አዳማፐ ኖሀ ጋካናዉ
4
(ዶመꬃ 4:1—5:32)
ቃዬላነ አቤላ
1 አዳም ባረ ማቻት ሄዋንና አቄዳ፤ እዛ ሻሃሮ ዎደ አቱማ ናኣ የላዱ፤ “መꬍና ጎዳይ ታና ማድና፥ አቱማ ናኣ ደማድ” ጋደ አ ቃዬላ ሱንꬃዱ።
2 ቃይ አ እሻ አቤላ የላዱ።
አቤል ዶርሳ ሄሜ፤ ቃይ ቃዬል ቢታ ጎሼ።
3 ኡንደና ዎድያፐ ጉየ፥ ቃዬል ባረ ጋደን ዶልያ ካꬃፐ መꬍና ጎዳዉ ያርሹዋ ያርሼዳ፤
4 ሽን አቤል ባረ ዶርሳ ዉድያ ግዶን ባይራ የለቴዳ ማራቱዋፐ አክ ሹኪደ፥ ኡንቱንቱ አሹዋፐ ሞꬍያዋ ያርሼዳ። መꬍና ጎዳይ አቤላነ አ ያርሹዋ አኬዳ፤
5 ሽን ቃዬላነ አ ያርሹዋ አክቤና። ሄዋ ድራዉ፥ ቃዬል ሎይꬅ ይሎቴዳ፤ ባረ ዴሙዋካ ꬉምሴዳ።
6 ያትና መꬍና ጎዳይ ቃዬላ፥ “አያዉ ይሎታይ? ነ ዴሙካ አያዉ ꬉሜዴ?
7 ኔን ሎኦባ ኦꬆዋ ግድንቶ፥ ነ ሶምእ ፓሽከኔ? ሽን ኔን ሎኦባ ኦꬃና ꬋዮፐ፥ ናጋራይ ዶኣዳን ነ ፐንግያን ሙጌ፤ እ ኔና ሞዳና ኮዬ፤ ሽን ኔን አ ጾናና በሴ” ያጌዳ።
8 ሄዋፐ ጉየ፥ ቃዬል ባረ እሻ አቤላ፥ “አነ ደምባ ቦይተ” ያጌዳ። ኡንቱንቱ ደምባን ደእሽን፥ ቃዬል ባረ እሻ አቤላ ቦላ ደንዲደ ዎꬌዳ።
9 መꬍና ጎዳይ ቃዬላ፥ “ነ እሻይ አቤል ሀቃኔ?” ያጊደ ኦቼዳ።
ቃዬል ዛሪደ፥ “ታን ኤርከ፤ ታ እሻ ናግያዌ ታኔየ?” ያጌዳ።
10 መꬍና ጎዳይ ቃዬላ፥ “ሀዋ አያዉ ኦꬃድ? በአ፤ ነ እሻ ሱꬃይ ቢታፐ ታኮ ዋሴ።
11 ነ ኩሽያፐ ነ እሻ ሱꬃ አኪደ፥ ምታናዉ ሀንጌዳ ቢታፐ ሀእ ኔን ሸቀቴዳዋ።
12 ኔን ጎሽናካ ቢታይ ነዉ አይፈና፤ በትያዳን ኔን ሳኣ ቦላን ቶይላካታናሳ” ያጌዳ።
13 ቃዬል መꬍና ጎዳ፥ “ፖራ! ኔን ታና ሙርያ ሙራይ ታን ኡባካ ዳንዳየናዋ።
14 ሄኮ ኔን ታና ሀቼ ሀ ቢታፐ የደርሳሳ፤ ታን ነ ስንꬃፐ ቆሰታና፤ በትያዳን ታን ሳኣ ቦላን ቶይላካታና፤ ታና ደሞዌ ኦንነ ዎꬋና” ያጌዳ።
15 መꬍና ጎዳይ አ፥ “ኔና ኦንነ ዎና፤ ዎꬎፐ፥ ነ ሀሉዋ አን ላፑን ኩሽያ ከሳና” ያጌዳ። ሄዋ ድራዉ፥ ደሞዌ ኦንነ አ ዎናዳን መꬍና ጎዳይ አ ቦላ ማላታ ዎꬄዳ።
16 ቃዬል መꬍና ጎዳ ስንꬃፐ ከሲደ፥ ኤደነ ባጋፐ አዋይ ዶልያ ባጋና ደእያ ኖዳ ቢታን ደኤድኖ።
ቃዬላ የለታ
17 ቃዬል ባረ ማቻትና አቄዳ፤ እዛ ሻሃሮ ዎደ ሄኖካ የላዱ። ቃዬል ካታማ ሄ ዎደ ኬጺደ፥ ሄ ካታማ ባረ ናኣ ሱንꬃን “ሄኖካ” ጊደ ሱንꬄዳ።
18 ሄኖክ እራዳ የሌዳ፤ እራድ ማሁያኤላ የሌዳ፤ ማሁያኤል ማቱሻኤላ የሌዳ፤ ማቱሻኤል ላሜካ የሌዳ።
19 ላሜክ አዶነ ጺሎ ግያ ላኡ ማቻቱዋ ዳዉꬃ አኬዳ።
20 አዳ ያባላ የላዱ፤ ያባል መህያ ሞድያ፥ ዱንካንያን ደእያ አሳቱዋ አዉዋ።
21 አ እሻ ሱንꬃይ ዩባላ፤ ዩባል ቃይ ዲꬃ ዲጽያነ ኡልዱድያ ፑንያ አሳቱዋ ኡባ አዉዋ፤
22 ጺላ ቃይ ቱባልቃይና ግያ ናኣ የላዱ፤ ቱባልቃይን ናሃስያፐነ ብራታፐ ዱማ ዱማ ሚሻቱዋ ቆጽያዋ። ቱባልቃይና ምቻታ ናእሞ።
23 እት ጋላስ ላሜክ ባረ ማቼቱዋ፥ “አዴ፥ ጺሌ፥ ስስተ፤ ታ ማቻቶ፥ አነ ታን ኦድያዋ ሀይዝተ። እት ብታኒ ታና ደቼዳ ድራዉ፥ ታን አ ዎꬋድ፤ ኤ፥ ታን ሄ ታና ማሱንꬄዳ ዎዳላ ዎꬋድ።
24 ቃዬላ ሀሉዋ ከሳናዉ ላፑን ኩሺ ኮሾፐ፥ ላሜካ ሀሉዋ ከሳናዉ ላፑን ታማነ ላፑን ኩሺ ኮሼ” ያጌዳ።
ሴታነ ሄኖሳ
25 አዳመ ባረ ማቻትና ግስና ሀራ ናኣ የላደ፥ “ቃዬል ዎꬌዳ አቤላ ድራዉ ጾሳይ ታዉ ሀራ ናኣ እሜዳ” ጋደ፥ አ ሴታ ጋደ ሱንꬃዱ።
26 ሴትካ አቱማ ናኣ የሌዳ፤ አ “ሄኖሳ” ጊደ ሱንꬄዳ። አሳይ መꬍና ጎዳ ሱንꬃ ጼሲደ ጎይንያዋ ሄ ዎደ ዶሜዳ።