3
Kɑntǝkɑɣɑ kʋyɛɛŋ
1 Tɔɔsɩ teu sɩ pǝ tǝnɑ pɩɩ lɑ kɑtɛ kɛ sɔsɔm kɛ kʋyɛɛŋ kɑntǝkɑɣɑ nyǝŋ tɑɑ.
2 Pǝ tɑɣɑ pʋlʋ, yǝlɑɑ kɑ wɛɛ mpɑ pɑɑ kɑ nyɔɔŋ nɑ pɑ mɑɣɑmɑɣɑ pɑ leleŋ pɛɛkʋɣʋ tɔ, liɣitee ɩsǝlɛ tɑɑ kɛ́ pɑɑ nyǝnǝɣɩ. Pɑɑ hɔ pɑ tɩ, nɑ pɑɑ lɑ ɩsǝcɑʋ. Pɑɑ yɔɣɔtɩ Ɩsɔ tɔɔ kɛ́ ɩsɑɣɑtʋ, pɑ kɑɑ seeki pɑ cɑɑnɑɑ. Pɑɑ lɑ fɔɔfɛɩnɑɑ, pɑ kɑɑ seeki Ɩsɔ.
3 Pɑɑ lɑ tǝkɑtɩɩ, pɑ kɑɑ wɛɛnɑ lɛlɑɑ pǝtɔɔtǝlɛ. Pɑɑ lɑ nɔɔhɛɛ tɛɛ kuulɑɑ nɑ mpǝle tɛlǝsǝlɑɑ nɑ nyɑŋ nyǝ́mɑ. Pɑ kɑɑ sɔɔlɩ kʋpɑntʋ.
4 Pɑɑ lɑ kɔlɔmɔtɔ nyǝ́mɑ nɑ pɑ́ɑ́nɑ́ nyǝ́mɑ. Pɑɑ sɑŋ pɑ tɩ, nɑ pɑɑ yele Ɩsɔ nɑ pɑ́ pɑɑsǝnɑ mpi pǝ hɛɛsǝɣɩ pɑ lɑŋɑ tɔ tike.
5 Pɑɑ cɛsɩ ḿpʋ́ɣʋ́ ɩsɔ ɩsɔ kɛ́ sɩ pɑ tǝŋǝɣɩ Ɩsɔsɛɛlɛ mpɑɑʋ pǝyele pɑ kʋ pǝ tomɑ kɛ pɑ tɑɑ. Yele yǝlɑɑ ɩsɩɩ mpʋ pǝ tɑkɑnɑɑ.
6 Pɑ tɑɑ lɛlɑɑ cɛŋǝɣǝnɑ tɛɛsɩ tɑɑ nɑ pɑ́ puɣusiɣi ɑlɑɑ mpɑ pɩɩ kɑntǝlǝɣɩ nɑ pɑ́ teelɑ ɩsɑɣɑtʋ nɑ kʋnyɩɩlǝŋ ɩnɩ ɩ tǝnɑ ɩ kʋɣɩ-wɛ tɔ.
7 Pǝ ɑlɑɑ pɛɛkǝɣɩ tɑm kɛ́ sɩ pɑ́ sɛɣɛsǝɣɩ-wɛ, pǝ́cɔ́ pɑɑ pɑ sɛɣɛsɑ-wɛ, pɑɑ pǝsǝɣɩ nɑ pɑ́ cɛkǝnɑ tɑmpɑnɑ nɑɑlɩ.
8 Ɩsɩɩ Yɑnɛɛsɩ nɑ Yɑmpǝlɛɛ pɑɑ kpɛɛsǝnɑ Moisi tɔ, mpʋ tɔtɔɣɔ yǝlɑɑ pɑnɛ pɑ kpɛɛsǝɣǝnɑ tɑmpɑnɑ. Pɑ lǝmɑɣɑsɛɛ sǝpɑɣɑ pɑ Ɩsɔsɛɛlɛ tɑ tǝŋ.
9 Pɑ nyʋɣʋ kɑɑ tɑsɑ kʋlʋɣʋ, mpi tɔ pɩɩ kuli pɑ wɑɑlɩ kɛ́ nɑ yǝlɑɑ tǝnɑ cɛkǝnɑ sɩ pɑ kɛ́ kʋmɛlɛmǝŋ. Yɑnɛɛsɩ nɑ Yɑmpǝlɛɛ pɑ nyǝntʋ kɑ lɑpɑ ḿpʋ́ɣʋ́ teitei kɛ́.
Nti Timotee kɑ́ lɑkɩ tɔ
10 Ye nyɑ́ ɩlɛ n tǝŋɑ mɑ sɛɣɛsʋɣʋ tǝnɑ, nɑ mɑ yɑɑsinɑɑ, nɑ mpi pǝ lɑpʋ mɑɑ tʋ mɑ lotu tɑɑ tɔ, nɑ ɩsǝnɑ mɑ tɛmɑ mɑ tɑɑ nɑ Ɩsɔ tɔ, nɑ mɑ suulu, nɑ ɩsǝnɑ mɑ sɔɔlǝɣɩ lɛlɑɑ tɔ, nɑ mɑ ɩsǝlɛ sɛɛsʋɣʋ
11 kɛ mɑ kʋnyɔntɔɣɔlɛnɑɑ nɑ mɑ wɑhɑlɑnɑɑ tɑɑ. Pɔpɔtʋ fɛɩ leleŋ, mɑ pɑɑsɑɑ kɛ́ nɑ mɑ́ tɔɣɔ kʋnyɔmǝŋ kɛ Antiyɔkɑ nɑ Ɩkʋniyɔm nɑ Lisitǝlɑ, nɑ nyɑ́ mɑɣɑmɑɣɑ n nyǝmɑ́ mpʋ. Amɑ Tɑcɑɑ yɑpɑ-m pǝ tǝnɑ pǝ tɑɑ.
12 Aɑɩ ḿpʋ́ɣʋ́ pǝ tɩɩ wɛɛ, mpɑ pɑ sɔɔlɑɑ sɩ pɑ́ nɑ Yesu Kilisiti pɑ́ kpɛntɩ nɑ pɑ́ nɩɩnɑ Ɩsɔ kɛ́ pɑ tɔntɛ tǝnɑ tɑɑ tɔ ḿpʋ́ɣʋ́ pɑɑ tʋɣʋ-wɛɣɛ kʋnyɔŋ.
13 Amɑ pǝ kɑɑsɑ ɑsɑɣɑɑ nɑ puɣusilɑɑ tɔ pɛlɛ pɑ ɩsɑɣɑtʋ kɑɑ wɛɛ tǝnɑɣɑ. Pɑɑ puɣusiɣi lɛlɑɑ kɛ ḿpʋ́ɣʋ́ nɑ pɑ́ kpɛŋnɑ pɑ mɑɣɑmɑɣɑ tɔtɔ nɑ pɑ́ puɣusiɣi.
14 Amɑ nyɑ́ ɩlɛ, nyɑɑ tɔkɩ teu kɛ sɛɣɛsʋɣʋ ŋku pɑ sɛɣɛsɑ-ŋ nɑ ń mʋ-kʋ nɑ n tɛmɑ-kʋ nɑ nyɑ́ tɑɑ tɔ. Tɔɔsɩ mpɑ pɑɑ sɛɣɛsɑ-ŋ sɛɣɛsǝŋ ɩnɩ tɔ pɑ tɔɔ.
15 Nɑ ń tɔɔsɩ tɔtɔ sɩ hɑtuu nyɑ́ pǝcɑɑtʋ kɛ n nyǝmɑ́ Ɩsɔ Tɔm nɑŋŋ nyǝntʋ, nɑ ntɩ tǝ pǝsǝɣǝnɑ nɑ tǝ́ hɑ-ŋ lɑɣɑtʋ nti n kɑ́ lɑnɑ nɑ ń tɛ́ nyɑ́ tɑɑ nɑ Yesu Kilisiti nɑ pǝ yɑ nyɑ́ nyʋɣʋ tɔ.
16 Ɩsɔ yelinɑ nɑ pɑ́ ŋmɑɑ ɩ tɔm kɛ tɑkǝlɑsɩ tɑɑ. Nɑ tǝ wɑɑsǝɣɩ yǝlɑɑ, pǝ tɑɣɑ pʋlʋ, tǝ sɛɣɛsǝɣɩ-wɛ nɑ tǝ́ kisiɣinɑ-wɛɣɛ pɔpɔtʋ, nɑ tǝ́ tɑɣɑnǝɣɩ-wɛɣɛ timpi timpi pɑ pǝntǝɣɩ tɔ, nɑ tǝ́ hʋ́lǝ́ɣɩ́-wɛɣɛ ɩsǝnɑ pɑɑ tǝŋ tɑmpɑnɑ mɑmmɑm kɛ pɑ kʋlɑpʋtʋ tɑɑ tɔ.
17 Tǝ lɑkɩ ḿpʋ́ɣʋ́ sɩ tǝ tɑɣɑnǝɣɩ Ɩsɔ yǝlɑɑ nɑ pɑ́ te teu, nɑ pɑ́ tɑɑ lɑŋ mpi pɑɑ lɑnɑ pɑ tǝmɑ kʋpɑnɑ tɔ.