Bo̱r-u̱s nass
Yan-se̱nge̱-m Kiristi
1 Hun-ne̱ dek, Apo̱ro̱s u̱n me̱ ne̱ yan-gu̱w-m Kiristi te̱ ro̱. Shir ya'astu̱ te̱ se̱nge̱-mo̱ u̱n rwo̱r u̱n ma-to̱ u̱n wu̱, to̱ o-nip to̱ ro̱ wukusse̱ à.
2 Rii gaan-yo a co̱ne̱ be-de u̱n go̱ u̱n ka gu̱w-ne̱ ye̱, ye̱ nom yo wan-co-o̱ ye̱ co̱ne̱ à, hur-u̱r gaan.
3 Yatt-yo da me̱ ko̱ no̱, ko̱ yan-piish u̱t-ma be u̱n no̱, ze̱e̱g u̱nze u̱m no̱mo̱g se̱nge̱-m re me̱ u̱n Shir ne̱, ko̱ me̱ no̱m á. Nip-o̱, me̱ u̱n piishe̱ u̱n hi u̱n de u̱t-ma mo̱sse̱ u̱n kaane̱ ne̱ á.
4 Me̱ nap ko̱ me̱ u̱n de ken ba'as-de ne̱ á, myet u̱n kaane̱ ne̱, man zee u̱m taagu̱te̱ u̱r-ba'as ko̱ hiin á. Wan-Ko̱yan wu̱ he gwo̱t u̱n se̱nge̱-m re à wu̱ he m-ze̱e̱ u̱m no̱mo̱g u̱r-bon ne̱ ko̱ ba u̱r-bon.
5 Remen kaane̱, taase no̱ kupse̱ wu̱ ken wu̱ u̱t-ma ba da-o̱ u̱n wo̱o̱. Ka da-o̱ ro̱o̱n, da-o̱ Wan-Ko̱yan he mu̱u̱n à. Wu̱ he rwu̱u̱nte̱ u̱n rem-se ro̱ wukusse̱ o-comb à, komo wu̱ rwu̱nte̱ sakto̱-o̱ ro̱ u̱n hur-de u̱n ne̱t à. Ka da-o̱ o̱ ka ko̱wan he go̱ks u̱r-bo̱ngo̱n be-de Shir hond hond Shir nepste̱ ka rii-yo ro̱ n-me̱ hur-de u̱n ne̱t à.
6 To̱, o̱r re ne̱, be-de u̱n ru̱re̱ u̱n no̱ ka rem-se u̱n ya-u̱r-yoos se, u̱m rwo̱'o̱g no̱ u̱s-barag n-me̱ u̱n Apo̱ro̱s ne̱ remen ka sha-mo̱ guut no̱ u̱n ka bu̱-yo. No̱ yoos be-de u̱n ka yoor-m te̱ mo̱ u̱m co̱no̱g no̱ nep yo ka: “Taase no̱ pes rii-yo a ge̱ne̱ à u̱n taku̱rda-o̱ Shir.” Taase wu̱ ken wu̱ nom m-gwo̱n remen wu̱ ro̱ wu̱ m-yoose̱ à, har wu̱ yo'og wu̱ ken wu̱.
7 ¿Wan wu̱ ze̱e̱ o aragte̱ ye̱ ken ye̱? ¿Yan yo ne̱ o ro̱tte̱ yo u̱n hi u̱n du hu̱sse̱ rii-yo Shir ya'u̱ wo̱ à? To̱, u̱rege̱ har kaa o̱, ¿ya hante̱ o ro̱tte̱ u̱n jaks u̱r-hi sa o zee ba yar-mo̱ a ya'u̱ wo̱ á?
8 No̱ m-no̱m sa o zee no̱ nepse̱ kap. Yatt-wu̱ he no̱ m-yoose̱ á. No̱ m-no̱m sa o zee no̱ kumuste̱ yar-mo̱ o-Ku̱kt. No̱ u̱r-she'et sa o zee gwo̱mo-ne̱ no̱ ro̱ u̱n Kiristi ne̱ amba te̱ ye̱ ro̱ no̱ m-yoose̱ à te̱ u̱r-she'et kaane̱ á. A ro ze̱e̱ge̱ ma no̱ gwo̱mo-ne̱ ye̱, te̱ argu̱ no̱m u̱t-gwo̱mo be-u̱r gaan u̱n no̱ ne̱!
9 Remen u̱n hyan-o re, Shir rwu̱ntu̱te̱ na yan-To̱m Ye̱so cas. Te̱ ro̱ ko̱m-de u̱n ko̱yan, u̱ntu̱n ye̱ a kupse̱ ma-to̱ m-mar à. Remen te̱ waragte̱ rii-yo ho̱no o-dak kap, u̱n yan-to̱m ye̱ Shir ne̱, u̱n hun-ne̱ ne̱ he she̱re̱ u̱n yish à.
10 Hun-ne̱ ye̱ u̱n ho̱no o-dak ro̱ m-hyan sa o zee te̱tt u̱s-we̱e̱r á remen te̱ ro̱ m-nome̱ u̱n Kiristi m-gu̱w. Amba no̱, no̱ m-gwo̱n sa o zee no̱ u̱s-we̱e̱r ne̱ n-me̱ u̱n Kiristi! Hun-ne̱ ye̱ u̱n ho̱no o-dak ro̱ te̱ m-hyan te̱tt be̱e̱b-de m-no̱m u̱n rii á. Amba no̱, no̱ u̱r-be̱e̱b ne̱ de m-no̱m u̱n rii. Hun-ne̱ ye̱ u̱n ho̱no o-dak ro̱ no̱ u̱n 'ya m-se̱k, amba te̱ ne̱ ye̱ ro̱ te̱ m-yo'og!
11 M-mo̱ka kaane̱ te̱ u̱n ho̱ge̱ u̱n me̱r u̱n swo̱o̱t-o̱ m-ho̱ ne̱, te̱ u̱n co̱p u̱n kashi u̱t-saw á, a te̱ m-dum te̱tt o-hur á.
12 Se̱ te̱ rangu̱te̱ te̱ kumut rii-yo u̱n hi u̱n te̱. Ye̱ pyepe te̱, te̱ ru̱'u̱ru̱ ye̱ nu-o so̱-o̱, a ye'e̱ te̱ u̱r-ko̱o̱b te̱ m-'mo̱ u̱r-hur.
13 Hun-ne̱ re ra-o te̱, te̱ nomo ye̱ u̱t-ma u̱n hur-de m-gwu̱gwu̱. Te̱ waragte̱ sa o zee buse̱-o̱ u̱n ho̱no o-dak, rii-yo ko̱wan ro̱ m-'yar à, ka ro̱ ho̱-u̱r bi.
14 Me̱ u̱n gene̱ no̱ to̱ ka yanze remen u̱m ru̱'u̱t no̱ ho̱ge̱ m-'e̱ á, se̱ de̱ remen u̱m kye̱we̱stú̱ no̱ remen no̱ yakar re ye̱, ye̱ me̱ m-co̱n komo à.
15 Man rees no̱ m-de̱k u̱ntu̱n yakar re. Ko̱ no̱ nom u̱n ya-u̱r-yoos ne̱ n-me̱ u̱n Wan-Ko̱yan har ye̱ wo̱o̱ dugu-u̱s o̱p [10,000] à, wan-gaan wu̱ cot he m-no̱m u̱ntu̱ o-tato. O̱ shir n-me̱ Ye̱so Kiristi me̱ ro̱ tato no̱ be-de u̱n hante̱ u̱n Ma-to̱ m-Re̱re̱m.
16 Remen kaane̱ me̱ u̱s-ko̱n no̱m no̱ bo̱ u̱m no̱me̱ à.
17 Remen u̱m guut no̱ m-no̱m kaane̱ o̱ rwo̱'e̱ u̱m to̱mbu̱te̱ Timoti wà re wu̱ me̱ m-co̱n à. Ko-yan-e̱ss u̱t-ma wu̱ u̱n Wan-Ko̱yan. Komo wu̱a baksu̱ no̱ bo̱ me̱ u̱n dor Ye̱so Kiristi à bo̱ me̱ u̱r-yoos n-me̱ u̱n ko̱ ye̱ ke hun-ne̱ ye̱ yan-dor à.
18 Amba ye̱ ken ye̱ hyanag sa o zee man habe̱ be u̱n no̱ u̱m te̱pe̱rtu̱ ye̱ u̱n rem-se ye̱ á, har ye̱ u̱n wo̱s u̱r-be̱ u̱s-se̱s sa o zee ye̱ nepse̱ ko̱yan.
19 Amba u̱m rwo̱be̱ o-Korinti u̱n be̱e̱b-de u̱n Wan-Ko̱yan u̱n ka ho̱-to̱ be u̱n no̱. Da-o̱ me̱ habe̱ man hyen u̱n hi u̱n de yo ka ya-u̱s-se̱s ye̱ ro̱ m-no̱m à. Man nep komo u̱rege̱ ye̱ kumug u̱r-be̱e̱b be-de Shir, ko̱ ne̱ ma-to̱ o-hwaa ye̱ ro̱ m-no̱m.
20 Baks no̱ u̱nze Shir ro̱ m-piishe̱ hun-ne̱ u̱t-ma u̱n bo̱ ye̱ yage̱ wu̱ no̱mte̱ u̱t-gwo̱mo u̱n hur-de u̱n ye̱ á, ba n-me̱ raks u̱n bo̱ ye̱ ro̱ te̱p á, amba n-me̱ m-gwo̱t ko̱ be̱e̱b-de u̱n wu̱ ro̱ n-me̱ hur-to̱ ye̱ à.
21 To̱, ¿ya no̱ hu̱sse̱ u̱m nomo no̱ da-o̱ me̱ wo̱be̱, u̱m negbe̱ o-so̱ro̱g ne̱ ko̱ de̱ u̱m kutu no̱ u̱t-co̱n u̱n gwu̱gwe̱r-mo̱ u̱r-hi ne̱?