9
ጾሳ ፕርዳ
1 ያርሽያ ሳኣ ማታን ጎዳይ ኤቃ ደእሽን፥ ታን በኣድ። እ ታና ሀዋዳን ያጌዳ፤ “ባሱ ቃጻናዳን፥ ጌሻ ማቅዳስያ ጉምቡዋ ሾጫ፤ አሳ ኡባ ሁጲያን መንሬꬃ። ሄዋፐ አትያ አሳ ታን ማሻን ዎꬋና። ባቃትያ አሳይ ከስ አከና፤ ከስ አኬዳ አስካ ፓጻ አተና።
2 ኡንቱንቱ ጋድያ ቦኪደ፥ ስኦልያዉ ዱገ ዎꬎፐካ፥ ታን ኡንቱንታ ሄዋፐ ከሳና። ሳሉዋ ፑደ ከሶፐካ፥ ታን ኡንቱንታ ሄዋፐ ዱገ ዎꬃና።
3 ኡንቱንቱ ቃርመሎሳ ደርያ ጼራን ቆሰቶፐካ፥ ታን ኡንቱንታ ኮያደ ሄዋፐ ከሳና። አባ ጪሙዋ ግዶ ገሊደ፥ ታ ስንꬃፐ ጌሞፐካ፥ ታን ዳዊያ አዛዝና፥ እ ኡንቱንታ ዱካና።
4 ቃይ ባረንቱ ሞርከቱዋን ኦሞደቲደ፥ ኡንቱንቱ ቦፐካ፥ ያን ኡንቱንቱ ማሻን ሀይቃናዳን፥ ታን አዛዛና፤ ታን ኡንቱንታ ኢታ አይፍያን ጼላናፐ አትና፥ ሎኦ አይፍያን ጼልከ” ያጌዳ።
5 ጎዳይ፥ ኡባፐ ዎልቃማ መꬍና ጎዳይ ሳኣ ቦቼ፤ ሳአይ ሴሬ፤ ቃይ ሳኣን ደእያባይ ኡባይካ ዬኬ። ናይለ ሻፋይ ኩንꬂደ ባልቡቀትያዋዳን፥ ቢታ ኡባይ ባልቡቀቴ፤ ቃይ ሄ ኩንꬁ ዎꬍያዋዳንካ ዎꬌ።
6 እ ባረዉ ደእያ ሳኣ ሳሉዋን ጊግሴ፤ አ ባሱዋካ ሳኣን ባሴ። ቃይ እ አባ ሃꬃቱዋ ጼሲደ፥ ጋድያ ቦላን ዱገ ጉሴ፤ አዉ ሱንꬃይ መꬍና ጎዳ።
7 መꬍና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ህንተ ታዉ ቶጵያ አሳ ማላ ግድክቴየ? ታን ህንተና ግብጼ ጋድያፐ ከሴዳዋዳን፥ ፕልስጼማ አሳ ካፍቶራፐ፥ ቃይ ሶርያ አሳካ ቂራፐ ከሳድ” ያጌ።
8 መꬍና ጎዳይ ሀዋዳን ያጌ፤ “በእተ፥ ኡባ ሞድያ መꬍና ጎዳ አይፊ ናጋራንቻ ካዉተꬃ ቦላን ደኤ። ታን አ ጋድያ ቦላፐ ꬋይሳና፤ ሽን ታን ያቆባ ዛርያ ኡባና ꬋይስከ።
9 “በእተ፥ ካꬃ ዛዝርያን ዛዝርያዋዳን፥ እስራኤልያ አሳ ካዉተꬃቱዋ ኡባ ግዶን ዛዝራናዳን፥ ታን አዛዛና፤ ሽን ኡንቱንቱ ግዶን አማነትያዋንቱፐ እቱነ ሳኣን ዎꬊደ ꬋየና።
10 ‘ኑና አያ ኢታባይነ ጋከና ዎይ ደመና’ ያግያ ታ አሳ ግዶን ደእያ ናጋራንቻቱ ኡባይ ማሻን ዉራና” ያጌ።
እስራኤልያ ፖኦ ህዶታ
(9:11-15)
11 ቃይካ ጾሳይ፥ “ሄ ጋላስ ታን ኮለቲደ ኩንዴዳ ጎልያዳን ሀኔዳ ዳዊታ ካዉተꬃ ደንꬃና፤ ጾኤቴዳ ሳአቱዋካ ባራና፤ ቃይ ኮለቴዳሳካ ኦራꬃና፤ ታን አ በንዋዳን ኦꬃደ ኬጻና።
12 ሄዌነ እስራኤልያ አሳይ ኤዶማ ጋድያፐ አቴዳዋንታነ ታ ሱንꬃን ጼሰቴዳ ካዉተꬃቱዋ ኡባ ላታናሳ” ያጌ። ሀዋ ኦꬅያዌ ታና መꬍና ጎዳ።
13 መꬍና ጎዳይ ሀዋዳን ያጌ፤ “በእተ፥ ካꬃ ጫክያዋንቱ ጫኪደ ዉርሰናን ደእሽን፥ ጋድያ ጎሽያዋንቱ ጋክያ ዎዲ፥ ዎይንያ ቴራ ጉምእያዋንቱካ ጉምኢደ ዉርሰናን ደእሽን፥ ዎይንያ ዘርያዋንቱ ጋክያ ጋላሳቱ ያና። ሄ ዎደ ደረቱ ማልኦ ዎይንያ ኤሳ ጾካና፤ ዞዘቱዋ ኡባፐካ ዎይንያ ኤሳይ ጎጋና።
14 ኦሞዱዋን ቤዳ ታ አሳ እስራኤልያ ዛራደ እሻልሳና። ኡንቱንቱ ኮለቴዳ ካታማቱዋ ዛረꬅ ኬጺደ፥ ኡንቱንቱን ደአና። ዎይንያ ቱራካ ቶኪደ፥ አፐ ዎይንያ ኤሳ ኡሻና። ቃይ አታክልተቱዋካ ቶኪደ፥ ኡንቱንቱ አይፍያ ማና።
15 ታን እስራኤልያ ኡንቱንቱ ጋድያን ቶካና፤ ኡንቱንቱ ታን ኡንቱንቶ እሜዳ ጋድያፐ ላኤንꬆ ሙለካ ሾደትክኖ” ያጌ። ሀዋ ኦድያዌ መꬍና ጎዳ ህንተ ጾሳ።