Bo̱r-u̱s yoor
Burus baksu̱te̱ ya-o-Tasaronika
mo̱sse̱ u̱n hamat-de u̱n wu̱ ne̱ be-to̱ u̱n ye̱
1 O̱r te̱ ne̱, no̱ nak u̱nze habe̱-m te̱ be u̱n no̱, mo̱ ja hwaa á.
2 Ko̱ de̱ no̱mte̱ te̱ su̱u̱ste̱ u̱r-ko̱o̱b o-yo'og ne̱ n-me̱ u̱n bo̱-o̱ o-Piripi, bo̱ no̱ nape̱ à. Amba u̱n gwu̱-o̱ u̱n Shir na, te̱ kumug no̱ ru̱re̱ u̱n Ma-to̱ m-Re̱re̱m, ko̱ de̱ nomte̱ to̱ swo̱o̱g m-shakt à.
3 Da-o̱ te̱ ko̱nu̱ no̱ m-go̱ks u̱n ka Ma-to̱ m-Re̱re̱m to̱ à, te̱ ru̱re̱ no̱ u̱t-bo̱ á, ko̱ a zee te̱ u̱n co̱n m-kum saw-u̱t no̱ á, ko̱ te̱ co̱n no̱ m-raks á.
4 Te̱ ro m-yoose̱ u̱n hun-ne̱, yo ye̱ co̱ne̱ m-ho̱ge̱ à ba yo te̱ m-rwo̱r temb á. U̱n hek-o̱ u̱n kááne̱, te̱ m-rwo̱r u̱n yo Shir ze̱e̱ te̱ ru̱ru̱ ye̱ à, remen wu̱ ro̱ u̱n m-byarag u̱n ko̱ yo ke rii-yo n-me̱ u̱n barag-u̱s na wu̱ nep yo a co̱ne̱ à.
5 Bo̱ no̱ nape̱ à, ma-u̱t te̱ ba to̱ u̱n re̱re̱m-mo̱ nu to̱ á, komo ba te̱ u̱n yo ken co̱w-yo u̱r-go̱p yo ne̱ wuke̱ á. Shir wu̱ ro̱ te̱ m-su̱'e̱.
6 Ba te̱ u̱n hoob-o̱ u̱r-bo̱ngo̱n be-de u̱n hun-ne̱, ko̱ be u̱n no̱, ko̱ ye̱ ken ye̱ u̱n ho̱n á.
7 Bo̱ te̱ ro̱ yan-To̱m Kiristi à, te̱ roa warag saw-to̱ u̱s-nu̱ be u̱n no̱. Amba te̱ kutute̱ hun-ne̱ gwu̱gwe̱r-mo̱ u̱r-hi n-me̱ u̱n no̱, u̱ntu̱n bo̱ inu-o ro̱ u̱n gwo̱t u̱n yakar-ye̱ u̱n wu̱ à.
8 Remen te̱ waste̱ u̱n no̱ ne̱ de̱e̱n, o̱ rwo̱'e̱ te̱ ko̱tu̱tu̱ no̱ ko̱'o̱t-o̱ u̱n Ma-to̱ m-Re̱re̱m to̱ Shir u̱n ho̱n-de u̱n to̱ á, amba te̱ ho̱gu̱te̱ m-re̱re̱m mo̱ u̱n ya'as u̱n ho̱o̱g-m te̱ rem no̱, remen no̱ co̱wo̱g te̱ u̱r-hur de̱e̱n.
9 O̱r te̱ ne̱, baks no̱ u̱n se̱nge̱-m te̱ ne̱ u̱n range̱-o te̱ ne̱ o̱ te̱ range̱ à. Te̱ no̱mo̱g m-se̱nge̱ m-ho̱w m-te̱t ne̱ taase te̱ ru̱'e̱ ko-wan u̱s-nu̱, da-o̱ te̱ ko̱'o̱te̱ no̱ ka Ma-to̱ m-Re̱re̱m to̱, to̱ rwu̱u̱ne̱ be-de Shir à.
10 No̱ te̱ m-su̱'e̱, Shir ma wu̱ ro̱ te̱ m-su̱'e̱ mo̱sse̱ u̱n go̱n she'et-de te̱ kutu no̱ yan-dor à. Te̱ she'ette̱ ba m-ku̱ko̱p, u̱n me̱n-u̱t pus-to̱ ne̱, ba u̱n be-de m-pyap.
11 U̱ntu̱n bo̱ no̱ nape̱ à, te̱ do̱ru̱ttu̱te̱ ko̱ wu̱ ke be u̱n no̱ bo̱ tato-o ro̱ m-do̱ru̱tte̱ u̱n yakar-ye̱ u̱n wu̱ à.
12 Te̱ nak no̱ u̱t-to̱, te̱ ya'ag no̱ jaab-o̱ u̱t-me̱n, te̱ kon no̱, no̱ she'et she'et-de depe̱ à, de u̱r-bon u̱n co-o̱ Shir, ka wu̱ agu̱ no̱ n-me̱ u̱n gwo̱mo-to̱ u̱n wu̱ u̱n se̱ps-mo̱ u̱n wu̱ ne̱ à.
Burus bo̱mo̱g Shir komo ne̱ remen bo̱
yan-bo̱-o̱ o-Tasaronika go̱kse̱
Ma-to̱ m-Re̱re̱m à
13 Remen kaane̱ o̱ te̱tte̱ u̱n bo̱m u̱n Shir ko̱yanda, remen, da-o̱ no̱ go̱kse̱ Ma-to̱ Shir, to̱ no̱ ho̱ge̱ be u̱n te̱ à, no̱ go̱ks to̱ u̱ntu̱n ma-to̱ u̱n ne̱t á. U̱n su̱ge̱-de u̱n kaane̱ ma, no̱ go̱kstu̱ to̱ bo̱ to̱ ro̱ à, Ma-to̱ Shir. Ká Ma-to̱ Shir to̱, to̱ ro̱ m-se̱nge̱ n-me̱ u̱n hur-u̱r no̱, no̱ ye̱ she̱re̱ à.
14 O̱r te̱ ne̱, no̱ yooste̱ be-de yan-dor ye̱ Shir n-me̱ u̱n Kiristi Ye̱so, ye̱ ro̱ n-me̱ u̱n dak-o̱ o-Judiya à. U̱m ze̱e̱g kaane̱ remen no̱ swo̱o̱g u̱r-ko̱o̱b be-de u̱n hun-ne̱ ye̱ u̱n dak-o no̱, u̱ntu̱n bo̱ ye̱ swo̱ u̱n kom-to̱ u̱n Yahuda-ne̱ à.
15 Yahuda-ne̱ ye̱ ho̱ Wan-Ko̱yan Ye̱so u̱n yan-Rwo̱r u̱n Ma-to̱ Shir ne̱, ye̱ yengu̱ru̱ te̱ komo. Ye̱ u̱n naas u̱n Shir u̱t-me̱n de̱e̱n. Ye̱ u̱t-yage̱ u̱n ko̱wan ne̱!
16 Te̱ u̱n ko̱'o̱t Ma-to̱ Shir be-de u̱n ye̱ ro̱ Yahuda-ne̱ á remen ye̱ kumut gwu̱. Amba ye̱ ken Yahuda-ne̱ conog m-we̱n u̱n ko̱'o̱t u̱n ka Ma-to̱ m-Re̱re̱m to̱. N-te̱ u̱n kaane̱ o̱ ye̱tte̱ m-do̱ u̱r-ba'as n-to̱n ba'as-to̱ u̱n ye̱. Amba ryaab-se Shir be'esu̱te̱ se kergu̱nsu̱te̱ n-te̱ u̱n ye̱.
Burus e̱ste̱ u̱r-hur
wu̱ heet o-Tasaronika
17 Amba, o̱r te̱ ne̱, da-o̱ a gaktu̱ te̱ m-wonge̱ u̱n no̱ ne̱ à n-me̱ u̱n ya o-da hiin à, wonge̱-mo̱ o-wu̱r yanze 'mo̱ u̱r-hur á. Te̱ o-re̱e̱b, te̱ m-se̱nge̱ te̱ hyenet no̱ yish-ye̱ ka yish-ye̱.
18 Te̱ e̱ste̱ u̱r-hur te̱ habu̱te̱ be u̱n no̱ ba u̱n das-mo̱ u̱r-hur. Me̱, Burus, u̱m no̱mo̱g m-se̱nge̱ u̱m habu̱te̱ be u̱n no̱ ba o-gaan á, ba o-yoor á, amba ko-Gwo̱mo-wu̱ u̱n ya-u̱t-ko̱t we̱ne̱g te̱.
19 Te̱ u̱n ho̱ge̱ u̱n re̱e̱b-o no̱. Te̱ co̱no̱g m-habe̱ be u̱n no̱ remen no̱ hantu̱te̱ te̱ o-sakto̱ o-zak ne̱. No̱ ro̱ gwo̱n-m te̱ u̱n 'yons u̱n te̱ ne̱ u̱n go̱nd-o te̱ ne̱, bo̱ te̱ he m-e̱s u̱n co-o̱ u̱n Wan-Ko̱yan na Ye̱so da-o̱ wu̱ he m-mu̱u̱n à.
20 O-nip, no̱ ye̱ ro̱ rii-yo u̱n gwo̱n-m te̱, u̱n rii-yo u̱n zak-o te̱ ne̱.