2
ኢዮባ ላኤንꬆ ፓጭያ
1 ሀራ ጋላስካ ቃይ ጾሳ ኪታንቻቱ መꬍና ጎዳ ስንꬃን ቤታናዉ ዬድኖ፤ ሴጻናይካ ቃይ ኡንቱንቱና እትፐ አ ስንꬃን ቤታናዉ ዬዳ።
2 መꬍና ጎዳይ ሴጻና፥ “ላ ኔን ሀቃፐ ያድ?” ያጌዳ።
ሴጻናይ መꬍና ጎዳዉ፥ “ሳኣን ኡባን ያነ ሃነ ዩይያሳፐነ ስመረትያሳፐ ያድ” ያጌዳ።
3 መꬍና ጎዳይ አ፥ “ታ ቆማ ኢዮባ አኬካደ በኣድ? ሳኣ ቦላን አ ማላትያ ቶሺ ባይናነ ሱረ አሳይ ሙለካ ባዋ። እ ጾሳዉ ያይያ፥ ኢታባፐካ ሃኬዳ አሳ። ጋሱ ባይናን ታን አ ꬋይሳና ማላ፥ ኔን ታና ደንꬅናካ፥ ሀእ ጋካናዉ እ ባረ ሱረተꬃን ምን ኤቄዳ” ያጌዳ።
4 ሴጻናይ ዛሪደ ጾሳ፥ “ ‘ጋልባ ድራዉ ጋልባ አኮ!’ ያግያዋዳን፥ አሳይ ባረ ሸምፑዋ ድራዉ፥ ባረዉ ደእያዋ ኡባ እማና።
5 ሽን ኔን ነ ኩሽያ የዳደ፥ አ አነ ሾጫ። ያትንቶ እ ኔና ቱሙ ነ ስንꬃን ሸቃና” ያጌዳ።
6 መꬍና ጎዳይ ሴጻና፥ “ኤኖ፥ አ ዎꬎፓፐ አትና፥ አ ቦላ ኔን ኮዬዳዋ ኦꬃናዉ ዳንዳያሳ” ያጌዳ።
7 ሄዋፐ ጉይያን፥ ሴጻናይ መꬍና ጎዳ ስንꬃፐ ከሲደ፥ ኢዮባ ገድያፐ ሁጲያ ጋካናዉ ኢታ ማዱꬃይ አ ቦላ ከሳናዳን ኦꬄዳ።
8 ያትና፥ ኢዮብ ብድንꬃ ቦላ ኡቲደ፥ ኮንኣን ባረና ጎዴዳ።
9 አ ማቻታ አ፥ “ሀእ ጋካናዉካ ኔን ነ ሱረተꬃን ምና ኡታዲ? ጾሳ ሸቃደ ሀይቃ” ያጋዱ።
10 እ ዛሪደ እዞ፥ “ኔን ቦዛ ማጫ አሳዳን ሃሳያዳ። ኑን ጾሳፐ ሎኦባ አክ አኪደ፥ ኢታባ አኮኮየ?” ያጌዳ።
ሀ ኡባንካ ኢዮብ ባረ ጌዳዋን ናጋራ ኦꬅቤና።
ሄዙ ኢዮባ ላገꬃቱ አ በአናዉ ዬድኖ
11 ኢዮባ ላገቱ ሄዛቱ፥ ተማና ቢታፐ ኤልፋዝ፥ ሹሀ ቢታፐ ብልዳድነ ናእማ ቢታፐ ጾፋር ኢዮባ ቦላ ጋኬዳ መቱዋ ስሴዳ ዎደ፥ አዉ ቃረታናዉነ አ ምንꬃናዉ ባረንቱ ሶፐ ባረንቱ ሶፐ ቃገቲደ፥ እትፐ አኮ ዬድኖ።
12 ኡንቱንቱ አ ሃኩዋን ግዲደ ጼልያ ዎደ፥ እ ኢዮባ ግድያዋ ኤርበይክኖ። ጉየፐ አ ግድያዋ ኤሬዳ ዎደ፥ ባረንቱ ቃላ ꬎቁ ኦꬂደ ዬኬድኖ፤ ባረንቱ ማዩዋካ ፔꬊደ፥ ባረንቱ ሁጲያን ባና ቆሌድኖ።
13 ሄዋፐ ጉይያን፥ ኡንቱንቱ አናና ላፑን ጋላሳነ ላፑን ቃማ ቢታን ኡቴድኖ። አ ሳኩ ሎይꬅ ዳሬዳዋ ኡንቱንቱ በኤዳ ድራዉ፥ አዉ አይ አሳይነ ቃላካ ቃትቤና።