8
ሚድያማቱ ዉርሰꬃ ጾኑዋ ጾነቴድኖ
1 ሄዋፐ ጉይያን፥ ኤፍሬማ አሳይ ጌዶና፥ “ሚድያማቱዋ ኦላናዉ ባደ ኑና አያዉ ጼሳበይኪ? ኑና አያዉ ሀዋዳን ኦꬃዲ?” ያጊደ ሎይꬅ ፓሉመቴድኖ።
2 ሽን ጌዶን ዛሪደ፥ “ታን ኦꬄዳዋፐ ህንተንቱ ኦꬄዳዌ አነየ? ታ ያራቱ አብኤዘራቱ ሺሼዳ ሙለ ካꬃፐ ህንተንቱ ኤፍሬማ ዛራቱ ቆሬዳ ቃርሚ ኬከነየ?
3 ሚድያማቱዋ ካፓቱዋ፥ ኦሬባነ ዛኤባ ጾሳይ ህንተንቱ ኩሽያን አꬂደ እሜዳ። ህንተንቱ ኦꬄዳዋ ማላ፥ ታን አይ ኦꬃናዉ ዳንዳያይታ?” ያጌዳ። እ ሄዋዳን ጊና፥ ኡንቱንቱ ሀንቁዋፐ ዛርቤድኖ።
4 ጌዶንነ አናና ደእያ ሄዙ ጼቱ አሳይ ዮርዳኖሳ ሻፋ ዪደ ፕኔድኖ፤ ኡንቱንቱ አይ ዳቡሮፐካ፥ ባረንቱ ሞርከቱዋ የደርስያዋ አግበይክኖ።
5 የደርሲደ ሱኮታ ጋኬዳ ዎደ፥ ጌዶን ካታማ አሳ፥ “ታ አሳይ ዳቡሬዳ ድራዉ፥ ሀያና አማሬዳ ኡክꬃ እሜርክቴ። ታን ሚድያማቱዋ ካተቱዋ ዘባሀነ ጻልሙናአ የደርሳደ ደአይ” ያጌዳ።
6 ሄዋፐ ጉየ ሱኮታ ካታማ ካፓቱ፥ “ዘባሀነ ጻልሙናአ ኔን ኦሞዳበይካሽን፥ ነ ኦላንቻቶ አያዉ ኡክꬃ እማኔ?” ያጌድኖ።
7 ያትና፥ ጌዶን፥ “ሎአ አይነ ባዋ! መꬍና ጎዳይ ዘባሀነ ጻልሙናአ ታ ኩሽያን አꬂደ እምያ ዎደ፥ ታን መላ ቢታ አጉንꬃንነ ክንድቹዋን ህንተንታ ዋꬋና” ያጌዳ።
8 ሄዋፐ ፓኑኤላ ግያ ሳኣ ቤዳ፤ ያን ደእያ አሳካ ሄ ኦሻ ኦቼዳ። ሽን ፓኑኤላ አሳይካ ሱኮታ ካታማ አሳይ ዛሬዳዋዳን ዛሬዳ።
9 ያትና፥ ፓኑኤላ አሳካ፥ “ታን ጾናደ ሳሮ ስምያ ዎደ፥ ህንተንቱ ካታማ ናግያ ሀ አዱሳ ግምቢያ ላላና” ያጌዳ።
10 ዘባህነ ጻልሙናእ አዋይ ዶልያ ባጋፐ ዬዳ ኦላንቻቱዋፐ አቴዳ ባረንቱ ታማነ እቼሹ ሻአ ኦላንቻቱዋና ቃርቆራ ጌተትያ ካታማን ደኢኖ። ካሰ አዋይ ዶልያ ባጋፐ ዬዳ ኦላንቻቱዋፐ ማሻን ኦለትያ እት እት ጼታነ ላታሙ ሻአ ግድያ ኦላንቻቱ ኦላን ሀይቂ ዉሬድኖ።
11 ጌዶን ኖባሀፐነ ዮግባሀፐ አዋይ ዶልያ ባጋን ደእያ ዛላናቱዋ ጋጻ ኦግያና ቢደ፥ ሄዋን ደእያ ኦላንቻቱዋ ቦላ ኡንቱንቱ አኬከናን ደእሽን ዎራጄዳ፤
12 ኡንቱንቱ ኡባይ ዳጋሜድኖ። ሚድያማ ካተቱ ዘባህነ ጻልሙናእ ላአቱካ ባቃቴድኖ፤ ሽን ጌዶን ኡንቱንታ የደርስ ጋኪደ ኦሞዴዳ።
13 ዮኣሻ ናአይ ጌዶን ኦላፐ ሄሬሳ ፕኑዋና ስሜዳ።
14 ሱኮተፐ እት ዎዳላ ኦይቂደ ኦቼዳ። ዎዳላይ ሱኮታ ካፓቱነ ጭማቱዋ ላፑን ታማነ ላፑናቱዋ ሱንꬃ ጻፊደ አዉ እሜዳ።
15 ሄዋፐ ጉይያን፥ ጌዶን ሱኮታ አሳኮ ዪደ፥ “ ‘ዘባሀነ ጻልሙናአ ኔን ኦሞዳበይካሽን፥ ነ ዳቡሬዳ አሳዉ አያዉ ኡክꬃ እማኔ?’ ጊደ ህንተንቱ ታና ቅሊጬድታ፤ ሽን ዘባሀነ ጻልሙናአ ሀዋንታ በእተ” ያጌዳ።
16 ሄዋፐ ጉይያን፥ መላ ቢታ አጉንꬃንነ ክንድቹዋን ዋꬊደ፤ ሱኮታ ካፓቱዋ ቃጻዬዳ።
17 ቃይ ፓኑኤላን ካታማ ናግያ አዱሳ ግምቢያ ላሊደ፥ ካታማን ደእያ አቱማ አሳ ዎꬌዳ።
18 ያቲደ ጌዶን ዘባሀነ ጻልሙናአ፥ “ህንተንቱ ታቦራን ዎꬌዳ አሳቱ አይ ማሌ?” ያጊደ ኦቼዳ።
ሽን ኡንቱንቱ፥ “ነ ማላ፤ ኡንቱንቱ ኡባይካ ካትያ ናና ማላትኖ” ያጊደ ዛሬድኖ።
19 ጌዶን፥ “ኡንቱንቱ ታ እሻቱዋ፤ ኡንቱንቱ ታ ዳይ ናና። መꬍና ጎዳይ ኤሮ! ህንተንቱ ኡንቱንታ ዎꬍቤናዋ ግድንቶ፥ ታንካ ህንተንታ ዎꬍከ ሽን” ያጌዳ።
20 ባረ ባይራ ናኣ የተራ፥ “ደንዳ ኤቃደ፥ ሀዋንታ ዎꬋ” ያጌዳ። ሄዋፐ ጉየ የተር ብሮ ያላጋ ግዴዳ ድራዉ ያዪደ፥ ባረ ማሻ ሾድቤና።
21 ሄዋፐ ጉይያን፥ ዘባህነ ጻልሙናእ ጌዶና፥ “ደንዳ ኤቃደ፥ ኔን ኑና ዎꬋ። አቱማ አሳ ኦሱዋ ኦꬃናዉ አቱማ አሳ ኮሼ” ያጌድኖ። ያትና፥ ጌዶን ደንዲደ፥ ኡንቱንታ ዎꬌዳ፤ ኡንቱንቱ ጋላቱዋ ቆꬍያን ደእያ አሌቁዋ ኡባ አኬዳ።
22 ሄዋፐ ጉይያን፥ እስራኤልያ አሳይ ጌዶና፥ “ኔን ኑና ሚድያማ አሳፐ አሼዳ ድራዉ፥ ኔን፥ ኔፐ ጉይያን ነ ናአይነ ነ ናኣ ናአይ ኑና ሞድተ” ያጌዳ።
23 ሄዋፐ ጉየ ጌዶን፥ “ታን ህንተንታ ሞድከ፤ ታ ናአይካ ህንተንታ ሞደና፤ መꬍና ጎዳይ ህንተንታ ሞዶ” ያጌዳ።
24 ኡንቱንታ፥ “አነ ታን ህንተንታ እትባ ኦቻይ: ህንተንቱ ኡባይ ኦሞዲደ አሄዳ ሀይꬃ ዎርቃ ታዉ እምተ” ያጌዳ። እስማኤላ አሳዳን፥ ሚድያማ ቢታ አሳቱካ ሀይꬃን ዎርቃ ዎꬂኖ።
25 እስራኤልያ አሳይ ዛሪደ፥ “ኤኖ፥ ኑ እማና” ያጌዳ። አፍላ ሂጺደ አሳይ ኡባይ ባረ ኦሞዴዳ ሀይꬃ ዎርቃ ሂጸቴዳ አፍላ ቦላን ዎꬄዳ።
26 ጌዶን አኬዳ ሀይꬃ ዎርቃይ ላታሙ ኪሎ ግራመ ዴጽያዋ። ሄዌነ፥ ሀራ አሌቂያዋንታ፥ ቆꬍያን አꬅያ ሀብልያ፥ ምድያማቱዋ ካተቱ ማይያ ኦቻ ቴራ ማላትያ ማዮቱዋነ ኡንቱንቱ ጋሎቱዋ ቆꬍያፐ አከቴዳ አሌቂያዋንታ ጉጀናና።
27 ጌዶን ዎርቃፐ ኤፉድያ ጊግሲደ፥ ባረ ደእያ ኦፍራ ካታማን ዎꬄዳ። ጉየፐ እስራኤልያ አሳይ ኡባይ ጾሳ አጊደ፥ ሄ ኤፉድያዉ ጎይኔዳ፤ ጌዶናዉነ አ ሶ አሳዉ ሄዌ ጲረ ግዴዳ።
28 ሄዋዳን ሀኒደ፥ ሚድያማ አሳይ እስራኤልያ አሳዉ ሞደቴዳ፤ ኡንቱንቱ እስራኤልያ አሳ ቦላ ላኤንꬁዋ ደንድበይክኖ። ጌዶን ሀይቃና ጋካናዉ፥ ኦይታሙ ላይꬃ ጋዲ ዎፓ ደሜዳ።
ጌዶና ሀይቁዋ
29 ዮኣሻ ናአይ፥ የሩባኣላ ጌተትያ ጌዶን ባረ ሶ ጉየ ቢደ፥ ባረ ጎለን ደኤዳ።
30 ጌዶን ጮራ ማችያ አኬዳ ድራዉ፥ አዉ ላፑን ታሙ አቱማ ናናይ የለቴድኖ።
31 ቃይ ሰኬማ ካታማን ደእያ ቆማታ አቱማ ናኣ አዉ የልና፥ ሱንꬃ አብመሌካ ያጊደ ሱንꬄዳ።
32 ዮኣሻ ናአይ ጌዶን ሎኦ ጭሚደ ሀይቄዳ፤ ባረ አዉዋ ዮኣሻ ዱፉዋን ሞገቴዳ። ሀ ዱፉ አብኤዘራ ያራቱ ደእያ ኦፍራ ካታማን ደኤ።
33 ጌዶን ሀይቄዳዋፐ ጉይያን፥ እስራኤልያ አሳይ ጾሳፐ ጉየ ስሚደ፥ ባኣላ ጌተትያ ጾሳቶ ጎይኔዳ፤ ባኣል-ባሪታ ጌተትያ ኤቃ ባረንቶ ጾሳ ኦꬄድኖ።
34 ያቲደ እስራኤልያ አሳይ ኡንቱንቱ ዩሹዋን ደእያ ሞርከቱዋ ኡባፐ ኡንቱንታ አሼዳ መꬍና ጎዳ ባረንቱ ጾሳ ሀሳይበይክኖ።
35 ቃይ ጌዶን እስራኤልያ አሳዉ ኦꬄዳ ሎኦ ኦሱዋ ኡባዉ፥ ኡንቱንቱ አ ሶ አሳዉ ኬካን ኩሽያ ዛርበይክኖ።