7
ደኡዋባ ቆፕያዋ
1 ጋቲ አልኦ ግዴዳ ሎኦ ሽቱዋፐ ሎኦ ሱንꬃይ አꬌ፤ የለትያ ጋላሳፐካ ሀይቂያ ጋላሳይ ሎአ።
2 ግብራ ጎልያ ብያዋፐ፥ ዬኮ ጎልያ ብያዌ ሎአ፤ አያዉ ጎፐ፥ አሳ ኡባ ዉርሰꬃይ ሀይቆ፤ ፓጻ ደእያ አሳይካ ሄዋ ባረ ዎዛናን ዎꬃናዉ ኮሼ።
3 ሚቻፐ ካዩ ኬካ፤ አያዉ ጎፐ፥ ካዩ ሶምኡዋ ካረጽሶፐካ ዎዛና ፖእሴ።
4 ኡባ ገደ ናሸችያዋ ጻላላ ቆፕያ ኡራይ ደኦፐ፥ ሄ ኡራይ ቦዛ፤ ሽን ጭንጫ አሳይ ሀይቁዋባካ ቆፔ።
5 ኤያቱ ሳቢደ የጽያ የꬃ ስስያዋፐ፥ አꬌዳ ኤራንቻ አሳይ ሴርያ ሴራ ስስያዌ ሎአ።
6 ኤያ ሚቻይ፥ ሱፓ አጉንꬃ ታማን የግና ኤጺደ ꬉእያዋ ማላ። ሄዌካ ቃይ መላ።
7 ሱገꬃ ኦሱ አꬌዳ ኤራንቻ ቦዛ ከሴ፤ ማጋንጻ አሳፐ አክያዌካ ዎዛና ባይዜ።
8 አይ የዎ ግዶፐነ፥ ዶመꬃፐ ዉርሰꬃይ ኬካ፤ ቃይ ኦቶራንቻ ኡራፐካ ዳንዳያንቻ ኡራይ ኬካ።
9 ሀንቁ አዛላቱ ሀሉዋ ከሳናዉ ጎኤትያ ሚሻ ግድያ ድራዉ፥ ኤለ ሀንቀቶፓ።
10 “ሀእ ዎድያፐ ካሰ አꬌዳ ዎዲ አያዉ ኬካ ግዴዴ?” ጋደ ኦቾፓ፤ አያዉ ጎፐ፥ ሄዋ ማላ ኦሻይ አꬌዳ ኤራንቻ ግያ አሳይ ኦችያ ኦሻ ግደና።
11 ሀ ሳኣን አሳይ ኡባይ አꬌዳ ኤራንቻ ግዳናዉ ኮሼ፤ አያዉ ጎፐ፥ አꬌዳ ኤራተꬃ ደምያዌ ማጹዋ ላትያዋፐ ጉጸና።
12 ሚሻይ አሳ ኢታፐ ካሚደ አሽያዋዳን፥ አꬌዳ ኤራተꬃይካ አሼ። ሽን፥ አꬌዳ ኤራተꬃይ ሚሻፐ ዳርያዌ፥ እ አሳዉ ደኡዋ እማናዉ ዳንዳይያዋና።
13 አነ ጾሳይ ኦꬄዳዋ አኬካ! ጾሳይ ጌላዬዳባ ኦን ሱርሳናዉ ዳንዳዪ?
14 ነዉ ኡባባይ ጊጌዳ ዎድያን ናሸታ፤ ቃይ መቱ ጋክያ ዎድያንካ አኬካ፤ አያዉ ጎፐ፥ ናሸቻ ግድና፥ መቶ ግድና፥ ጾሳይ የድያ ዎድያን ዬ። ሽን ሀቃዌ ካሰቲደ ያነንቶ፥ ኔን ኤራካ።
15 ሀ መላ ግዴዳ ላይꬃን ታዋን ዳሮባ ታን በኣድ። ሄዌካ፥ ጌላይ ባረ ጌላተꬃ ኦꬂደ፥ አዱሳ ላይꬃ ደእያ ዎደ፥ ጽሎተꬃ ኦꬅያ ጽሉ ቃንꬃ ላይꬃን ሀይቄ።
16 ሄዋ ድራዉ፥ ኔን ኤለ ꬋየናዳን፥ ሎይꬅ ዳሮ ጽሉዋ ዎይ ሎይꬅ ዳሮ አꬌዳ ኤራንቻ ግዶፓ።
17 ቃይ ዎዲ ባይናን ኔን ሀይቀናዳን፥ ኡባ ባላ ኢታነ ግዶፓ፤ ኡባ ሞጆጃ ኤያነ ግዶፓ።
18 ሀ ኡባንካ ጾሳዉ ያይያ ኡራይ፥ መቶ ኡባፐ ጾኑዋን ከሳናዉ ዳንዳይያ ድራዉ፥ ኔን ዳሮ ኢታ ዎይ ዳሮ ጽሉዋነ ግደናን ግዶ አሳ ግዳ።
19 አꬌዳ ኤራተꬃይ አꬌዳ ኤራንቻቶ እምያ ዎልቃይ ታሙ ካታማቱዋ ሞድያ አሳቶ ዎልቃፐ ዳሬ።
20 ጽሎባ ጻላላ ኦꬂደ፥ ናጋራ ኦና አሳይ ሀ ሳኣ ቦላን ባዋ።
21 አሳይ ሃሳይያ ቃላ ሙልያ ሀይዛደ ፖላና ጎፓ፤ ኔን ሙልያ ሀይዛና ጎፐ፥ ነ ቆማይ ኔና ሸቂሽን፥ ኔን ስሳና።
22 ቃይ ኔንካ ነ ሁጲያን ሀራቱዋ ሸቄዳዋ ነ ዎዛናይ ኤሬ።
23 ሀዋ ኡባ ታን አꬌዳ ኤራተꬃን ፕልጋደ ጼላድ፤ ያታደ፥ “ታንካ አꬌዳ ኤራንቻ ግዳና” ያጋድ። ሽን ታን ጌዳዋዳን ሀንቤና።
24 አꬌዳ ኤራተꬃይ ኡባ ገደካ ሃኩዋን ደእያዋነ ጪማባ፤ ያትና፥ አ ቆሪደ ደማናዉ ዳንዳይያዌ ኦኔ?
25 ታን ኤራናዉ፥ ፕልጋ ጼላናዉነ አꬌዳ ኤራተꬃነ የዉዋ ኡባ ዉርሰꬃ ኤራናዉ፥ ቃይ ናጋራይ ኤያተꬃ ግድያዋነ ኤያተꬃይካ ጎሻ ግድያዋ ኤራናዉ፥ ታ ዎዛናን ዩሻ ዩሻደ ቆፓድ።
26 ታን ሀይቁዋፐ አꬊደ ጫምያ ሀራ እትባ ፕልጋ ጼላደ ደማድ፤ ሄዌካ፥ እዝ ዎዛናይ ጲረ ዎይ እግር ብራታ ግድና፥ እዝ ኩሺ ሳንሳላታ ማላ ግዴዳ እት ማጫ ምሽራትባ። ጾሳ ናሸችያ ኡራይ ኢፐ ከስ አካና፤ ሽን ናጋራንቻ አ ባረ ጲርያ ዋጻደ ኦይቃና።
27 ኤራንቻይ ሀዋዳን ያጌዳ፤ “ታን ካላ ካላደ፥ ፕልጋ ጼላደ፥ ሀራ ደሜዳዌ ሀዋ።
28 ሄዌካ፥ ታን ሀች ጋካናዉ ኮያደ ደማቤናዋ። ሻኡ አቱማ አሳ ግዶፐ ቦንቹ በስያ እት አሳ ጻላላ ደማድ፤ ሽን ማጫ አሳ ግዶፐ እትኖነ ደማናዉ ዳንዳያበይከ።
29 ታን ቆራደ ደሜዳ ሀራባይ፥ ጾሳይ አሳ ሱረ ቆፋይ ደእያዋንታ ኦꬂደ መꬌዳ፤ ሽን አሳይ ዳሮ ሂላ ኦግያ ኮዪደ ቤዳ” ያጌዳ።