17
ምናሰ ዘረꬃ ጋኬዳ ሻኩዋ
1 ዮሴፎ ባይራ ናኣ ምናሰ ዛረቶ እመቴዳ ቢታይ ሀዋ። ጋላኣደ አዉ ማኪር ምናሰዉ ባይራ ናኣ፤ ማኪና ያራቱ ምኖ ኦላንቻ ግዴዳ ድራዉ፥ ጋላኣደነ ባሳነ ቢታቱዋ አኬድኖ።
2 ዮርዳኖሳ ሻፋፐ አዋይ ዉልያ ባጋና ደእያ ቢታይ የንኩዋ አቴዳ ምናሰ አሳዉ እመቴዳ፤ ሄ ያራቱካ አብኤዘራ፥ ሄሌቃ፥ አስርኤላ፥ ሸኬማ፥ ሄፌራነ ሻምዳአ። ዮሴፎ ናኣ ምናሰ ያራ ግድያ አቱማዋንቱ ሀዋንታ።
3 ጻሎፍሃድ ሄፌራ ናኣ፤ ሄፌር ጋላኣደ ናኣ፤ ጋላኣደ ማኪና ናኣ፤ ማኪር ምናሰ ናኣ። ጻሎፍሃዳዉ ማጫ ናናቱዋፐ አትና፥ አቱማ ናናይ ባዋ፤ አ ማጫ ናናይ ማህሎ፥ ኖኦ፥ ሆግሎ፥ ምልኮነ ትርጾ ጌተትኖ።
4 ኡንቱንቱ ቄስያ ኤልኣዛራኮ፥ ነዌ ናኣ ኢያሱኮነ ካፓቱዋኮ ሺቂደ፥ “ኑ ዳባቱ ግዶን ኑዉካ ጋድያ ግሹዋን እማና ማላ መꬍና ጎዳይ ሙሳ አዛዝ ዎꬄዳተነ” ያጌድኖ። ሄዋፐ ጉየ መꬍና ጎዳይ አዛዜዳዋዳን፥ ኡንቱንቱ አዉዋ እሻቱዋ ግዶን ኡንቱንቶካ ጋድያ እሜዳ።
5 ምናሰ ያራቱ ዮርዳኖሳ ሻፋፐ አዋይ ዶልያ ባጋና ደእያ ጋላኣደነ ባሳነ ቦላ ጉጂደ፥ ታሙ ሳማ ጋድያ አኬድኖ።
6 አያዉ ጎፐ፥ ምናሰ ዛራቱዋፐ ማጫ ናናይካ አቱማ ናናቱዋና እትፐ ሻክ አኬድኖ። ጋላኣደ ጋዲ አቴዳ ምናሰ ያራቱዋሳ ግዴዳ።
7 ምናሰ ያራቱ ጋድያ ዛዋይ አሴራ ጋድያፐ ዶሚደ፥ ሰኬማፐ አዋይ ዶልያ ባጋና ደእያ ምክማታታ ጋኬ። ሄ ዛዋይ ሄዋፐ ደንድ ቢደ፥ ገድሳ ባጋና ደእያ ታፑሀ አሳይ ደኢያሳ ጻጽ ዋጼ።
8 ታፑሀ ቢታይ ምናሰሳ፤ ሽን ምናሰ ዛዋን ደእያ ታፑሀ ካታማይ ባረ ሁጲያዉ ኤፍሬማ ዛራቱዋሳ።
9 ቃይ ሄ ዛዋይ ሄዋፐ ደንድ ቢደ፥ ቃና ሻፋን ዛዋቴ። ምናሰ ካታማቱዋ ግዱዋን ኤፍሬማሳ ግድያ ካታማቱካ ደኢኖ፤ ሽን ምናሰ ዛዋይ ቃና ሻፋፐ ሁጲሳ ባጋ ግዲደ፥ ቢደ ሜድትራንያ አባን ዛዋቴ።
10 ሻፋፐ ገድሳ ባጋና ደእያ ቢታይ ኤፍሬማሳ፤ ሁጲሳ ባጋና ደእያ ቢታይ ቃይ ምናሰሳ። ምናሰ ቢታዉ አዋይ ዉልያ ባጋ ዛዋይ ሜድትራነ አባ። ቃይ ሁጲሳ ባጋና አሴራ ጋድያ፥ አዋይ ዶልያ ባጋና ይሳኮራ ጋድያ ጋኬ።
11 ይሳኮራነ አሴራ ቢታቱዋ ግዱዋን ቤትሻና፥ ይብላኣማ፥ ዶራ፥ ኤንዶረ፥ ታእናካነ ማግዶ ጌተትያ ካታማቱ ባረንቱ ዩሹዋን ደእያ ሞꬃቱካ ምናሰሳ።
12 ሽን ምናሰ ዛራቱ ሄ ካታማቱዋን ደእያ አሳቱዋ ከሳናዉነ ካታማቱዋ ኦይቃናዉ ዳንዳይበይክኖ። ሄዋ ድራዉ ካናነ አሳቱ ያን ደኤድኖ።
13 እስራኤልያ አሳይ ምኔዳ ዎደ፥ ካናነ አሳቱዋ ዎልቃን ሀጋዝስያዋፐ አትና፥ ኡንቱንቱ ጋድያፐ ኡባይ ከስበይክኖ።
ዮሴፎ ዛራቱ ጉጆ ቢታ ኦቼድኖ
14 ዮሴፎ ዛራቱ ቢደ ኢያሳ፥ “ቢታ ላታ ግሹዋን ኑዉ አያዉ እት ሳማ ጻላላ እማድ? ኑን ፓይዱዋን ጮራ፤ አያዉ ጎፐ፥ መꬍና ጎዳይ ኑና አንጄዳ” ያጌድኖ።
15 ኢያሱ ኡንቱንታ፦ “ህንተንቱ ጮራ ግዶፐነ፥ ኤፍሬማ ገዚ ህንተንቶ ጉጾፐ፥ ፓርዘቱነ ራፋየቱ ደእያ ጋድያ ቢደ፥ ዎራ ህንተንቶ ቡꬅተ” ያጌዳ።
16 ዮሴፎ ዛራቱ፥ “ሀ ገዚ ኑ ግደና፤ ሄዋ ቦላካ ቃይ ቤትሻና ካታማን፥ አ ዩሹዋን ደእያ ሞꬃቱዋንነ እዝራኤላ ዎምባን ደእያ ካናነቶ ፓራቱ ጎችያ ብራታ ጋረቱ ደኢኖ” ያጌድኖ።
17 ኢያሱ ዮሴፎ ናና ኤፍሬማነ ምናሰ ዛረቶ፥ ሀዋዳን ያጌዳ፤ “ህንተንቱ ጮራነ ዳሮ ዎልቃማ፤ ህንተንቶ እት ሳማ ጻላላይ ግደና።
18 ሄዋ ድራዉ ገዘ ቢታካ ህንተንቱ አካና። ሄ ገዘ ዎራ ግዶፐነ ቡꬂደ ዉርሰꬃ ጋጻ ጋካናዉካ ህንተሳ ኦꬅተ። ካናነቶ ፓራቱ ጎችያ ብራታ ጋረቱ ደኦፐካ፥ ኡንቱንቱ ምኖ ግዶፐነ፥ ህንተንቱ ኡንቱንታ ከሳናዉ ዳንዳዪታ” ያጌዳ።