4
ድቦሮነ ባራቃ
1 ኤሁድ ሀይቄዳዋፐ ጉይያን፥ እስራኤልያ አሳይ መꬍና ጎዳ ስንꬃን ዛረꬂደካ ኢታባ ኦꬄዳ።
2 ሄዋ ድራዉ፥ መꬍና ጎዳይ ሀጾራ ጌተትያ ካታማን ካተቴዳ ካናነ ካትያ ያብናያዉ ኡንቱንታ አꬂደ እሜዳ፤ አ ኦላንቻቱዋ ጋዳዉ ስሳር ደርያ-ሀሮሼታ-ሀጎዪማ ጌተትያ ካታማን ደኤ።
3 ያብናያ ብራታፐ ኦሰቴዳ ኡዱፑን ጼቱ ፓራ ጋረቱ ደእያ ድራዉነ እ እስራኤልያ አሳ ቃረት ባይናን ላታሙ ላይꬃ ኡቁኔዳ ድራዉ፥ ኡንቱንቱ ማዱዋ ደማናዉ መꬍና ጎዳኮ ዋሴድኖ።
4 ሄ ዎደ ላፕዶታ ማቻታ ድቦራ፥ ትምቢትያ ኦድያና እስራኤልያ ቢታን ፕርድያ ዳናቶ።
5 ድቦራ ኤፍሬማ ገዝያን፥ ራማ ካታማፐነ ቤቴለ ካታማፐ ግዱዋን ደእያ ድቦር ዛምባ ጋርሳን ኡታደ ፕርዳዉ፤ እስራኤልያ አሳይ ባረ የዉዋ ፕርድሳናዉ ኢኮ ዬ።
6 እት ጋላስ ደቦራ አብኖኣማ ናኣ ባራቃ ንፍታሌማ ጋድያን ደእያ ቀዴሻ ካታማፐ ኪታደ ጼስሳዱ፤ “መꬍና ጎዳይ እስራኤልያ ጾሳይ ኔና ሀዋዳን ያጊደ አዛዜ፤ ‘ንፍታሌማ ዛርያፐነ ዛብሎና ዛርያፐ ታሙ ሻአ አሳ አካደ፥ ታቦራ ደርያ ባ።
7 ታን ያብና ኦላንቻቱዋ ጋዳዋይ ስሳር ፓራ ጋረቱዋነ ኦላንቻቱዋ አኪደ፥ ቂሾና ሻፋን ኔናና ኦላ ጋከታናዉ ያናዳን ኦꬃና፤ ታን ነዉ አ አꬃደ እማና’ ያጌ” ያጋዱ።
8 ያትና፥ ባራቅ፥ “ኔን ታናና ቦፐ፥ ታን ባና፤ ሽን ኔን ታናና ባና ꬋዮፐ፥ ታንካ ቢከ” ያጌዳ።
9 አ፥ “ኤኖ፥ ታን ኔናና ባና፤ ሽን መꬍና ጎዳይ ስሳራ ማጫ አሳ ኩሽያን አꬂደ እምያ ድራዉ፥ ሄ ቡሳይ ነዉ ቦንቾ ግደና” ያጋዱ። ደቦራ ደንዳደ፥ ባራቃና ቀዴሻ ባዱ።
10 ባራቅ ንፍታሌማነ ዛብሎና ዘረꬃ ቀዴሻ ጼስና፥ ታሙ ሻአ አሳይ አ ካሊደ ከሴዳ፤ ድቦራካ አናና ባዱ።
11 ሄ ዎደ ሄቤራ ጌተትያ እት ብታኒ ደኤ፤ እ ቄና አሳ፤ እ ሙሴ ቦሉዋ ሆባባ ያራ። እ ሀራ ቄናቱዋፐ ሻከቲደ፥ ቀዴሻኮ ሺቂደ፥ ዛእናኒማን ደእያ ዎላ ማታን ባረ ዱንካንያ ꬎጌዳ።
12 አብኖኣማ ናአይ ባራቅ ታቦራ ደርያ ቤዳዋ ስሳር ስሴዳ ዎደ፥
13 ብራታፐ ኦሰቴዳ ባረ ኡዱፑን ጼቱ ፓራ ጋረቱዋነ ባረናና ደእያ አሳ ኡባ ጼስሲደ፥ ሀሮሼታ-ሀጎዪማፐ ቂሾና ሻፋ ሺሼዳ።
14 ያትና፥ ድቦራ ባራቃ፥ “ደንዳ! ሀቼ መꬍና ጎዳይ ነ ኩሽያን ስሳራ አꬂደ እምያ ጋላሳ። በአ፥ መꬍና ጎዳይ ኔፐ ስንꬃቲደ ቤዳ” ያጋዱ። ሄዋፐ ጉየ ባራቅ ታሙ ሻአ አሳ ካለꬂደ፥ ታቦራ ደርያፐ ዎꬌዳ።
15 መꬍና ጎዳይ ስሳራ፥ አ ፓራ ጋረቱዋ ኡባነ አ ኦላንቻቱዋ ኡባ ቃራ ማሻን ባራቃ ስንꬃፐ ባቃትሴዳ። ያትና፥ ስሳር ባረ ፓራ ጋርያፐ ዎꬊደ፥ ገድያን ባቃቴዳ።
16 ባራቅ ሄ ፓራ ጋረቱዋነ ኦላንቻቱዋ ሀሮሼታ-ሀጎዪማ ጋካናዉ የደርሴዳ። ስሳራ ኦላንቻቱ ኡባይ ቃራ ማሻን ሀይቄድኖ፤ እት አሳይነ አትቤና።
17 ሄ ዎደ ሀጾራ ካትያ ያብን ቄና ሄቤራ ጎለ አሳና ሳሮ ደኤ። ሄዋ ድራዉ፥ ስሳር ገድያን ባቃቲደ፥ ቄና ሄቤራ ማቻት ያኤል ዱንካንያ ጋኬዳ።
18 ያኤላ ስሳራ ሞካናዉ ከሳደ፥ “ታ ጎዳዉ፥ ገላ፤ ሃ ገላ፤ ያዮፓ” ያጋዱ። ዱንካንያ ኢኮ ገልና፥ አ ባረ ቡሉኩዋን ካማዱ።
19 ስሳር፥ “ታና ሳሜ፤ ኡሽያ ጉꬃ ሃꬃ እማርኪ” ያጌዳ። ማꬃ ትግያ ሚሻ ፖካደ ኡሻዱ፤ ያታደ ዛራደ ካማዱ።
20 ሄዋፐ ጉይያን እ እዞ፥ “ዱንካንያ ፐንግያን ኤአ። አይ አሳይ ዪደ፥ ‘ሀዋን አሳይ ደኢ?’ ያጊደ ኦቾፐ፥ ‘ባዋ’ ጋ” ያጌዳ።
21 ስሳር ሎይꬅ ዳቡሬዳ ድራዉ፥ ገምእሹዋ ፓኑሬዳ። ሄቤራ ማቻታ ያኤላ ማዶሻነ ዱንካንያ ꬎግያ ሽካሊያ አካደ፥ ሎዳን አኮ ሺቃዱ፤ ሺቃደ ꬎግያ ሽካልያ ሀይꬃ ካርያን ኤሳደ፥ ማርቴሉዋን ꬍሻደ፥ ቢታና ስክና፥ ስሳር ሀይቄዳ።
22 ባራቅ ስሳራ ኮዪደ ዪና፥ ያኤላ አ ሞካናዉ ካረ ከሳደ፥ “ሃያ፤ ኔን ኮይያ ብታንያ ታን ኔና በሳና” ያጋዱ። እዝና ዱንካንያ ግዶ ገሊደ፥ ስሳራ ሀይꬃ ካርያን ꬎጉ ገልና፥ አ አሃይ ሳኣን ግሴዳዋ በኤዳ።
23 ሄ ጋላስ ጾሳይ እስራኤልያ አሳይ ካናነ ካትያ ያብና ጾናናዳን ኦꬄዳ።
24 እስራኤልያ አሳይ ካናነ ካትያ ያብና ቦላ ምን ምኒደ ቢደ፥ ዉርሰꬃን አ ꬋይሴዳ።