5
1 ዮርዳኖሳ ሻፋፐ አዋይ ዉልያ ባጋና ደእያ አሞራዋናቱዋ ካተቱነ ሜድትራነ አባ ላንቂያ ላንቂያ ኦይቂደ ደእያ ካናነቱ ካተቱ ኡባይ፥ እስራኤልያ አሳይ ፕናና ጋካናዉ ጾሳይ ዮርዳኖሳ ሻፋ ሃꬃ መልሴዳዋ ስሴዳ ዎደ፥ ኡንቱንቱ ዎዛናይ ኮልዴዳ። ኡንቱንቱ እስራኤልያ አሳና ጋከታናዉ ጻልበይክኖ።
እስራኤልያ አቱማ አሳይ ቃጻረቴዳ
2 ሄ ዎደ ጾሳይ ኢያሳ፥ “ሳልያ ጌተትያ ሹቻፐ ቃራ ማቅላ ጊግሳደ፥ እስራኤልያ አቱማ አሳ በንዋንቱዋዳን ሀእካ ቃጻራ” ያጌዳ።
3 ኢያሱ ሳልያ ጌተትያ ሹቻፐ ቃራ ማቅላ ጊግሲደ፥ ቃጻራ ደርያ ጌተትያ ሳኣን እስራኤልያ አሳ ቃጻሬዳ።
4 እ ሄዋ ኦꬄዳ ጋሱ: ግብጼፐ ከሴዳ አሳን ላይꬃይ ኦላዉ ጋኬዳ አቱማ አሳይ ኡባይ ግብጼፐ ቢደ ዎራን ሀይቄዳ።
5 ግብጼፐ ከሴዳ አቱማ አሳይ ኡባይ ቃጻረቴዳ፤ ሽን ዎራን ዩይያ ዎደ የለቴዳ አቱማ ናናይ እቱነ ቃጻረትቤና።
6 እስራኤልያ አሳይ ጾሳዉ አዛዘተናን እጼዳ ድራዉ፥ ግብጼፐ ከስያ ዎደ ላይꬃይ ኦላዉ ጋኬዳ አቱማ አሳይ ኡባይ ሀይቂደ ዉራና ጋካናዉ ዎራን ኦይታሙ ላይꬃ ዩዬዳ። ሄዌነ፥ ጾሳይ ኡንቱንታ፥ “ኤሳይነ ማꬃይ ጎግያ አራዳ ጋድያ፥ ታን ካሰ ህንተንቱ ማይዛ አዋቶ እማና ጌዳ ሄ ጋድያ ህንተንቱ በእክታ” ጌዳ ቃላይ ፖለታናዳና።
7 ሄዋ ድራዉ ጾሳይ ኡንቱንቱ ናና ኡንቱንቱ ሳኣን ደንꬄዳ፤ ኢያሱ ቃጻሬዳዋንቱካ ሄዋንታ። ኡንቱንቱ ቃጻረተናን ደእያዌ ኦግያን ቢደ ኡንቱንቱ ቃጻረትቤና ድራሳ።
8 አሳይ ኡባይ ቃጻረቴዳዋፐ ጉይያን፥ ኡንቱንቱ ማይꬃይ ፓጻና ጋካናዉ ባረንቱ ዱንካኔዳ ሳኣን ጋምኤድኖ።
9 ጾሳይ ኢያሳ፥ “ሀቼ ታን ግብጼቱዋ ቦርያ ህንተፐ ድጋድ” ያጌዳ። ሄ ሳኣ ሱንꬃይ ሀቼ ጋካናዉ ገልጋላ ጌተቴ።
10 እስራኤልያ አሳይ ያርኮ ደምባን ገልጋላ ግያ ሳን ዱንካኒደ፥ አግናዉ ታማነ ኦይደንꬆ ጋላስ ኦማርሴዳዋን ፓስጋ ባላ ቦንቼዳ።
11 ፓስጋፐ ጉይያን ዎንተꬃ ጋላስ፥ ቢታን ዶልያ ካꬃ አይፍያ እርሹ ገልቤና ኡክꬃነ ጺጸቴዳ ትሻ ሜዳ።
12 ሄ ቢታን ዶልያ ካꬃ ሜዳ ዎንተꬃ ጋላስ ማናይ ቡክያዋ አግ ባሼዳ። ሄዋፐ ጉይያን እስራኤልያ አሳይ ማና ደምቤና። ሄ ዎድያፐ ዶሚደ ኡንቱንቱ ካናነን ዶልያ ካꬃ ሚደ ደኤድኖ።
ኢያሳነ አዳ ኦይቄዳ ብታንያ
13 ኢያሱ ያርኮ ማታን ደእያ ዎደ፥ ꬎቁ ጊደ ጼሊደ፥ እት ብታኒ ማሻ ሾድ ኦይቂደ፥ ባረ ስንꬃን ኤቄዳዋ በኤዳ። ኢያሱ አኮ ሺቂደ፥ “ኔን ኑ ባጋ አሴየ ኑ ሞርከቱዋ ባጋ አሴ?” ያጌዳ።
14 ብታኒ፥ “ታን ኦ ባጋካ ግድከ። ሽን ታን ጾሳ ኦላንቻቱ ጋዳዋ ግዳደ ሀእ ያድ” ያጌዳ።
ኢያሱ ሳኣን ኩንድ ጎይኒደ፥ “ታ ጎዳይ ባረ ቆማዉ ኦድያባይ አዬ?” ያጌዳ።
15 ጾሳ ኦላንቻቱዋ ጋዳዋይ፥ “ኔን ኤቄዳ ሳአይ ጌሻ ግዴዳ ድራዉ፥ ነ ገድያፐ ጫማ ከሳ” ያጌዳ። ኢያሱ እ ጌዳዋዳን ኦꬄዳ።