Bo̱r-u̱s eer
Ye̱so wu̱ ro̱ na ko-Gwo̱mo
be-de u̱n ko̱n-se Shir
1 'Wu̱p-de u̱n ma-u̱t na de ro̱ a ro̱ u̱n ko-Gwo̱mo-wu̱ u̱n ko̱n-se Shir ne̱, wu̱ ro̱ tara u̱n be-de u̱t-gwo̱mo n-riib o̱ Shir Wa-u̱t-Hyat n-To̱n shir à.
2 Kane̱ wu̱ ro̱ m-no̱m u̱n se̱nge̱-mo̱ u̱n wu̱ mo̱ u̱n ko̱n-se Shir u̱n de̱pi-o̱ o-nip o̱ Wan-Ko̱yan nome̱ à, yanze u̱n de̱pi-o̱ hun-ne̱ no̱me̱ á.
3 Bo̱ Shir co̱ne̱ ko̱ wu̱ ke ko-Gwo̱mo-wu̱ u̱n ko̱n-se Shir, wu̱ 'ye m-yar u̱t-seke̱ ne̱ à. Wu̱ ma na ko-Gwo̱mo-wu̱ go̱s-wu̱ u̱n cen wu̱ se̱ wu̱ seke̱te̱ yo ken rii-yo.
4 A ro ze̱e̱ge̱ Ye̱so ro̱ u̱n kà ho̱no o-dak o̱, wu̱ roa warag wan-Co̱w u̱n ko̱n-se Shir á, ko̱ hiin, remen yan-Co̱w u̱n ko̱n-se Shir ro̱ ko̱n ye̱ ro̱ u̱n heet u̱n yar-mo̱ u̱n hun-ne̱ bo̱ karamsa-o Mosa ze̱e̱ a no̱m à.
5 Se̱nge̱-mo̱ ye̱ ro̱tte̱ à horomte̱-o̱ u̱n sha-mo̱ u̱n rem-se ro̱ n-to̱n à, o̱ rwo̱'e̱ Shir ke̱we̱ste̱ Mosa da-o̱ wu̱ ro u̱n zo̱nge̱-to̱ wu̱ meet de̱pi-o̱ u̱n ko̱n-se Shir à. Ka da-o̱ Shir kewsu̱ wu̱, Shir zee, “No̱m ce̱e̱n, o nom ko̱yan bo̱ u̱m kutu wo̱ n-to̱n u̱n ká haag-o̱ à.”
6 Amba m-mo̱ka Ye̱so caari-wu̱ u̱n ko-wan-co be-de u̱n Gwo̱mo-ne̱ ye̱ u̱n ko̱n-se Shir na. Shir ya'aste̱ wu̱ se̱nge̱-mo̱ jiishe̱ ka mo̱ ye̱ nome̱ m-gu̱w be-de u̱n karamsa-u̱t ut à, remen wu̱ hongsu̱ na u̱n e̱ss u̱t-ma u̱n Shir ne̱. Yo jiishe̱ à u̱n bu̱-yo u̱n swo̱o̱ru̱ o-nu, o̱ jiishe̱ à.
7 A ro ze̱e̱ge̱ a hyanag yo̱-mo̱ u̱n ká e̱ss u̱t-ma to̱ u̱r-takan to̱ á, a roa do e̱ss u̱t-ma o-ayoore̱-o̱ á.
8 Shir hyanu̱ru̱ m-yo̱ mo̱ u̱n hun-ne̱,
“Yawe zee, ‘Da-o ro̱o̱n o̱ u̱m hette̱ ja'as
u̱n e̱ss u̱n ma-u̱t pu̱-to̱,
u̱n hun-ne̱ ye̱ u̱n baag-to̱ o-Isra-ne̱,
u̱n hun-ne̱ ye̱ u̱n baag-to̱ o-Yahuda-ne̱.
9 Ba go̱ u̱n ka e̱ss u̱t-ma u̱t-ut to̱,
to̱ u̱m nome̱ u̱n tat-ne̱ u̱n ye̱ ne̱,
da-o̱ u̱m nakne̱ ye̱ u̱n kom-u̱t re,
u̱m rwu̱ntu̱tu̱ ye̱ u̱n dak-o̱ o-Masar á.
Bo̱ ye̱ wasse̱ u̱n ká e̱ss u̱t-ma to̱ ne̱ á,
o̱ hante̱ u̱m tukutu̱ ye̱ o-cin.
Yawe zee,
10 amba m-mo̱ka u̱m ru̱ssu̱te̱ hun-ne̱ ye̱ o-Isra,
To̱ kà ro̱ e̱ss u̱n ma-u̱t re u̱t-pu̱ to̱:
Yawe ze̱e̱g da-o ro̱o̱n,
man ru̱ karamsa-u̱t re n-me̱ me̱n-to̱ u̱n ye̱.
Man gen to̱ komo u̱n hur-de u̱n ye̱.
Man warag Shir o̱ u̱n ye̱,
ye̱ komo ye̱a warag hun-ne̱ re.
11 Yatt-wu̱ he yoose̱ u̱n ko̱wan á.
Yatt-wu̱ he ze̱e̱ u̱n o̱r u̱n wu̱, “Nep Yawe” á.
Remen u̱n yakar u̱n se̱k-ye̱ ne̱,
ko̱wan wu̱a nep me̱.
12 Man hyen 'wo̱n-de u̱n ye̱,
u̱m sokse̱ ye̱ ba'as-to̱ u̱n ye̱.
Man do m-baks u̱n to̱ ne̱ á.’ ”
13 Da-o̱ Shir ce̱pe̱ ma-to̱ u̱n e̱ss u̱t-ma u̱t-pu̱ to̱ à, wu̱ muutte̱ o̱ ka o̱ u̱r-takan o-'wu̱tu̱m. Komo bo̱ u̱n rii-yo ro̱ u̱ntu̱n yo n-ga à, yo ro̱ komo m-wu̱tme̱ à, yoa tees ba m-jime̱.