15
ይሁዳ ዘረꬃ ጋኬዳ ቢታ
1 ይሁዳ ዛረቶ ኡንቱንቱ ያራን ያራን ሻክና ጋኬዳ ጋዲ ቢደ ኤዶማ ጋድያን ዛዋቲደ፥ ገድሳ ባጋ ጋጻን ደእያ ጺና ግያ ባዙዋ ዉርሰꬃ ጋኬ።
2 ገድሳ ባጋና ኡንቱንቱ ዛዋይ ማጽነ አባፐ ገድሳ ባጋ ዉርሰꬃፐ ዶሚደ፥
3 አክራቢማ ፕኑዋ አꬊደ፥ ጽና ባዙዋና ቢደ፥ ቃዴሳ-ባርነ ገድሳ ጋኬ። ቃይ ሄዋፐ ሻክ ቢደ፥ ሄጽሮናና አꬊደ፥ ፑደ አዳራ ጋኪደ፥ ቃርቃኮ ስሜ።
4 ሄዋፐ ቃይ አጽሞና አꬊደ፥ ግብጼ ሻፋን ጋከት ቢደ፥ ሜድትራነ አባን ዛዋቴ። ገድሳ ባጋና ደእያ ይሁዳ ዛዋይ ሀዋ።
5 አዋይ ዶልያ ባጋ ዛዋይ ማጽነ አባ ግዲደ፥ ዮርዳኖሳ ሻፋይ አን ገልያ ሳኣ ጋኬ። ሁጲሳ ዛዋይ ቃይ ዮርዳኖሳ ሻፋ ማጽነ አባን ገልያ ሳፐ ዶሚደ፥
6 ፑደ ቤት-ሆግላ ከሲደ፥ ቤት-አራብያ ዛንጋራፐ ሁጲሳና አꬊደ፥ ሮቤላ ናኣ ቦሃና ሹቻን ዛዋቴ።
7 ያቲደ ዛዋይ አሁረ (መቱዋ) ዎምባፐ ዳቢራ ካታማ ፑደ ከሲደ፥ ዎምባፐ ገድሳ ባጋና ደእያ አዱሚማ ፕኑዋ ስንꬃ ባዙዋን ደእያ ገልጋላኮ ሁጲያዉ ምርቀቴ። ሄዋፐ ቃይ ኤንሸሜሻ ግያ ፑልትያ አꬊደ፥ ኤንሮጌላ ግያ ሳን ዛዋቴ።
8 ሄዋፐ ህኖማ ዛንጋራ አꬊደ፥ ያቡሳዋናቱዋ ካታማይ የሩሳላመ ደእያ ደርያፐ ገድሳ ባጋና አꬊደ፥ ደርያ ሁጲያ ከሴዳ፤ ሄ ደሪ ህኖማ ዛንጋራፐ አዋይ ዉልያ ባጋናነ ራፋይማ ዎምባፐ ሁጲሳ ባጋና ደኤ።
9 ሄ ደርያ ሁጲያፐ ስንꬃዉ ቢደ፥ ነፍቶሀ ሃꬃ ፑልትያ አꬊደ፥ ኤፍሮና ደርያን ደእያ ካታማቱዋኮ ከሴዳ። ሄዋፐ ቃይ ዱገ ባኣላ ዎይ ቅርያት-ይኣሪማ ጌተትያ ካታማኮ ስሜ፤
10 ባኣላፐ ቃይ አዋይ ዉልያ ባጋና ደእያ ሰኢራ ደርያኮ ምርቀቴ። ሄዋፐ ቃይ ሁጲሳ ባጋ ይኣሪማ ዎይ ክሳሎና ጌተትያ ደርያ ጋኪደ፥ አፐ ዱገ ቤት-ሸመሻ ዎꬊደ፥ ትምና አꬊደ ቤ።
11 ሄ ዛዋይ ኤቅሮና ሁጲሳ ባጋና ደእያ ፑደꬃን ዛዋቲደ፥ ሽካሮናኮ ምርቀቴ፤ ሄዋፐ ባኣላ ደርያና አꬊደ፥ ያብንኤላን ዛዋቴ። ሄ ሁጲሳ ባጋ ዛዋይ ሜድትራነ አባን ዛዋቴ።
12 አዋይ ዉልያ ባጋና ደእያ ዛዋይ ሜድትራንያ አባዉ ጋጻን ዛዋቴ። ይሁዳ ዛራቱ ባረንቱ ያራን ያራን አኪደ ደኤዳዌ ሀ ዛዋቱ ዛርና ደእያ ሳአቱዋና።
ካሌብ ከብሮናነ ዳቢራ ጾኒደ ኦይቄዳ
(ዳና. 1:11-15)
13 መꬍና ጎዳይ አ አዛዜዳዋዳን፥ ኢያሱ ይፉነ ናኣ ካሌባ ጋክያ ግሹዋ ይሁዳ ጋድያፐ ቅርያት-አርባአ ጌተትያ ከብሮና እሜዳ። አርባእ አናቀ አዉዋ።
14 ካሌብ አናቀ ዘረꬃ፥ ሸሻያ፥ አህማናነ ታልማያ ጌተትያ ሄዙ ያራቱዋ ከብሮናፐ ከሴዳ።
15 ሄዋፐ ደንዲደ፥ ዳቢራ ግያ ካታማን ደእያ አሳ ኦላናዉ ቤዳ፤ ዳቢራ ካታማይ ካሰ ቅርያት-ሰፈራ ጌተቴ።
16 ካሌብ፥ “ቅርያት-ሰፈራ ኦለቲደ ኦይቂያ ኡራዉ ታን ታ ናቶ አክሶ እማና” ያጌዳ።
17 ካሌባ እሻ ቃናዛ ናአይ ኦትንኤል ሄ ካታማ ኦለቲደ ኦይቂና ካሌብ ባረ ናቶ አክሶ አዉ እሜዳ።
18 አክሳ ኦትንኤላ ገልያ ዎደ፥ እዝ አቡ እዝዉ ጋድያ እማናዳን ዎሳና ማላ ኦትንኤል እዞ ዞሬዳ። እዛ ባቁሉዋፐ ዎꬋዱ፤ ካሌብ እዞ፥ “አያ ኮያይ?” ያጊደ ኦቼዳ።
19 እዛ፥ “ታዉ ዎይቱዋ እማ። ኔን ካሰ ታዉ ነጌበን እሜዳ ቢታይ ግዴዳ ድራዉ፥ ሃꬃ ፑልቶቱዋ ታዉ እማርኪ” ያጋዱ። ካሌብ እዝዉ ክል ፑልቱዋካ ህርክ ፑልቱዋካ እሜዳ።
ይሁዳ ካታማቱዋ
20 ይሁዳ ዛራቱ ባረንቱ ያራን ያራን ላቴዳ ላታቱ ሀዋፐ ካሊደ ጻፈቴዳዋንታ።
21 ገድሳ ባጋ ጋጻን ኤዶማ ዛዋ ማታን ደእያ ይሁዳ አሳ ካታማቱ ቃብጽኤላ፥ ኤዴራ፥ ያጉራ፥
22 ቂና፥ ድሞና፥ አድኣዳ፥
23 ቀዴሻ፥ ሀጾራ፥ ይትናና፥
24 ዚፋ፥ ጸለማ፥ ባኣሎታ፥
25 ሀጾር-ሀዳታ፥ ቅርዮት-ሄጽሮና ዎይ ሀጾራ፥
26 አማማ፥ ሻማአ፥ ሞላዳ፥
27 ሀጻር-ጋዳ፥ ሄሽሞና፥ ቤት-ጳሌጻ፥
28 ሀጻር-ሹኣላ፥ በርሳቤሀ፥ ቢዝዮትያ፥
29 ባኣላ፥ ኢዩማ፥ ኤጼማ፥
30 ኤልቶላዳ፥ ካሲላ፥ ሆርማ፥
31 ጽቅላጋ፥ ማድማና፥ ሳንሳና፥
32 ለባዎታ፥ ሽልሂማ፥ አይናነ ርሞና። ሀ ካታማቱ ባረንቱ ሞꬃቱዋና እትፐ ላታማነ ኡዱፑና።
33 ጋꬋን ደእያ ካታማቱ ኤሽታኦላ፥ ጾርአ፥ አሺና፥
34 ዛኖሀ፥ ኤንጋኒማ፥ ታፑሀ፥ ኤናማ፥
35 ያርሙታ፥ አዱላማ፥ ሶኮ፥ አዜቃ፥
36 ሻእራይማ፥ አድታይማ፥ ጋዴራነ ጋደሮታይማ። ሀ ካታማቱ ባረንቱ ሞꬃቱዋና እትፐ ታማነ ኦይዳ።
37 ቃይ ይሁዳ ካታማቱ ጽናና፥ ሀዳሻ፥ ምግዳላ-ጋዳ፥
38 ዲልኣና፥ ምስጳ፥ ዮቅትኤላ፥
39 ላክሻ፥ ቦጽቃታ፥ ኤግሎና፥
40 ካቦና፥ ላህማሳ፥ ክትሊሻ፥
41 ጋደሮታ፥ ቤት-ዳጎና፥ ናእማናነ ማቄዳ። ሀ ካታማቱ ባረንቱ ሞꬃቱዋና እትፐ ታማነ ኡሱፑና።
42 ቃይካ ሊብና፥ ኤቴራ፥ አሻና፥
43 ይፍታሀ፥ አሺና፥ ናጺባ፥
44 ቃኢላ፥ አክዚባነ ማሬሻ። ሀ ካታማቱ ባረንቱ ሞꬃቱዋና እትፐ ኡዱፑና።
45 ሄዋዳንካ፥ ቃይ ኤቅሮና ካታማ ባረ ሄራን ደእያ ቄር ካታማቱዋነ ሞꬃቱዋ ኡባ።
46 አሽዶዳ ኤለካ ኤቅሮናፐ ቢደ፥ ሜድትራንያ አባ ጋካናዉ ደእያ ካታማቱዋነ ኡንቱንቱ ሞꬃቱዋ ኡባ።
47 ቃይ አሽዶዳ ካታማነ አ ሞꬃቱዋ፥ ጋዛ ካታማነ አ ሞꬃቱዋ፥ ቢደ ግብጼ ሻፋነ ሜድትራንያ አባ ላንቂያ ጋካናዉ ደእያ ሳኣ።
48 ገዝያን ደእያ ካታማቱካ ሻሚራ፥ ያትራ፥ ሶኮ፥
49 ዳና፥ ቅርያት-ሳና ዎይ ዳቢራ፥
50 አናባ፥ ኤሽታሞአ፥ አኒማ፥
51 ጎሸና፥ ሆሎናነ ጊሎ። ሀ ካታማቱ ባረንቱ ሞꬃቱዋና እትፐ ታማነ እታ።
52 ቃይ አራባ ካታማ፥ ዱማ፥ ኤሽኣና፥
53 ያኒማ፥ ቤት-ታፑሀ፥ አፌቃ፥
54 ሁምጻ፥ ከብሮና ዎይ ቅርያት-አርባአነ ጽኦራ። ሀ ካታማቱ ባረንቱ ሞꬃቱዋና እትፐ ኡዱፑና።
55 ቃይካ ማኦና፥ ቃርመሎሳ፥ ዚፋ፥ ዩጻ፥
56 እዝራኤላ፥ ዮቅድኣማ፥ ዛኖሀ፥
57 ቃይና፥ ግብአነ ትምና። ሀ ካታማቱ ባረንቱ ሞꬃቱዋና እትፐ ታማ።
58 ቃይ ሀልሁላ፥ ቤትጹራ፥ ጋዶራ፥
59 ማእራታ፥ ቤት-አኖታነ ኤልትቆና። ሀ ካታማቱ ባረንቱ ሞꬃቱዋና እትፐ ኡሱፑና።
60 ሄዋዳንካ ቃይ ቅርያት-ባኣላ ዎይ ቅርያት-ይኣሪማነ ራባ። ሀ ካታማቱ ባረንቱ ሞꬃቱዋና እትፐ ላአ።
61 ዎራን ቃይ ቤት-አራባ፥ ምዲና፥ ሰካካ፥
62 ንብሻና፥ ማጽነ ካታማነ ኤንጋዳ። ሀ ካታማቱ ባረንቱ ሞꬃቱዋና እትፐ ኡሱፑና።
63 ግዶፐነ፥ ይሁዳ አሳይ የሩሳላመን ደእያ ያቡሳቱዋ ከሳናዉ ዳንዳይበይክኖ። ሄዋ ድራዉ ያቡሳዋናቱ ሀቼ ጋካናስካ ይሁዳ አሳና እትፐ የሩሳላመን ደኢኖ።