28
አꬌዳ ኤራተꬃ ትምርትያ
1 “ብራ ቦክ ከስያሳይነ ዎርቃ ጌሻናዉ ሙሽስያ ሳአይ ደኤ።
2 ብራታይ አሳይ ቢታፐ ቦክና ከሴ፤ ናሃሲካ አ ሹቻ ሙሽስና ከሴ።
3 አሳይ ጾምፕያ አሂደ፥ ꬉማ ጾኔ፤ ቢታ ጪሙዋ ጋኪደ፥ ꬍጵ ጎ ꬉማ ግዶን ሄ ሹቻ ኮዬ።
4 አሳይ ደኢያሳፐ ሃኪደ፥ አሳ ገዲ የꬍ ኤረናሳ ቢደ፥ ሄዋን ጪማ ኦላ ቦኬ፤ ሄዋን ዎዶሩዋን ያነ ሃነ ኩሉሙሺደ፥ አሳፐ ሻከቲደ ደኤ።
5 ካꬃይ ቢታፐ ሞኬ፤ ሽን ሄ ቢታ ግዱ ታማን ሙሺደ፥ አꬍ አꬍ ዎꬌ።
6 ሄ ቢታ ግዶን ደእያ ሹቻፐ ሳምፔርያ ግያ አልኦ ሹቻይ ከሴ፤ አ ባና ግዶፐካ ዎርቃይ ቤቴ።
7 “ሄ ሹቻ ቦክያሳ አፍያ ኦግያ ጽንግሊ ኤረና፤ ጋጪካ በእቤና።
8 ኢታ ዶአቱ ባረንቱ ገድያን ሄ ሳኣ የꬍ ኤርክኖ፤ ጋሙካ ሄዋና አና።
9 “አሳይ ምኖ ዛላ መንሬꬄ፤ ደርያካ ቦኪደ፥ ጻጱዋፐ አꬅ የጌ።
10 ዛላ ሉኪደ፥ አꬍያ ኦግያ ከሲደ፥ ሄ አልኦ ሹቻካ ደሜ።
11 ሃꬃ ፑልቱዋ ቦክኖ፤ ጌሜዳባቱዋካ ፖኡዋ ከሴ።
12 “ሽን አꬌዳ ኤራተꬃይ ሀቃፐ ቤታናዉ ዳንዳዪ? አኬካይ ቤትያ ሳአይ ሀቄ?
13 አሳይ አ ቱሙ ጋትያ ኤረና፤ አያዉ ጎፐ፥ አꬌዳ ኤራተꬃይ ፓጻ ደእያዋንቱ ቢታን ቤታናዉ ዳንዳየና።
14 ጪሙ፥ ‘አꬌዳ ኤራተꬃይ ታ ግዶን ባዋ’ ያጌ፤ አባይካ ታናና ግደና ጌ።
15 “አꬌዳ ኤራተꬃይ ዎርቃን ሻመተና፤ አ ጋቲካ ብራን ጌዳረተና።
16 አꬌዳ ኤራተꬃይ በርተ ዎርቃን፥ ማርግድያነ ሳምፔርያ ጌተትያ አልኦ ሹቻን ሻመተና።
17 ዎርቃይነ ማስቶትያ ኦሰቴዳ ሚሻቱዋ ጋቲ አናና ልከተና፤ ዎርቃፐ ኦሰቴዳ አልኦባንካ ላመተና።
18 አꬌዳ ኤራተꬃ ጋቲ የሌሉዋፐ፥ አልማዝያፐነ እንቁዋ ኡባፐ አꬌ።
19 ቶጳዝዮንያ ግያ ቶጵያ እንቁካ አናና ልከተና፤ በርተ ዎርቃንካ ሻመተና።
20 “ያትና፥ አꬌዳ ኤራተꬃይ ሀቃፐ ዪ? አኬካይ ቤትያ ሳአይ ሀቄ?
21 ፓጻ ደእያ መታ ኡባፐ ጌም ኡቴዳ፤ ሳሉዋ ካፎቱካ አ ደምክኖ።
22 ባሻይነ ሀይቁ፥ ‘ኑን አꬌዳ ኤራተꬃዉ ኦዶ ጻላላ ኑ ሀይꬃን ስሴዶ’ ያጊኖ።
23 “አꬌዳ ኤራተꬃኮ አፍያ ኦግያነ እ ደእያ ሳኣ ኤርያዌ ጾሳ ጻላላ።
24 አያዉ ጎፐ፥ ጾሳይ ሳኣ ጋጻ ኡባ ጼሌ፤ ሳሎቱዋፐ ጋርሳና ደእያዋ ኡባ በኤ።
25 ጾሳይ ጫርኮ ዎልቃ እሜዳ ዎደነ ሻርያ ሃꬃ ልኬዳ ዎደ፥
26 እራይካ ሀቃን ቡካነንቶ፥ ዋልቃንꬃይካ ሀቃን ዎꬋነንቶ ዎጋ ዎꬄዳ ዎደ፥
27 እ ሄ ዎደ፥ አꬌዳ ኤራተꬃ በኢደ ፓጬዳ፤ ሎአ ጌዳ።
28 ሄዋፐ ጉይያን፥ ጾሳይ አሳዉ ኦዲደ፥ ‘ጾሳዉ ያይያዌ አꬌዳ ኤራተꬃ፤ ኢታፐ ሃክያዌካ አኬካ’ ያጌ” ያጌዳ።