20
ታሙ አዛዛቱዋ
1 ጾሳይ ሀ ቃላቱዋ ኡባ ሀዋዳን ያጊደ ሃሳዬዳ፤
2 “ኔና ግብጼፐ አይለተꬃ ጋድያፐ ከሴዳ መꬍና ጎዳይ ነ ጾሳይ ታና።
3 “ታፐ አትና፥ ሀራ ጾሳዉ ጎይኖፓ።
4 “ቦላ ሳሉዋን ደእያ፥ ዎይ ጋርሳ ሳኣን ደእያ፥ ዎይ ሳኣፐ ጋርሳን ሃꬃ ግዶን ደእያ አያነ ማላትሳደ ነዉ ጎይንያ ምስለቱዋ ኦꬆፓ።
5 ኡንቱንቶ ሆኮፓ ዎይ ኡንቱንቶ ጎይኖፓ። አያዉ ጎፐ፥ ታን፥ መꬍና ጎዳይ ነ ጾሳይ ቃናታንቻ ጾሳ፤ ታና እጽያዋንታ አዎቱዋ ናጋራ ድራዉ፥ ናና ሄዘንꬆ የለታነ ኦይደንꬆ የለታ ጋካናዉ ሙርያዋ።
6 ቃይ ታና ሲቅያነ ታ አዛዙዋ ናግያዋንቶ ሻአ የለታይ ጋካናዉ ላመተና ሲቁዋ በስያ መꬍና ጎዳ።
7 “መꬍና ጎዳ ነ ጾሳ ሱንꬃ ጮ ደንꬆፓ፤ አያዉ ጎፐ፥ ጾሳይ ባረ ሱንꬃ ጮ ደንꬅያዋ ሙራና።
8 “ጌሻ ኦꬃደ፥ ሳምባታ ጋላሳ ናጋ።
9 ኔን ኦꬅያ ኦሱዋ ኡባ ኡሱፑን ጋላሳቱዋን ኦꬃ።
10 ሽን ላፑንꬃ ጋላሳይ መꬍና ጎዳ ነ ጾሳዉ ሳምባታ። ሄ ጋላስ አይ ኦሱዋነ ኦꬆፓ፤ ኔን፥ ዎይ ነ አቱማ ናአይ፥ ዎይ ነ ማጫ ናና፥ ዎይ ነ ማጫነ አቱማ ቆማቱ፥ ዎይ ነ ሚዛይ፥ ዎይ ህንተንቱና ደእያ እስራኤልያ ግደና አሳይ ሄ ጋላሳን አይ ኪታካ ኪተቶፖ።
11 አያዉ ጎፐ፥ ኡሱፑን ጋላሳ ግዶን መꬍና ጎዳይ ሳሉዋነ፥ ሳኣ፥ አባነ ኡንቱንቱ ግዶን ደእያ ኡባ መꬌዳ፤ ሽን ላፑንꬃ ጋላሳን ሸምፔዳ። ሄዋ ድራዉ፥ መꬍና ጎዳይ ሳምባታ ጋላሳ አንጄዳነ ጌሼዳ።
12 “መꬍና ጎዳይ ነ ጾሳይ ነዉ እምያ ቢታን ነ ላይꬃይ አዱቃና ማላ፥ ነ አባነ ነ ዳዮ ቦንቻ።
13 “አሳ ዎꬎፓ።
14 “ዎሹሞፓ።
15 “ዉኦፓ።
16 “ነ ሾሩዋ ቦላን ዎርዱዋ ማርካቶፓ።
17 “ነ ሾሩዋ ጎልያ አሞቶፓ፤ ነ ሾሩዋ ማቻቶ፥ ዎይ አ ቆማ፥ ዎይ አ ቆማቶ፥ ዎይ አ ቦራ፥ ዎይ አ ሀርያ፥ ዎይ አዉ ደእያዋ አያነ አሞቶፓ” ያጌዳ።
አሳ ያሻ
(ዛረ. 5:22-33)
18 አሳይ ኡባይ ጉጉንꬃይ ጉጉምያዋነ ዋልቃንꬃይ ዎልቃምያዋ በኤዳ፤ ማላካታ ዋሱዋ ስሴዳ፤ ቃይ ደሪ ጩዋትያዋካ በኤዳ፤ አሳይ ያሻን ኮኮሪደ፥ ሃኩዋን ኤቄዳ።
19 ኡንቱንቱ ሙሳ፥ “ኔን ኑዉ ሃሳያ፤ ኑን ስሳና፤ ሽን ኑን ሀይቀናዳን፥ ጾሳይ ኑዉ ሃሳዮፖ” ያጌድኖ።
20 ሙሴ አሳ፥ “ጾሳይ ህንተንታ ፓጫናዉ፥ ናጋራ ህንተንቱ ኦና ማላ፥ አ ያሻይ ህንተንቱ ዎዛናን ደአናዳን፥ እ ዬዳ ድራዉ ያዮፕተ” ያጌዳ።
21 አሳይ ሃክ ኤቂደእሽን፥ ጾሳይ ደእያ ሳኣ ዎልቃማ ꬉማኮ ሙሴ ሺቄዳ።
ያርሽያ ሳአቱዋን ጎኤትያ ዎጋቱዋ
22 ሄዋፐ ጉይያን፥ መꬍና ጎዳይ ሙሳ፥ “እስራኤልያ አሳዉ ሀዋዳን ያጋደ ኦዳ፤ ‘ታን ሳሉዋፐ ህንተንቶ ሃሳዬዳዋ ህንተንቱ ህንተንቱ ሁጲያዉ በኤድታ።
23 ታ ማታን አይ ኤቃነ ኦꬆፕተ፤ ብራ ኤቃ ዎይ ዎርቃ ኤቃ ህንተንቶ ኦꬆፕተ።
24 “ ‘ኔን ታዉ ያርሹዋ ያርሽያ ሳኣ ኡርቃፐ መꬋደ ነ ጹግያ ያርሹዋ፥ ነ እትፐተꬃ ያርሹዋ፥ ነ ዶርሳቱዋነ ነ ዴሻቱዋፐ ነ ሚዛቱዋ አ ቦላ ያርሻ። ታ ሱንꬃይ ቆፈታና ማላ ኦꬄዳ ሳኣ ኡባን፥ ታን ህንተንቱኮ ያደ፥ ህንተንታ አንጃና።
25 ኔን ታዉ ያርሹዋ ያርሽያ ሳኣ ሹቻፐ መꬎፐ፥ ማሰቴዳ ሹቻፐ መꬎፓ፤ አያዉ ጎፐ፥ ኔን ማስያ ሚሻን አ ቦቾፐ፥ ነ አ ቱንሳሳ።
26 ታ ያርሹዋ ሳኣ ፑደ ጋይያን ከሶፓ፤ አያዉ ጎፐ፥ ኔን ከስያ ዎደ፥ ነ ካሉ ቤተ’ ያጋደ ኦዳ።