ያናዉ ደእያ ጌሻ ጎልያነ ቢታ ሳፃ
40
(40:1—48:35)
ህዝቄል ሳጻን የሩሳላመ ቤዳ
1 ኑን ኦሞደቴዳ ላታማነ እቼሸንꬃ ላይꬃን፥ የሩሳላመ ጾነቴዳ ታማነ ኦይደንꬆ ላይꬃን፥ ኦራꬃ ላይꬃይ ገሌዳ ኮይሮ አግናን ታማንꬃ ጋላሳን፥ መꬍና ጎዳ ዎልቃይ ታ ቦላ ደኤ። እ ታና ደንꬂደ የሩሳላመ አፌዳ።
2 ጾሳ ሳጻን እ ታና እስራኤልያ ቢታ አፊደ፥ እት ዳሮ ꬎቃ ደርያ ሁጲያን ኤሴዳ። ሄ ደርያፐ ገድሳ ባጋና ካታማ ማላትያ ግምቢያ ጎለቱዋ በኣድ።
3 እ ታና ያ አኪደ አፌዳ፤ ታን ናስያ ብራታዳን ጶልያ እት ብታንያ በኣድ። ሄ ብታኒ ሊኑዋፐ ኦሰቴዳ ሜትርያነ ልክያ ጻምኣ ኦይቂደ፥ ድርሳ ፐንገን ኤቄዳ።
4 እ ታና ሀዋዳን ያጌዳ፤ “ላ አሳ ናአዉ፥ ኔና ታን ሀ ሳኣ አሄዳዌ ታን ኔና በስያዋ ኡባ ኔን ምንሳ አኬካናሳ። ሄዋ ድራዉ፥ ነ አይፍያን ጼላ፤ ነ ሀይꬃን ስሳ፤ ነ ዎዛናን ዎꬃ። ኔን በእያዋ ኡባ እስራኤልያ አሳዉ ኦዳ” ያጌዳ።
አዋይ ዶልያ ባጋ ፐንግያ
5 ታን ጌሻ ጎልያ ኡባና ዩይ አꬌዳ ድርሳ ግምቢያ በኣድ። ሄ ብታንያ ኩሽያን ልክያ ኡሱፑን አዱሳ ዋꬋ ጻምአይ ደኤ። እት አዱሳ ዋꬋይ እት ዋꬋ ቦላ ኦይዱ ብራቱዋ ጉጄዳዋ። እ ግምቢያ ልኬዳ፤ ግምቢያዉ ጌሳይ 6 ዋꬋ፤ ጎምፓይካ 6 ዋꬋ ግዴዳ።
6 ሄዋፐ ጉይያን፥ አዋይ ዶልያ ባጋና ደእያ ድርሳ ፐንግያኮ ቤዳ። ደꬃቱዋ ፑደ ከሲደ፥ ፐንግያ ጎጭላ ልክና 6 ዋꬋ ግዴዳ።
7 ሄዋፐ አꬍና፥ ሎሱነ ኡሸቻናነ ሀድርሳና ፐንግያ ናግያዋንቱ ኤቂያ ሄዙ ሄዙ ክፍለቱ ደኢኖ፤ እት እት ክፍሊ 6 ዋꬋ አዱሳነ 6 ዋꬋ አካ። ኡንቱንቱ ግዶን ደእያ ጎዳቱ 5 ዋꬋ ኦርዱዋ። ፐንግያ ናግያዋንቱ ክፍለቱዋፐ ያ ባጋና፥ ጌሻ ጎልያ ጼልያ ባራንዳ ጎጭላይ 6 ዋꬋ።
8 ሄዋፐ ጉይያን፥ ሄ ብታኒ ገልያሳ ባራንዳ ልኬዳ፤ 8 ዋꬋ ግዴዳ።
9 ሄዌ ጌሻ ጎልያ ጼልያ ፐንግያ ዉርሰꬃን ደኤ። ሄ ባራንዳ ቆስለꬃቱዋ ኦርዶተꬃይ ላኡ ላኡ ዋꬋ።
10 አዋይ ዶልያ ባጋ ፐንግያን ሶ ባጋና፥ ገልያ ሎሱዋ ፐንግያ ናግያዋንቱ ክፍለቱ፥ ሀ ባጋና ሄዙ ያ ባጋና ሄዙ ደኢኖ። ኡንቱንቱ ጎምፓይ ኡባዌካ ቃራ፤ ኡንቱንታ ሻክያ ድርሳ ግምቢያ ኦርዶተꬃይካ ቃራ።
11 ሄዋፐ ጉይያን፥ ሄ ብታኒ ድርሳ ፐንግያ አꬍያ ሳኣ ጎምፓ ልኬዳ፤ ኡባና 10 ዋꬋ ግዴዳ። ፐንገቱዋፐ ግዱዋን ደእያ ሎሱ 13 ዋꬋ።
12 እት እት ፐንግያ ናግያዋንቱ ክፍልያ ስንꬃን ደእያ ግምቢያ ጌሳይ እት ዋꬋ፥ ጎምፓይካ እት ዋꬋ ግዴዳ ጎዳይ ደኤ፤ ናግያዋንቱ ክፍለቱ ላኡ ባጋናካ ኡሱፑን ኡሱፑን ዋꬋ።
13 ሀፍንꬃን ደእያ ናግያዋንቱ ክፍለቱዋ ጉየ ጋጻፐ ሄፍንꬃን ደእያ ናግያዋንቱ ክፍለቱዋ ጉየ ጋጻ ጋካናዉ ደእያ ሳኣ ልክና 25 ዋꬋ ግዴዳ።
14 ሄ ብታኒ ዳባባ ጼልያ ዉርሰꬃ ክፍልያ ልክና 20 ዋꬋ ግዴዳ።
15 ፐንግያ ገልያ ሳፐ ቢደ፥ ህን ዉርሰꬃን ደእያ አ ባራንዳ ጋካናዉ ደእያ አዱሳተꬃይ 50 ዋꬋ።
16 ክፍለቱዋ ኡባን ካረ ባጋ ጼልያ ጉꬃ ጉꬃ ማስኮተቱ ደኢኖ፤ ቃይ ክፍለቱዋፐ ግዱዋን ደእያ ጎዳዉካ ማስኮተቱ ደኢኖ። ያነ ሃነ ሻክያ ጎዳቱዋ ቦላን ዛምባ ምስሊ መት ኡቴዳ።
ካረ ዳባባ
17 ሄዋፐ ጉይያን፥ ሄ ብታኒ ታና ካረ ዳባባኮ አፌዳ። ሄዋን ታን ዳባባ ዩሹዋን ሹቻ ሂጸቴዳ ባሱዋነ ሄ ባሱዋ ዩሹዋን ኬጸቴዳ ሀታሙ ክፍለቱዋ በኣድ።
18 ሹቻይ ሂጸቴዳ ባሱ ዳባባ ዩሹዋ ኡባ ጋኬዳ፤ ሄዌ ካረ ዳባባይ ግዶ ዳባባፐ ዝቄ።
19 ግዶ ዳባባኮ ጋꬅያ፥ ꬎቃን ኦሰቴዳ፥ ድርሳ ፐንጊ ደኤ። ሄ ብታኒ ላኡ ፐንገቱዋፐ ግዱዋን ደእያ ሳኣ ልክና ሁጲሳ ባጋነ ገድሳ ባጋ ጎምፓይ 100 ዋꬋ ግዴዳ።
ሁጲሳ ፐንግያ
20 ሄዋፐ ጉይያን፥ ሄ ብታኒ ታና ሁጲሳ ባጋ አፌዳ። ሁጲሳ ባጋ ጼልያ ድርሳ ፐንግያ ጉታራነ ጎምፓ እ ልኬዳ። ሄ ድርሳ ፐንጊ ካረ ዳባባኮ ጋꬅያዋ።
21 ሎሱዋፐ ኡሸቻነ ሀድርሳ ባጋና ደእያ ሄዙ ሄዙ ናግያዋንቱ ክፍለቱ፥ ኡንቱንቱፐ ግዱዋን ደእያ ጎዳቱነ አ ባራንዳይ ኮይሮ አዋይ ዶልያ ፐንግያ ባጋን ልኬዳዋንቱና ብጸ ላገ ግዴድኖ። ድርሳ ፐንግያ ጉታራይ ኡባና 50 ዋꬋ፤ ጎምፓይካ 25 ዋꬋ።
22 ባራንዳይ፥ ማስኮተቱነ መቴዳ ዛምባ ምስሊ ካሰ አዋይ ዶልያ ፐንግያ ባጋን በኤዳዋንቱና እት ማላ። ያ ጋꬅያ ላፑን ደꬃቱ ደኢኖ። ባራንዳይ ዳባባ ስንꬃን ዉርሰꬃ ባጋና ደኤ።
23 አዋይ ዶልያ ባጋዳን፥ ሀ ሁጲሳ ባጋንካ ግዶ ዳባባዉካ ሀራ ፐንጊ ደኤ። ሄ ብታኒ ሀ ላኡ ድርሳ ፐንገቱዋፐ ግዱዋን ሳኣ ልክና 100 ዋꬋ ግዴዳ።
ገድሳ ፐንግያ
24 ሄዋፐ ስሚደ፥ ሄ ብታኒ ታና ገድሳ ባጋ ድርሳ ፐንገ ካለꬅና ባደ፥ ሄዋን ሀራ ድርሳ ፐንግያ በኣድ። እ አ ልክያ ዎደ፥ ግዶ ግምበቱዋነ ሀራቱዋ ልክና እካ ሀራቱዋ ኬሻ ግዴዳ።
25 ልክያ ሀራቱዋዳን፥ ሀ ድርሳ ፐንግያ ማታን ደእያ ክፍለቶ ኡባዉ ማስኮተቱ ደኢኖ። ድርሳ ፐንግያ አዱሳተꬃይ 50 ዋꬋ፤ ጎምፓይካ 25 ዋꬋ።
26 ያ ጋꬅያ ላፑን ደꬃቱ ደኢኖ። ባራንዳይ ዳባባ ስንꬃን ዉርሰꬃ ባጋና ደኤ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ።
27 ግዶ ዳባባዉካ ሀራ ፐንጊ ደኤ። ሄ ብታኒ ሀ ላኡ ድርሳ ፐንገቱዋፐ ግዱዋን ደእያ ሳኣ ልክና 100 ዋꬋ ግዴዳ።
ግዶ ዳባባዉ ገድሳ ባጋ ፐንግያ
28 ሄ ብታኒ ታና ገድሳ ድርሳ ፐንግያ ባጋና ህን ግዶ ዳባባኮ አፌዳ። እ ድርሳ ፐንግያ ልክና፥ ሀራ ፐንገቱዋና ልከ ግዴዳ።
29 ሄዎ ናግያዋንቱ ክፍለቱ፥ ጎዳቱነ ባራንዳቱ ኡባይ ሀራ ድርሳ ፐንገቱዋና እት ማላ። ሄ ድርሳ ፐንግያ ዩሹዋን ክፍለቱዋ ኡባዉ ማስኮተቱ ደኢኖ። ሀ ፐንግያ አዱሳተꬃይ 50 ዋꬋ፤ ጎምፓይካ 25 ዋꬋ።
30 አ ዩሹዋን ባራንዳቱ ደኢኖ፤ ኡንቱንቱ አዱሳተꬃይ 25 ዋꬋ፤ ጎምፓይካ 5 ዋꬋ።
31 ሄ ባራንዳቱ ካረ ባጋ ዳባባ ጼሊኖ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። ያ ጋꬅያ ሆስፑን ደꬃቱ ደኢኖ።
ግዶ ዳባባዉ አዋይ ዶልያ ባጋ ፐንግያ
32 ሄ ብታኒ ታና አዋይ ዶልያ ባጋ ድርሳ ፐንግያና ህን ግዶ ዳባባኮ አፌዳ። እ ሄ ድርሳ ፐንግያ ልክና፥ ሀራ ፐንገቱዋና ልከ ግዴዳ።
33 ናግያዋንቱ ክፍለቱ፥ ጎዳቱነ ባራንዳይ ኡባይ ሀራ ድርሳ ፐንገቱዋና እት ማላ። ሄ ድርሳ ፐንግያ ዩሹዋን ደእያ ክፍለቱዋ ኡባዉ ማስኮተቱ ደኢኖ። ሄ ፐንግያ አዱሳተꬃይ 50 ዋꬋ፤ ጎምፓይካ 25 ዋꬋ።
34 ባራንዳይ ካረ ባጋ ዳባባ ጼሌ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። ያ ጋꬅያ ሆስፑን ደꬃቱ ደኢኖ።
ግዶ ዳባባዉ ሁጲሳ ባጋ ፐንግያ
35 ሄ ብታኒ ታና ሁጲሳ ባጋ ድርሳ ፐንግያኮ አፌዳ። እ ሄ ድርሳ ፐንግያ ልክና፥ እካ ሀራ ፐንገቱዋና ልከ ግዴዳ።
36 ናግያዋንቱ ክፍለቱ፥ ጎዳቱነ ባራንዳይ ኡባይ ሀራ ድርሳ ፐንገቱዋና እት ማላ። ሄ ድርሳ ፐንግያ ዩሹዋን ማስኮተቱ ደኢኖ። ሄ ፐንግያ አዱሳተꬃይ 50 ዋꬋ፤ ጎምፓይካ 25 ዋꬋ።
37 ባራንዳይ ካረ ባጋ ዳባባ ጼሌ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። ያ ጋꬅያ ሆስፑን ደꬃቱ ደኢኖ።
ያርሹዋ ጊግስያ ክፍለቱዋ
38 ካረ ዳባባዉ ሁጲሳ ባጋና፥ ግዶ ድርሳ ፐንግያ ባራንዳና ኦይቀቴዳ፥ ሀራ ክፍሊካ ደኤ። ጹግያ ያርሾ አህያ መህያ አሹ ሜጨትያዌ ሄ ክፍልያና።
39 ሄ ባራንዳን ሀ ባጋና ላኡ ጻርጴዛቱ፥ ያ ባጋናካ ላኡ ጻርጴዛቱ ደኢኖ፤ ጹግያ ያርሾ፥ ናጋራ ያርሾነ ናቁዋ ያርሾ ሹክያ መህያ ኡባይ ሹከትያዌ ሄ ጻርጴዛቱዋ ቦላና።
40 ባራንዳፐ ካረ ባጋና ሁጲሳ ድርሳ ፐንግያ ማታን ላኡ ጻርጴዛቱ ሀ ባጋና፥ ላኡ ጻርጴዛቱ ያ ባጋና ደኢኖ።
41 ሄዋ ድራዉ፥ ያርሾ ሺቄዳ መሂ ሹከትያ ኡባና ሆስፑን ጻርጴዛቱ ደኢኖ፤ ኡንቱንቱፐ ኦይዳቱ ባራንዳን ደኢኖ፤ ኦይዳቱ ቃይ ካረ ዳባባን ደኢኖ።
42 ቃይ ጹግያ ያርሹዋ ዎꬃናዉ ጊግሴዳ፥ ሹቻፐ ማሰቲደ ኦሰቴዳ ኦይዱ ጻርጴዛቱ ደኢኖ። ኡንቱንቶ ጌሳይ እት ዋꬋ፤ አዱሳተꬃይ እት ዋꬋነ ታካ፤ ቃይ ጎምፓይካ እት ዋꬋነ ታካ። ጹግያ ያርሹዋነ ሀራ ያርሾቱዋ ኡባ ሹክያ ሚሻቱ ሄ ጻርጴዛቱዋ ቦላን ኡቲኖ።
43 ኦይዱ ብራꬍያ አዱቂያ ካቂያ ማጋቱ ጎዳ ቦላ ዩይ አꬊደ ꬍሸት ኡቴድኖ። ያርሾ ሺሽያ አሹ ኡባይ ሄ ጻርጴዛቱዋ ቦላ ዎꬌ።
44 ሄዋፐ ጉይያን፥ ሄ ብታኒ ታና ግዶ ዳባባ ገልሴዳ። ሄዋን ፐንገቱ ግዶ ዳባባኮ ዶየትያ ላኡ ክፍለቱ ደኢኖ። ኡንቱንቱፐ እት ክፍሊ ሁጲሳ ድርሳ ፐንግያ ማታና ገድሳ ባጋ ጼሌ፤ ላኤንꬁ ቃይ ገድሳ ድርሳ ፐንግያ ማታና ሁጲሳ ባጋ ጼሌ።
45 ሄ ብታኒ ታና ሀዋዳን ያጌዳ፤ “ገድሳ ባጋ ጼልያ ክፍሊ ጌሻ ጎልያን ኦꬅያ ቄሳቱ ዋ።
46 ሁጲሳ ባጋ ጼልያ ክፍሊ ቃይ ያርሽያሳን ኦꬅያ ቄሳቱ ዋ። ቄሳቱ ኡባይ ጻዶቃ ያራፐ የለቴዳ ሌዋቱዋ፤ መꬍና ጎዳኮ ሺቂደ፥ አስ ኦꬃናዉ በሲኖ ጌተቴዳዌ ኡንቱንቱ ጻላላ” ያጌዳ።
ግዶ ዳባባነ ጌሻ ጎልያ
47 ሄ ብታኒ ዳባባ ልክና አዱሳተꬃይ 100 ዋꬋ፥ ጎምፓይካ 100 ዋꬋ ግዴዳ። ዳባባን ጌሻ ጎልያፐ ስንꬃ ባጋና እት ያርሽያሳይ ደኤ።
48 ሄዋፐ ጉይያን፥ እ ታና ጌሻ ጎልያ ባራንዳ አፌዳ። ባራንዳ ገልያ ቆስለꬃ ልክና ጌሳይ 5 ዋꬋ፤ ጎምፓይካ 14 ዋꬋ። ሀድርሳናነ ኡሸቻና ደእያ ጎዳቱዋ ኦርዶተꬃይ ሄዙ ሄዙ ዋꬋ ግዴዳ።
49 ባራንዳ አዱሳተꬃይ 20 ዋꬋ፤ ጎምፓይካ 12 ዋꬋ። ያ ጋꬅያ 10 ደꬃቱ ደኢኖ። ገልያሳን ኡሸቻናነ ሀድርሳና ኤቄዳ ላኡ ቱቀቱ ደኢኖ።