23
ኢዮስያሰ ኤቃ ጎይኑዋ ቢታፐ ꬋይሴዳ
(2 ኦዱዋ 34:3-7፣ 29-33)
1 ሄዋፐ ጉይያን፥ ካቲ ኢዮስያሰ ኪቲደ፥ ይሁዳ ጭማቱዋነ የሩሳላመ ጭማቱዋ ኡባ እ ሺሼዳ።
2 ካቲ መꬍና ጎዳ ጌሻ ጎልያ ፑደ ከሴዳ፤ ይሁዳ አሳይ ኡባይ፥ የሩሳላመን ደእያ አሳይ ኡባይ፥ ቄሳቱነ ትምቢትያ ኦድያዋንቱ፥ ጉꬃፐ ዎጋ ጋካናዉ፥ አሳይ ኡባይ አናና እትፐ መꬍና ጎዳ ጌሻ ጎልያ ፑደ ከሴድኖ። መꬍና ጎዳ ጌሻ ጎልያፐ ቤቴዳ ቃላ ጫቁዋ ማጻፋ ቃላ ኡባ ካቲ ኡንቱንቱ ስስሽን ናባቤዳ።
3 ሄዋፐ ጉይያን፥ ካቲ ቱሳ ማታን ኤቂደ፥ ኡንቱንቱ መꬍና ጎዳ ኦግያን ሀመታናዉነ፥ አ ህግያ፥ አ ዎጋነ አ አዛዙዋ ባረ ኩመንꬃ ዎዛናንነ ባረ ኩመንꬃ ሸምፑዋን ናጋናዉ፥ ቃይ ሀ ማጻፋን ጻፈቴዳ ጫቁዋዳን ኦꬃናዉ መꬍና ጎዳ ስንꬃን ገፔዳ። ያትና አሳይ ኡባይካ ጫቁዋ ናጋናዉ ገፔዳ።
4 ሄዋፐ ጉይያን፥ ካቲ ቄሳቱዋ ኡባቱዋ ካፑዋ ህልቂያ፥ አፐ ጋርሳና ደእያ ቄሳቱ ዋነ ፐንግያ ናግያዋንታ ባኣላዉ፥ አሼሮነ ሳሉዋ ጾልንተቶ ጎይናናዉ ጊግሴዳ ሚሻቱዋ ኡባ መꬍና ጎዳ ጌሻ ጎልያፐ ከሳናዳን አዛዜዳ። ካቲ ሄዋንታ የሩሳላመፐ ጋጻ ከሲደ፥ ቀድሮና ዛንጋራን ጹጌዳ፤ ብድንꬃ ቤቴለ አፌዳ።
5 ይሁዳ ካታማቱዋንነ የሩሳላመ ዩሹዋን ደእያ ꬎቃ ግሹዋን ኡባን እጻና ጩዋያናዳን ይሁዳ ካተቱ ሱንꬄዳ ꬋማሻቱዋ ቄሳቱ ዋ ኡባ ኦሱዋፐ ከሴዳ። ባኣላዉ፥ አዋዉ፥ አግናዉ፥ ጾልንተቶነ ሳሉዋን ደእያ ሀራ መታቶ እጻና ጩዋይያዋንታ ኡባ ድጌዳ።
6 አሼሮ ግያ ጾሳት ምስልያ መꬍና ጎዳ ጌሻ ጎልያፐ አኪደ፥ የሩሳላመ ካታማፐ ጋጻ ከሲደ፥ ቀድሮና ዛንጋራ አፌዳ። ሄዋፐ ካላ ያን ጹጌዳዋ ሊቅስ ጋጪደ፥ ꬊለ ከሴዳ። ያቲደ ሄ ባና ጋደ አሳ ማካና ቦላ ላሌዳ።
7 መꬍና ጎዳ ጌሻ ጎልያ ግዶን ጎይኖ ዎጋ ኦꬂደ፥ አቱማ አሳቱ አቱማ አሳቱዋና ሻርሙጸትያ ጎልያ ክንቼዳ፤ ሄ ጎለቱዋን ማጫ አሳይ አሼሮ ግያ ጾሳትዉ ጋርዱዋ ሱቄ።
8 እዮስያሰ ቄሳቱ ዋ ኡባ ይሁዳ ካታማቱዋፐ አሄዳ፤ ካሰ ቄሳቱ እጻና ጩዋዬዳ ꬎቃ ሳኣ፥ ገባአፐ ቢደ በርሳበሀ ጋካናዉ ደእያዋንታ ቱንሴዳ። ካታማ ሞድያ ኢያሱ ፐንግያ ግያ ፐንግያ ገልያ ሳፐ ሀድርሳ ባጋና ደእያ ጎይንያ ሳአቱዋካ ቆቆፌዳ።
9 ꬎቃ ሳኣ ቄሳቱ የሩሳላመን መꬍና ጎዳዉ ያርሽያ ሳኣ ፑደ ዪክኖ፤ ሽን ኡንቱንቱ ሀራ ቄሳቱ ዋና እትፐ እርሹ ገልቤና ኡክꬃ ሚኖ።
10 ካቲ እዮስያሰ ህኖማ ዛንጋራን ደእያ ቶፌታ ጌተትያ ያርሹዋ ሳኣ ቱንሴዳ። ያቲደ ሞሎካ ግያ ጾሳዉ እት አሳይነ ባረ አቱማ ናኣ ዎይ ባረ ማጫ ናቶ ታማን ያርሸናዳን ድጌዳ።
11 ይሁዳ ካተቱ መꬍና ጎዳ ጌሻ ጎልያ ገልያ ፐንግያን አዋዉ ዱማይ ዎꬄዳ ፓራቱዋ ድጌዳ። አዋ ፓራቱ ናታን-መለካ ግያ ካፑዋ ክፍልያ ማታን ደእያ ዳባባን ደኢኖ። ሄዋፐ ጉይያን፥ አዋዉ ዱማይ ዎꬄዳ ፓራ ጋረቱዋ እዮስያሰ ታማን ጹጌዳ።
12 አካዛ ጎልያ ፖቅያ ቦላን ይሁዳ ካተቱ ጊግስሴዳ ያርሹዋ ሳአቱዋነ ምናሰ መꬍና ጎዳ ጌሻ ጎልያዉ ደእያ ላኡ ዳባባቱዋ ግዶን ጊግሴዳ ያርሽያ ሳአቱዋ ካቲ እዮስያሰ ክንቼዳ። ኡንቱንታ ሄ ሳፐ ድጊደ ክንቼሬꬄዳ፤ ሱፓ ቀድሮና ዛንጋራን ኦሌዳ።
13 ቃይካ ካቲ የሩሳላመ ካታማፐ አዋይ ዶልያ ባጋና ዳብረ ዛይተ ጌተትያ ደርያፐ ገድሳ ባጋን ደእያ ቱናተꬃ ꬎቃ ደርያ። ሄ ꬎቃ ሳአቱ እስራኤልያ ካቲ ሶሎሞነ ሲዶናቱዋ ጾሳት አስታሮትዉ፥ ሞኣባቱዋ ጾሳ ካሞሻዉነ፥ አሞናቱዋ ጾሳ ሞሎካዉ፥ ሄ ቱና ጾሳቶ ጎይናናዉ ጊግሴዳ ꬎቃ ሳኣ።
14 ካቲ ኢዮስያሰ ጎይንያ ሹቻ ቱሳቱዋካ መንሬꬂደ፥ አሴሮ ጌተትያ ጾሳት ምስለቱዋካ ቃንጸሬꬄዳ። ያቲደ ኡንቱንቱ ኤቄዳ ኮሽያን ሀይቄዳ አሳ መቀꬃ ኩንꬄዳ።
15 ቃይ እስራኤልያ አሳ ናጋራ ኦስሴዳ ናባጻ ናአይ እዮርባም ቤቴለን ꬎቃ ሳኣን ጊግሴዳ ያርሽያ ሳኣ ካቲ እዮስያሰ ክንቼዳ። ሄ ያርሽያ ሳኣ ሹቻቱዋካ መንሬꬂደ፥ ꬊለ ከሴዳ፤ አሼር ምስልያካ ጹጌዳ።
16 ሄዋፐ ጉይያን፥ እዮስያሰ ዩሹዋ ጼሊደ፥ ደርያ ጋጻን ደእያ ሞጉዋ ጎንጎሉዋ በኤዳ፤ መቀꬃቱዋ ጎንጎሉዋፐ ከሲደ፥ ያርሽያ ሳኣ ቦላ ዎꬂደ፥ ታማን ጹጌዳ። ያቲደ ያርሽያ ሳኣ ቱንሴዳ። ሄዌ ሀኔዳዌ መꬍና ጎዳ አሳይ ካሰ አዋዬዳ መꬍና ጎዳ ቃላ ማራና።
17 ሄዋፐ ጉይያን ካቲ፥ “ሀ ቤትያዌ ኦ ዱፌ?” ያጊደ ኦቼዳ።
ቤቴለ ካታማ አሳቱ፥ “ይሁዳፐ ዪደ፥ ቤቴለ ያርሽያ ሳኣ ቦላ ሀእ ኔን ኦꬃ ስምያዌ ፖለታናዋ ካሰቲደ ኦዴዳ መꬍና ጎዳ አሳ ዱፉዋ” ያጊደ ኦዴድኖ።
18 ካቲ፥ “አግ ባሽተ፤ እት አሳይነ አ መቀꬃ ሳፐ ቃꬆፖ” ያጌዳ። ሄዋ ድራዉ፥ ሳማርያፐ ዬዳ ትምቢትያ ኦድያ ብታንያ መቀꬃና እትፐ አ መቀꬃ ቦቼናን አግ ባሼድኖ።
19 እስራኤልያ ካተቱ ሳማርያ ካታማቱዋን ኦስሲደ፥ መꬍና ጎዳ ሀንቀꬄዳ፥ ጎይንያ ꬎቃ ሳኣ እዮስያሰ ድጌዳ፤ ቤቴለን ኦꬄዳዋዳን፥ ኡንቱንታካ ኦꬄዳ።
20 እ ሄ ꬎቃ ግሹዋን ኦꬅያ ቄሳቱ ዋ ኡባ ያርሽያ ሳኣ ቦላ ዎꬌዳ፤ ቃይ ሄ ያርሽያ ሳኣ ቦላ አሳ መቀꬃ ጹጌዳ። ሄዋ ኡባ ኦꬂደ፥ የሩሳላመ ስሜዳ።
እዮስያሰ ፓስጋ ባላ ቦንቼዳ
(2 ኦዱዋ 35:1-19)
21 ሄዋፐ ጉይያን፥ ካቲ አሳ ኡባ፥ “ሀ ቃላ ጫቁዋ ማጻፋን ጻፈቴዳዋዳን መꬍና ጎዳዉ ህንተንቱ ጾሳዉ ፓስጋ ባላ ቦንችተ” ያጊደ አዛዜዳ።
22 እስራኤልያ ሞድያ ዳናቱ ዎድያፐ ዶሚደ፥ እስራኤልያ ካተቱዋ ዎድያንነ ይሁዳ ካተቱዋ ዎድያን ኡባን ሀዋ ማላ ፓስጋ ባላይ ኡባካ ቦንቼት ኤረና።
23 ሽን ካቲ እዮስያሰ ካተቴዳ ታማነ ሆስፑንꬃ ላይꬃን የሩሳላመ ካታማን መꬍና ጎዳ ቦንቻናዉ ሀ ፓስጋ ባላይ መꬍና ጎዳዉ ቦንቼቴዳ።
እዮስያሰ ኦꬄዳ ሀራ ኦሶቱዋ
24 ቃይ ቄሳቱዋ ኡባ ካፑ ህልቂ መꬍና ጎዳ ጌሻ ጎልያን ቤቴዳ ማጻፋን ጻፈቴዳ ህግያ ቃላ ምንሳናዳን፥ ኢታ አያና ጼስያዋንታነ ሻሬቻቱዋ፥ ሶይ ግዶ ኤቃ ምስለቱዋ፥ ኤቃ ሚሻቱዋነ ይሁዳ ቢታንነ የሩሳላመ ካታማን ቤቴዳ ሀራ ሸነይያባቱዋ ኡባ እዮስያሰ ꬋይሴዳ።
25 ሙሴ ህግያዳን ባረ ኩመንꬃ ዎዛናን፥ ባረ ኩመንꬃ ሸምፑዋንነ፥ ባረ ኩመንꬃ ዎልቃን መꬍና ጎዳኮ ስሜዳባን እዮስያሳ ማላ ካቲ፥ አፐ ካሰ ግዲና፥ አፐ ጉየ ግድና፥ ኡባካ ደንድቤና።
26 ግዶፐነ ምናሰ መꬍና ጎዳ ሀንቀꬃናዉ ኦꬄዳ ኢታ ኦሱዋ ኡባ ድራዉ፥ መꬍና ጎዳይ ይሁዳ ቦላ ሀንቀቴዳ ባረ ሀንቁዋ ታማይ ስምቤና።
27 ሄዋ ድራዉ መꬍና ጎዳይ፥ “ታን እስራኤልያ ታ ስንꬃፐ ድጌዳዋዳን፥ ይሁዳካ ታ ስንꬃፐ ድጋና፤ ታን ዶሬዳ ካታማ፥ የሩሳላመነ ታን፥ ‘ታ ሱንꬃይ ሀዋን ደአና’ ጌዳ ሀ ጌሻ ጎልያ ድጋና” ያጌዳ።
እዮስያሳ ካዉታ ዉርሰꬃ
(2 ኦዱዋ 35:20—36:1)
28 እዮስያሰ ሀኔዳ ሀራባይነ እ ኦꬄዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ።
29 እዮስያሳ ዎደ ግብጼ ካቲ ናኮይ፥ አሶረ ቢታ ካትያ ኦላን ኤቃናዉ ኤፍራጺሳ ሻፋ ቤዳ። ካቲ እዮስያሰ አናና ኦለታናዉ ባረ ኦላንቻቱዋ አኪደ ከሴዳ፤ ሽን ካቲ ናኮይ አናና ማግዶን ጋከቲደ፥ አ ዎꬌዳ።
30 አ ቆማቱ አ አሃ ፓራ ጋርያን ዎꬂደ፥ ማግዶፐ የሩሳላመ አሄድኖ፤ አ ዱፉዋን አ ሞጌድኖ። ሄዋፐ ጉይያን፥ ሄ ቢታ አሳቱ እዮስያሳ ናኣ እዮአካዛ ዶሬድኖ፤ አ አዉዋ ኮታን አ ኦኪደ ካተዬድኖ።
ዉርሰꬃ ይሁዳ ካተቱዋ
(23:31—24:20)
31 እዮአካዝ ካተትያ ዎደ፥ ላይꬃይ አዉ ላታማነ ሄዛ፤ እ የሩሳላመን ሄዙ አግና ካተቴዳ። አ ዳይ ሱንꬃይ ሀሙጻሎ፤ እዛ ሊብና ካታማን ደእያ ኤርማሳ ናቶ።
32 ባረ ማይዛ አዎቱ ኦꬄዳዋዳን፥ እዮአካዝ መꬍና ጎዳ ስንꬃን ኢታባ ኦꬄዳ።
33 እዮአካዝ የሩሳላመን ካተተናዳን ግብጼ ካቲ ናኮይ ሀማታ ጌተትያ ጋድያን ርብላ ግያ ሳን አ ቃቼዳ። ሄዙ ሻአነ ኦይዱ ጼቱ ኪሎ ግራመ ዴጽያ ጻጋራ ብራነ ሀታማነ ኦይዱ ኪሎ ግራመ ዴጽያ ዎርቃ ይሁዳ አሳ ጊርሴዳ።
34 ካትያ ናኮይ እዮስያሳ ናኣ ኤልያቄማ አ አዉዋ ኮታን ካተዬዳ፤ ያቲደ አ ሱንꬃ እዮኣቄማ ያጊደ ላሜዳ። ሽን እዮአካዛ ግብጼ አፌዳ፤ እዮአካዝ ያን ሀይቄዳ።
ይሁዳ ካትያ እዮኣቄማ
(2 ኦዱዋ 36:5-8)
35 ያትና እዮኣቄም ካቲ ናኮይ ኦቼዳ ጊራ ብራነ ዎርቃነ አዉ እሜዳ። ሄ ጊራ ጭጋናዉ ዮኣቄም ሄ ቢታ አሳይ ደምያ ኬሻ ብራፐነ ዎርቃፐ ጊራ ሺሼዳ።
36 እዮኣቄም ካተትያ ዎደ ላይꬃይ አዉ ላታማነ እቼሻ፤ እ የሩሳላመን ታማነ እት ላይꬃ ካተቴዳ። አ ዳይ ሱንꬃይ ዛብዶ፤ እዛ ሩማ ካታማን ደእያ ፓዳያ ናቶ።
37 እዮኣቄም ባረ ማይዛ አዎቱ ኦꬄዳዋዳን፥ መꬍና ጎዳ ስንꬃን ኢታባ ኦꬄዳ።