32
ሙሴ ማዝሙርያ
1 ህንተኖ፥ ሳሎቶ፥ ታን ኦድያዋ ስስተ፤ ቢታይካ ታ ዶና ቃላ ስሶ።
2 ታ ትምርቲ እራዳን ቡኮ፤ ታ ቃላቱካ ከተርሳዳን፥ ጾኩ ማታ ቦላን ዎꬍያ ፑሰ እራዳንነ ጫርሻ ቦላን ዎꬍያ ፑስያዳን ዎꬎ።
3 ታን መꬍና ጎዳ ሱንꬃ አዋያና፤ ግታተꬃ ኑ ጾሳዉ እምተ።
4 እ ኑ ዛላቴ፥ አ ኦሱዋን ፖኩ ባዋ፤ አ ኦገ ኡባይካ ሱረ። ኑ ጾሳይ አማነትያዋነ ኢታተꬃይ ባይናዋ፤ እ ቱማንቻነ ሱረ።
5 ህንተ አማነተናነ አያዉነ ፓና፥ ናጋራንቻነ ባለꬅያ የለታ ግድያ ድራዉ፥ አ አሳ ግዳናዉ ህንተ በስክታ።
6 ህንተኖ ኤያነ አኬክ ባይና አሳዉ፥ ህንተ መꬍና ጎዳዉ እምያ ዛሩ ሀዌ? እ ህንተና መꬌዳ ህንተ አዉዋ ግደኔ? እ ህንተና መꬊደ፥ ምንስ ኤሴዳ።
7 ካሰ ዎድያ ቆፕተ፤ ዳሮ የለታቱ ላይꬃካ አኬክተ። ህንተ አዎቱዋ ኦችተ፤ ኡንቱንቱ ህንተና በሳና። ህንተ ጭማቱዋካ ኦችተ፤ ኡንቱንቱ ህንተንቶ ኦዳና።
8 ኡባፐ ዎልቃማይ ካዉተꬃቶ ኡንቱንቱ ደኢያሳ ላትሴዳ ዎደ፥ አሳ ናናቱዋ ኡንቱንቱ ዛርያን ዛርያን ሻኬዳ ዎደ፥ እስራኤልያ አሳ ፓይዱዋዳን፥ ኡንቱንቱ ዛዋ ኤሴዳ።
9 አያዉ ጎፐ፥ ሻኩዋን መꬍና ጎዳ ጋኬዳዌ እስራኤልያ፤ ያቆብካ አ ጋኬዳ ላታ።
10 ቢታ መላ ቢታን ኡንቱንቱ ሳሙዋን ደእሽን፥ ጫርኩዋ ጻላላይ ሱራግያሳን ብቻርሽን፥ ኡንቱንታ ደሜዳ። ያቲደ ባረ አይፍያ ቡሉዋዳን፥ ኡንቱንቶ ጎንዳለ ግዲደ፥ ኡንቱንታ ምንሲደ ናጌዳ።
11 አርጋንꬃይ ባረ ማራ ፓሉዋ ታማርስያዋዳን፥ ባረ ምጬዳ ቀፍያን ጋክ ኦይቂደ አሽያዋዳን፥ ሄዋዳን ጾሳይ ባረ ቀፍያን ሀጲደ ኡንቱንታ አሼዳ።
12 ሀራ አላጋ ጾስ ባይናን፥ መꬍና ጎዳ ጻላላይ ባረ አሳ ካለꬄዳ።
13 እ ቢታዉ ꬎቃ ሳኣ ኡንቱንታ ከሴዳ። ሾይቃን ሞኬዳ አይፍያ ኡንቱንታ ምዜዳ። ዛላ ጳልቀꬃፐ ኡንቱንታ ኤሳ ምዜዳ፤ ሹቻ ጋድያፐ ዛይትያ ምዜዳ።
14 ኡንቱንቱ መህያ ዉድያፐ መኤዳ ማꬃነ ዴሻ ዉድያፐካ ማꬃ፥ ዶርሳ አንቃራነ ጋልሳ ሜድኖ፤ ቃይ ባሳነ ዶርሳ ዉድያነ ዴሻ፥ ሎኦ ዛርጋ ሜድኖ፤ ሱꬃ ማላትያ ዎይንያ ኤሳካ ኡሼድኖ።
15 ያኒደ ይሽሩን ኦርዴዳ፤ ማካሌዳ፤ ም ሚደ፥ ቦቦርጬዳ። ባረና መꬌዳ ጾሳ አጌዳ፤ ባረ አቶተꬃ ዛላ ካꬌዳ።
16 ኡንቱንቱ አላጋ ጾሳቶ ጎይንያዋን አ ምሽሴድኖ፤ ባረንቱ ቱና ኤቃቱዋን አ ሀንቀꬄድኖ።
17 ጾሳ ግደና ጻላሄቶ፥ ካሰ ኡንቱንቱ ኤርቤና ጾሳቶ፥ ዝኖ ከሴዳዋንቶ፥ ኡንቱንቱ አዎቱ ያይቤና ጾሳቶ ያርሼድኖ።
18 ኡንቱንቱ ደኡዋ እሜዳ ዛላ ቆፕበይክኖ፤ ቃይ የል ድቼዳ ጾሳ ዶጌድኖ።
19 መꬍና ጎዳይ ሄዋ በኢደ፥ ኡንቱንቱ ቦላ ሀንቀቴዳ። አ አቱማነ ማጫ ናናቱዋ እጼዳ።
20 ያቲደ ሀዋዳን ያጌዳ፤ “ታን ታ ሶምኡዋ ኡንቱንቱፐ ገንꬃና፤ ኡንቱንቱ ጌላነ አማነተና አሳ ግድያ ድራዉ፥ ኡንቱንቱ ኦማርሳ ጮኡ ጋደ ጼላና።
21 ጾሳ ግደናዋን ታና ምሽሴድኖ፤ ባረንቱ ኤቃቱዋን ታና ሀንቀꬄድኖ። ታንካ ኡንቱንቱ ዛረ ግደናዋንቱን ምሽሳና፤ ኤያ አሳ ዛራቱዋን ታን ኡንቱንታ ሀንቀትሳና።
22 ታ ሀንቁ ታማዳን ኤጺደ፥ ጋድያን ደእያዋ ኡባ ጹጋና። ሄ ታማይ ስኦልያን ደእያዋናካ ጋꬂደ ጹጋና፤ ደርያ ባሱዋ ጋካናዉ፥ ሄ ታማይ ማና።
23 “ታን ኡንቱንቶ መቱዋ መቱዋ ቦላ ዶራና፤ ታ ዎንዳፍያን ኡንቱንታ ዱካና።
24 ኡንቱንቱ ኮሻን፥ ጹግያ ምሹዋንነ ኢታ ሀርግያን ዉራና። ኡንቱንቱ ቦላ መቶ ጋꬅያ ባዙዋ ዶአቱዋነ ኡንቱንታ ዱክያ አላጋ ሾሻቱዋ ኡንቱንቱ ቦላ የዳና።
25 ቶራይ ኦገ ኡባን ኡንቱንቱ ናናቱዋ ዉርሳና። ጎልያ ኡባን ሻቢርሳይነ ዳጋማይ ካተታና። ያላጋ አቱማዋንቱነ ማጫዋንቱ ዉራና፤ ጉꬃ ናናይካ ጭማቱካ አትክኖ።
26 ኡንቱንታ ታን ሃኮ ሳአ ላላና፤ ሄዋፐ ጉይያን፥ ኡንቱንታ ሀሳይያባይ ꬋያና።
27 ሽን ኡንቱንቱ ሞርከቱ፥ ‘ኑ ዎልቃይ ኡንቱንታ ጾኔዳ፤ ሀዋ ኡባ መꬍና ጎዳይ ኦꬅቤና’ ያጊደ ኦቶሩዋን ጬቀተናን አግክኖ ያጋደ ቆፓድ” ያጌዳ።
28 እስራኤልያ አሳይ ዞረት ባይና አሳ፤ አኬክ ኡንቱንቶ ባዋ።
29 ኡንቱንቱ ጾነቴዳዌ አያነንቶ በአናዉ ኡንቱንቶ እጸቴዳ፤ ባረንቱ ዉርሰꬃይካ አየንቶካ ኤርክኖ።
30 እት ሻአ አሳይ እት አሳን፥ ታሙ ሻአ አሳይ ላኡ አሳን፥ ዋን ጾነቴዴ? ኡንቱንቱ ዛላይ ኡንቱንታ ዛልኤዳ ግሻሳነ መꬍና ጎዳይ ኡንቱንታ አꬅ እሜዳ ድራሳ ግደኔ!
31 ኡንቱንቱ ሞርከቱ ባረንቱ ጾሳይ ላፋ ግድያዋነ እስራኤልያ ጾሳዳን ዎልቃማ ግደናዋ ኤሪኖ።
32 ኡንቱንቱ ዎይኒ ሶዶማ ዎይንያፐነ፥ ጋሞራ ሾይቃፐ ዬዳዋ። ኡንቱንቱ ቴራይ ማርዘ፤ ኡንቱንቱ ዉርጩካ ጫምያዋ።
33 ኡንቱንቱ ዎይንያ ኤሳይ ሾሻ ማርዘ፤ ዎꬍያ ማርዚ ደእያ ሀሱዋ።
34 ጾሳይ፥ ሀዋ ታን ናጋደ ታ ማዝጎብያን አታማበይክታ?
35 ኡንቱንቱ ባሻ ጋላሳይ ማታቴዳ፤ ኡንቱንቱ ቦላ ጋካናባይ ኤሌሌ። ሄ ዎደ ኡንቱንቱ ገዲ ꬉበታና። ታን ኡንቱንቶ ሀሉዋ ከሳናነ ኩሽያ ዛራና ያጌዳ።
36 ኡንቱንቱ ዎልቃይ ዳቡሬዳዋነ ኡንቱንታካ ማድያዌ ባይናዋ በኤዳ ዎደ፥ መꬍና ጎዳይ ባረ አሳዉ ፕርዳና፤ ባረ ቆማቶካ ቃረታና።
37 እ ኡንቱንታ ሀዋዳን ያጋና፤ ኡንቱንቱ አማነትያ ኡንቱንቱ ጾሳቱ ሀቃነ? ኡንቱንቱ ባቃቲደ አ ግዶን ቆሰትያ ኡንቱንቱ ዛላይ ሀቃነ?
38 ኡንቱንቱ ያርሹዋ ሞꬉዋ ሜዳዋንቱ፥ ኡንቱንቱ ኡሻ ያርሹዋ ዎይንያ ኤሳ ኡሼዳዋንቱ ሀእ ደንዲደ፥ አነ ኡንቱንታ ማድኖ፤ አነ ኡንቱንታ አሽኖ።
39 ጾሳይ ታናቴ። ታ ጻላላይ ጾሳ። ታፐ አትና፥ ሀራ ጾስ ባዋ። ዎꬍያዌ፥ ደኡዋካ እምያዌ ታና፤ ታን ማዱጽሳደ፥ ታን ፓꬃና፤ ታ ኩሽያፐ ኦንነ አሸና።
40 ታ ኩሽያ ፑደ ደንꬃደ ሀዋዳን ያጋና፤ “ታን መꬍናዉካ ደኦ።
41 ጶሉጶሉ ግያ ታ ማሻ ሌፋደ፥ ፕርዳናዉ ታ ኩሽያን ኦይቂያ ዎደ፥ ታ ሞርከቱዋ ቦላ ታ ሀሉዋ ከሳና፤ ታና እጽያዋንቶ ኡንቱንቱ ኩሽያ ዛራና።
42 ታ ዎንዳፈቱ ኡንቱንቱ ሱꬃን ማꬆታና፤ ታ ማሻይካ ኡንቱንቱ አሹዋ ማና። ታና እጽያ ኡባካ ማርከ። ሀራይ አቶ ማዱጼዳዋንቱነ ኦሞደቴዳዋንቱካ ሀይቃና” ያጋና ያጌዳ።
43 ህንተኖ ካዉተꬃቶ፥ ጾሳ አሳና ናሸትተ። እ ባረ ቆማቱ ሱꬃ አቻና፤ ባረ ሞርከቱዋ ቦላንካ ሀሉዋ ከሳና። ቢታን ደእያ ባረ አሳ ናጋራካ አቶ ጋና ያጌዳ።
44 ሙሴነ ኔዌ ናአይ ኢያሱ እስራኤልያ አሳ ስሲደ፥ ሀ ማዝሙርያ ቃላ ኡባ ሃሳዬድኖ።
ሙሴ እሜዳ ዉርሰꬃ ዞርያ
45 ሙሴ ሀ ቃላ ኡባ እስራኤልያ አሳ ኡባዉ ኦድ ዉርሴዳ ዎደ፥
46 ኡንቱንታ ሀዋዳን ያጌዳ፤ “ሀ ህግያ ቃላ ኡባ ኡንቱንቱ ናጋናዳንነ ኦꬃናዳን ህንተ ናናቱዋ አዛዛና ማላ፥ ሀች ታ ህንተንቶ ማርካትያ ቃላ ኡባ ህንተ ዎዛናን ዎꬅተ።
47 ሀ ቃላይ ህንተንቶ ደኦፐ አትና፥ ጮ መላ ቃላ ግደና። ሀ ቃላ ናጎፐ፥ ህንተ ዮርዳኖሳ ፕኒደ ላታና ቢታንካ አዱሳ ላይꬃ ደአና” ያጌዳ።
48 ሄ ጋላሳንካ መꬍና ጎዳይ ሙሳ ሀዋዳን ያጌዳ፤
49 “ሞኣበን እያርኮ ካታማፐ ስንꬃ ባጋና ደእያ አባርማ ደረቱዋፐ እቱዋ፥ ህን ናቦ ደርያ ከሳ፤ ሄዋን እስራኤልያ አሳ ታ ላትሳና ካናነ ቢታ ሄፍንꬃ ጼላ።
50 ነ እሻ አሮን ሆራ ደርያን ሀይቂደ፥ ባረ ማይዛ አዎቱዋን ጋከቴዳዋዳን፥ ኔንካ ሀ ከሴዳ ደርያን ሀይቃደ፥ ነ ማይዛ አዎቱዋን ጋከታና።
51 አያዉ ጎፐ፥ ህንተ ላኡካ እስራኤልያ አሳ ስንꬃን ታዉ አማነትበይክታ፤ ጺና መላ ቢታን፥ ቃዴሳ ካታማ ማታን ደእያ ማሪባ ሃꬃ ማታን፥ ታ ጌሻተꬃ እስራኤልያ አሳ በስበይክታ።
52 ሄዋ ድራዉ፥ ቢታ ሃኩዋን ሄፍንꬃ ጼላናፐ አትና፥ ታን እስራኤልያ አሳ ላትሳና ቢታ ገላካ” ያጌዳ።