Taku̱rda-o Burus ayoore̱-o̱ o̱ wu̱ gene̱ yan-dor Ye̱so n-me̱ bo̱-o̱
o-Korinti
Rem-se ro̱ n-me̱ à:
M-zante̱ 1:1-11
Burus u̱n yan-dor Ye̱so ne̱ n-me̱ o-Korinti 1:12—7:16
Go̱ks m-yar remen yan-dor Ye̱so n-me̱ o-Judiya 8:1—9:15
Burus no̱mo̱g u̱t-ma mo̱sse̱ u̱n con-de u̱n wu̱ ne̱ de ko-yan-To̱m Ye̱so 10:1—13:10
U̱r-ko̱m 13:11-13
Bo̱r-o gaan
U̱r-Gas
1 Be u̱n de, Burus, mo̱sse̱ u̱n Timoti o̱r na ne̱, ge̱nbe̱ ka taku̱rda-o̱. Shir muute̱ me̱ wan-To̱m Ye̱soKiristi remen wu̱ co̱no̱g kaane̱.
Ha-mo̱ u̱n be-de u̱n yan-dor o̱ Shir ye̱ ro̱ n-me̱ bo̱-o̱ o-Korinti mo̱sse̱ kap u̱n ye̱ ro̱ n-me̱ u̱n dak-o̱ o-Akaya ne̱ à.
2 Me̱ u̱s-ko̱n Shir Tato na u̱n Wan-Ko̱yan ne̱ Ye̱so Kiristi, wu̱ 'ye no̱ m-yar u̱n gwu̱gwu̱-mo̱ u̱r-hur ne̱.
Burus bo̱mo̱g Shir
3 A ya'as u̱r-bo̱ngo̱n be-de Shir Tato-o Wan-Ko̱yan na Ye̱so Kiristi. Wu̱ ro̱ Tato-o̱ u̱r-'wo̱n u̱n Shir o̱ u̱n gwu̱'u̱rse̱ u̱r-hur ne̱ kap à.
4 Wu̱ ro̱ na gwu̱'u̱rse̱ u̱r-hur be-de u̱n swo̱ u̱n ko̱o̱b-u̱r na kap, remen a hoksté̱ gwu̱'u̱rse̱ u̱n hur-u̱t o̱r na be-de u̱n ko̱o̱b-de ye̱ ro̱ m-swo̱ à, u̱n ka gwu̱'u̱rse̱ u̱r-hur o̱ Shir ya'u̱ na ne̱ à.
5 U̱ntu̱n bo̱ a u̱n swo̱ u̱r-ko̱o̱b bo̱ Kiristi swo̱ à, kaane̱ komo, remen a ro̱ ye̱ ma Kiristi, Shir ro̱ na gwu̱'u̱rse̱ u̱r-hur u̱n bu̱-o Kiristi.
6 Ko̱ m-mo̱ka te̱ m-swo̱ u̱r-ko̱o̱b rem no̱, te̱ gwu̱'u̱rsu̱tú̱ no̱ u̱r-hur, komo no̱ se̱nge̱té̱ m-she̱r u̱n ka Shir-o̱ gu no̱ à. U̱rege̱ ne̱ gwu̱'u̱re̱-mo̱ u̱n hur u̱n te̱ do̱o̱g, no̱ ma gwu̱'u̱re̱-mo̱ u̱n hur-u̱r no̱ a doo bo̱ no̱ he kum m-'wo̱ns mo̱ m-du̱ngu̱ne̱ u̱n ka swo̱ u̱r-ko̱o̱b de no̱ m-swo̱ bo̱ te̱ swo̱ à.
7 Komo dish-o te̱ ro̱ gu̱ng be-u̱r no̱. No̱ swo̱o̱g u̱r-ko̱o̱b de̱e̱n bo̱ te̱ swo̱ à, te̱ nak komo u̱nze Shir a gwu̱'u̱rsu̱ no̱ u̱r-hur bo̱ wu̱a gwu̱'u̱rsu̱ te̱ à.
8 O̱r te̱ ne̱, te̱ co̱no̱g no̱ nep go̱n ko̱o̱b-de te̱ swo̱ u̱n dak-o̱ o-Asiya à. Ka swo̱ u̱r-ko̱o̱b de no̱mo̱g de̱e̱n har te̱ hyen sa o zee te̱a nom ho̱o̱g á.
9 Te̱ u̱n ho̱o̱g ne̱, amba sa o zee a u̱n piishe̱ te̱ u̱t-ma to̱ wo̱o̱se̱ m-mar à. Amba yo ka u̱n ko̱r remen taase te̱ tor u̱n be̱e̱b-de u̱n hi u̱n te̱, se̱ de̱ te̱ tor be-de Shir, wu̱ ro̱ m-'yons u̱n margan-ne̱ à.
10 Shir ruutu̱ te̱ u̱n ka mar-m yo̱-mo̱ mo̱, te̱ nak wu̱a do̱ te̱ m-ruut komo ne̱. Be-de u̱n wu̱ o̱ te̱ ya'ase̱ u̱r-be̱e̱b remen wu̱a gu te̱.
11 Te̱ co̱no̱g no̱ se̱ngu̱ te̱ m-gu u̱n bu̱-yo ko̱n-se Shir. No̱m no̱ kaane̱ remen hun-ne̱ de̱e̱n bu̱mu̱t Shir, remen wu̱ shaks ka ko̱n-se rem te̱.
Burus ja'aste̱ zo̱nge̱-to̱
u̱n wu̱ to̱ u̱r-hew
12 Rii-yo ro̱ te̱ m-rwo̱ m-gwo̱n à: Yo ro̱ hur u̱n te̱ kaps te̱ á, de ro̱ te̱ m-ru̱re̱ u̱nze te̱ she'ette̱ she'et-de u̱n ba m-ku̱ko̱p n-me̱ u̱n ho̱no o-dak u̱n hur-u̱r gaan ne̱ to̱ rwu̱u̱ne̱ be-de Shir à. Yagu̱nte̱ ma she'et-de te̱ she'ette̱ u̱n no̱ ne̱ á. Man zee te̱ no̱mo̱g kaane̱ n-me̱ u̱n o̱ Shir. Te̱ u̱n nom kaane̱ n-me̱ kwu̱m-o̱ Shir, ba be-de u̱n we̱e̱r-se u̱n ho̱no o-dak á.
13-14 Te̱ ge̱nu̱ no̱ rii-yo no̱a hoks m-karante̱ no̱ nep á. Komo u̱m rwo̱'o̱g u̱r-hur kane̱ o-co no̱a nep te̱ bo̱ depe̱ à, ko̱ no̱ nap te̱ m-mo̱ka á. Ka da-de, da-de ho̱-de Wan-Ko̱yan Ye̱so he m-mu̱u̱n à, no̱a nom m-gwo̱n u̱n te̱ ne̱, bo̱ te̱ m-nom m-gwo̱n u̱n no̱ ne̱ à.
15 U̱m nak u̱n kaane̱ ne̱, o̱ rwo̱'e̱ u̱m cu̱nte̱ m-habe̱ be u̱n no̱ u̱r-takan, remen no̱ kumut o-kwu̱m o-yoor.
16 U̱m zo̱ngu̱te̱ u̱m do̱nte̱ raag-o no̱ me̱ ro̱ m-ha dak-o̱ o-Makidoniya u̱m do̱nd komo da-o̱ me̱ mu̱u̱ne̱, remen u̱m kumut gwu̱ no̱. Ka da-de no̱a hoks me̱ m-to̱m ha-mo̱ u̱n dak-o̱ o-Judiya.
17 No̱ m-hyan no̱ zee ¿me̱ u̱n no̱m to̱ ka zo̱nge̱-to̱ ba m-nap u̱n yo me̱ m-nom? ¿Ko̱ ne̱ no̱ m-hyan me̱ u̱n no̱m ka zo̱nge̱-to̱ n-me̱ u̱n barag-se ma-hun ne̱, remen da-o̱ me̱ zee “E̱e̱,” u̱m warag m-ze̱e̱ “Ay”?
18 Bo̱ Shir ro̱ wan-e̱ss u̱t-ma à, kaane̱ komo ma-to̱ te̱ nomu̱ no̱ à, ba to̱ u̱n “E̱e̱, te̱a no̱m yo ka” amba ne̱, “Ay” o̱ te̱ u̱t-ma á.
19 Remen Wà-wu̱ Shir Ye̱so Kiristi, wu̱, me̱ u̱n Siras ne̱ u̱n Timoti ne̱ ru̱ru̱ no̱ ma-to̱ u̱n wu̱ à, ba ne̱t-wu̱ u̱n “E̱e̱” wu̱ da-o̱ wu̱ ro̱ ma-to̱ u̱n “Ay” á. Amba n-me̱ u̱n wu̱ “E̱e̱” o̱ ho̱-u̱r bi.
20 Remen n-me̱ u̱n wu̱ o̱ Shir shooste̱ kap ma-to̱ wu̱ su̱rte̱ o-nu à, n-me̱ u̱n Ye̱so Kiristi atte̱ m-ze̱e̱, “E̱e̱” Kaane̱ komo u̱n co̱w-yo u̱n wu̱ atte̱ m-ze̱e̱, “Amin” remen se̱ps-mo̱ Shir.
21 Shir o̱ u̱n hi u̱n de u̱n o̱ no̱mu̱ te̱ u̱n no̱ ne̱ ragaan, she̱r no̱ gu̱ng be-u̱r Kiristi, wu̱ wu̱ daage̱ na komo.
22 Wu̱ ru̱'u̱ru̱ na napa-o̱ u̱n wu̱ u̱nze na ye̱ ma u̱n wu̱ ye̱. Wu̱ ya'u̱ru̱ na Ku̱kt-o̱ u̱n wu̱. Komo Ku̱kt-o̱ u̱n wu̱ ro̱ na m-e̱se̱ n-me̱ u̱n hur-u̱r na remen mo̱ kututé̱ na u̱nze wu̱a 'ye na rii-yo wu̱ swo̱re̱ o-nu à.
23 M-mo̱ka, yage̱ u̱m ru̱ru̱te̱ no̱ yo hante̱ u̱m waksu̱te̱ hur u̱n de u̱m yagu̱te̱ m-do̱rbe̱ raag-o no̱ á. Yo ro̱, me̱ do̱rbe̱ raag-o no̱ u̱n bo̱-o̱ o-Korinti, remen u̱ntaase u̱m te̱pru̱ no̱ mo̱sse̱ u̱n ba'as-de no̱ no̱me̱ ne̱ à. Shir u̱n hi u̱n de u̱n o̱ nak u̱nze ba bo̱-to̱ u̱m me̱tte̱ á.
24 Yanze te̱ u̱n co̱n te̱ garamse̱ no̱ bo̱ no̱ she'ete̱ u̱n bu̱-yo she̱r-m no̱ á. Amba te̱ co̱no̱g te̱ se̱nge̱ kang-o gaan u̱n no̱ ne̱, remen no̱ nomot o-zak. Te̱ co̱n no̱ m-gakte̱ á, amba te̱ co̱no̱g m-hyan she̱r-m no̱ kum m-'wo̱ns de̱e̱n.