Bo̱r-u̱s tet
Wan-kom-o margan
(Mati 12:9-14; Ruka 6:6-11)
1 De ken ho̱-de, Ho̱-de u̱r-Wu̱we̱, Ye̱so dooru̱ m-co̱w u̱n kuke̱-o̱ u̱n yoos u̱n Ma-to̱ Shir. Wu̱ hyanu̱ru̱ wu̱ ken ne̱t-wu̱ kane̱ wan-kom-o margan.
2 To̱, ye̱ ken hun-ne̱ ye̱ ro kane̱ ye̱ co̱no̱g ye̱ shipk Ye̱so u̱r-ba'as. Ye̱ ma'asu̱ru̱ Ye̱so u̱n tuwe̱ u̱n yish ko̱ wu̱a taasu̱ wu̱ ka go̱m-o̱ o-kom à. Ye̱ de̱k u̱nze Ye̱so dosse̱ wu̱ ka go̱m-o̱ Ho̱-de u̱r-Wu̱we̱, ye̱ ship Ye̱so o̱ ká be-de u̱r-ba'as. Ye̱ kumug o̱ ka co̱w-yo ye̱ hette̱ wu̱ m-heet be-de u̱n piish u̱t-ma à.
3 Ye̱so ze̱e̱ru̱ wan-kom-o margan, “Hyokne̱ o ine̱ ge̱ u̱n co-o̱ u̱n ko̱wan.”
4 Ka da-de ne̱, wu̱ citu̱ru̱ hun-ne̱, “¿Ya karamsa-o Mosa ze̱e̱ a he m-no̱m Ho̱-de u̱r-Wu̱we̱? ¿A nom rii yo̱-yo, ko̱ o-so̱-yo? ¿A gu ne̱t a doote̱ wu̱ u̱t-ho̱, ko̱ de̱ a ho wu̱?” Ye̱ re̱su̱ru̱ te̱k.
5 Wu̱ gwo̱tu̱ru̱ ye̱ gwo̱t-o̱ u̱s-ryaab. Me̱n-u̱t naasu̱te̱ wu̱ remen cikt-de u̱n ye̱. Ka da-de, wu̱ ze̱e̱ru̱ ka ne̱t-wu̱, “Neks kom-o ru.” Wu̱ neksu̱ru̱ kom-o̱ u̱n wu̱. Go̱m taaru̱.
6 Ba u̱n naas o-da Parisa-ne̱ ruuru̱, ye̱ gamu̱ru̱ u̱t-hi u̱n hun-ne̱ ko-Gwo̱mo Here̱ ne̱ ye̱ wu̱ ro̱tte̱ u̱t-tu̱w à. Ye̱ ho̱o̱bu̱ru̱ o-co̱w ye̱ hoot Ye̱so.
Hun-ne̱ mo̱rgu̱te̱ n-riib o-mar
7-8 Ye̱so inu̱ru̱ mo̱sse̱ u̱n yan-neke̱-mo̱ u̱n wu̱ ne̱. Ye̱ haaru̱ n-riib o̱ o-mar. Mo̱o̱r-to̱ u̱n hun-ne̱ de̱e̱n u̱n dak-o̱ o-Gariri ye̱ do̱ru̱ru̱ wu̱, har yan-dak-o̱ o-Judiya, u̱n yan-bo̱-o̱ o-Urusharima ne̱, dak-o̱ o-Idumiya, u̱n hun-ne̱ ne̱ ye̱ u̱n jit-de u̱n Ro̱o̱g-o̱ o-Joda, raag-o̱ o-Taya o-Sidon ne̱. Ho̱no o-dak ye̱ haanu̱ru̱ be-de u̱n wu̱. Ye̱ ho̱gu̱su̱te̱ kap rem-se wu̱ ro̱ m-no̱m à.
9 Bo̱ ye̱ mo̱rgu̱te̱ à, Ye̱so ze̱e̱ru̱ yan-neke̱-mo̱ u̱n wu̱ ye̱ e̱ssu̱ wu̱ hat-o re̱k-o̱, taase mo̱o̱r-to̱ u̱n hun-ne̱ me̱gu̱mse̱ wu̱.
10 Wu̱ be'esu̱te̱ wu̱ taasu̱te̱ ya-u̱s-go̱m de̱e̱n go̱m-se u̱n ye̱, har kap ya-u̱s-go̱m ye̱ ro m-mo̱nd be-de u̱n wu̱ ye̱ ci'it wu̱.
11 Da-o̱ ye̱ ya-u̱t-ko̱t da'e̱ u̱r-hi à, hyane̱ Ye̱so à, ye̱ kwu̱ktu̱ru̱ u̱n co-o̱ u̱n wu̱. Ye̱ ze̱e̱ru̱ u̱s-kan, “Wo̱ wu̱ Wà-wu̱ Shir.”
12 Wu̱ kangsu̱ru̱ ye̱, ye̱ yage̱ wu̱ m-rwu̱u̱nte̱ kaane̱.
Yan-neke̱-m Ye̱so ne̱n o̱p u̱n yoor
(Mati 10:1-4; Ruka 6:12-16)
13 Ye̱so daagu̱ru̱ ye̱ ken yan-neke̱-mo̱ u̱n wu̱ ye̱, ye̱ neke̱, ye̱ deet o-haag u̱n wu̱ ne̱, yan-neke̱-mo̱ u̱n wu̱ argu̱ m-ha.
14-15 Wu̱ daagu̱ru̱ ne̱n o̱p u̱n yoor, wu̱ egu̱ru̱ ye̱ u̱r-jin yan-To̱m ye̱ u̱n wu̱. Ye̱ ma'aste̱ m-neke̱ u̱n wu̱ ne̱, ye̱ ko̱tu̱té̱ hun-ne̱ Ma-to̱ Shir, ye̱ kumut 'wo̱ns-mo̱ u̱n ruut u̱n ya-u̱t-ko̱t u̱n hi-to̱ u̱n hun-ne̱.
16-19 Jin-to̱ u̱n ye̱ to̱ ka, ne̱n o̱p u̱n yoor-ye̱ wu̱ daage̱ à:
Simo̱n (wu̱ Ye̱so ru̱'e̱ u̱r-jin Bitrus à),
Yakubu (wà Ze̱be̱di),
u̱n heno u̱n wu̱ Yohana (ye̱ wu̱ ru̱'e̱ u̱r-jin yakar Buwanajis à, yakar-ye̱ u̱t-dàkàr), tomso
Andarawus, u̱n
Pirip,
Bataromi, u̱n
Matiyos,
Tomas,
Yakubu (wà Aru̱payes), u̱n
Taddiyus, u̱n
Simo̱n (ya o-Kan'ana), tomso
Yahudas Iskariyoti wu̱ (wu̱ ya'ase̱ Ye̱so u̱n kom-to̱ u̱n ya-u̱t-yage̱ à).
Ye̱so u̱n Beru̱zabur
(ko-Gwo̱mo-wu̱ u̱n ya-u̱t-ko̱t ne̱)
(Mati 12:22-32; Ruka 11:14-23; 12:10)
20 Ka da-de, Ye̱so co̱wu̱ru̱ o̱ ken hur-o̱, komo mo̱o̱r-to̱ u̱n hun-ne̱ dooru̱ m-go'one̱ be-de u̱n wu̱, har wu̱ kum da-o̱ u̱n re̱ u̱n rii-yo m-re̱ u̱n yan-neke̱-mo̱ u̱n wu̱ ne̱ á.
21 Da-o̱ o̱r u̱n wu̱ ne̱ ho̱ge̱ kaane̱ à, ye̱ ruuru̱ ye̱ bu̱pt wu̱. Ye̱ u̱n no̱m kaane̱ remen ye̱ ken hun-ne̱ ye̱ ro̱ m-ze̱e̱, “Wu̱ ro̱ ku̱s ku̱s.”
22 Yan-Yoos-de u̱n karamsa-o Mosa ye̱ kergene̱ bo̱-o̱ o-Urusharima à, ye̱ ze̱e̱ru̱, “Ko-Gwo̱mo-wu̱ u̱n ya-u̱t-ko̱t daag wu̱ u̱r-hi. U̱n be̱e̱b-de u̱n ko-Gwo̱mo-wu̱ u̱n ya-u̱t-ko̱t o̱ wu̱ ro̱tte̱ u̱n ruut u̱n ya-u̱t-ko̱t.”
23 Bo̱ Ye̱so ho̱gu̱te̱ ma-to̱ u̱n ye̱ à, wu̱ agnu̱ru̱ ye̱ be-de u̱n wu̱. Ka da-de ne̱, wu̱ citu̱ru̱ ye̱. Wu̱ ze̱e̱ru̱, “¿Re o̱ ne̱ ko-Gwo̱mo-wu̱ u̱n ya-u̱t-ko̱t he ruut u̱n hi u̱n de u̱n wu̱?” Bo̱ wu̱ citte̱ ye̱ kaane̱ à, wu̱ taknu̱ ye̱ m-yoose̱ u̱n sha-mo̱ u̱t-ma.
24 Wu̱ ze̱e̱ru̱, “U̱rege̱ hun-ne̱ ye̱ u̱n o̱ ken dak-o̱ wongu̱te̱ ye̱ ro̱ u̱r-gu̱n kur-u̱t u̱t-kur u̱n hi u̱n de u̱n ye̱, cakru̱-mo̱ ka dak-o̱ hette̱.
25 Kaane̱ o̱, hun-ne̱ ye̱ u̱n o̱ ken hur-o̱, ye̱ wonge̱ kur-u̱t u̱t-kur. Ye̱ ma'asu̱ru̱ m-dum u̱n hi u̱n de u̱n ye̱, caage̱-mo̱ ka, ka hur-o̱ hette̱.
26 Gwo̱mo-to̱ u̱n ko-Gwo̱mo-wu̱ u̱n ya-u̱t-ko̱t komo, to̱ wonge̱ kur-u̱t u̱t-kur, to̱ ro̱ m-dum, jesse̱-mo̱, to̱ he'e̱.
27 Yatt-wu̱ he m-co̱w u̱n hur-o̱ u̱n ko-be̱e̱b-wu̱ ku̱u̱ste̱ saw-to̱ u̱n wu̱ á, se̱ wu̱ shipste̱ wu̱ u̱r-takan. Wu̱ geks ka da-de ne̱, wu̱ cakarsu̱te̱ hur-o̱ u̱n wu̱.
28 Nip-o̱ me̱ no̱ m-ru̱re̱, Shir a sokse̱ hun-ne̱ kap ba'as-to̱ ye̱ nome̱ wu̱ à, o-yo'og ne̱ o̱ ye̱ nome̱ wu̱ à,
29 amba wu̱ yo'oge̱ Ku̱kt-o̱ Shir à, a sokse̱ ka ne̱t-wu̱ ba'as-de u̱n wu̱ á. Ka ba'as-de dea she'et be-de u̱n wu̱ ko̱ o̱ ke da-o̱.”
30 Ye̱so u̱n rwo̱r kaane̱, remen ye̱ ze̱e̱g, “Ko-Gwo̱mo-wu̱ u̱n ya-u̱t-ko̱t daag wu̱ u̱r-hi.”
Inu Ye̱so u̱n hen-ne̱ Ye̱so ne̱
(Mati 12:46-50; Ruka 8:19-21)
31-32 Hun-ne̱ u̱t-mo̱o̱r ne̱ ro tara tara. Ye̱so ro n-te̱te̱ o̱ u̱n ye̱. Wu̱ ro ye̱ u̱t-ma, inu u̱n wu̱ wo̱o̱nu̱ru̱ u̱n hen-ne̱ ye̱ u̱n wu̱ ne̱. Ye̱ e̱su̱ru̱ n-do̱. Ye̱ to̱mu̱ru̱ wu̱ rwu̱u̱n wu̱ nom u̱t-ma u̱n ye̱ ne̱. Wu̱ ken wu̱ ze̱e̱ru̱ wu̱, “Inu ru wu̱ ka u̱n hen-ne̱ ru ne̱ n-do̱. Ye̱ ro̱ u̱n hoob-o ru.”
33 Wu̱ shasu̱ru̱ ye̱, wu̱ ze̱e̱ru̱, “¿Wan wu̱ ne̱ ro̱ inu re u̱n hen-ne̱ re ne̱?”
34 Wu̱ gu̱tru̱ru̱ hun-ne̱ ye̱ hwo̱ wu̱ n-te̱te̱ o̱ u̱n ye̱ à. Wu̱ ze̱e̱ru̱, “Inu re wu̱ ka u̱n hen-ne̱ re ne̱.
35 Wu̱ no̱me̱ rii-yo Shir co̱ne̱ à, campo̱, ko̱ ne'a, wu̱ ro̱ heno re, wu̱ ro̱ komo inu re.”