ኤርማሳ ሴላ
ኦድያ ማጻፋ
ገሉዋ
ኤርማሳ ሴላ ኦድያ ማጻፋይ፥ ክርስቶስ የለታናፐ ካሰ እቼሹ ጼታነ ሆስፑን ታማነ ኡሱፑን ላይꬃን የሩሳላመ ላለቴዳ ጋሱዋንነ አሳይካ ኦሞደቲደ ቤዳ ጋሱዋን፥ ጾሳይ ጾሳተꬃ ሙሩዋ ፖላናዉ ባብሎናቱዋ ባረ ሾጭያ ጻምኣ ኦꬂደ ጎኤቴዳ ጋሱዋን፥ ግንጹዋን ጊጌዳ እቼሹ ካዩዋ ዝላሳቱዋ ኦይቄዳዋ። ሀ ማጻፋዉ ዳርያ ባጋይ ዬኩዋባነ ካዩዋባ ኦድያዋ ግዶፐነ፥ ጾሳን አማነትያዋነ ህዶታን ደእያዋ ኦድያ ክፍለቱካ አን ደኢኖ። ሀ ግንጾቱዋ አይሁዳ አሳቱ ክርስቶስ የለታናፐ ካሰ እቼሹ ጼታነ ሆስፑን ታማነ ኡሱፑን ላይꬃን፥ ሄ ቢታ ቦላ ጋኬዳ ባየꬃ ሀሳያናዉ፥ ላይꬃን ላይꬃን ጾምያነ ካዮትያ ዎጋቱዋ ፖልያ ጋላሳቱዋን ጎኤቲኖ።
ሸምፓቱዋ ኡባቶ እመቴዳ ቃንꬃ ቆፋቱዋ
የሩሳላመ መቱዋነ ካዩዋ 1:1-22
ጾሳይ የሩሳላመ ቦላ አሄዳ ሙሩዋ 2:1-22
ብሮ ህዶታይ ደእያዋ ግዱሳ 3:1-66
የሩሳላመ ባሻ 4:1-22
ማሮታ ደማናዉ ዎሳ 5:1-22
1
የሩሳላመ መቱዋነ ካዩዋ
(1:1-22)
1 ካሰ አሳይ ኩሜዳ የሩሳላመ ካታማታ ሀእ ዋናደ መላ አታዴ! ካሰ ካዉተꬃቱዋ ግዶን ዎልቃማ ግዴዳና ሀእ አስናይ ሀይቄዳ ምሽራቲዳን፥ ዋናደ ባረካ አታዴ! ካታማቱዋ ኡባ ግዶን ካታቶ ግዴዳና ሀእ ዋናደ አይለ ግዳዴ!
2 ቃማ ኡባን አፎꬃይ እ ጋጩዋና ሆልሳካትሽን፥ ዬካደ አቃዱ። ካሰ እዞ ዶስያዋንቱፐ ሀእ እዞ ምንꬅያዌ እቱነ ባዋ። እ ላገቱ እዞ አꬅ እሚደ፥ እዉ ሞርከ ግዴድኖ።
3 ይሁዳታ ናቀታደነ አይለታደ ኦሞደታደ ባዱ። እዛ ሀእ ካዉተꬃቱዋ ግዶን ደአዉ፤ ሽን ሸምፕያ ሳኣ ደማበይኩ። እዞ የደርሴዳዋንቱ እዛ መቶታ ደእሽን ጋኪደ ደሜድኖ።
4 ላይꬃ ግዶን ቦንችያ ባላቱዋ ይያዌ ባይና ድራዉ፥ ጽዮነ ኦገቱ ካዮቲኖ። ካታማ ፐንገቱ መላ አቴድኖ፤ እ ቄሳቱ ካ ኦሊኖ። እ ዎዶሮ ናናቱካ ቱጋቴድኖ፤ ቃይ እዛ ባረ ሁጲያዉካ ኢታ ቱጋ ቱጋታዱ።
5 እ ሞርከቱ እዉ ጎዳ ግዴድኖ፤ ኡንቱንቶ እንጅና ደኤድኖ። አያዉ ጎፐ፥ እ ናጋራ ዳሩዋ ጋሱዋን መꬍና ጎዳይ እዞ ቱጋዬዳ፤ እ ጉꬃ ናናቱ ሞርክያን ኦሞደቲደ ቤድኖ።
6 ጽዮን ቦንቹ ኡባይ ኢፐ ቃረት ክቼዳ፤ እ ካፓቱካ ማታ ምያ ሳኣ ꬋዬዳ ጋራ ማላ ግዴድኖ። ኡንቱንቱ ዎልቃ ꬋዪደ፥ ባረንታ የደርስያዋንቱ ስንꬃፐ ባቃቴድኖ።
7 የሩሳላማ ሀእ ባረ ቱጋነ ባረ ኡንኣ ጋላሳቱዋን በን ባረ ቦንቾ ዱረታ ሀሳያዉ። እ አሳይ ኡባይ ሞርከቱዋ ኩሽያን አꬊደ እመቴዳ ዎደ፥ እዞ ማድያዌ እቱነ አትቤና። እ ሞርከቱ እዞ ጼሊደ፥ እ ባሻን ሚጬድኖ።
8 የሩሳላማ ዎልቃማ ናጋራ ኦꬃዱ፤ ሄዋ ድራዉ፥ እዛ ቱናባ ግዳዉ። ካሰ እዞ ቦንቼዳ ኡባይ ሀእ እ ካሉዋ በኤዳ ድራዉ፥ እዞ ካꬌ። አካ ኦላዉነ ጉየ ስማዉ።
9 እ ቱናተꬃይ እ አፍላ ጼራ ባቂ ኦይቄዳ። ስንꬃፐ ባረ ቦላ ያናባ እዛ ቆፓበይኩ። ሄዋ ድራዉ፥ እዝ ኩንደꬃይ ዳጋንꬅያዋ። እዛ፥ “አቤት መꬍና ጎዳዉ፥ ታ ቱጋ በአ! ታ ሞርከቱ ታና ጾኔድኖ” ጊናካ፥ እዞ ምንꬅያዌ እቱነ ባዋ።
10 ሞርከቱ እዝ ቦንቾ ዱረታ ኡባ ቦላን ባረንቱ ኩሽያ የዴድኖ። ጋድያ ካዉተꬃቱ፥ ካሰ ኔን ጾሳ ማባራ ግዶ ገልሰናን ድጌዳ አሳቱ፥ እ ጌሻ ጎልያ ገልሽን በኣዱ።
11 እዝ አሳቱ ኮሻቲደ፥ ቁማ ደማናዉ ኦሊኖ። ኡንቱንቱ ፓጻ ደአና ድራዉ ጊደ፥ ባረንቱ ቦንቾ ዱረታ ኡባ ቁማን ላሚኖ።
የሩሳላማ ሀዋዳን ያጋዉ፤ “አቤት መꬍና ጎዳዉ፥ ጼላ፤ ታን ካቴዳዋ በአ!
12 ህንተኖ፥ ሀዋና አꬍያዋንቶ፥ ሀዌ ህንተዉ ኡባዉ አያነ ግደኔ? መቱ ኡባይ መꬍና ጎዳይ ባረ ኤጽያ ሀንቁዋ ጋላስ ታ ቦላ አሄዳ መቱዋ ማሌ?
13 ጾሳይ ቦላ ꬎቃፐ ታማ ዱገ የዴዳ፤ ሄ ታማይ ታ መቀꬃ ግዶ ገሌዳ። ታ ገድያ ኦይቃናዉ ጲርያ ዎꬄዳ፤ ታና ጉየ ዛሬዳ። እ ታና ጋላሳ ኡባን ላባንꬂደ፥ የግ ባሼዳ።
14 ታን ኦꬄዳ ናጋራ ኡባ ሺሽ ቃቺደ፥ ሞርገ ምꬃዳን ታ ሞርግያን ዎꬄዳ። ያቲደ ታ ዎልቃ ዉርሴዳ። ታን ኤቀታናዉ ዳንዳየናዋንቶ ጎዳይ ታና አꬅ እሜዳ።
15 ጎዳይ ታ ግዶን ዎልቃማ ኦላንቻቱዋ ኡባ እጼዳ። ታ ያላጋቱዋካ ꬋይሳናዉ ዎድያ ኬሬዳ። ዎይንያ ቴራ ጉምእያ ሳኣን የꬍያዋዳን፥ ጎዳይ ይሁዳ አሳ የꬌዳ።
16 ታን ዬክያዌነ ታ አይፊ አፎꬃ ሆልሳይያዌ ሄዋሳ። ታና ምንꬃናዉነ ታ ዎልቃ ምንስያዌ እት አሳይነ ባዋ። ሞርኪ ጎቤዳ፤ ታ ናናቱነ መላ አቴድኖ” ያጋዉ።
17 ጽዮና ባረ ኩሽያ ምጫዱ፤ ሽን እዞ ምንꬅያዌ ባዋ። እ ዩሹዋን ደእያዋንቱ እዞ ሞርካናዳን፥ መꬍና ጎዳይ ኦꬄዳ። የሩሳላማ ኡንቱንቱ ግዶን ቱናባ ግዳዱ።
18 እዛ ሀዋዳን ያጋዉ፤ “መꬍና ጎዳይ ጽሉዋ፤ አ ቃላዉ አዛዘተናን ማካሌዳና ታና። ህንተኖ፥ አሳቶ ኡባይካ ስስተ! ታ መቱዋካ በእተ። ታ ዎዳላቱነ ታ ጌላዮቱ ኦሞደቲደ ቤድኖ።
19 ታን ታና ዶስያዋንታ ጼሳድ፤ ሽን ኡንቱንቱ ታና ጭሜድኖ። ታ ቄሳቱ ነ ታ ጭማቱ ባረንቱ አካታ ምንሳናዉ ቁማ ኮዪደ፥ ካታማ ግዶን ሀይቄድኖ።
20 አቤት መꬍና ጎዳዉ፥ ታ ዋይያ በአ! ታ ጋርሳይ ሻቢረቴዳ። ታን ሎይꬃ ማካሌዳ ድራዉ፥ ታ ዎዛናይ መኤዳ። ካረን ማሻይ ዉርሴ፤ ሶንካ ሀይቆ ጻላላይ ደኤ።
21 አሳይ ታን ዝላልያዋ ስሴዳ፤ ሽን ታና ምንꬅያ እት አሳይነ ባዋ። ታ ሞርከቱ ኡባይ ታን መቶትያዋ ስሴድኖ፤ ኔን ኦꬄዳባን ናሸቴድኖ። ኡንቱንቱካ ታናዳን ሀናና ማላ፥ ኡንቱንቱ ቦላ ኔን አዋዬዳ ጋላሳ አያ!
22 ኡንቱንቱ ኢታተꬃይ ኡባይ ነ ስንꬃ ጋኮ፤ ታ ናጋራ ኡባ ድራዉ፥ ኔን ታና ሙሬዳዋዳን፥ ኡንቱንታካ ሙራ! አያዉ ጎፐ፥ ታ ዝላሳይ ዳሬዳ፤ ታ ዎዛናይካ መኤዳ” ያጋዉ።