ጾሳ ኦራꬃ ማላልስያ መታ
63
(63:1—66:24)
አይሁዳ ግደና አሳቱዋ ጾሳይ ጾንያ ጾኑዋ
1 ኤዶማ ጋድያን ደእያ ቦጽራ ግያ ካታማፐ ዞኦ ማዩዋ ማዪደ ይያዌ፥ ሄዌ እ ኦኔ? ሀ ፑላና ደእያ ማዩዋ ማዪደ፥ ባረ ዎልቃ ምኖተꬃን ስንꬃዉ ሀመትያዌ ኦኔ?
ጾሳይ፥ “ሄዌ ጽሉዋ ሃሳይያዌነ ዎልቃን አሽያዌ ታና ግድክታ!” ያጌ።
2 ዎይንያ ጉምኢያሳን ዎይንያ የꬍያ ብታንያ ማዩዋዳን፥ ነ ማዩ አያዉ ዞኤዴ?
3 ጾሳይ ሀዋዳን ያጊደ ዛራና፤ “ዎይንያ ጉምኢያሳ ታን ታረካ የꬋድ፤ ካዉተꬃቱዋፐ እት አሳይነ ታናና ባዋ። ታን ኡንቱንታ ታ ሀንቁዋን የꬋድ፤ ታ ይሉዋንካ ኡንቱንታ ድርጸረꬃድ። ኡንቱንቱ ሱꬃይ ታ ማዩዋ ቦላን ꬋጨትና፥ ታ ማዩ ኡባይ ባዬዳ።
4 ታን ታ አሳ ዎዝያ ጋላሳይነ ኡንቱንቱ ሞርከቶ ሀሉዋ ከስያ ላይꬃይ ጋኬዳ።
5 ታን ጼላድ፤ ሽን ታና ማድያ እት አሳይነ ቤትቤና። ማድያዌ ꬋዬዳ ድራዉ፥ ታን ማላለታድ። ሄዋ ድራዉ፥ ታ ቀሲ ታዉ ጾኑዋ አሄዳ፤ ታ ሀንቁካ ታና ማዴዳ።
6 ታን ታ ሀንቁዋን ካዉተꬃቱዋ የꬋድ፤ ታ ይሉዋንካ ኡንቱንታ መንሬꬃድ፤ ኡንቱንቱ ሱꬃካ ታን ጋድያን ጉሳድ” ያጋና።
ጾሳይ እስራኤልያዉ ኬክያ ኬካ
7 መꬍና ጎዳይ ኑዉ ኦꬄዳ ኦሱዋ ኡባ ድራዉ፥ መꬍና ጎዳ አገና ሲቁዋነ አ ጋላታ ታን ኦዳና፤ ኤ፥ ባረ ማሮታንነ ባረ ኬካተꬃ ዳሩዋን እስራኤልያ አሳዉ እ እሜዳ ጮራ ሎኦባ ታን ኦዳና።
8 ጾሳይ ኦዲደ፥ “ኡንቱንቱ ቱሙ ታ አሳቱዋነ ታ ናናቱዋ ግድያ ድራዉ፥ ታና ጭማናዉ ኮይክኖ” ያጌዳ። ሄዋ ድራዉ፥ እ ኡንቱንታ አሽያዋ ግዴዳ።
9 ኡንቱንቱ ዋይያ ኡባን እ ዋየቴዳ። አ ደኡሳ ኪታንቻይ ኡንቱንታ አሼዳ። እ ኡንቱንታ ባረ ሲቁዋንነ ባረ ማሮታን ዎዜዳ። ካሰ አꬌዳ ዎደቱዋ ኡባን እ ኡንቱንታ ደንꬂደ ቶኬዳ።
10 ሽን ኡንቱንቱ ማካሌድኖ፤ አ ጌሻ አያናካ ካዮዬድኖ። ሄዋ ድራዉ፥ እ ስሚደ፥ ኡንቱንቶ ሞርከ ግዴዳ፤ ኡንቱንቱናካ ኦለቴዳ።
11 ሄዋፐ ጉይያን አሳይ በንዋ፥ እ ባረ ቆማ ሙሴ ዎደ ኦꬄዳዋ ሀሳዪደ፥ ሀዋዳን ያጌዳ፤ “ባረ ዉድያ ሄንꬃንቻቱዋናካ ኡባ አባ ግዶና አꬂደ ከሴዳዌ ሀቃን ደኢ? ቃይ ሄ ዎደ ባረ ጌሻ አያና ኡንቱንቱ ግዶን ዎꬄዳዌ ሀእ ሀቃን ደኢ?
12 ባረ ቦንቹዋ ቀስያ ዎልቃማ ዎልቃ ሙሴዉ ኡሸቻ ኩሽያ ግዳናዳን ኪቴዳዌ፥ ባረ መꬍና ሀይꬃ ከሳናዉ፥ ኡንቱንቱ ስንꬃን ደእያ ሃꬃ ሻኬዳዌ፥
13 ኡንቱንቱ ጪሙዋ ግዶና ፕንꬄዳዌ ሀቃን ደኢ?” ያጌድኖ።
ባዙዋና አꬍያ ፓራዳን፥ ኡንቱንቱ ꬉበትበይክኖ።
14 ዎምባ ዱገ ዎꬍያ መህያዳን፥ መꬍና ጎዳ አያናይ ኡንቱንታ ሸምፕሴዳ። ሄዋዳን ኔን ነ ሱንꬃ ቦንችሳናዉ ነ አሳ ካለꬃዳ።
ማሮታነ ማዱዋ ደማናዉ ዎስያ ዎሳ
15 አቤት ጾሳዉ፥ ሳሉዋና ዱገ ጼላ፤ ኔን ደእያ ጌሻነ ቦንቾ ግዴዳ ሳፐ ኤለካ በአ። ኔን ምሸትያ ምሹነ ነ ዎልቃይ አኔ? ነ ዎዛናይ ኑና ላሞትያ ላሞታይነ ነ ቃረታይ ኑፐ ሃኬዳ።
16 አብራሃመ ኑና ኤራና ꬋዮፐካ፥ ያቆብ ኑና አኬከናን ꬋዮፐካ፥ አቤት መꬍና ጎዳዉ፥ ኔን ኑ አዉዋ። በን ዎደፐካ ዶሚደ፥ ነ ሱንꬃይ ኑና ዎዝያዋ።
17 አቤት መꬍና ጎዳዉ፥ ኑን ነ ኦግያፐ ባያናዳን፥ አያዉ ኦꬃዲ? ቃይ ኑን ነዉ ያየናዳን፥ ኑ ዎዛና አያዉ ꬉሌፋያዴ? ጾሳዉ፥ ነ ቆማቱ ድራዉ፥ ነ ቢታ ላቴዳ ዛራቱዋ ድራዉ፥ ኑኮ ስማ።
18 ነ ጌሻ አሳይ ነ ጌሻ ጎልያ ጉꬃ ዎድያዉ ላቴድኖ፤ ሽን ኑ ሞርከቱ አ ዱገ ዛሪደ የꬌድኖ።
19 ኑን በንፐካ ነዋንታ፤ ኡንቱንታ ኔን ሞዳባካ፤ ኡንቱንቱ ነ ሱንꬃን ጼሰትበይክኖ።