Bo̱r-u̱s o̱p u̱s-ta'yoor
A 'yonste̱ hun-ne̱ u̱r-hur o-Tasaronika
1 Burus ne̱ u̱n Siras ye̱ do̱ru̱ru̱ so̱ u̱n bo̱-to̱ o-Ampibo̱ris o-Apo̱ro̱niya ne̱. Ye̱ wo̱o̱ru̱ bo̱-o̱ o-Tasaronika, be-de ro u̱n kuke̱-o̱ u̱n yoos u̱n Ma-to̱ Shir ne̱ à o̱ u̱n Yahuda-ne̱.
2 Bo̱ wu̱ we̱te̱ à, Burus co̱wu̱ kuke̱-o̱ u̱n yoos u̱n Ma-to̱ Shir. Ho̱-to̱ u̱r-Wu̱we̱ u̱t-tet, wu̱ ro u̱t-ma n-me̱ u̱n ge̱n-mo̱ u̱n Ma-to̱ Shir.
3 Wu̱ ro ye̱ m-kute̱ cas, wu̱ ro ye̱ komo u̱n ru̱re̱ o-nip be-de Ma-to̱ Shir ze̱e̱ Kiristi a su̱ u̱r-ko̱o̱b, komo wu̱a ine̱ u̱t-marimar. Komo Burus ze̱e̱ru̱, “Ka Ye̱so-wu̱ u̱m ru̱ru̱ no̱ à, wu̱ ro̱ ka Kiristi-wu̱.”
4 Ye̱ ken hun-ne̱ ye̱ u̱n Yahuda-ne̱ komo u̱n Girik-ne̱ ne̱ “Yan-se̱ps u̱n Shir” mo̱sse̱ u̱n caari-ye̱ u̱n ne'a-ne̱ ne̱ u̱t-mo̱o̱r ne̱ de̱e̱n, kap ye̱ deku̱ ma-u̱t Burus ne̱ u̱n Siras, komo ye̱ mo̱ssu̱ru̱ u̱t-hi u̱n ye̱ ne̱.
5 Amba Yahuda-ne̱ no̱mu̱ u̱r-shoob, ye̱ karagsu̱ru̱ ye̱ ken hun-ne̱ ye̱ o-saa ye̱ be-de a u̱t-baab à m-o̱ ne̱. Bo̱ ye̱ kargu̱te̱ kap o̱ u̱n ye̱ à, ye̱ 'yonsu̱ru̱ hur-de u̱n hun-ne̱ ye̱ o-bo̱. Ye̱ ruuru̱ u̱s-rek n-me̱ u̱n hur-o Jaso̱n. Ye̱ ro u̱n hoob-o Burus ne̱ u̱n Siras remen ye̱ hantu̱tú̱ ye̱ be-de u̱n hun-ne̱.
6 Bo̱ ye̱ hyente̱ ye̱ 'wo̱s ye̱ á, ye̱ naknu̱ru̱ Jaso̱n u̱n ye̱ ken yan-dor-ye̱ ne̱, ye̱ wootu̱ru̱ ye̱ har u̱n he̱r-o̱ u̱n yan-piish u̱t-ma. Ye̱ o-zaaz, ye̱ m-ze̱e̱, “Ka hun-ne̱ ye̱, ye̱ ro̱ m-'yons u̱n hur-de u̱n hun-ne̱ ko̱ kene̱ ho̱no o-dak à, ye̱ ka haane̱ har kane̱.
7 Har ma Jaso̱n 'ye ye̱ be-de u̱r-she'et. Myet-mo̱ u̱n ye̱ ne̱ komo ye̱ ro̱ m-jetem u̱n karamsa-o ko-Gwo̱mo Sisar. Ye̱ ro̱ m-ze̱e̱ wu̱ ken ko-Gwo̱mo-wu̱ ro̱ ko̱n, u̱nze jin-de u̱n wu̱ Ye̱so.”
8 Bo̱ hun-ne̱ ya-o-bo̱ u̱n yan-piish u̱t-ma ne̱ ho̱gu̱te̱ to̱ ka à, hur-de u̱n ye̱ inu̱ru̱.
9 Ye̱ ho'os Jaso̱n u̱n ye̱ ka ne̱ á, se̱ da-o̱ ye̱ go̱kse̱ hwo̱r-ye̱ o-be̱ri u̱n kom-to̱ u̱n ye̱ à.
Burus ne̱ u̱n Siras o-Biriya
10 Bo̱ te̱t-m rewte̱ à, yan-dor shiiru̱ Burus ne̱ u̱n Siras ye̱ neke̱ bo̱-o̱ o-Biriya. Bo̱ ye̱ woote̱ re̱e̱no̱ à, ye̱ co̱wu̱ru̱ kuke̱-o̱ u̱n Yahuda-ne̱ o̱ u̱n yoos u̱n Ma-to̱ Shir.
11 To̱ ye̱ ka Yahuda-ne̱ ye̱, ye̱ aragte̱ ye̱ o-Tasaronika u̱s-we̱e̱r, u̱n remen ye̱ go̱kste̱ u̱t-ma kom-u̱t yoor-u̱t-yoor. Ye̱ ro̱ u̱n ceker-se u̱n ge̱n-mo̱ u̱n Ma-to̱ Shir ko̱ de ke ho̱-de, ye̱ hyenet ko̱ rii-yo Burus rwo̱re̱, ko̱ nip-o̱ à.
12 Remen kaane̱ hun-ne̱ de̱e̱n be-de u̱n Yahuda-ne̱ bo̱pu̱ru̱ o-nip, har u̱n ye̱ ken ne'a-ne̱ ye̱ ne̱ ye̱ u̱n Girik-ne̱ go̱s-ye̱, go̱s-ye̱ komo u̱n campo̱-ne̱ ne̱ ye̱ u̱n Girik-ne̱ de̱e̱n.
13 Amba bo̱ Yahuda-ne̱ ye̱ ro o-Tasaronika ho̱gu̱te̱ u̱nze Burus ro u̱n rwo̱r u̱n Ma-to̱ o-Shir o-Biriya à, ye̱ haaru̱ ma ye̱ swo̱wu̱ hun-ne̱ u̱n ye̱ re̱e̱no̱, ye̱ ro u̱n 'yons u̱n hur-de u̱n ye̱.
14 Da-o gaan, komo yan-dor rwo̱'u̱ru̱ Burus wu̱ neke̱ n-riib m-sa. Amba Siras ne̱ u̱n Timoti ye̱ e̱su̱ru̱ kane̱ to kon.
15 Ká yan-dor-ye̱ shie̱ Burus à, ye̱ wootu̱ wu̱ har o-Atina. Bo̱ ye̱ inite̱ m-mu̱u̱n à, Burus to̱mnu̱ ye̱ be-u̱r Siras ne̱ u̱n Timoti u̱nze ye̱ haan ye̱ hyen wu̱ ho̱r-m-ho̱r, ye̱ argu̱ m-neke̱.
Burus u̱n bo̱-o̱ o-Atina
16 Bo̱ Burus rotte̱ u̱n 'er-u̱r Siras ne̱ u̱n Timoti u̱n bo̱-o̱ o-Atina à, me̱n-to̱ u̱n wu̱ tu̱ku̱ru̱ de̱e̱n bo̱ wu̱ hyane̱ bo̱-o shiig u̱n pyo-se m-gir à.
17 Remen kaane̱ wu̱ ro u̱t-ma n-me̱ u̱n kuke̱-o̱ u̱n yoos u̱n Ma-to̱ Shir u̱n Yahuda-ne̱, u̱n ye̱ ken ye̱ ne̱ “Yan-se̱ps u̱n Shir.” Ko̱ de ke ho̱-de wu̱ ro u̱t-ma u̱n ye̱ wu̱ ro m-kum ne̱ be-de u̱t-baab à.
18 Kaane̱ komo ye̱ ken Abikuri-ne̱ ye̱ u̱n Sitokiya-ne̱ ya-u̱s-nap no̱mo̱g u̱t-ma u̱n wu̱ ne̱. Ye̱ ken ye̱ ze̱e̱ru̱, “¿Yan yo ne̱ ka wa-o-zaaz-wu̱ co̱ne̱ m-ze̱e̱?” Ye̱ ken ye̱ ze̱e̱ru̱, “Yo ro̱ sa o zee u̱nze ka ne̱t-wu̱ ro̱ u̱n ko̱'o̱t shir-ye̱ u̱n u̱n be-u̱t ho̱r-to̱.” Ye̱ u̱n rwo̱r kaane̱ remen Burus ro u̱n rwo̱r u̱n Ma-u̱t Ye̱so to̱ m-Re̱re̱m, komo m-ine̱ ne̱ be-de u̱t-marimar.
19 Remen kaane̱, ye̱ heetu̱ru̱ wu̱ u̱n dor-de o-Arepagus. Bu̱u̱g-de yan-co u̱n ka bo̱-o̱ ze̱e̱ru̱ wu̱, “¿Ko̱ wo̱a ru̱ru̱ te̱ ka yoos-u̱r pu̱-de de o wo̱tte̱?
20 Remen te̱ we̱t m-ho̱ge̱ u̱n go̱n to̱ ka ma-to̱ á. Te̱ co̱no̱g te̱ nep bo̱ to̱ ro̱ à.”
21 (Myet Atina-ne̱ u̱n hamat-ne̱ ne̱ ye̱ ro̱ u̱r-she'et o-Atina à, ye̱ jiishte̱ m-co̱n ye̱ ho̱ge̱ rii pu̱-yo komo ye̱ cep ma-to̱ u̱n yo, arge̱ ko̱yan.)
22 Burus inu̱ eso u̱n he̱r-o̱ u̱n mo̱ro̱g-de u̱n ya-u̱s-nap, wu̱ ze̱e̱ru̱, “No̱ hun-ne̱ ye̱ o-Atina, u̱m nak u̱nze no̱ yan-co̱n-to̱ u̱n dor-o̱ shir-ye̱ m-so̱k ne̱ u̱n ko̱ yo ke riib-yo.
23 Remen da-o̱ u̱m m-pa'e̱ n-me̱ o-bo̱ à, u̱m gwo̱t rem-se no̱ u̱n nome̱ m-gu̱w à, har ma u̱m hyanag u̱n o̱ ken hana-o̱ o̱ u̱r-seke̱ m-ge̱n ne̱ n-to̱n u̱n o̱ a ge̱ne̱g u̱nze, ‘Remen Shir ye̱ a nape̱ á.’ To̱, ka wu̱ no̱ m-kwu̱kte̱ ba no̱ u̱n nap wu̱ à, ma-to̱ u̱n wu̱ me̱ no̱ m-rwu̱u̱nte̱ cas.
24 “Shir ye̱ no̱me̱ ho̱no o-dak u̱n kap o̱ u̱n rii-yo ro̱ ne̱ n-me̱ u̱n o̱ à, wu̱ wu̱ ro̱ Wan-Ko̱yan wu̱ o-To̱n o-dak ne̱. Wu̱ ro̱ m-she'et u̱n pyo-o̱ ne̱t ma'e̱ á.
25 Kaane̱ komo wu̱ ro̱ u̱n hoob-o̱ u̱n gwu̱ be-de u̱n ne̱t á. Wu̱ ro̱ u̱n hoob-o̱ u̱n yo ken rii-yo á, remen wu̱ ro̱ u̱n 'ya u̱n kap o̱ u̱n hun-ne̱ ho̱o̱g, m-shik ne̱ u̱n kap o̱ u̱n rii-yo ye̱ ro̱ ne̱ o-hoob à.
26 Wu̱ wu̱ komo nome̱ kap o̱ u̱t-dak be-de u̱n ne̱t wan-gaan, remen ye̱ she'etté̱ u̱n kap o̱ u̱n hek-o̱ u̱n ho̱no o-dak. Cin u̱n n-ga ne̱ wu̱ e̱ssu̱su̱te̱ o-da, u̱n da-o̱ ye̱ he m-no̱m m-ho̱o̱g m-mar ne̱ à, u̱n bo̱ u̱n be-to̱ hun-ne̱ ye̱ u̱n ko̱ o̱ ke dak-o̱ hette̱ m-she'et ne̱ à.
27 Shir u̱n no̱m kaane̱ remen ye̱ hobt wu̱, ko̱ a nap á. O-da ye̱ kum wu̱, ko̱ de̱ nomte̱ wu̱ no̱m u̱r-hew u̱n ko̱ wu̱ ke ne̱ be u̱n na á.
28 Ai, ‘Be-de u̱n wu̱ a ro̱ no̱ u̱n no̱m m-ho̱o̱g, atte̱ m-nukte̱, atte̱ komo u̱n m-neke̱ u̱n no̱m u̱n rii-yo a m-no̱m ne̱,’ bo̱ ye̱ ken yan-se̱p-u̱t no̱ ye̱ rwo̱re̱ à u̱nze, ‘O-nip, na ma yakar-ye̱ u̱n wu̱ ye̱.’
29 “To̱, bo̱ a ro̱ no̱ baag-o̱ Shir o̱ à, ai, u̱depe̱ a no̱m u̱s-barag a zee Shir ro̱ m-sha ne̱ u̱ntu̱n mo̱ o-zinariya, ko̱ mo̱ o-azorpa, ko̱ mo̱ u̱r-ta'ar á, de ne̱t zwo̱'e̱ u̱n we̱e̱r-se u̱n hi u̱n de u̱n wu̱ á.
30 N-ga Shir ro m-was u̱n ba'as-to̱ u̱n hun-ne̱ ne̱ á, remen ko̱o̱b-de u̱n nap-o̱ u̱n ye̱. Amba m-mo̱ka, wu̱ ze̱e̱g kap o̱ u̱n hun-ne̱ ye̱ u̱n ko̱ kene̱ ye̱ yage̱ ba'as-to̱ u̱n ye̱, ye̱ waktu̱ne̱ be-de Shir.
31 Remen wu̱ e̱ssu̱ssu̱te̱ u̱r-ho̱ de wu̱ he m-haan wu̱ piishité̱ hun-ne̱ ho̱no o-dak u̱t-ma to̱ o-nip be-de u̱n wu̱ ken wu̱, wu̱ wu̱ daage̱ à. Shir rwu̱ntu̱te̱ nip-o̱ u̱n no̱m-mo̱ u̱n to̱ ka cas be-de u̱n 'yons u̱n ka ne̱t-wu̱ u̱t-marimar.”
32 Bo̱ ye̱ ho̱gu̱te̱ ma-to̱ m-ine̱ u̱t-marimar à, ye̱ ken ye̱ argu̱ wu̱ nome̱ u̱r-ar. Amba ye̱ ken ye̱ ze̱e̱ru̱, “Te̱ co̱no̱g te̱ do m-ho̱ge̱ rii-yo o he m-rwo̱r mo̱sse̱ u̱n ka ma-to̱ ne̱ à.”
33 Kane̱ o̱ ka Burus wonge̱ u̱n ye̱ ne̱.
34 Amba ye̱ ken ye̱ wargu̱ru̱ be-u̱r Burus ye̱ she̱ru̱ u̱n ma-to̱ u̱n wu̱, n-me̱ u̱n ye̱ har u̱n Diyonisiyus ne̱, wan-gaan be-de u̱n ka mo̱ro̱g-de u̱n ya-u̱s-nap de, u̱n wu̱ ken ne'a-wu̱ ne̱ jin-de u̱n wu̱ Damaris, u̱n ye̱ ken ye̱ ne̱ komo.