ይሁዳ ካዉተꬃ
18
(18:1—25:30)
ህዝቂያሳፐ እዮስያሳ ጋካናዉ
(18:1—21:26)
1 ኤልያ ናአይ ሆሴእ እስራኤላን ካተቴዳ ሄዘንꬆ ላይꬃን ይሁዳ ካትያ አካዛ ናአይ ህዝቂያሰ ካተቴዳ።
2 እ ካተትያ ዎደ ላይꬃይ አዉ ላታማነ እቼሻ፤ የሩሳላመን እ ላታማነ ኡዱፑን ላይꬃ ካተቴዳ። አ አት ሱንꬃይ አቢ ጌተቴ፤ እዛ ዛካራሳ ናቶ።
3 አ ማይዛ አዉዋ ዳዊተ ኦꬄዳዋዳን፥ ህዝቂያስካ መꬍና ጎዳ ስንꬃን ሱረባ ኦꬄዳ።
4 አሳይ ጎይንያ ꬎቃ ሳኣ እ ድጌዳ። ኤቃ ቱሳቱዋ መንሬꬄዳ። አሼሮ ግያ ጾሳት ምስልያ ቃንጽ ኦሌዳ። ቃይ ሙሴ ናሃስያፐ መꬌዳ ሾሻካ መንሬꬄዳ። አያዉ ጎፐ፥ ሄ ዎዲ ጋካናዉካ እስራኤልያ አሳይ አዉ እጻና ጩዋዪደ ታኬዳ። ሄ ሾሻ ሱንꬃይ ነሁሽታና።
5 ህዝቂያሰ መꬍና ጎዳ እስራኤልያ ጾሳ አማኔዳ፤ ይሁዳ ካተቱዋ ኡባ ግዶን አ ማላ ካቲ አፐ ካሰ ግድና፥ አፐ ጉየ ግድና ቤትቤና።
6 አያዉ ጎፐ፥ መꬍና ጎዳዉ እ አማነቴዳ፤ መꬍና ጎዳ ካልያዋ አግቤና፤ መꬍና ጎዳይ ሙሳ አዛዜዳ አዛዙዋ ናጌዳ።
7 መꬍና ጎዳይ አናና እትፐ ግዴዳ፤ ያትና እ ኦꬅያባይ ኡባይ አዉ እንጀቴዳ። እ አሶረ ካትያ ቦላ ማካሌዳ፤ አዉ ሞደተናን እጼዳ።
8 እ ፕልስጼማ አሳና ኦለቴዳ፤ ቀር ጉꬃ ሞꬃፐ ቢደ፥ ዎጋ ዎልቃማ ካታማ ጋካናዉ፥ ጋዛካ አ ዩሹዋን ደእያ ቢታቱካ አተናን ኡንቱንቱ ደእያ ሳኣ ኡባ ጾኔዳ።
9 ካቲ ህዝቂያሰ ካተቴዳ ኦይደንꬆ ላይꬃን፥ ኤልያ ናአይ እስራኤልያ ካቲ ሆሼእ ካተቴዳ ላፑንꬃ ላይꬃን፥ አሶረ ካቲ ሳልማንኤሰር እስራኤልያ ቦላ መቱዋ ጋꬃናዉ ዶዴዳ፤ ሳማርያ ካታማካ ዶዴዳ።
10 ሄዘንꬆ ላይꬅ ሶርያ አሳይ ሳማርያ ካታማ ጾኔዳ። ያትና ህዝቂያሰ ካተቴዳ ኡሱፑንꬃ ላይꬃን፥ እስራኤልያ ካቲ ሆሴእ ካተቴዳ ኡዱፑንꬃ ላይꬃን፥ ሳማርያ ካታማይ ጾነቴዳ።
11 አሶረ ካቲ እስራኤልያ አሳ አሶረ ጋድያ አፌዳ። ሄዋፐ ካላ ኡንቱንታ ሄዋ ሀላሀ ካታማን፥ ሄዋ ሜዶናቱዋ ካታማን፥ ሀራቱዋ ቃይ ጎዛና ቢታን ደእያ ሀቦራ ሻፋ ኤለካ ዎꬄዳ።
12 ሀዌ ሀኔዳዌ ኡንቱንቱ መꬍና ጎዳዉ ባረንቱ ጾሳዉ አዛዘተናን እጺደ፥ መꬍና ጎዳ ቃላ ጫቁዋ፥ መꬍና ጎዳ ቆማይ ሙሴ አዛዜዳ አዛዙዋ ኡባ መንꬄዳ ጋሱዋና። ኡንቱንቱ አ አዛዙዋ ስሳናዉካ አዛዘታናዉካ ኮይቤይክኖ።
አሶረቱ የሩሳላመ ኦላናዉ ናሴድኖ
(2 ኦዱዋ 32:1-19፤ ኢሳ. 36:1-22)
13 ካቲ ህዝቂያሰ ካተቴዳ ታማነ ኦይደንꬆ ላይꬃን፥ አሶረ ካቲ ሳናክሬበ ግምበቱ ኡቴዳ ይሁዳ ካታማቱዋ ኡባ ኦለቲደ ኦይቄዳ።
14 ያትና ይሁዳ ካቲ ህዝቂያሰ ላክሻ ካታማን ደእያ አሶረ ካትያ ሳናክሬማዉ ኪታ የዲደ፥ “ታን ባይዛድ። ሀያና ታ ቢታ የዳደ ከሳ። ኔን ታና ኦቼዳዋ አያነ ታ እማና” ያጌዳ።
አሶረ ካቲ ይሁዳ ካትያ ህዝቂያሳ፥ “ኔን ታሙ ሻአ ኪሎ ግራመ ብራነ እት ሻአ ኪሎ ግራመ ዎርቃ ታዉ የዳ” ያጌዳ።
15 ህዝቂያሰ መꬍና ጎዳ ጌሻ ጎልያንነ ካትያ ጎልያ ሚሻ ምንጅያሳን ደኤዳ ብራ ኡባ አዉ የዴዳ።
16 ሄ ዎደ ይሁዳ ካቲ ህዝቂያሰ መꬍና ጎዳ ጌሻ ጎልያ ፐንግያ ሳንቃቱዋ ማይ ኡቴዳ ዎርቃነ ቃይ እ ባረ ሁጲያዉ ሄ ፐንገ ቆስለꬃቱዋ ማይዝ ዎꬄዳ ዎርቃ ፖቂ ቃሪደ፥ አሶረ ካትያዉ የዴዳ።
17 ሄዋፐ ጉይያን፥ አሶረ ካቲ ሄዙ ኦላ ጋዳዋቱዋ ጮራ ኦላንቻቱዋና ላክሻ ግያ ካታማፐ ካትያ ህዝቂያሳኮ የሩሳላመ የዴዳ። ኡንቱንቱ ቢደ፥ የሩሳላመ ጋኬድኖ፤ ማዩዋ ሜጭያዋ ጋደ አፍያ ኦግያፐ ቆሞ ባጋና ደእያ፥ ዳጋቴዳ ሃꬃይ ጎግያ ቦይያ ምይያን ኤቄድኖ።
18 ያቲደ ኡንቱንቱ ካትያ ጼሴድኖ። ህልቂያ ናአይ ካትያ ጎለን አዎትያ ኤልያቂመ፥ ዋና ጻፊ ሼብንነ አሳፋ ናአይ ታርክያ ጻፍያ ዮኣህ አኮ ካረ ከሴድኖ።
19 አሶረቱ ጋዳዋይ ኡንቱንታ፥ “ህዝቂያሳዉ ሀዋዳን ያጊደ ኦድተ፤ ‘አሶረ ካቲ፥ ዎልቃማይ ኔና ሀዋዳን ያጌ፤ ኔን ሀዋ ኬና አያን አማነታድ?’
20 ኔን ጮ መላ፥ ‘ኦላ ኦለታናዉ ታዉ አꬌዳ ኤራይነ ዎልቃይነ ደኤ’ ያጋሳ። ሽን ኔን ኦናን አማነታደ ታ ቦላ ሀዋ ማካላዲ?
21 ኔን ግብጼ ካትያ ማዳና ጋደ ቆፔዳዋ ግዶፐ፥ መኤዳ ማቃ ጋትማን ጉፈትያ አሳ ማላ። አያዉ ጎፐ፥ ጋትማይ መእና፥ ፕንጩ ኩሽያ ጫዴነ ማዱንጽሴ። ግብጼ ካቲ ባረናን አማነትያ አሳ ኡባዉ ሄዋ ማላ።
22 “ሽን ኔን ታዉ፥ ‘ኑን መꬍና ጎዳን ኑ ጾሳን አማነቴቶ’ ያጎፐ፥ ህዝቂያሰ ይሁዳ አሳነ የሩሳላመ አሳ፥ ‘ህንተ የሩሳላመን ደእያ ያርሽያ ሳኣን ጎይናናዉ ኮሸ’ ጊደ፥ አዉ ጎይንያ ꬎቃ ሳአቱዋነ ያርሹዋ ሳኣ ድጌዳ ጾሳ እ ግደኔ?
23 “አነ ሀእ ሃያ! ታ ጎዳ አሶረ ካትያና ናሰታ። ኔን ቶጋናዉ ዳንዳይያ፥ ግድያ አሳ ደሞፐ፥ ላኡ ሻአ ፓራቱዋ ታን ነዉ እማና።
24 ኔን ግብጼቱ ፓራ አሳቱዋና ፓራ ጋረቱዋ ታዉ የዳና ጋደ አማኖፐነ፥ ታ ጎዳ ኦላንቻቱ ካፓቱዋፐ እት ላፍያዋካ ዛራናዉ ዳንዳያካ።
25 ሄዋ ቦላካ ቃይ፥ ታን ሀእ ቱሙ መꬍና ጎዳ አዛዙ ባይናን ሀ ቢታ ꬋይሳናዉ ከሳድታ? መꬍና ጎዳይ ባረ ሁጲያዉ ታና፥ ኔረካ፥ ሄ ቢታ ባደ፥ ኦላደ ባይዛ ያጊደ ኦዴዳ ያጌ ያግተ” ያጌዳ።
26 ሄዋፐ ጉይያን፥ ህልቂያ ናአይ ኤልያቂመ፥ ሼብንነ ዮኣህ አሶረቱ ጋዳዋ ሀዋዳን ያጌድኖ፤ “ኑን ብርሸꬃ ኤርያ ድራዉ፥ ሀያና ኔን ኑዉ ነ ቆማቶ ሶርያ ቃላን ኦዳ። ድርሳ ግምቢያ ሁጲያን ደእያ አሳይ ስሰና ማላ፥ እብራዌꬆ ቃላን ኑዉ ኦዶፓ” ያጌድኖ።
27 ሽን ጋዳዋይ ዛረꬂደ፥ “ሀ ቃላቱዋ ታን ህንተዉነ ህንተንቱ ጎዳ ጻላላዉ ኦዳናዉ ታና ታ ጎዳይ ኪቴዴየ? ህንተንቱና እትፐ ባረንቱ ሽኣ ማናዉነ ባረንቱ ሼሻ ኡሻናዉ ደእያ፥ ሀ ድርሳ ግምቢያ ቦላ ኡቴዳ አሳና ኡባዉ ኦዳናሳ ግደኔየ?” ያጌዳ።
28 ሄዋፐ ጉይያን፥ አሶረቱ ጋዳዋይ ደንድ ኤቂደ፥ ባረ ቃላ ꬎቁ ኦꬂደ፥ እብራዌꬆ ቃላን ሀዋዳን ያጌዳ፤ “አሶረ ካቲ ዎልቃማይ ህንተንታ ግያዋ ስስተ!
29 ካቲ ህንተንታ ሀዋዳን ያጌ፤ ‘ህዝቂያስ ህንተንታ ጭሞፖ፤ አያዉ ጎፐ፥ እ ህንተንታ ታ ኩሽያፐ ዎꬅ አካናዉ ዳንዳየና።
30 እ ህንተንታ፥ መꬍና ጎዳይ ቱማ ኑና አሻናዋ፤ ሀ ካታማይካ አሶረ ካትያ ኩሽያን ገለና’ ያጊደ ህንተንታ መꬍና ጎዳን አማንꬆፖ” ያጌ።
31 “ኤ፥ ህንተንቱ ህዝቂያሰ ኦድያዋ ስሶፕተ። አሶረ ካቲ ህንተንታ፥ ‘ታናና ስገትተ፤ ሃ ታኮ ከስተ። ያቶፐ ህንተንቱ ኡባይካ ህንተንቱ ዎይንያ ቴራፐነ ህንተንቱ ባላስያ ቴራፐ ሚሻና፤ ህንተንቱ ቦኬዳ ኦላፐካ ሃꬃ ኡሽሻና።
32 ሄዋፐ ጉይያን፥ ታን ያደ፥ ህንተንታ ህንተንቱ ቢታ ማላትያ ጋድያ አካደ አፋና። ሄ ቢታይ ካꬃይነ ዎይንያ ኤሳ ኡክꬃይነ ዎይንያ አታክልቲ ኩሜዳ ቢታ፤ ዎጋራይነ ማꬃ ኤሳይነ ኩሜዳ ቢታ። ህንተንቱ ታዉ አዛዘቶፐ፥ ፓጻ ደአና፤ ሀይቂክታ’ ያጌ።
“ህዝቂያሰ ህንተንታ፥ ‘መꬍና ጎዳይ ኑና አሻና’ ያጊደ ጭምያዋ ስሶፕተ።
33 አይሁዳ ግደና አሳ ጾሳቱዋፐ ባረ ቢታ አሶረ ካትያ ኩሽያፐ አሼዳ ጾስ ደኢየ?
34 ሀማታ ጾሳቱነ አርፋደ ጾሳቱ ሀቃን ደኢኖ? ሳፋርዋይማ፥ ሄናአነ ኢዋ ጾሳቱ ሀቃን ደኢኖ? ኡንቱንቱ ሳማርያ ታ ኩሽያፐ ዎꬅ አኬድኖ?
35 ሀ ቢታቱዋ ጾሳቱዋ ኡባ ግዶን ባረ ቢታ ታ ኩሽያፐ አያ ጾስ አሼዳዋ ሽን፥ መꬍና ጎዳይ የሩሳላመ ታ ኩሽያፐ አሻኔ?” ያጌዳ።
36 ሽን አሳይ እት ቃላነ አዉ ዉርሰናን ጮኡ ጌዳ። አያዉ ጎፐ፥ ካቲ ኡንቱንታ፥ “አዉ አይነ ዛሪደ ኦዶፕተ” ያግ ዎꬄዳ።
37 ሄዋፐ ጉይያን፥ ህልቂያ ናአይ ካትያ ጎለን አዎትያ ኤልያቂመ፥ ዋና ጻፊ ሼብንነ ታርክያ ጻፊ አሳፋ ናአይ ዮኣህ ባረንቱ ማዩዋ ፔꬊደ፥ ህዝቂያሳኮ ቤድኖ፤ አሶረቱ ጋዳዋይ ጌዳዋ ኡባ አዉ ኦዴድኖ።