27
ይሳቅ ያቆባ አንጄዳ
1 ይሳቅ ጭምና፥ አ አይፊ ጼላ እጼዳ ዎደ፥ ባረ ባይራትያ ናኣ ኤሳ ጼሲደ አ፥ “ታ ናአዉ” ያጌዳ።
እ፥ “አቤ” ጊደ ኮዬዳ።
2 እ፥ “በአ፥ ሀእ ታን ጭማድ፤ ታን ሀይቃና ጋላሳ ኤርከ።
3 ያትያ ድራዉ፥ ሀእ ነ ሻንካትያ ዎንዳፍያነ ዙቢያ አካደ፥ ባዙዋ ባ፤ ዶኣ ታዉ ሻንካታደ፥ አሹዋ አካደ ያ።
4 ማልኦ ቁማ፥ ታን ዶስያዋ ካꬃደ አꬃ፤ ሄዌነ ታን ሀይቃናፐ ካሰ ኔና አንጃናሳ” ያጌዳ።
5 ርብቃ ይሳቅ ባረ ናኣ ኤሳዉ ኦድያ ዎደ ስሳዱ። ኤሳይ ዶኣ ሻንካቲደ አሀናዉ ባዙዋ ቤዳዋፐ ጉየ፥
6 ርብቃ ባረ ናኣ ያቆባ፥ “ነ አዉ ነ እሻ ኤሳዉ፥
7 ‘ዶኣ ሻንካታ አሃደ፥ ታዉ ማልኦ ቁማ ታን ማናዉ ካꬃ፤ ሄዌነ ታን ሀይቃናፐ ካሰታደ፥ መꬍና ጎዳ ስንꬃን ኔና አንጃናሳ’ ያግያዋ ታን ስሳድ።
8 ታ ናአዉ፥ ሀእ ታን ኔና አዛዝያዋ ሎይꬃደ ስሳ።
9 ዉድያ ጋርሳ ባደ፥ ላኡ ቦልትቦልታ ዴሻ ማራቱዋ ታዉ አካደ ያ፤ ታን ነ አቦው ማልኦ ቁማ እ ዶስያዋዳን ካꬃና።
10 ነ አዉ ሚደ ሀይቀናን ካሰቲደ ኔና አንጃና ማላ፥ አዉ አꬃሳ” ያጋዱ።
11 ሽን ያቆብ ባረ አቶ ርብቆ፥ “ታ እሻ ኤሳ ቦላን እስኪ ደኤ፤ ሽን ታ ቦላይ ሊቆ።
12 ታ አዉ ታና ኦይቂ በኦፐ ሽን? ታን አ ጭምያዋ አዉ ማላትና፥ ታን አንጁዋ ድራዉ ሸቃ ታ ቦላ አሀነንቶነ” ያጌዳ።
13 አ ዳያ አ፥ “ታ ናአዉ፥ ሄ ሸቃይ ታና ጋኮ። ታን ነዉ ኦድያዋ ኦꬃ፤ ባደ ዴሻ ማራቱዋ ታዉ አካደ ያ” ያጋዱ።
14 ብ አሂደ ባረ ዳይዉ እሜዳ፤ አ ዳያ ማልኦ ቁማ አ አዉ ዶስያዋዳን ካꬃዱ።
15 ሄዋፐ ጉየ፥ ርብቃ ሶን ባረ ማታን ደእያ ባረ ባይራ ናኣ ኤሳ ማዩዋ ሎኡዋ አሃደ፥ ባረ ቴፋ ናኣ ያቆባ ማይዛዱ።
16 ቃይ ሄ ዴሻቱዋ ጋልባ አ ኩሽያነ አ ሊቆ ቆꬍያ ማይዛዱ።
17 ባረ ካꬄዳ ማልኦ ቁማነ ኡክꬃ ባረ ናኣ ያቆባ ኩሽያን ዎꬃዱ።
18 ያትና እ ባረ አዉዋኮ ቢደ ገሊደ፥ “ታ አዎ” ያጌዳ።
እ፥ “አቤ! ታ ናአዉ፥ ኔን ኦኔ?” ያጌዳ።
19 ያቆብ ባረ አዉዋ፥ “ታን ነ ባይራ ናኣ ኤሳ፤ ኔን ታና አዛዜዳዋዳን ታን ኦꬃድ፤ ደንዳ፤ ደንዳ ኡታደ፥ ታን ሻንካፐ አሄዳዋ ማ፤ ያታደ ታና አንጃ” ያጌዳ።
20 ይሳቅ ባረ ናኣ፥ “ታ ናአዉ፥ ዋታ ኤሌላ ደማድ?” ያጊደ ኦቼዳ።
እ፥ “መꬍና ጎዳይ ነ ጾሳይ ታና ማዴዳ” ያጌዳ።
21 ይሳቅ ያቆባ፥ “ታ ናአዉ፥ ኔን ቱሙ ታ ናኣ ኤሰንቶነ ታን ኦይቃ በአናዉ አነ ታኮ ሺቃ” ያጌዳ።
22 ያቆብ ባረ አዉዋ ይሳቃኮ ሺቅና ኦይቂ በኢደ፥ “ሀ ቃላይ ያቆባ ቃላ፤ ሽን ኩሺ ኤሳ ኩሽያ” ያጌዳ።
23 አ ኩሺ አ እሻ ኤሳ ኩሽያዳን እስክያና ደእያ ድራዉ፥ ኤርቤና፤ እ ኤረናን አ አንጄዳ።
24 አ፥ “ቱሙ ኔን ታ ናኣ ኤሰዬ?” ያጊደ ኦቼዳ።
እ፥ “ኤ፥ ታናቴ” ያጌዳ።
25 እ፥ “ታ ናአዉ፥ ታን ኔን ሻንካቴዳዋ ማናዉ ሃ አꬃ፤ ማደ ታን ኔና አንጃና” ያጌዳ። ያቆብ አꬅና፥ እ ሜዳ፤ ቃይ እ አዉ ዎይንያ ኤሳ አህና ኡሼዳ።
26 ሄዋፐ ጉየ አ አዉዋ ይሳቅ፥ “ታ ናአዉ፥ ሃያ፤ ሺቃደ ታና የራ” ያጌዳ።
27 ያቆብ ሺቂደ አ የሬዳ፤ ይሳቅ አ ማዩዋ ስንግ ስሲደ፥ ሀዋዳን ያጊደ አንጄዳ፤ “ታ ናኣ ፔኑ መꬍና ጎዳይ አንጄዳ ጎሻዳን ሳዌ።
28 ጾሳይ ሳሉዋ ጮኩዋነ ሳኣ ሽጫ፥ ካꬃነ ኦራꬃ ዎይንያ ኤሳ ዳርሲደ ነዉ እሞ።
29 ካዉተꬃቱ ነዉ ሞደትኖ፤ አሳቱ ነዉ ጉልባትኖ። ኔን ነ እሻቶ ጎዳ ግዳ፤ ነ አት ዛራቱ ነዉ ጉልባትኖ። ኔና ሸቂያዌ ሸቀቴዳዋ ግዶ፤ ኔና አንጅያዌ አንጀቴዳዋ ግዶ” ያጌዳ።
30 ይሳቅ ያቆባ አንጅ ዉርሴዳዋፐ ጉየ፥ ያቆብ ባረ አዉዋ ይሳቃ ስንꬃፐ ከሶዋን ኤሳይ ሻንካፐ ፑቱ ጌዳ።
31 እካ ቃይ ማልኦ ቁማ ካꬂደ፥ ባረ አዎ አꬄዳ። አ፥ “ታ አዎ፥ ደንዳ፤ ደንዳ ኡታደ፥ ታን ሻንካቴዳዋፐ ማ፤ ያታደ ታና አንጃ” ያጌዳ።
32 አ አዉ ይሳቅ አ፥ “ኔን ኦኔ?” ያጊደ ኦቼዳ።
እ፥ “ታን ነ ናኣ፥ ነ ባይራ ናኣ ኤሳ” ያጌዳ።
33 ይሳቅ ዳጋሚደ ኮኮሪደ፤ “ያትና ዶኣ ሻንካቴዳዋ አኪደ ታዉ አꬄዳዌ ኦኔ? ታን ሀእ ኔን ያና ስንꬃን ማደ፥ አ አንጃ ድጋድ፤ ቱሙካ እ አንጀቴዳዋ ግዳናዋ” ያጌዳ።
34 ኤሳይ ባረ አዉዋ ቃላ ስሴዳ ዎደ፥ ባረ ቃላ ꬎቁ ኦꬂደ፥ ዳሮ ይባታ ዬኩዋ ዬኪደ ባረ አዉዋ፥ “ታና አንጃ፤ ታ አዎ፥ ታናካ አንጃ!” ያጌዳ።
35 ሽን እ፥ “ነ እሻይ ዪደ ጭሚደ፥ ነ አንጁዋ አክ ድጌዳ” ያጌዳ።
36 ኤሳይ፥ “አ ኤሪደ ያቆባ ሱንꬄዳ፤ እ ታና ጭሞደ፥ ሀዌ ላኤንꬁዋ፤ እ ታ ባይራተꬃ አኬዳ፤ ቃይ ሀእ ታ አንጁዋ አኬዳ” ያጌዳ። ቃይ እ፥ “ኔን ታዉ አንጁዋፐ አያነ አሻበይኪ?” ያጊደ ኦቼዳ።
37 ይሳቅ ኤሳ፥ “ታን አ ነዉ ጎዳ ኦꬃድ፤ አ እሻቱዋ ኡባካ አ ቆማቱዋ ኦꬃድ፤ ቃይ ታን ካꬃንነ ኦራꬃ ዎይንያ ኤሳን አ ምንሳድ። ያትና፥ ታ ናአዉ፥ ነዉ ታን አያ ኦꬆ?” ያጌዳ።
38 ኤሳይ ባረ አዉዋ፥ “ታ አዎ፥ ነዉ እት አንጆ ጻላላይ ደኢ? ታ አዎ፥ ታናካ ቃይ አንጃ” ያጌዳ። ሄዋፐ ጉየ፥ ኤሳይ ባረ ቃላ ꬎቁ ኦꬂደ ዬኬዳ።
39 አ አዉዋ ይሳቅ ዛሪደ፥
“ነ ደእያ ሀ ሳኣ ዱረተꬃፐ ሃካደ ደአና፤
ሳሉዋ ጮኩካ ነዉ ዎና፤
40 ኔን ነ ማሻን አቃና፤
ኔን ነ እሻዉ ሞደታና።
ሽን ኔን አናና ኤቀትያ ዎደ፥
አ ሞርገ ምꬃ ነ ሞርግያፐ ኦላና” ያጌዳ።
41 ያቆባ አ አዉ አንጄዳ ድራዉ፥ ኤሳይ ባረ ኡሉዋን አ ሞርኬዳ፤ እ ባረ ዎዛናን፥ “ታ አዉ ሀያና ማቴዳ፤ ታን አዉ ካዮታ ስማደ፥ ታ እሻ ያቆባ ዎꬋና” ያጌዳ።
42 ሽን ርብቃ ሀ ባረ ባይራ ናኣ ኤሳ ቃላ ስሴዳ ድራዉ፥ ባረ ቴፋ ናኣ ያቆባ ጼስሳ አሃደ ሀዋዳን ያጋዱ፤ “ነ እሻይ ኤሳይ ኔና ዎꬊደ ሀሉዋ ከሳናዉ ሀልቼዳ።
43 ሀያና ታ ናአዉ፥ ታን ነዉ ኦዶዋ ኦꬃ። ደንዳ! ካራነን ደእያ ታ እሻ ላባናኮ ባቃታ!
44 ያታደ ነ እሻ ሀንቁ ዶቻና ጋካናዉ፥ አማሬዳ ዎድያ አናና ደአሻ።
45 ነ እሻይ ነዉ ሀንቀትያዋ አግያ ዎደነ፥ ኔን አ ቦላ ኦꬄዳዋ እ ዶግያ ዎደ፥ ታን ኪታደ ኔና ያፐ አህሳና። ታን እት ጋላስ ህንተንቱ ላኡዋፐ መላ ከሳና ኮይከ” ያጋዱ።
ይሳቅ ያቆባ ላባናኮ የዴዳ
46 ሄዋፐ ጉየ ርብቃ ይሳቃ፥ “ኤሳይ አኬዳ ሂተቱዋ ማጫ ናና ጋሱዋን ታን ታ ደኡዋ ሸነታድ፤ ቃይ ያቆብካ ሀዋንቱ ማላ ሂተቱዋ ማጫ ናናቱዋፐ ማቻቶ አኮፐ፥ ታን ስም ሀይቃናዉ ኮያድ” ያጋዱ።