99
Tɑcɑɑ kɛ wulɑʋ, nɑ ɩ́ wɛ tənɑŋŋ
1 Tɑcɑɑ n tɔkɩ kɑwulɑɣɑ kɛ́, nɑ yəlɑɑ seliɣi.
N cɑɣɑ ɩsɔtɑɑ tɑŋlɑɑ hɛkʋ nɑ tɛtʋ seliɣi.
2 Tɑcɑɑ nyɑɣɑlɛ sɔsɔ kɛ Siyɔŋ tɑɑ,
Nyɑ́ tɛɛnɑ yəlɑɑ tənɑ.
3 Pɑ sɛɛ nyɑ́ hətɛ sɔsɔɔlɛ kɑtɛ nyəntɛ,
tə kɛ́ nɑŋŋ nyəntɛ kɛ́.
4 Pɑ sɛɛ wulɑʋ nyɑ́ wei n sɔɔlɑ siɣisuɣu tɔ nyɑ́ toŋ,
nyɑ́ nyɔɔsəɣənɑ tɑmpɑnɑ təŋʋɣʋ.
N lɑkɩ kʋsiɣisim nɑ mpi pə
wɛ teitei tɔɣɔ Ɩsɛɣɛlɩ tɑɑ.
5 Ɩ́ pʋɣʋlɩ Tɑcɑɑ tɑ Ɩsɔ,
nɑ ɩ́ luŋ ɩ nɔɔhɛɛ təsɩɩlɛ,
ɩ kɛ́ nɑŋŋ tʋ kɛ́.
6 Moisi nɑ Alɔŋ mpɑ pɑɑ wɛ Ɩsɔ nyɑ́ nyɑ́ kɔtəlɑɑ tɑɑ tɔ
nɑ Sɑmiyɛlɩ wei ɩ kɑ wɛ mpɑ
pɑ sələmɑɣɑ-ŋ tɔ pɑ hɛkʋ tɔ,
pɑ sələmɑ Tɑcɑɑ nyɑ́ nɑ ń mʋ.
7 Ɩsɔŋmʋntʋɣʋ tɑɑ kɛ́ n yɔɣɔtɑɣɑnɑ-wɛ
nɑ mpɛ pɑ́ tɔkəɣɩ nyɑ́ kʋsəsɩɩtʋ nɑ kiiu ŋku n sɩɩ-wɛ tɔ.
8 Tɑcɑɑ tɑ́ Ɩsɔ, n mʋ pɑ kʋsələmʋtʋ.
Nyɑɣɑlɛ pɑ Ɩsɔ, nɑ ń wiiki-wɛ.
Amɑ n tʋ-wɛɣɛ sɑləkɑ kɛ pɑ ɩsɑɣɑtʋ tɔɔ.
9 Ɩ sɑ Tɑcɑɑ tɑ Ɩsɔ nɑ ɩ́ luŋ
ɩ pulɑɣɑ nɑŋŋ nyəŋkɑ tɔɔ.
Mpi tɔ, tɑ́ Ɩsɔ Tɑcɑɑ wɛɛ kɛ́ tənɑŋŋ.