wule yontu.
2 Pə wɛ teu kɛ́ sɩ tə́ sɑ Tɑcɑɑ nyɑ́,
nɑ tə́ yoo yontu kɛ ɩsɔtɑɑ
Ɩsɔ sɔsɔ nyɑ́ nyɑ́ hətɛ tɑɑ.
3 Nɑ tə́ kpɑɑlɩ nyɑ́ kʋpɑntʋ kɛ tɑnɑŋ tɛɛ,
nɑ nyɑ́ teu tɔm kɛ ɑhoo.
4 Tə́ sɑ-ŋ nɑ ŋmɩɩsɩ
nɑɑnʋwɑ cəməŋ nɑ sɑŋkʋnɑɑ.
5 Hɑɩ, Tɑcɑɑ, nyɑ́ kʋlɑpəm hɛɛsəɣɩ mɑ lɑŋlɛ kɛ́,
nɑ mɑ́ yooki nyɑ́ niŋ təmɑ tɔm kɛ yontu nɑ lɑŋhʋlʋmlɛ.
6 Hɑɩ, Tɑcɑɑ, nyɑ́ təmɑ kɛ́ sɔsɔɔnɑ kɛ́,
nɑ nyɑ́ ləmɑɣɑsɛɛ kɛ́ yuŋ nyənɑ.
7 Kʋmɛlɛŋ ɩɩ cɛkəɣənɑ təlɛ,
pəyele ləmɑɣɑsɛɛ fɛɩ tʋ nɑɑ pɑɑsəɣənɑ.
8 Asɑɣɑɑ hukiɣi kɛ́ ɩsɩɩ nyɩɩtʋ,
nɑ ɩsɑɣɑtʋ lɑtɑɑ nɑ́ɑ́ pɩɩkɩ.
Amɑ wɑkəlʋɣʋ tɑm tɔɔ nyəŋkʋ tɑŋnɑ-wɛ.
9 Hɑɩ, Tɑcɑɑ, nyɑ́ kɛ́ ɩsɔtɑɑ
Ɩsɔ sɔsɔ kɛ tɑm tɔɔ kɛ́.
10 Ye pə kɑɑsɑ nyɑ́ kolontunɑɑ, pɛlɛ pɑɑ le kɛ́.
Pɑ tənɑ mpɑ pɑ lɑkɩ ɩsɑɣɑtʋ tɔ pɑɑ yɑ yem.
11 Tɑɑlɛ nɑʋ tomɑ kɛ n hɑ-m,
nɑ ń pəlɩ mɑ tɔɔ kɛ́ nikɑɣɑ nim.
12 Mɑ nɑɑkɩ mɑ kolontunɑɑ kpisuɣu,
nɑ mɑ́ nɩɩkɩ ɑsɑɣɑɑ mpɑ pɑ cɑɑkɩ-m
tɔm tɔ pɑ kiisuɣu.
13 Tɑmpɑnɑ təŋlɑɑ pɩɩkɩ kɛ́ ɩsɩɩ pɑɑŋ,
nɑ pɑ́ kʋləɣɩ ɩsɩɩ Lipɑŋ tɩɩŋ sɔsɔɔŋ.
14 Pɑ wɛ kɛ́ ɩsɩɩ tʋɣʋ ŋku pɑ tuu
Ɩsɔ təsɛɛlɛ kɑtɑɣɑ tɑɑ tɔ,
nɑ pɑ́ pɩɩkɩ teu kɛ tɑ́ Ɩsɔ Tɑcɑɑ tɛ́.
15 Pɑɑ kpɑtəlɑɣɑ wɑɑtʋ,
pɑ tɔŋɑ lʋlʋɣʋ kɛ́,
nɑ pɑ́ wɛ təlɛkʋlɛkʋ kɛ teu nɑ ɑlɑɑfəyɑ.
16 Mpʋ pə hʋlə́ɣə́nɑ́ təkelekele sɩ Tɑcɑɑ siɣisɑɑ.
Ɩ tɑ kɛɛ tiili, ɩnəɣəlɛ mɑ kʋkpɑmʋɣʋ.