7
ናቁዋ ያርሹዋ
1 “ ‘ናቁዋ ያርሹዋ ዎጋይ ሀዋ: እካ ጌሻ ኡባፐ እቱዋ ግዴዳ ጌሻ ያርሹዋ።
2 ጹግያ ያርሾ ሺሽያ መህያ ሹክያ ሳኣን ናቁዋ ያርሹዋ መህያካ ሹክኖ፤ አ ሱꬃካ ያርሽያ ሳኣ ምየቱዋን ꬋጭኖ።
3 ቃይ አ ሀንዳ ኡባ: ሄዌካ ናስያ ሀንዳ፥ ቃንꬃ አሹዋ ማዬዳ ሀንዳ፥
4 ላኡ ክላሆቱዋ፥ ሽንጭያ ማታን ደእያ ኡንቱንቱ ማዬዳ ሀንዳነ ትርያ ጼራ ቦላ ደእያ ሞꬍያ ክላሆቱዋና እትፐ ያርሹዋ ኦꬂደ ሺሾ።
5 ታማን ጹጊደ መꬍና ጎዳዉ ያርሽያ ያርሹዋዳን፥ ሄ ሺቄዳ ሀንዳ ቄሲ ያርሽያ ሳኣ ቦላን ጹጎ፤ ሄዌ ናቁዋ ያርሹዋ።
6 ቄስያ ዛረ ግዴዳ አቱማ አሳይ ኡባይ ሄ ያርሹዋ አሹዋ ሞ። ሄ ያርሹ ጌሻ ያርሹዋ ኡባፐ እቱዋ ግድያ ድራዉ፥ ጌሻ ሳኣን ሞ።
7 “ ‘ናቁዋ ያርሹ ናጋራ ያርሹዋካ ማላ፤ ኡንቱንቱ ላኡዋ ዎጋይ እቱዋ። ሄዌነ ያርሸቴዳ መህያ አሹ ናጋራ አቶ ጊሳናዉ ያርሹዋ ያርሼዳ ቄስያዉ እመቴ።
8 ኦንነ ጹግያ ያርሹዋ አሆፐ ያርሽያ ቄሲ ሄ መህያ ጋልባ ባረዉ አኮ።
9 ጮጭያን ኮምፐቴዳ ካꬃ ያርሹዋ ኡባይነ ኦቱዋን ዶይሰቴዳ ዎይ ባሽያን ኡከቴዳ ኡባይካ ሄ ያርሹዋ ያርሼዳ ቄስያዉ እመቴ።
10 ቃይ ዛይትያን ሙናቀቴዳ ዎይ ሙናቀትቤና ካꬃ ያርሹዋ ኡባይ አሮና አቱማ ናናቶ ኡባዉ እመቴ፤ ኡንቱንቱ ሄዋ ቃራን ግሽ አክኖ።
እትፐተꬃ ያርሹዋ
11 “ ‘አሳይ እትፐተꬃ ያርሹዋ መꬍና ጎዳዉ ያርሽያ ዎደ አዉ ደእያ ዎጋይ ሀዋ:
12 እ ሺሽያ እትፐተꬃ ያርሹ ጋላታ ያርሹዋ ግዶፐ፥ ሄ ያርሹዋና እትፐ ዛይትያን ሙናቄዳ፥ እርሹዋ የገናን ኡኬዳ ኡክꬃ፥ ዛይትያን ኦከቴዳ፥ እርሹ ገልቤና ሌኦ ዳቡዋነ ዛይትያን ሎይꬅ ሙናቄዳ፥ ሊቆ ꬊልያፐ ኡከቴዳ ኮምፑዋ ሺሾ።
13 ሄ ጋላታዉ ሺሽያ እትፐተꬃ ያርሹዋና እትፐ እርሹዋ የጌዳ ሙናቃፐ ኡከቴዳ ኡክꬃካ እሞታ ኦꬂደ ሺሾ።
14 ቃይ ሄ ኡባ ቆሞ ኡክꬃቱዋፐካ እ እቱዋ እቱዋ ደንꬂደ፥ መꬍና ጎዳዉ ያርሹዋ ኦꬂደ አሆ። ሄዌ እትፐተꬃ ያርሹዋ ሱꬃ ጫጫፌዳ ቄስያዉ እመቶ።
15 ሄ መህያ አሹ ጋላታዉ ሺቅያ እትፐተꬃዉ ያርሸቴዳ ጋላስ ሜተቶ፤ ዎንታዉ አያይነ አቶፖ።
16 “ ‘ሽን አ ያርሹ ሺቄዳዋ ጋꬅያ ዎይ ባረ ዶሱዋን ጮ እምያ ያርሹዋ ግዶፐ፥ ሄ ያርሹዋ አሹ ሄ ያርሼዳ ጋላስ ሜተቶ፤ አፐ አትያዋ ቃይ ዎንተꬃ ጋላስካ ሜተቶ።
17 ሄ ያርሹዋ አሹዋፐ ፓላሂደ ሄዘንꬆ ጋላሳ ጋካናዉ ጋምእያዌ ደኦፐ፥ ሄዌ ታማን ጹገቶ።
18 እት አሳይ ሺሼዳ እትፐተꬃ ያርሹዋ አሹዋፐ ሀቃዌነ ሄዘንꬆ ጋላስ ሜተቶፐ፥ አ ያርሹ አከተና፤ እ ያርሼዳዋዳንካ ፓይደተና። ሄ ያርሹ ቱና፤ አፐ ሜዳ ኦንነ ባረ ናጋራን ኦሸቴ።
19 “ ‘ቱናባ አያነ ቦቼዳ አሹ ሜተቶፖ፤ እ ታማን ጹገታናዉ ኮሼ። አሹ ጌሻ አሹዋ ግዶፐ፥ ዎጋን ጌሻ ግድያ አሳይ ኦንነ ማና ጎፐ ሞ።
20 ሽን እት አሳይ ቱና ግድ ኡቲደ፥ መꬍና ጎዳዉ ሺሼዳ እትፐተꬃ ያርሹዋ አሹዋፐ ምያዋ ግዶፐ፥ ሄ አሳይ ባረ አሳ ግዶፐ ቦሄቶ።
21 ቃይ እት አሳይ ቱናባ አያነ ቦቾፐ አሳ ቱናተꬃ ግድና ዎይ ቱና መህያ ግድና፥ ዎይ ሀራ ሸነይያ ቱናባ ቦቾፐ ስሚደ መꬍና ጎዳዉ ያርሼዳ እትፐተꬃ ያርሹዋ አሹዋፐ ሞፐ፥ ሄ ኡራይ ባረ አሳ ግዶፐ ቦሄቶ’ ያጋ” ያጌዳ።
ሱꬃነ ሞꬉዋ ሙሳይ ድገቴዳ
22 መꬍና ጎዳይ ሙሴዉ ሀዋዳን ያጊደ ኦዴዳ፤
23 “እስራኤልያ አሳዉ ሀዋዳን ያጋ፤ ‘ኮሩማ ዎይ ዶርሳ ዎይ ዴሻ አሹዋን ሞꬍያ ዛዋ ሙለካ ሞፕተ።
24 ሀይቄዳ መህያ ዎይ ዶአይ ዎꬌዳ መህያ ሞꬍያካ ሀራባዉ ጎኤትተፐ አትና፥ አፐ አያነ ሞፕተ።
25 አያዉ ጎፐ፥ መꬍና ጎዳዉ ታማን ጹግያ ያርሾ ሺሽያ መህያ ሞꬍያ ምያ ኦንነ ባረ አሳ ግዶፐ ቦሄቶ።
26 ህንተ ደእያ ሳኣን ሀቃን ግዶፐካ፥ ካፉዋ ሱꬃ፥ መህያ ሱꬃ ዎይ ሀራባ አያ ሱꬃነ ሞፕተ።
27 ሱꬃ ምያ አይ አሳይነ፥ ሄ አሳይ ባረ አሳ ግዶፐ ቦሄቶ’ ያጋ” ያጌዳ።
ቄስያ ጋክያ ግሹዋ
28 መꬍና ጎዳይ ሙሴዉ ሀዋዳን ያጊደ ኦዴዳ፤
29 “እስራኤልያ አሳዉ ሀዋዳን ያጋ፤ ‘መꬍና ጎዳዉ እትፐተꬃ ያርሹዋ ሺሽያ አይ አሳይነ ሄ እትፐተꬃ ያርሹዋፐ ሻኪደ፥ ባረ ሁጰ እሞታ ዱማዪደ መꬍና ጎዳዉ ሺሾ።
30 ሄዋ እ መꬍና ጎዳዉ ታማን ጹግያ ያርሹዋ ኦꬂደ፥ ባረ ኩሽያን አኪደ አሆ፤ ቃይ ሞꬉዋካ አንጎሱዋና አሆ፤ አንጎሱዋ ዉጻክያ ያርሹዋ ኦꬂደ፥ መꬍና ጎዳ ስንꬃን ቃꬆ።
31 ቄሲ ያርሽያ ሳኣ ቦላን ሞꬉዋ ጹጎ፤ ሽን አንጎሱ አሮናሳነ አ አቱማ ናናቶ እመቶ።
32 ህንተ እትፐተꬃ ያርሹዋፐ ኡሸቻ ገድያ እሞታ ኦꬂደ ቄስያዉ እምተ።
33 ሄዌ ኡሸቻ ገዲ አሮና አቱማ ናናቱዋፐ እትፐተꬃ ያርሹዋ ሱꬃነ ሞꬊድያ ያርሽያዎ አ ጋክያ አ ግሹዋ።
34 ታን እስራኤልያ አሳ እትፐተꬃ ያርሹዋፐ ቃꬄዳ አንጎሱዋነ ያርሾ ሺሼዳ ገድያ አካደ፥ ቄስያ አሮናሳነ አ አቱማ ናናቶ እማድ፤ ሄዌ ኡንቱንታ ጋክያ ኡንቱንቱ ግሹዋ ግድያ ድራዉ፥ እስራኤልያ አሳይ መꬍናዉ ሄዋ ኡንቱንቶ እሚደ ደአና’ ያጋደ ኦዳ” ያጌዳ።
35 አሮንነ አ አቱማ ናናይ ቄስያ ግዲደ፥ መꬍና ጎዳዉ ኦꬃናዉ ሱንቴዳ ጋላስ መꬍና ጎዳዉ ሺሼዳ ታማን ጹግያ ያርሹዋፐ ሄዌ ኡንቱንቶ ግሹዋ ግዲደ እመቴዳ።
36 መꬍና ጎዳይ ኡንቱንቱ ቄሰተꬃዉ ኦከቴዳ ጋላስ፥ ሄዋ ኡንቱንቶ እማና ማላ፥ እስራኤልያ አሳ ኡባ አዛዜዳ፤ ስንꬃ የለታን ኡባንካ ሀዌ ዎጋ ግዲደ ኦሰቴ።
37 ስም ሀዋንቱ፥ ጹግያ ያርሾ፥ ካꬃ ያርሾ፥ ናጋራ ያርሾ፥ ናቁዋ ያርሾ፥ ቄሳተꬃዉ ኦከትያ ዎደ ያርሽያ ያርሾነ እትፐተꬃ ያርሾ እመቴዳ ዎጋቱዋ።
38 ሀ ዎጋቱ እስራኤልያ አሳይ ሲና መላ ሳኣን ባረንቱ ያርሹዋ መꬍና ጎዳዉ ያርሻና ማላ መꬍና ጎዳይ አዛዜዳ ጋላስ፥ ሲና ደርያ ቦላን መꬍና ጎዳይ ሙሳ አዛዜዳ ዎጋቱዋ።