19
ጌሻተꬃነ ልከ ፕርዳ ህገቱዋ
1 መꬍና ጎዳይ ሙሳ ሀዋዳን ያጌዳ፤
2 “እስራኤልያ አሳዉ ኡባዉ ሀዋዳን ያጋደ ኦዳ፤ ‘ታን፥ መꬍና ጎዳይ፥ ህንተ ጾሳይ ጌሻ ግድያ ድራዉ፥ ህንተካ ጌሻ ግድተ።
3 “ ‘ህንተፐ እቱነ አተናን ባረ አባነ ባረ ዳዮ ቦንቾ፤ ታ ሳምባታቱዋካ ቦንችተ። ታን፥ ጾሳይ፥ ህንተ ጾሳ።
4 “ ‘ታና አጊደ ኤቃቶ ጎይኖፕተ፤ ዎይ ቃይ ብራታፐ ሲልሴዳ፥ ጾሳቱዋ ህንተንቶ መꬎፕተ። ታን፥ መꬍና ጎዳይ፥ ህንተ ጾሳ።
5 “ ‘ህንተ እትፐተꬃ ያርሹዋ መꬍና ጎዳዉ ያርሽያ ዎደ፥ ሄ ያርሹ ህንተ ድራዉ አከታናዳን፥ በስያዋዳን ያርሽተ።
6 ሄ ያርሹ ህንተ ያርሼዳ ጋላሳን ዎይ ዎንተꬃ ጋላሳን ሜተቶ፤ ሄዘንꬆ ጋላሳይ ጋካናዉ አቴዳዌ ደኦፐ ሄዌ ጹገቶ።
7 ሄዛንꬆ ጋላሳን አ ሞፐ፥ ሄዌ ሸነይያባ፤ ታን ሄዋ አክከ።
8 ሄዋ ምያ ኦንነ ባረ ናጋራን ኦሸቴ፤ አያዉ ጎፐ፥ እ መꬍና ጎዳዉ ጌሻ ግዴዳዋ ቱንሴዳ። ሄ አሳይ ባረ አሳ ግዶፐ ቦሄቶ።
9 “ ‘ህንተ ጋድያን ሞኬዳ ካꬃ ህንተ ጫክያ ዎደ፥ ጋድያ ጋጻ ጋካናዉ ጫኮፕተ፤ ቃይ ጫካፐ ስምና ደእያ ቃርምያካ ቃርሞፕተ።
10 ነ ዎይንያ አይፍያ ሙለ ማጻደ ምꬃ ካሎዮፓ፤ ሳኣን ዎꬌዳ ዎይንያ አይፍያካ ማጾፓ፤ ሄዋ ህዬሳቶነ በተቶ አጋ። ታን፥ መꬍና ጎዳይ፥ ህንተ ጾሳ።
11 “ ‘ህንተ ዉኦፕተ።
“ ‘ዎርዶቶፕተ።
“ ‘እቱ እቱዋ ጭሞፕተ።
12 “ ‘ታ ሱንꬃን ዎርዱዋን ጫቆፕተ፤ ያቲደ ህንተ ጾሳ ሱንꬃ ቱንሶፕተ። ታን መꬍና ጎዳ።
13 “ ‘ነ ሾሩዋ ሱጎፓ፤ ዎይ ቦንቆፓ።
“ ‘ከራ ኦꬅያ ብታንያ ድርጉዋ ድጋደ፥ እት ቃማነ ነ ማታን አይሶፓ።
14 “ ‘ቱልያ ሸቆፓ፤ ዎይ ቃይ ቆቅያ ስንꬃን ꬉቢያዋ ዎꬆፓ፤ ሽን ኔን ጾሳዉ ያያ። ታን መꬍና ጎዳ።
15 “ ‘ፕርዳ ፕርዳደ ደሽሶፓ፤ ህዬሳ አ ህዬሳተꬃ ድራዉ ማዳደ ፕርዶፓ፤ ዱርያካ አ ዱረተꬃ ድራዉ ያያደ አጎፓ። ሽን ነ ሾሮ ቱማተꬃን ፕርዳ።
16 “ ‘ነ አሳ ግዶን ኢታ ዝግርሳ አካደ ዩዮፓ።
“ ‘ነ ሾሩዋ ዎꬍያዋ አያነ ኦꬆፓ። ታን መꬍና ጎዳ።
17 “ ‘ነ እሻ ነ ዎዛናን እጾፓ።
“ ‘ነ ሾሩዋ ጋሱዋን ኔን ናጋራ ኦና ማላ፥ አ ሴራ።
18 “ ‘ኩሽያ ጭጎፓ፤ ቃይ ነ አሳፐ እቶነ ኡሉዋን ቅምያ ኦይቆፓ። ሽን ነ ሾሩዋ ነ ሁጲያዳን ሲቃ። ታን መꬍና ጎዳ።
19 “ ‘ታ አዛዞቱዋ ናጋ።
“ ‘ነ መህያፐ እት ቆሞ መህያ ሀራ ቆሞ ዱማ መህያን ብራስሶፓ።
“ ‘እት ሾይቃን ላኡ ቆሞ ዘረꬃ ዘሮፓ።
“ ‘ቃይ ላኡ ቆሙዋፐ ዳደቴዳ ማዩዋ ማዮፓ።
20 “ ‘እት አሳይ ሀራ አሳ ገላናዉ ጊጋ ኡቴዳ ዳንጋጽራትና ግሶፐ፥ ቃይ ሄ ዳንጋጽራታካ ባረ ዳንጋጽረተꬃፐ ዎዘታቤናኖ ግዶፐ፥ ኡንቱንቱ ሙረታናዉ በሴ፤ ሽን እዛ ባረ ዳንጋጽረተꬃፐ ዎዘታቤና ድራዉ፥ ኡንቱንታ ዎꬋናዉ ኮሸና።
21 ግዶፐነ ሄ ብታኒ ባረ ናቁዋ ያርሾ ግድያ ዶርሳ ኦርግያ ጾሳ ዱንካንያኮ መꬍና ጎዳ ስንꬃ አሆ።
22 ቄሲ ሄ ናቁዋ ያርሹዋ ዶርሳ አኪደ፥ ብታኒ ኦꬄዳ ናጋራ መꬍና ጎዳ ስንꬃን አቶ ጊሴ፤ እ ኦꬄዳ ናጋራይካ አቶ ጌተታና።
23 “ ‘ህንተ ካናነ ቢታ ገልያ ዎደ፥ አይፍያ ምያ አይ ቆሞ ምꬃ ቶኮፐካ፥ ሄ ምꬃ አይፍያ ሜተተናዋዳን ፓይድተ፤ ሄዙ ላይꬃይ ዉራናዉ ሄ ምꬃ አይፊ ሜተተና፤ አ ሞፕተ።
24 ኦይደንꬆ ላይꬃን ሄ ምꬃ አይፊ ኡባይ መꬍና ጎዳዉ ጋላታ ሺሽያ ጌሻ ያርሹዋ ግዳናዋ።
25 ሽን ሄ ምꬃ አይፊ ህንተንቶ ሎይꬅ ዳራና ማላ፥ እቼሸንꬆ ላይꬃ አይፍያ ሚተ። ህንተ ሀዋዳን ኦꬆፐ፥ ህንተ ምꬃ አይፊ ዳራና። ታን መꬍና ጎዳይ ህንተ ጾሳ።
26 “ ‘ሱꬃይ አ ግዶን ደእያ አይ አሹዋካ ሞፕተ።
“ ‘ካዮፕተ ዎይ ሻሬቾፕተ።
27 “ ‘ህንተ ሁጲያ ብናና ጋርሳና ዩሽ አꬂደ ቃንጾፕተ፤ ቃይ ህንተ ቡቻካ ዩሽ አꬂደ ቃንጾፕተ።
28 “ ‘ሀይቄዳ አሳ ድራዉ ህንተ ቦላ ቃንጸሬꬆፕተ፤ ዎይ ጫቻ ማላታ ህንተ ቦላን ከሶፕተ። ታን መꬍና ጎዳ።
29 “ ‘ቢታይ ዎዳላ ቱናተꬃን ኩሜዳዋ ግደና ማላ፥ ነ ናቶ ሻርሙጻ ኦሶ አꬃ እማደ ቱንሶፓ።
30 “ ‘ታ ሳምባታቱዋ ቦንችተ፤ ታዉ ጎይንያ ሳኣካ ቦንችተ። ታን መꬍና ጎዳ።
31 “ ‘ሞይትልያ ሃሳይስያዋንቱኮነ ሻሬቾቱዋኮ ቦፕተ፤ ህንተ ቱነና ማላ ኡንቱንታ ኮዮፕተ። ታን፥ መꬍና ጎዳይ፥ ህንተ ጾሳ።
32 “ ‘ፑሉሜዳ አሳነ ጭሜዳ አሳ በእያ ዎደ ኡቴዳ ሳኣፐ ደንዳ ኤቃ፤ ኡንቱንታ ቦንቻ፤ ነ ጾሳዉ ያያ። ታን መꬍና ጎዳ።
33 “ ‘ህንተ ጋድያን ህንተናና ደእያ በተቱዋ ቦላን ሱገꬃባ ኦꬆፕተ።
34 ህንተ ጋድያን ህንተናና ደእያ በተ አሳ ህንተ ቢታ አሳዳን ጼልተ፤ አ ህንተ ሁጲያዳን ሲቅተ። አያዉ ጎፐ፥ ህንተካ ካሰ ግብጼ ጋድያን በተ ግዲደ ደኤድታ። ታን፥ መꬍና ጎዳይ፥ ህንተ ጾሳ።
35 “ ‘ህንተ ጌሳ ልክያባን፥ ሚዛናን ዎꬂደ ልክያባንነ ማክያባን ዎርዶቶፕተ።
36 ህንተ ኪሉዋ ሚዛናይ፥ ህንተ ማክያባይነ ልክያ ሚሻቱ ኡባይ ልከ ግድኖ። ታን ህንተና ግብጼ ጋድያፐ ከሳደ አሄዳ መꬍና ጎዳ ህንተ ጾሳ።
37 ህንተ ታ ህግያነ ታ አዛዙዋ ኡባ ናግተነ ኦꬅተ። ታን መꬍና ጎዳ ያጋ’ ” ያጌዳ።