ቢታ ግሹዋ
13
(13:1—21:45)
ዮርዳኖሳፐ ዶላሃ ባጋና ደእያ ቢታ
(13:1-33)
1 ኢያሱ ጭሚደ፥ ላይꬃ ሎይꬅ ሱጌዳ ዎደ፥ መꬍና ጎዳይ አዉ፥ “ኔን ጭማዳ፤ ላይꬃካ ሎይꬃ ሱጋዳ። ሽን ኦይቀተናን አቴዳ ዳሮ ቢታይ ብሮ ደኤ።
2 ኦይቀትቤና ቢታቱ ሀዋንታ: ፕልስጼማቱዋ ጋድያነ ጋሹራቱዋ ጋድያ ኡባ።
3 ግብጼፐ አዋይ ዶልያ ባጋና ደእያ ሽሆራ ሻፋፐ ዶሚደ፥ ሁጲሳ ባጋና ደእያ ኤቅሮና ጋድያ ጋካናዉ ደእያ ቢታቱ ኡባይ ካናነ ጋድያን ፓይደቲኖ። እቼሹ ፕልስጼማ ካተቱ ሞድያ ካታማቱ ጋዛ፥ አሽዶዳ፥ አስቃሎና፥ ጋታነ ኤቅሮና ጌተትያ። አዎቱዋ ቢታይካ ብሮ ኦይቀትቤና።
4 ገድሳ ባጋና ካናነቱ ቢታይ ኡባይ፥ ሲዶናቶ ደእያ ማኣራ ግያ ሳፐ ደንዲደ ቢደ፥ አሞራዋናቱዋ ጋድያን ደእያ አፌቃ ካታማ ጋካናስካ ኦይቀትቤና።
5 ገባላቱ ቢታይ አዋይ ዶልያ ባጋና ሊባኖሳ ቢታይ ኡባይ፥ ሄርሞነ ደርያፐ ጋርሳ ባጋና ደእያ ባኣል-ጋዳ ካታማፐ ቢደ፥ ሀማታ ፕኑዋ ጋካናዉ ብሮ ኦይቀትቤና።
6 ሊባኖሳፐ ቢደ ምስራፎታ-ማይማ ጋካናዉ ደእያ ገዝያን ደእያ ሲዶናቱዋ ቢታይካ ኦይቀትቤና። ታን ታ ሁጲያዉ እስራኤልያ አሳ ስንꬃፐ ኡንቱንታ ላጋደ ከሳና። ታን ኔና አዛዜዳዋዳን፥ ኔን ሀ ቢታቱዋ እስራኤልያ አሳዉ ጋደ ኦꬃደ ሻካ።
7 ሀእ ኔን ሀ ጋድያ ኡዱፑን ዛረቶነ ምናሰ ዛራቱዋፐ ባጋዉ ሻካ” ያጌዳ።
ዮርዳኖሳ ሻፋፐ አዋይ ዶልያ ባጋ ቢታ ሻኩዋ
8 ምናሰ ዛራቱዋፐ ባጋቱ፥ ሮቤላ ዛራቱነ ጋደ ዛራቱ መꬍና ጎዳ ቆማይ ሙሴ ዮርዳኖሳ ሻፋፐ ሄፍንꬃ አዋይ ዶልያ ባጋና ኡንቱንቶ ግሽ ዎꬄዳ ጋድያ አኬድኖ።
9 ኡንቱንቱ ቢታይ አርኖና ዛንጋራ ጋርሳን ደእያ አሮኤራ ካታማፐ ደንዲደ፥ ሄ ዛንጋራ ግዶን ደእያ ካታማ ኦይቂደ፥ መዳባ ግያ ገዝያ አꬍ ቢደ፥ ድቦና ጋኬ።
10 ቃይ ሀሰቦናን ኡቲደ ሞድያ አሞራዋናቱዋ ካትያ ስሆና ካታማቱዋ ኡባ ኦይቂ ቢደ፥ አሞናቱዋ ዛዋ ጋኬ።
11 ሄዋዳንካ፥ ቃይ ጋላኣደ ጋድያ፥ ጋሹራቱዋ ጋድያ፥ ማእካቱዋ ጋድያ፥ ሄርሞነ ደርያ ኡባነ ሳላካ ጋካናዉ ደእያ ባሳነ ጋድያ ጋኬ።
12 አስታሮታ ካታማንነ ኤድራአ ካታማን ደኢደ ሞድያ፥ ራፋየቱዋ ዛርያፐ ዉርሰꬃን አቴዳ ባሳነ ካትያ ኦጋ ጋድያ ኡባ ኦይቄዳ። ሙሴ ሄ አሳ ኡባ ጾኒደ፥ ኡንቱንቱ ጋድያፐ ላጊደ ከሴዳ።
13 ሽን እስራኤልያ አሳይ ጋሹራ አሳነ ማእካ አሳ ጋድያፐ ከስበይክኖ፤ ሄዋ ድራዉ ኡንቱንቱ ሀቼ ጋካናዉ እስራኤልያ አሳ ግዶን ደኢኖ።
14 ሙሴ ሌዊያ ዛራቱዋ ጻላላዉ ላትያ ጋድያ እምቤና። መꬍና ጎዳይ ሙሴዉ ጌዳዋዳን፥ መꬍና ጎዳይ እስራኤልያ ጾሳዉ ታማን ጹግያ ያርሹዋ ያርሽያዌ ኡንቱንቶ ላታ።
ግሹዋን ሮቤላ ዘረꬃ ጋኬዳ ቢታ
15 ሙሴ ሮቤላ ዛረቶ ኡንቱንቱ ያራን ያራን ጋድያ ሻክ እሜዳ።
16 ኡንቱንቱ ቢታይ አርኖና ዛንጋራ ጋጻን ደእያ አሮኤራ ካታማፐ ደንዲደ፥ ሄ ዛንጋራ ግዶን ደእያ ካታማ ኦይቂደ፥ መዳባ ገዝያ ጋኬ።
17 ቃይ ሀሰቦና፥ ገዝያን ደእያ ካታማቱዋ፥ ድቦና፥ ባሞት-ባኣላ፥ ቤትባኣል-መኦና፥
18 ያሃጻ፥ ቅደሞታ፥ መፋኣታ፥
19 ቅርያታይማ፥ ሲብማ፥ ዛንጋራ ግዶን ደእያ ደርያ ቦላ ደእያ ጼረታ-ሻሀራ፥
20 ቤት-ፓኦራ፥ ፕስጋ ደርያፐ ጋርሳና ደእያ ጋድያነ ቤት-ያሽሞታ ጌተትያ ካታማቱዋ ኡባ ጋኬ።
21 ሄዋዳንካ፥ ቃይ ገዝያን ደእያ ካታማቱዋነ ሀሰቦና ካታማ ሞዴዳ አሞራዋናቱዋ ካትያ ስሆና ጋድያ ኡባ ጋኬ። ሙሴ ካትያ ስሆናነ ምድያማቱዋ ካፓቱዋ ኤዋ፥ ረቄማ፥ ጹራ፥ ሁራነ ረባአ ጾኔዳ፤ ሀዋንቱ ስሆናፐ ጋርሳና ሄ ጋድያ ሞድያዋንታ።
22 እስራኤልያ አሳይ ኦላን ዎꬌዳ አሳፐ ሀራ፥ ሻሬቹዋ፥ ባኦራ ናኣ ባላኣማካ ማሻን ዎꬌድኖ።
23 ሮቤላ ዛራቱዋ ዛዋይ ዮርዳኖሳ ሻፋ። ሀ ካታማቱነ ኡንቱንቱ ሄራን ደእያ ሞꬃቱ፤ ሮቤላ ዘረꬃ ኡንቱንቱ ያራን ያራን ጋኬዳዋንታ።
ግሹዋን ጋደ ዘረꬃ ጋኬዳ ቢታ
24 ሙሴ ጋደ ዛረቶ ኡንቱንቱ ያራን ያራን ጋድያ ሻክ እሜዳ።
25 ኡንቱንቱ ጋዲ ያእዜራ፥ ጋላኣደን ደእያ ካታማቱዋ ኡባነ አሞናቱዋ ጋድያፐ ባጋ አኪደ፥ ራባፐ አዋይ ዶልያ ባጋና ደእያ አሮኤራ ጋኬ።
26 ሄዋዳንካ፥ ሀሰቦናፐ ደንዲደ፥ ራሞታ-ምጽጳነ በጾኒማ ጋኬ፤ ቃይ ማህናይማፐ ደንድ ቢደ፥ ሎዳባራ ዛዋ ጋኬ።
27 ዮርዳኖሳ ዎምባዉ ግዱዋን ሀሰቦና ካትያ ስሆና ካዉተꬃፐ አቴዳዉንታ፥ ቤት-ሀራማ፥ ቤት-ኒምራ፥ ሱኮታነ ጻፎና ጌተትያ ካታማቱዋ አኬዳ። አዋይ ዶልያ ባጋና ኡንቱንቱ ዛዋይ ዮርዳኖሳ ሻፋ ግዲደ ቢደ፥ ጋሊላ አባ ጋኬ።
28 ሄ ካታማቱነ ኡንቱንቱ ሄራን ደእያ ሞꬃቱ ጋደ ዛረቶ ኡንቱንቱ ያራን ያራን ጋኬዳዋንታ።
ግሹዋን ምናሰ ዛራቱዋፐ ባጋ ጋኬዳ ቢታ
29 ሙሴ ምናሰ ዛራቱዋፐ ባካዉ ኡንቱንቱ ያራን ያራን ጋድያ ሻክ እሜዳ።
30 ኡንቱንቱ ቢታይ ማህናይማነ ባሳነ ጋድያ ኡባ ጻጽ ዋጼ፤ ባሳነ ካትያ ኦጋ ካዉተꬃ ኡባነ ባሳነን ደእያ ኡሱፑን ታሙ ያኢራ ካታማቱዋ ኦይቄ።
31 ቃይ ጋላኣደፐ ባካነ ባሳነን ኦጋ ካዉተꬃይ ሁጰ ግዴዳ አስታሮታነ ኤድራአ ጌተትያ ካታማቱዋ ጋኬ። ሄ ኡባይ ምናሰ ናኣ ማኪና ዛራቱዋፐ ባጋቶ፥ ኡንቱንቱ ያራን ያራን ጋኬዳዋ።
32 ዮርዳኖሳፐ ሄፍንꬃና፥ ያርኮፐ አዋይ ዶልያ ባጋና ደእያ ሞኣበ ደምባን ደኢደ ሙሴ ሻክ እሜዳ ጋዲ ሀዋ።
33 ሽን ሙሴ ሌዊያ ዛረቶ ላትያ ጋድያ እምቤና፤ ካሰ መꬍና ጎዳይ ኡንቱንቶ ጌዳዋዳን፥ መꬍና ጎዳይ እስራኤልያ ጾሳይ ኡንቱንቱ ላታ።