ጳዉሎስ
ቆሮንቶሳ አሳዉ
ጻፌዳ ኮይሮ ኪታ
ገሉዋ
ጳዉሎስ ቆሮንቶሳ አሳዉ ጻፌዳ ኮይሮ ኪታይ፥ ጳዉሎስ ቆሮንቶሳ ካታማን ደእያ አማንያዋንቱ ግዶን ክርስትና ደኡዋነ አማኑዋ ጼልያባን ደንዴዳ መቱዋ ꬋይሳናዉ ቆፒደ ጻፌዳዋ። ሄ ዎደ ቆሮንቶሳ ካታማይ ሄ ጋደን ደእያ አሳይ ጎኤትያ ኤረቴዳ ግሪከ ካታማ። ሄዋ ቦላካ ቃይ አካይያ ጌተትያ ሮማ ካዉተꬃዉ ሁጰ ካታማ። ሀ ካታማይ ዎልቃማ ዛልእያን፥ ጋምኢደ ምኔዳ ዎጋን፥ ሎይꬅ አክ አክ ብያ የዳ ደኡዋን ዎይ ጊገናባ ሀንያዋንነ ሀይማኖትያ ጮራተꬃን ኤረቴዳዋ።
የሱስ ኪቴዳዌ ምንሲደ ኦዳናዉ ኮዬዳዌ፥ ሄ አማንያዋንቱ ግዶን ደእያ ሻኮተꬃባነ የዳ ደኡዋባ፥ ዎሹማባነ ገሉዋ አካባ፥ ዎሳ ጎለ ዎጋባ፥ ጌሻ አያና እሞታቱዋባነ ሀይቁዋ ደንዱዋባ። የሱስ ኪቴዳዌ ሀ ምሽራቹዋ ቃላ ሀ ኦሻቱዋ ቦላ ምንሲደ ኦድያዋ ናጊደ ሺሼ።
ሲቁ ጾሳይ ባረ አሳዉ እሜዳ እሞታ ኡባፐ አꬍያዋ ግድያዋ ኦድያ ሸምፑዋ ታማነ ሄዙ፥ ሀ ማጻፋን ዳሮ ኤረቴዳዋ ጌተቲደ ቆፈቴ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1:1-9
አማንያዋንቱ ግዶን ደንዴዳ ሻኮተꬃ 1:10—4:21
የዳ ደኡዋባነ ሶይ አሳ ደኡዋባ 5:1—7:40
አማንያዋንታነ ክርስትና አማኑዋ አክቤናዋንታ 8:1—11:1
አማንያዋንቱ ደኡዋነ ጎሸታ ዎጋ 11:2—14:40
ክርስቶስ ሀይቁዋ ጾን ደንዶዋነ አማንያዋንቱ ደንዱዋባ 15:1-58
ይሁዳን ደእያ መቶታንቻቶ እመቴዳ ማዱዋባ 16:1-4
ዉርሰꬃ ቁትያ 16:5-24
1
1 ታን፥ ጾሳ ሸንያን የሱስ ክርስቶስ ኪቴዳዋ ግዳናዉ ጼሰቴዳ ጳዉሎስነ፥ ኑ እሻ ሶስተኒስ፥
2 ቆሮንቶሳን ደእያ ጾሳ አማንያ አሳቶ፥ የሱስ ክርስቶሳን ጌዬዳዋንቱስነ፥ ኑዉ ጎዳ ግድያ ኑ ጎዳ የሱስ ክርስቶሳ ሱንꬃ ኡባ ሳኣን ጼስያ ኡባቱዋና ጌሻ ግዳናዉ ጼሰቴዳዋንቶ ሀ ዳብዳቢያ ጻፌቶ።
3 ጾሳይ፥ ኑ አዉነ ኑ ጎዳይ የሱስ ክርስቶስ ህንተንቶ አꬎ ኬካተꬃነ ሳሮተꬃ እሞ።
ጾሳ ጋላቱሳ
4 ጾሳይ ክርስቶሳ የሱሳ ባጋና ህንተንቶ እሜዳ አꬎ ኬካተꬃ ድራዉ፥ ታን ኡባ ዎደ ህንተንቶ ጾሳ ጋላታይ።
5-6 ታን ክርስቶሳዉ ማርካትያዌ ህንተንቱን ምኔዳ ድራዉ፥ ህንተ ኡባባን፥ ሃሳያ ኡባን ኤራተꬃ ኡባን፥ አን ዱረቴድታ።
7 ሀዋዳን ህንተ ኑ ጎዳ የሱስ ክርስቶሳ ዩሳ ናግሽን፥ አያና እሞታፐ ሀራይ አቶ እቱነ ህንተንቶ ፓጨና።
8 ቃይ ኑ ጎዳ የሱስ ክርስቶሳ ጋላሳን ህንተ ካꬌ ባይናዋንታ ግዳናዳን፥ ዉርሰꬃይ ጋካናዉ እ ህንተንታ ምንሳናዋ።
9 ባረ ናኣ ኑ ጎዳ የሱስ ክርስቶሳ እትፐተꬃዉ ህንተንታ ጼሴዳ ጾሳይ አማነቴዳዋ።
አማንያ አሳ ግዶን ሻኮተꬃይ መቶፖ
10 ሽን ታናዳን አማንያዋንቶ፥ እት ዎዛናንነ እት ቆፋን እትፐ ግዳናፐ አትን፥ ሻኮተꬃይ ህንተ ግዶን ደኤና ማላ፥ ህንተ ኡባይ እት ሃሳያ ሃሳያናዳን፥ ኑ ጎዳ የሱስ ክርስቶሳ ሱንꬃን ታን ህንተንታ ዎሳይ።
11 አያዉ ጎፐ፥ ታናዳን አማንያዋንቶ፥ ቃሎአ ሶይ አሳይ ህንተንቱባ፥ ህንተ ግዶን ዋላሳይ ደእያዋ፥ ታዉ ኦዴድኖ።
12 ታን ግያዌ ሀዋ፤ ህንተንቱ ሁጲያን ሁጲያን፥ “ታን ጳዉሎሳዋ። ታን አጲሎሳዋ። ታን ኬፋዋ። ታን ክርስቶሳዋ” ያጊታ።
13 ክርስቶስ ሻከቴዴ? ህንተንቱ ድራዉ፥ ማስቃልያ ቦላ ምስማርያን ꬍሸቲደ ካቀቴዳዌ ጳዉሎስ? ዎይ ህንተ ጳዉሎሳዉ ግዳናዉ ጻማቀቴድቴ?
14 ታን ቃርስጶሳፐነ ጋዮሳፐ አትን፥ ህንተንቱፐ ኦናነ ጻማቃቤና ድራዉ፥ ጾሳ ጋላታይ።
15 ሄዋ ድራዉ፥ ኦንነ ህንተንታ ታዉ ግዳናዳን ጻማቀቴድታ ጋናዉ ዳንዳየና።
16 ቃይ፥ ኤ፥ እስጽፋኖሳ ሶይ አሳካ ታን ጻማቃድ። ሽን ሀራ ጉጃደ ጻማቃድታንቶነ ዎዛና አꬅከ።
17 አያዉ ጎፐ፥ ክርስቶስ ታና ምሽራቹዋ ቃላ ኦዳና ማላ ኪቴዳፐ አትን፥ ጻማቃና ማላ ኪትቤና፤ ቃይ ክርስቶስ ማስቃልያ ቦላ ሀይቄዳዌ መላ ግደና ማላ፥ ታን አሳ አꬌዳ ኤራተꬃ ቃላን ታማርስከ።
ክርስቶስ ጾሳ አꬌዳ ኤራነ ዎልቃ
18 አያዉ ጎፐ፥ ክርስቶስ ማስቃልያ ቦላ ሀይቄዳዋ ኦድያ ቃላይ ꬋይያዋንቶ ኤያተꬃ። ሽን ኑዉ አትያዋንቶ ጾሳ ዎልቃ።
19 ጾሳ ማጻፋይ፥
“ታን ኤራንቻቱዋ አꬌዳ ኤራተꬃ፥
ባይዛና፤
ቃይ አኬካንቻቱዋ አኬካካ ꬋይሳና”
ያጌ።
20 አꬌዳ ኤራንቻይ ሀቃን ደኢ? ህግያ ታማርስያዌ ሀቃን ደኢ? ዎይ ሀ አላምያ ጾናናዉ ፓሉመትያዋንቱ ዋናንድኖሻ? ጾሳይ ሀ ሳኣ አꬎ ኤራተꬃይ ኤያተꬃ ግድያዋ በሴዳ!
21 አያዉ ጎፐ፥ አሳይ ባረ ሁጰ አꬎ ኤራተꬃን ባረና ጾሳ ኤረና ማላ፥ ጾሳይ ባረ አꬎ ኤራተꬃን ድጊደ፥ ኑን ኦድያ ኤያ ቃላን አማንያዋንታ አሻናዉ ቆፔዳ።
22 አይሁዳቱ ማላታ ኦቺኖ። ቃይ ግሪከ አሳቱ አꬎ ኤራተꬃ ዎልቃማ ኮሻ ኮዪኖ።
23 ሽን ኑን ማስቃልያ ቦላ ምስማርያን ꬍሸቲደ ካቀቴዳ ክርስቶሳባ ኦዴቶ። ሄዌ አይሁዳቶ ꬉቦ፤ ቃይ አይሁዳ ግደናዋንቶ ኤያተꬃ።
24 ሽን ጾሳይ ጼሴዳዋንቶ አይሁዳቶካ ግሪካቶካ ኑን ኦድያ ጾሳ ዎልቃይነ አ አꬎ ኤራተꬃይ ክርስቶሳ።
25 አያዉ ጎፐ፥ ጾሳ ኤያተꬃይ አሳ አꬌዳ ኤራተꬃፐ አꬌ፤ ቃይ አ ላፋተꬃ ጌተትያዌካ አሳ ምኖተꬃፐ ምኔ።
26 ስም ታናዳን አማንያዋንቶ፥ ጾሳይ ህንተንታ ጼስያ ዎደ ህንተ ዎይሳ ማላ አሰንቶ ቆፕተ። አሳ ቆፋን ህንተ ግዶን አꬎ ኤራንቻቱ፥ ዎልቃማቱነ ꬎቃ ሼሻቱ ዳራ ግድክኖ።
27 ሽን ጾሳይ አꬌዳ ኤራንቻቱዋ ዬላያናዉ፥ አላምያን ደእያ ኤያቱዋ ዶሬዳ፤ ቃይ ምናቱዋ ዬላያናዉ፥ አላምያን ደእያ ላፋቱዋ ዶሬዳ።
28 ጾሳይ ሀ አላምያን ዎልቃማባ ጊደ ቆፕያዋ ꬋይሳናዉ፥ ሀ አላምያ ማደናባ ካቶባነ ሀንቤናባ ዶሬዳ።
29 ሄዋ ድራዉ፥ ኦንነ ጾሳ ስንꬃን ጬቀታናዉ በሰና።
30 ሽን ጾሳይ ህንተንቶ ክርስቶስ የሱሳ ደኡዋ ኦꬅ እሜዳ። ክርስቶስ ኑዉ አꬎ ኤራተꬃ፥ ጽሎተꬃ፥ ጌሻተꬃነ አቶተꬃ ግዴዳ።
31 ሄዋ ድራዉ፥ ጾሳ ማጻፋይ፥
“ጬቀትያ ኡራይ ኦንነ፥
ጎዳይ ኦꬄዳዋን ጬቀቶ”
ያጌ።