13
ጋልባ ሀርግያ ጼልያዋን ከሴዳ ህገቱዋ
1 መꬍና ጎዳይ ሙሳነ አሮና ሀዋዳን ያጌዳ፤
2 “አይ አሳ ቦላነ ጋፉ ቤቶፐ፥ ዎይ ꬉሳ ማዱꬃይ ዎይ እላሁ ከሶፐነ ቃይ ሄዌካ አ ጋልባን ዎልቃማ ጋልባ ሀርግያዉ ላመቶፐ፥ ሄ ብታንያ ቄስያ አሮናኮ ዎይ ቄስያ ግድያ አ አቱማ ናናቱዋፐ እቱዋኮ አህኖ።
3 ቄሲ አ ጋልባ ቦላን ደእያ ማዱꬃ በኦ። ሄ ማዱጼዳ ሳኣን ደእያ እስኪ ቦጾፐነ፥ ማዱꬃይካ ኦላቶፐ፥ ሄዌ ዎልቃማ ጋልባ ሀርገ። ቄሲ ሄዋ በኢደ፥ ሄ ብታኒ ቱና ግድያዋ ኤርሶ።
4 ሽን አ ጋልባ ቦላን ደእያ ሻቱ ቦጽንቶካ፥ ጋልባፐ ሉኪደ ኦላትቤናዋ ግዶፐነ ሄ ማዱꬃ ቦላን ደእያ እስኪ ቦጽቤናዋ ግዶፐ፥ ቄሲ ሄ ብታንያ ዱማ ክፍልያን ላፑን ጋላሳ ጎርዲደ ዎꬆ።
5 ላፑንꬃ ጋላሳን ቄሲ አ ዛረꬂደካ በኦ፤ እ በእያ ዎደ ማዱꬃይ ብታንያ ጋልባ ቦላን አከናን ካሰዋዳንካ ደኦፐ፥ ቄሲ ሄ ብታንያ ላኤንꬁዋካ ዱማ ክፍልያን ላፑን ጋላሳ ጎርዲደ ዎꬆ።
6 ቃይካ ላፑንꬃ ጋላሳን ቄሲ አ፤ በእያ ዎደ ማዱꬃይ አክያዋ አጊደ ꬋይ ꬋይ ቦፐነ ꬉሞፐ፥ ቄሲ እ ጌሻ ግድያዋ ኤርሶ። ሄዌ ሻቱዋፐ አትና ሀራባ ግደና፤ ሄዋ ድራዉ፥ እ ባረ ማዩዋ ሜጪደ ጌሻ ግዴ።
7 ሽን እ ጌያናዉ ባረና ቄስያ በሴዳዋፐ ጉይያን፥ ሄ ሻቱ አ ጋልባ ቦላን ያ አክ አክ ቦፐ፥ እ ላኤንꬁዋ ባረና በሳናዉ ቄስያኮ ቦ።
8 ቄሲካ አ በኦ፤ ሄ ሻቱ ብታንያ ጋልባ ቦላን ያ አክ አክ ቦፐ፥ ቄሲ እ ቱና ግድያዋ ኤርሶ፤ አያዉ ጎፐ ሄዌ ዎልቃማ ጋልባ ሀርግያ።
9 “ኦናነ ዎልቃማ ጋልባ ሀርጊ ኦይቆፐ፥ ቄስያኮ አ አህኖ።
10 ቄሲ አ በኦ፤ በእያ ዎደ አ ጋልባ ቦላን ቦꬃ ጋፉ ደኦፐ፥ ሄ ጋፉ እስክያካ ቦꬃዉ ላሞፐነ ሄ ጋፉዋ ግዶን አሹ ሙን ኡቴዳዋ ግዶፐ፥
11 ሄዌ አ ጋልባ ቦላን ጋምኤዳ ዎልቃማ ጋልባ ሀርግያ ግድያ ድራዉ፥ ቄሲ እ ቱና ግድያዋ ኤርሶ። እ ቱና ግድያዌ ኤረት ድጌዳ ድራዉ፥ አ ዱማ ክፍልያን ጎርዳናዉ ኮሸና።
12 “ቃይ ዎልቃማ ጋልባ ሀርጊ ብታንያ ጋልባ ቦላን አኪደ፥ ሁጲያፐ ገድያ ጋካናዉ ኡባን ማዬዳዋ ግዶፐ፥ ቄሲ በኦ።
13 ሄ ዎልቃማ ጋልባ ሀርጊ አ ቦላ ኡባ ማዮፐ፥ ቄሲ እ ጌሻ ግድያዋ ኤርሶ፤ አ ቦላይ ኡባናካ ላመቲደ ቦꬃ ግዴዳ ድራዉ፥ እ ጌሻ።
14 ሽን ሄ ማዱꬃ ግዶን ሙኔዳ አሹ ቤቶፐ እ ቱና።
15 ቄሲ ሄ ሙኔዳ አሹዋ፤ በኢደ ሄ ብታኒ ቱና ግድያዋ ኤርሶ። ሄ ሙኔዳ አሹ ዎልቃማ ጋልባ ሀርግያ ግድያ ድራዉ፥ እ ቱና።
16 ሽን ሄ ሙኔዳ አሹ ቃይካ ላመቲደ ቦጾፐ፥ ሄ ብታኒ ቄስያኮ ዮ።
17 ቄሲ አ በኦ፤ አ ማዱꬃይ ቦጼዳዋ ግዶፐ፥ ሄ ብታኒ ጌሻ ግድያዋ ቄሲ ኤርሶ፤ ያቶፐ እ ጌሻ ግዳናዋ።
18 “እት አሳ ቦላ ማዱꬃይ ዎꬊደ ፓጽና፥
19 አ ሳኣን ቦꬃ ጋፉ ቤቶፐ ዎይ ዞኤዳ እላሁ ከሶፐ፥ ሄ ኡራይ ባረና ቄስያ በሶ።
20 ቄሲ አ በኦ፤ ሄ ማዱꬃይ ኦላቶፐነ ማዱꬃ ቦላን ደእያ እስኪካ ላመቲደ ቦጾፐ፥ ሄ ብታኒ ቱና ግድያዋ ቄሲ ኤርሶ። ሄዌ ማዱꬃና ዶሜዳ ዎልቃማ ጋልባ ሀርግያ።
21 ሽን ቄሲ በእያ ዎደ፥ እስኪ ቦጽቤናዋ ግዶፐነ ማዱꬃይካ ጋልባ ሉኪደ ኦላትቤናዋ ግዶፐ፥ ቃይ ꬋይ ꬋይ ቦፐ፥ ቄሲ አ ዱማ ክፍልያን ላፑን ጋላሳ ጎርዲደ ዎꬆ።
22 ሄዌ አ ጋልባ ቦላን አክ አኪደ ቦፐ፥ ሄ ብታኒ ቱና ግድያዋ ቄሲ ኤርሶ፤ አያዉ ጎፐ፥ ሄዌ ጋልባ ሀርግያ።
23 ሽን ሄ እላሁ አክ አክ ቤናን እትሳ ጻላላን ደኦፐ፥ ሄዌ ማዱꬃይ ፓጼዳ ማላ ግድያ ድራዉ፥ ሄ ብታኒ ጌሻ ግድያዋ ቄሲ ኤርሶ።
24 “እት አሳ ጋልባ ታማይ ሞፐነ ሄ ሜዳ ሳኣን ቦጼዳ ዎይ ዞኤዳ እላሁ ከሶፐ፥
25 ቄሲ ሄ ሳኣ በኦ፤ አ ሳኣን ደእያ እስኪ ቦጾፐነ ማዱꬃይካ ሉኪደ ኦላቶፐ፥ ሄዌ ዎልቃማ ጋልባ ሀርግያ። እ ታማይ ሜዳሳና ከሴዳ፤ ሄዋ ድራዉ ቄሲ እ ቱና ግድያዋ ኤርሶ።
26 ሽን ቄሲ በእያ ዎደ፥ ሄ እላሁዋ ቦላን ደእያ እስኪ ቦጽቤናዋ ግዶፐነ ማዱꬃይካ ጋልባ ሉኪደ ኦላትቤናዋ ግዶፐ፥ ቃይ ꬋይ ꬋይ ቤዳዋ ግዶፐ፥ ቄሲ አ ዱማ ክፍልያን ላፑን ጋላሳ ጎርዲደ ዎꬆ።
27 ላፑንꬃ ጋላሳን ቄሲ አ በኦ፤ ሄ ዎደ ሄ ሳአይ አክ አክ ቦፐ፥ እ ቱና ግድያዋ ቄሲ ኤርሶ። ሄዌ ዎልቃማ ጋልባ ሀርግያ።
28 ሽን ሄ እላሁ ጋልባ ቦላን አከናን አጊደ እት ሳኣን ኡቶፐነ ኡባ ቃይ ꬋይ ꬋይ ቦፐ፥ ሄዌ ታማይ ሜዳሳን አቴዳ ማላ ግድያ ድራዉ፥ እ ጌሻ ግድያዋ ቄሲ ኤርሶ።
29 “እት አቱማ አሳዉ ዎይ ማጫ አሳዉ ሁጲያ ዎይ ጋጩዋ ቦላን ማዱꬃይ ከሶፐ፥
30 ቄሲ ሄ ማዱꬃ በኦ። እ በእያ ዎደ ማዱꬃይ ጋልባ ሉኪደ ኦላቶፐነ አ ቦላን ደእያ እስኪካ አድልያ ጪሻ ማላትያ ሌኦ ግዶፐ፥ ሄ ብታኒ ቱና ግድያዋ ቄሲ ኤርሶ። ሄዌ ሁጲያ ዎይ ጋጩዋ ቦላን ከስያ ቃጨቹዋነ ዎልቃማ ጋልባ ሀርግያ።
31 ቃይ ቄሲ ሄ ሀርግያ በእያ ዎደ፥ እ ጋልባ ሉኪደ ኦላትቤናዋ ግዶፐነ ካረꬃ እስኪካ አ ቦላ ꬋዮፐ፥ ሄ ቃጨቹዋ ሀርግያና ደእያ ብታንያ ቄሲ ዱማ ክፍልያን ላፑን ጋላሳ ጎርዲደ ዎꬆ።
32 ላፑንꬃ ጋላሳን ቄሲ ሄ ሀርግያ፤ በእያ ዎደ ቃጨቹዋ ሀርጊ አከናዋ ግዶፐ፥ አ ቦላን አድልያ ጪሻ ማላትያ እስኪ ባይናዋ ግዶፐነ፥ እካ ጋልባ ሉኪደ ኦላትቤናዋ ግዶፐ፥
33 ሄ ብታኒ ሄ ማዱꬃ ዩሹዋን ደእያ እስክያ ሜዶ፤ ቃጨችያ ሳኣን ደእያ እስክያ ማታ ሜዶፖ። ቄሲ ሄ ብታንያ ዱማ ክፍልያን ሀራ ላፑን ጋላሳ ጎርዲደ ዎꬆ።
34 ላፑንꬃ ጋላሳን ቄሲ ሄ ቃጨችያ ሳኣ በእያ ዎደ፤ ሄዌ ብታንያ ጋልባ ቦላን አካና ꬋዮፐ ጋልባ ሉኪደ ኦላታና ꬋዮፐ፥ ሄ ብታኒ ጌሻ ግድያዋ ቄሲ ኤርሶ። ብታኒካ ባረ ማዩዋ ሜጪደ፥ ጌሻ ግዴ።
35 ሽን እ ጌዬዳዋፐ ጉይያን፥ ቃጨችያዌ ሄ ብታንያ ጋልባ ቦላን አክ አክ ቦፐ፥
36 ቄሲ አ በእያ ዎደ ሄ ቃጨችያዌ አኬዳዋ ግዶፐ፥ ቄሲ አድልያ ጪሻ ማላትያ እስክያ ኮዮፖ፤ አያዉ ጎፐ፥ ሄ ብታኒ ቱኔዳ።
37 ሽን ቄሲ በእያ ዎደ፥ ሄ ቃጨችያሳይ አክቤናዋ ግዶፐነ ካረꬃ እስኪካ አ ቦላ ዶለዳዋ ግዶፐ፥ ሄ ቃጨችያሳይ ፓጼዳ። ሄ ብታኒካ ጌሻ ግድያ ድራዉ፥ እ ጌሻ ግድያዋ ቄሲ ኤርሶ።
38 “እት አቱማ አሳ ዎይ ማጫ አሳ ጋልባ ቦላ ቦꬃ እላሁ ከሶፐ፥
39 ቄሲ አ፤ በእያ ዎደ ሄ ኡንቱንቱ ጋልባ ቦላን ደእያ እላሁ ሾሎላ ቦꬃ ግዶፐ፥ ሄዌ ጋልባ ቦላን ጮ ከሴዳዋ፤ ሄ ብታኒካ ጌሻ።
40 “እት አሳዉ ሁጲያ ብናናይ ቆቆፈቶፐ፥ እ ቦኣ፤ ግዶፐ አትና እ ጌሻ።
41 ቃይ እት አሳዉ ሁጲያ ብናናይ ስንꬃና ቦአቶፐ፥ አ ቲሻይ ሜዳ፤ ግዶፐ አትና እ ጌሻ።
42 ሽን አ ቦኣ ዎይ አ ቲሻይ ሜዳሳ ቦላን ዞኦ ዎይ ቦꬃ ማዱꬃይ ከሶፐ፥ ሄዌ አ ቦኣን ዎይ ቲሻይ ሜዳሳን ከሴዳ ዎልቃማ ጋልባ ሀርግያ።
43 አ ቄሲ፤ በእያ ዎደ አ ቦኣ ዎይ ቲሻይ ሜዳሳ ቦላን ደእያ ማዱꬃይ ጋልባ ቦላን ከስያ ዎልቃማ ጋልባ ሀርግያዳን ዞኦ ግዶፐ፥
44 ሄ ብታኒ ቱሙካ ዎልቃማ ጋልባ ሀርጊ ሳክያ ሀርጋንቻ። እ ቱና ግድያ ድራዉ እ ቱና ግድያዋ ቄሲ ኤርሶ፤ አያዉ ጎፐ ሀርጊ አ ሁጲያን ደኤ።
45 “ዎልቃማ ጋልባ ሀርጊ ኦይቄዳ አሳይ ፔቴዳ ማዩዋ ማዮ፤ ባረ ሁጲያ ፕጾፖ፤ ባረ መተርሻካ ካሞ፤ ያቲደ፥ ባረ ቃላ ꬎቁ ኦꬂደ፥ ‘ታን ቱና፥ ታን ቱና!’ ያጎ።
46 ሄ ሀርጊ አ ቦላ ደኤዳ ኬሻን ኡባን እ ቱና። እ ቱና ግድያ ድራዉ፥ አሳፐ ሻከቲደ ዱንካኔዳ ሳኣፐ ካረና ባረካ ደኦ።
ሳላይ ከስያ ዎደ ኦꬅያ ዎጋ
47 “አይ ማዩዋ ቦላነ ቦሮቄዳ ሳአይ ቤቶፐ፥ ሄ ማዩ ሱፈ ግድና ዎይ ሊኖ ግድና፥
48 ቃጭናፐ ዎይ ሻሉዋፐ ዳደቴዳ ሊኖ ዎይ ሱፈ ግድና፥ ጋልባ ዎይ ጋልባፐ ኦሰቴዳ ማዩዋ ግድና፥
49 ሄ ማዩዋ ቦላ ከሲደ ቦሮቁ ማታ ማላትያ ዎይ ዞኦ ማላ በሶፐ፥ እ ቃጭናፐ ዎይ ሻሉዋፐ ዳደቴዳዋ ግድና፥ ጋልባ ዎይ ጋልባፐ ኦሰቴዳ ማዩዋ ግድናካ፥ ሄዌ ቦሮቁ ከሴዳ ድራዉ፥ ሄዋ ቄስያ በሳናዉ ኮሼ።
50 ቄሲ ሄ ቦሮቁዋ በኢደ፥ ሄ ቦሮቁዋና ደእያ ማዩዋ ዱማ ክፍልያን ላፑን ጋላሳ ጎርዲደ ዎꬆ።
51 ላፑንꬃ ጋላሳን ቄሲ ሄ ማዩዋ በእያ ዎደ፤ ሄ ማዩዋ ቦላን አክ አክ ቦፐ፥ እ ቃጭና ዎይ ሻሎ ማዩዋ ግድና፥ ጋልባ ዎይ ጋልባፐ ኦሰቴዳ ማዮ ግድናካ፥ ሄዌ እቱዋፐ እቱዋ ኦይቂያ ቦሮቆ ግድያ ድራዉ፥ ሄ ማዩ ቱና።
52 ቃይ ሄ ማዩ ቃጭና ዎይ ሻሎ ማዮ ግድና፥ ሊኖ ዎይ ሱፈ ግድና፥ ጋልባፐ ኦሰቴዳዋ አያ ግድናካ፥ ቄሲ አ ጹጎ። ሄዌ እቱዋፐ እቱዋ ኦይቂያ ቦሮቆ ግድያ ድራዉ፥ እ ጹገታናዉ በሴ።
53 “ቃይካ ቄሲ በእያ ዎደ፥ ሄ ቦሮቁ ማዩዋ ቦላ አክቤናዋ ግዶፐ፥ እ ቃጭና ዎይ ሻሎ ማዮ ዎይ ጋልባፐ ኦሰቴዳዋ አያ ግድናካ፥
54 ሄ ቦሮቁ ደእያ ማዩዋ ሜጫናዳን ቄሲ አዛዞ። ሄዋፐ ጉይያን፥ ሄ ማዩዋ ዱማ ክፍልያን ሀራ ላፑን ጋላሳ ጎርዲደ ዎꬆ።
55 ሄ ቦሮቆ ሳአይ ደእያ ማዩዋ ሜጮዋፐ ጉይያን፥ ቃይካ ቄሲ በእያ ዎደ ሄ ቦሮቁ ባረ ማላ ላምቤናዋ ግዶፐ፥ እ አክ አክ ባና ꬋዮፐካ ቱና። ሄ ቦሮቆ ሳአይ ማዮ ጉየ ባጋና ዎይ ስንꬃ ባጋና ደእንካ፥ ሄ ማዩ ታማን ጹገታናዉ ኮሼ።
56 ሽን ሄ ማዩዋ ሜጭ ስምና ቄሲ በእያ ዎደ ቦሮቁ ꬋይ ꬋይ ቦፐ፥ እ ጋልባ ግድና፥ ቃጭና ዎይ ሻሎ ማዮ ግድናካ፥ ሄ ቦሮቁ ደእያ ሳኣ ቄሲ ዳኪደ ከስ ድጎ።
57 ሄዋፐ ጉይያን፥ ማዩዋ ቦላ ስሚደካ ከሶፐ፥ ሄ ማዩ ቃጭና ዎይ ሻሎ ማዮ ግድና፥ ጋልባፐ ኦሰቴዳዋ አያ ግድናካ፥ ሄዌ አክ አክ ብያ ቦሮቆ ሳ ግድያ ድራዉ፥ ሄ ቦሮቁ ደእያ ማዩ ታማን ጹገታናዉ በሴ።
58 ሽን ሜጨቴዳ ማዩ ቃጭና ዎይ ሻሎ ማዮ ግድና፥ ዎይ ጋልባፐ ኦሰቴዳ አያ ማዮ ግድናካ፥ ቦሮቆ ሳአይ አ ቦላፐ ꬋዮፐ፥ ሄ ማዩ ላኤንꬁዋ ሜጨቶ፤ ሄዋፐ ጉይያን፥ እ ጌሻ ግዴ።
59 “እት ማዩ ሱፈ ዎይ ሊኖ ግድና፥ ቃጭና ዎይ ሻሎ ማዮ ግድና፥ ዎይ ቃይ ጋልባፐ ኦሰቴዳዋ ግድናካ፥ ሄ ማዩዋ ጌሻ ዎይ ቱና ጊሳናዉ ዳንዳይያ ቦሮቆ ሳኣ ዎጋይ ሀዋ” ያጌዳ።