46
ባብሎና ኤቃቱዋ
1 ቤላ ግያ ባብሎነ ኤቃይ ጎይኔ፤ ናባ ግያ ኤቃይካ ሆኬ። ካሰ ህንተ ቶክያ ኤቃቱ ሀእ ጫና መህያ ቦላን ጫነቲደ፥ ኡንቱንቶ ዴጾ ቶኩዋ ግዴድኖ።
2 ጫና መሄቱ ዴጹዋፐ ደንዴዳዋን፥ ጫናና እትፐ ኩንዴድኖ፤ ኤቃቱ ባረና አሻናዉ ዳንዳየና ድራዉ፥ ባረንቱ ሁጲያዉካ ኦሞደቲደ ቤድኖ።
3 ጾሳይ ሀዋዳን ያጌ፤ “ህንተኖ፥ እስራኤልያፐ አቴዳዋንቶ፥ ያቆባ ዛረቶ፥ ታን ኦድያዋ ስስተ፤ ህንተ የለቴዳ ዎድያፐ ዶማደ ታን ህንተና ቶካድ።
4 ህንተ ጭማና ጋካናዉካ ታን ታናካ፤ ህንተ ፑሉማና ጋካናዉካ፥ ታን ህንተና ማዳና። ታን ህንተና መꬋድ፤ ታን ህንተና ደንꬃና፤ ታን ህንተና ቶካናነ አሻና።
5 “ታና ኦ ማላ ጊተ? ቃይ ኦናና ልኪቴ? ኑን እት ማላ ግዳናዳን፥ ታና ኦናና ጋꬅ ጼሊቴ?
6 ዎርቃ ባረንቱ ቃርጪታፐ ቆልያዋንቱነ ብራ ሚዛናን ዎꬂደ ልክያዋንቱ ሄዋ ኡንቱንቶ ጾሳ ኦꬂደ መꬋና ማላ፥ ዎርቃ ትግያዋ ቃጻሪኖ። እካ ጾሳ ኦꬂደ መꬌ፤ ያትና፥ ኡንቱንቱ ሄ ኤቃ ስንꬃን ሆኪደ ጎይኒኖ።
7 ኡንቱንቱ አ ደንꬂደ፥ ባረንቱ ሀሽያን ቶኪኖ፤ አ ሳኣን አ ዎꬂኖ። ያቶፐ እ ሄዋን ኤቂ አጌ፤ ሄዋፐ ያ ሃ ቃጸና። እት አሳይ አዉ ዋሶፐካ፥ ዛሩዋ እመና፤ ቃይ አ መቱዋፐካ አ አሸና።
8 “ህንተኖ ናጋራንቻቶ፥ ሀዋ ሀሳይተነ ቆፕተ፤ ህንተ ዎዛናን ካሀን ዎꬅተ።
9 በን ዎደ ሀኔዳ የዎቱዋ ሀሳይተ። አያዉ ጎፐ፥ ታን ጾሳ፤ ሀራይ ባዋ። ታን ጾሳ፤ ታ ማላይ ኦንነ ባዋ።
10 ‘ታ ቆፋይ ምናና፤ ቃይ ታንካ ታ ሀልቹዋ ኡባ ፖላና’ ያጋይ። ዉርሰꬃን ትምቢትያ ዶመꬃን፥ ቃይ ብሮ ሀንቤና የዎቱዋ በን ዎድያፐ ዶማደ አዋያይ።
11 አዋይ ዶልያ ባጋፐ ቦንቂያ ካፉዋ፥ ሃኮ ጋድያፐ ታ ቆፋ ፖልያ አሳ ታን ጼሳደ፥ ታን ጌዳዋ ታን ፖላና፤ ታን ሀልቼዳዋካ ታን ኦꬃና።
12 “ህንተኖ ዎዛናይ ሙሜዳዋንቶ፥ ጽሎተꬃፐካ ሃኬዳዋንቶ፥ ታን ኦድያዋ ስስተ፤
13 ታን ታ ጽሎተꬃ ማታ አያይ፤ እካ ሀሳኮ ግደና። ታ አቶተꬃይ ጋምኤና፤ ታን ታ አቶተꬃ ጽዮንዉ፥ ታ ቦንቹዋካ እስራኤልያዉ እማና” ያጌ።