15
መꬍና ጎዳይ አብራመና ጫቀቴዳ
1 ሄዋፐ ጉየ፥ መꬍና ጎዳ ቃላይ ሳጻን አብራመኮ ዪደ፥ “አብራማ፥ ያዮፓ! ታን ነዉ ጎንዳለ፤ ነ ጋቲ ሎይꬅ ዳራ” ያጌዳ።
2 አብራመ፥ “አቤት ኡባ ሞድያ መꬍና ጎዳዉ፥ ታዉ ኡባካ ናእ ባይና ድራዉ፥ ኔን እምያ ጋቲ ታዉ አይሴ? ደማስቆ ኤልኤዛር ታና ላታና ሽን” ያጌዳ።
3 ቃይካ አብራመ፥ “ኔን ታዉ ናኣ እማባካ፤ ሄዋ ድራዉ ታ ሶን ደእያ ቆማይ ታና ላትያዋ” ያጌዳ።
4 መꬍና ጎዳ ቃላይ አኮ ዪደ፥ “ሀ ቆማይ ኔና ላተና፤ ሽን ነ ጉልባታፐ ከስያዌ ኔና ላታና” ያጌዳ።
5 ስሚደ ካረ አ ከሲደ፥ “ሳሉዋ ፑደ ጼላ፤ ኔን ጾልንተቱዋ ፓይዳናዉ ዳንዳዮፐ ፓይዳ፤ ነ ዘረꬃይካ ሀዋ ኬሻ ግዳና” ያጌዳ።
6 አብራሞ መꬍና ጎዳ አማኔዳ፤ መꬍና ጎዳይ ሄዋ አዉ ጽሎተꬃዳን ፓይዴዳ።
7 መꬍና ጎዳይ ቃይካ አ፥ “ታን ኔን ሀ ቢታ ላታና ማላ ነዉ እማናዉ ኡር ግያ ካላዳዌቱዋ ካታማፐ ኔና ከሳ አሄዳ መꬍና ጎዳቴ” ያጌዳ።
8 ሽን አብራሞ አ፥ “አቤት ኡባ ሞድያ መꬍና ጎዳዉ፥ ታን ሀ ቢታ ላታናዋ አያን ኤሮ?” ያጌዳ።
9 መꬍና ጎዳይ አ፥ “ሄዙ ላይꬃ ኡሳ፥ ሄዙ ላይꬃ ዴሻ፥ ሄዙ ላይꬃ ዶርሳነ ላኡ ቆሞ ሀራጰቱዋ ታዉ አካደ ያ” ያጌዳ።
10 እ ሀዋንታ ኡባ አዉ አፌዳ፤ ኡንቱንታ ጳልቂደ ላኡ ከሴዳ፤ ላኡዋ ከሴዳዋ እቱዋ እቱዋ ባጋን ዎꬄዳ፤ ሽን ካፎቱዋ ላኡ ከስ ጳልቂቤና።
11 ሄ ዎደ አንኮቱ ሄ አሹዋ ቦላ ዎꬌድኖ፤ ሽን አብራመ ኡንቱንታ የደርሴዳ።
12 አዋይ ዉልያ ዎደ አብራማ ዎልቃማ ገምእሹ ኦይቄዳ፤ ꬍጵ ጌዳ ꬉማይ አ ቦላ ዎꬌዳ።
13 ያትና መꬍና ጎዳይ አ፥ “ነ ዘረꬃይ ሀራ ጋድያን በተ ግዲደ ደአናዋ ኔን ቱሙፐ ኤራ፤ ኡንቱንቱ አይለቲደ ኦይዱ ጼቱ ላይꬃ ናቀታና።
14 ሽን አይለዪደ ኡንቱንታ ሞድያ ካዉተꬃ ታን ሙራና፤ ሄዋፐ ጉየ፥ ኡንቱንቱ ዳሮ አቁዋና ሄ ቢታፐ ከሳና።
15 ኔና ግዶፐ፥ ኔን ነ ማይዛ አዎቱዋኮ ሳሮተꬃን ባና፤ ኔን ሎይꬃ ጭማደ ሀይቃናነ ሞገታና።
16 ሽን ኦይደንꬆ የለታን ነ ዘረꬃይ ሀ ጋድያ ስማና፤ አያዉ ጎፐ፥ አሞረቱ ናጋራይ ብሮ ልክያ ጋክቤና” ያጌዳ።
17 አዋይ ዉልና ሳአይ ꬉሜዳ፤ ጮጭያ ጩዋይነ ታማ ላጩ አኬከናን ቤቲደ፥ ሄ ላኡ ከስ ጳልቀቴዳዋንቱፐ ግዱዋና አꬌዳ።
18 ሄ ጋላስ መꬍና ጎዳይ አብራመና ሀዋዳን ያጊደ ጫቁዋ ጫቀቴዳ፤ “ግብጼ ሻፋፐ ዶሚደ ኤፍራጺሳ ግያ ዎልቃማ ሻፋ ጋካናዉ፥ ሀ ቢታ ታን ነ ዘረꬃዉ እማድ፤
19-21 ሀ ቢታይ ቄናቱዋ፥ ቀኒዘቱዋ፥ ቃድሞነቱዋ፥ ሂተቱዋ፥ ፓርዘቱዋ፥ ራፋየቱዋ፥ አሞረቱዋ፥ ካናነቱዋ፥ ገርጌሰቱዋነ ያቡሳቱዋ ቢታ” ያጌዳ።