25
1 “ላኡ አሳቱ ዋላቀቲደ ፕርዳ ጎልያ ዮፐ፥ ዳናቱ ጌሻ ነ ልከ ጊደ፥ ናቄዳዋ ነ ባይዛንቻ ጊደ ፕርድኖ።
2 ባይዛንቻይ ዋꬉ በስያዋ ግዶፐ፥ ትራን ግስሲደ ዞክያ ሾጫናዉ ዳናይ አዛዞ፤ ያቶፐ ባይዛንቻይ ዳና ስንꬃን ባረ ባይዙዋ ኬና ሾጨቶ።
3 እ ኦይታሙዋ ጋካናዉ ሾጨቶፐ አትና፥ ሄዋፐ ዳሩዋ ሾጨቶፖ። ሄዋፐ ዳሩዋ አ ሾጮፐ፥ ነ እሻይ ነ ስንꬃን ካዉሻና።
4 “ኡዱማን ካꬃ የꬍያ ቦራ ዶና ቃቾፓ።
ሀይቄዳ እሻዉ ኦꬃናዉ በስያባቱዋ
5 “እትፐ ደእያ እሻቱዋፐ እቱ ናኣ የለናን ሀይቆፐ፥ አ ማቻታ ሀራ ባደ ገሉፑ፤ እዝ አስና እሻይ እዞ አኮ፤ እዝዉ ኮሽያዋ ፖሎ።
6 ያቶፐ ሀ ሀይቄዳዋ ሱንꬃይ እስራኤልያፐ ፕተት ꬋየናዳን፥ አ ኮይሮ የልያ አቱማ ናአይ ሀ ሀይቄዳዋ ሱንꬃን ጼገቶ።
7 “ግዶ ሽን፥ እ ባረ እሻ ማቻቶ አካናዉ ኮያና ꬋዮፐ፥ እዛ ካታማ ፐንግያን ኡቴዳ ጭማቱዋኮ ባደ፥ ‘ታ አስና እሻይ ባረ እሻ ሱንꬃይ እስራኤልያን ደአናዉ ኮይቤና፤ ታና አኪደ፥ ታዉ ኮሽያዋ ኩንናን እጼዳ’ ያጋደ ማጋኑ።
8 ካታማ ጭማቱ አ ጼጊደ ኦችኖ፤ ሀእካ፥ ‘ታን እዞ አክከ’ ጊደ እጾፐ፥
9 ሄ ሀይቄዳዋ ማቻቶ ጭማቱዋ ስንꬃን አኮ ሺቃደ፥ አ ገድያ ጫማፐ እቱዋ ከሳደ፥ አ ሶምኡዋን ጩቻ ጩቻደ ሀዋዳን ያጉ፤ ‘ባረ እሻዉ ዘረꬃይ ደአናዉ ኮየና አሳ ቦላ፥ ሀዋ ማላ ካዉሻይ ጋካናዉ በሴ’ ያጉ።
10 አ ዛሪ እስራኤልያን፥ ‘ጫማ ከሴዳዋንቱ ሶያ’ ጌተት ጼገቲደ ደአና።
ሀራ ህገቱዋ
11 “ላኡ አሳቱ ዋትሽን፥ እቱዋ ማቻታ ያደ፥ ባረ አስና ሾጭያዋ ኩሽያፐ አሻናዉ፥ ባረ ኩሽያ የዳደ ህንኩዋ አቱማተꬃ ኦይቆፐ፥
12 እዝዉ አይነ ቃረተናን እ ኩሽያ ቃንጽተ።
13 “ነ ኬሻ ግዶን ዴጾነ ካዉሻ ግዴዳ ላኡ ሚዛናቱ ደኦፕኖ።
14 ነ ሶን ዳርሲደነ ጉꬂደ ልክያ ላኡ ማክያባይ ደኦፖ።
15 መꬍና ጎዳይ ነ ጾሳይ ነዉ እምያ ጋድያን አዱሳ ላይꬃ ነ ደአናዳን ኩመንꬃነ ልከ ሚዛናይነ ማክያባይ ነዉ ደኦ።
16 አያዉ ጎፐ፥ መꬍና ጎዳይ ነ ጾሳይ ሄዋ ማላባ ኦꬂደ፥ ባለꬅያ አሳ ኡባ ሻቴ።
አማሌቃቱዋ ዎꬋናዉ እመቴዳ አዛዙዋ
17 “ህንተ ግብጼፐ ከሲደ ቢደ ደእሽን፥ አማሌቃቱ ህንተ ቦላ ኦꬄዳዋ ሀሳይተ።
18 ኡንቱንቱ ጾሳዉ ያየና አሳ፤ ህንተ ኦግያን ህንተናና ኤቀቴድኖ። ህንተ ሄመትሽን፥ ዳቡሪደ ጉየ አቴዳ አሳ ኡባ ዎꬌድኖ።
19 ሄዋ ድራዉ፥ መꬍና ጎዳይ ህንተ ጾሳይ ህንተና ሄ ቢታ ላትሲደ፥ ህንተ ዩሹዋን ደእያ ሞርከቱዋ ኡባፐ ህንተና ሸምፕስያ ዎደ፥ ሀ ጋድያን ኡንቱንታ ሀሳይያ አሳይ ꬋያና ጋካናዉ፥ አማሌቃቱዋ ኡባ ሳሉዋ ጉፋንꬃፐ ꬋይስተ፤ ሄዋ ኦꬃናዋ ሙለካ ዶጎፕተ።