Bo̱r-u̱s tet
She'et-de u̱n hun-ne̱ u̱n ko̱m-de o-da
1 Timoti, u̱m co̱no̱g o nep u̱nze u̱n ho̱-to̱ u̱r-ko̱m, hun-ne̱ a su̱ u̱r-ko̱o̱b de̱e̱n.
2 Yo rwo̱'e̱ u̱m zeet kaane̱ à, remen:
Hun-ne̱ ye̱a ma'as yan-co̱n-to̱ u̱n hi u̱n de u̱n ye̱ temb.
Ye̱a ma'as yan-co̱n-to̱ u̱n hwo̱r,
Ya-u̱s-se̱s,
Yan-nu̱-mo̱ u̱r-hi,
Ya-u̱t-re̱e̱b,
Yan-ko̱o̱b-de o-do̱ro̱tte̱ o̱ u̱n ye̱ mate̱ ye̱ à,
Yan-nu-se u̱n o-kiit,
Yan-ko̱o̱b-de u̱n gye̱r-o̱ Shir.
3 Yan-ko̱o̱b-de m-was u̱n hun-ne̱ ne̱,
Ya-m-e̱e̱s u̱n o̱r re u̱n ye̱ ne̱ u̱r-hur,
Yan-we̱-to̱ hun-ne̱,
Yan-ko̱o̱b-de u̱n garamse̱ u̱n hi u̱n de u̱n ye̱,
Ya-m-zwo̱m,
Ya-u̱r-shoob u̱n kap rii-yo ro̱ so̱-yo à.
4 Ya-m-re̱ o-ra,
Ye̱ ro̱ u̱n no̱m u̱n rii ba m-ceker u̱n yo he m-ko̱r à,
Ye̱ ro̱ shiishe̱ u̱n nu̱-mo̱ u̱r-hi ne̱,
Yan-co̱n-to̱ u̱n ho̱ge̱ u̱n re̱re̱m-mo̱ u̱n hi u̱n de u̱n ye̱ arge̱ co̱n-to̱ Shir,
5 Ye̱ ro̱ m-no̱m sa o zee ye̱ u̱n do̱ro̱tte̱-o̱ Shir. Amba ye̱ m-co̱n Shir ja'as rem-u̱s yo̱-se, se̱ ye̱ ro̱ m-no̱m á.
No̱m ja u̱n go̱n ka hun-ne̱ ye̱ ne̱.
6 Yo rwo̱'e̱ u̱m zeet o no̱m ja u̱n go̱n ka hun-ne̱ ye̱ ne̱ à, remen ye̱ ken ye̱ ro̱ m-raks hun-ne̱ remen ye̱ tu̱wu̱t hur-to̱ u̱n ye̱. Ye̱ m-no̱m u̱n kaane̱ remen ye̱ garamsu̱té̱ ne'a-ne̱ ye̱ m-raag. Ka ne'a-ne̱ ye̱ ba'as-u̱t daag u̱n hi-to̱ u̱n ye̱, komo co̱n-to̱ u̱n no̱m u̱n rem-u̱s yo̱-se garamsu̱te̱ ye̱.
7 Ko̱yanda a ro̱ ye̱ m-yoose̱, amba myet u̱n kaane̱ ne̱, ye̱ wo̱ m-nap u̱n yoos-de o-nip á.
8 Ye̱ ro̱ u̱ntu̱n Jenis u̱n Jambaras ne̱ ye̱ nome̱ Mosa u̱r-shoob n-ga n-ga à. Ka bo̱-se o̱, ka hun-ne̱ ye̱ ro̱ u̱r-shoob u̱n rii-yo ro̱ o-nip à. Barag-se u̱n ye̱ ro̱tt u̱r-bon á, she̱r-mo̱ u̱n ye̱ komo mo̱ u̱t-bo̱ mo̱.
9 Amba ye̱a hoks raks u̱n hun-ne̱ u̱n ya o-da hiin. Remen ba m-jime̱ de̱e̱n, ko̱wan he m-hyan u̱n rem-se o-hwaa se u̱n ye̱ cas, u̱ntu̱n bo̱ ko̱re̱ u̱n Jenis ne̱ u̱n Jambaras à.
Burus nak Timoti u̱t-to̱
10 Amba wo̱, Timoti, o nepse̱ u̱r-bon ne̱, yo me̱ m-yoose̱ u̱n hun-ne̱ à. O nepse̱ komo bo̱ u̱m no̱me̱ she'et u̱n de à. O neps yo u̱m co̱ne̱ u̱m nom à. O nepse̱ u̱m she̱re̱g be-de Shir. O nepse̱ me̱ u̱n 'mo̱ u̱r-hur u̱n hun-ne̱ ne̱, komo me̱ u̱n was u̱n hun-ne̱. Komo o nepse̱ u̱m jo̱o̱su̱te̱ u̱s-rem de̱e̱n.
11 O nak hun-ne̱ ya'ag me̱ u̱r-ko̱o̱b. O nak komo rem-u̱s yo̱-se se kumu me̱ n-me̱ bo̱-to̱ o-Antakiya, o-Iko̱niya ne̱, o-Risiya ne̱. O nak hun-ne̱ ya'ag me̱ u̱r-ko̱o̱b, amba u̱m jo̱o̱su̱te̱, Wan-Ko̱yan Ye̱so guug me̱ be-de u̱n ye̱ kap.
12 Kap wu̱ co̱ne̱ wu̱ no̱m go̱n she'et-de Shir co̱ne̱ à, wu̱ she̱r be-u̱r Kiristi Ye̱so, wu̱a su̱ u̱r-ko̱o̱b be-de u̱n hun-ne̱.
13 Amba yan-me̱n-u̱t jaas-to̱, u̱n ya-u̱t-raks ne̱, she'et-de u̱n ye̱ u̱r-yo̱-de a do m-ha n-co n-co. Ye̱ ro̱ u̱n raks u̱n hun-ne̱, u̱n ce u̱n ye̱, a ye̱ u̱t-raks.
14 Amba wo̱, se̱nge̱ m-she̱r be-de o-nip o̱ a yoose̱ wo̱ à. O she̱r hur u̱n du u̱n o̱ ne̱ de̱e̱n, remen o nepse̱ ka ye̱ yoose̱ wo̱ à, wo̱a hoks wo̱s u̱r-be̱ u̱n ye̱ ne̱.
15 O nak Ma-to̱ Shir cin da-o̱ o ro'e̱ wà re̱k-wu̱ à. Ma-to̱ Shir a hoks wo̱ m-'ya u̱s-nap u̱nze se̱ o she̱re̱g u̱r-hur be-u̱r Kiristi Ye̱so, ka da-de ne̱ wu̱ he wo̱ m-gwu̱.
16 Kap Ma-to̱ Shir to̱ ro̱ gense̱ à, to̱ u̱n rwu̱u̱n be-de Shir. To̱ ro̱ u̱n gwu̱ ne̱ be-u̱r na:
Be-de u̱n yoose̱ u̱n hun-ne̱,
u̱n kwo̱s u̱n ye̱ ba'ase̱ ne̱ à,
u̱n ja'as u̱n ye̱ no̱me̱ u̱r-ba'as à,
u̱n yoose̱ hun-ne̱ bo̱ ye̱ he she'et-de u̱r-bon à.
17 Shir u̱n ya'as na Ma-to̱ u̱n wu̱ remen kap ne̱t-wu̱ ro̱ wu̱ Shir à, wu̱a ma'as zo̱ngse̱, wu̱ nomot ko̱ mo̱ ke go̱n se̱nge̱-mo̱ u̱r-bon mo̱.