3
የሩሳላመ ድርሳ አሳይ ዛረꬅ ግምቤዳ
(3:1—7:73)
1 ሄዋፐ ጉይያን፥ ቄሰ ኡባቱዋ ካፑ ኤልያሽብነ ሀራ ቄሳቱ ዶርሳ ፐንግያ ግምቢያ ድርሳ ዛረꬅ ግምቢደ፥ ጾሳዉ ዱማዬድኖ፤ ሳንቃካ አꬄድኖ። ኡንቱንቱ ጼቱ አዱሳ ማማነ ሀናንኤላ አዱሳ ማማ ጋካናዉ ግምቤዳ ግምቢያ ጾሳዉ ዱማዬድኖ።
2 ኡንቱንቱ ጋጻን ደእያ ሳኣ እያርኮ አሳይ ግምቤዳ።
ኡንቱንቱ ጋጻን ደእያ ሳኣ እምራ ናአይ ዛኩር ግምቤዳ።
3 ሀስናአ ናናይ ሞልያ ፐንግያ ግምቢያ ድርሳ ግምቤድኖ። ኡንቱንቱ ፐንገ ምꬃ ኤሲደ፥ ሳንቃካ አꬄድኖ፤ ቃይ ሳንቃዉ ጎርድያ ምꬃነ ምꬃ ገልስያ ኩልቡዋ ጊግሴድኖ።
4 ኡንቱንቱ ጋጻን ደእያ ሳኣ ሀቆጻ ናኣ ግዴዳ ኦርዮና ናአይ ማረሞት ግምቤዳ።
አ ጋጻን ደእያ ሳኣ ማሸዛቤላ ናኣ በረክያ ናአይ ማሹላም ግምቤዳ።
አ ጋጻን ደእያ ሳኣ ባኣና ናአይ ጻዶቀ ግምቤዳ።
5 አ ጋጻን ደእያ ሳኣ ታቆአ ካታማ አሳቱ ግምቤድኖ፤ ግዶ ሽን፥ ሄ ካታማ ካፓቱ ባረንቶ እመቴዳ ኪታ እጼድኖ።
6 ፓሴሀ ናአይ ዮዳሄነ ባሶድያ ናአይ ማሹላም ኤጫ ፐንግያ ግምቢያ ድርሳ ግምቤድኖ። ኡንቱንቱ ፐንገ ምꬃ ኤሲደ፥ ሳንቃካ አꬄድኖ፤ ቃይ ሳንቃዉ ጎርድያ ምꬃነ ምꬃ ገልስያ ኩልቡዋ ጊግሴድኖ።
7 ኡንቱንቱ ጋጻን ደእያ ሳኣ ጋባኦና ካታማ አሳ ግድያ ማላጼነ መሮኖታ ካታማ አሳ ግዴዳ ያዶን ግምቤድኖ። ቃይ ጋባኦናነ ምጽጳ ካታማቱዋ አሳቱካ ኡንቱንቱና እትፐ ግዲደ፥ ኤፍራጺሳ ሻፋፐ አዋይ ዉልያ ባጋ ቢታ ሞድያዌ ደእያ ጎልያ ጋካናዉ ደእያ ሳኣ ግምቤድኖ።
8 ዎርቃ ትግያ ሀርሃያ ናአይ ኡዝኤል ኡንቱንቱ ጋጻን ደእያ ሳኣ ግምቤዳ። ቃይ አ ጋጻን ደእያ ሳኣ ሽቱዋ መꬍያ ሀናኒ ግምቤዳ። ኡንቱንቱ ላኡ እትፐ አኮ ግምቢያ ጌተትያ ሳኣ ጋካናዉ፥ የሩሳላመ ግምቢያ ግምቤድኖ።
9 ኡንቱንቱ ጋጻን ደእያ ሳኣ ሁራ ናአይ፥ የሩሳላመ ዎራዳ ሻኩዋ ሞድያ ራፋይ ግምቤዳ።
10 ሀሩማፋ ናአይ ያዳይ ባረ ጎልያፐ ስንꬃ ባጋና ደእያ ሳኣ ግምቤዳ።
አ ጋጻን ደእያ ሳኣ ሀሻባንያ ናአይ ሀጹኡሽ ግምቤዳ።
11 ሀሪማ ናአይ ማልኬነ ፓሀት-ሞኣባ ናአይ ሀሹብ አ ጋጻን ደእያ ሳኣነ እቶነ አዱሳ ግምቢያ ግምቤድኖ።
12 ኡንቱንቱ ጋጻን ደእያ ሳኣ ሀሎሄሻ ናአይ፥ የሩሳላመ ዎራዳ ላኤንꬆ ሻኩዋ ሞድያ ሻሉምነ አ ማጫ ናናይ ግምቤድኖ።
13 ሀኑንነ ዛኖሀ ካታማን ደእያ አሳቱ እትፐ ዛንጋራ ፐንግያ ግምቢያ ድርሳ ግምቤድኖ። ኡንቱንቱ ፐንግያን ሳንቃ አꬂደ፥ ሳንቃዉ ጎርድያ ምꬃነ ምꬃ ገልስያ ኩልቡዋ ጊግሴድኖ። ቃይ ፕቱዋ ኦልያ ፐንግያ ግምቢያ ድርሳ ጋካናዉ፥ ሻአ ዋꬋ አዱሳ ግምቢያ ጉጂደ ግምቤድኖ።
14 ረካባ ናአይ፥ ቤት-ሀካሬማ ዎራዳ ሞድያ ማልኪ ፕቱዋ ኦልያ ፐንግያ ግምቢያ ድርሳ ግምቤዳ። ፐንግያን ሳንቃ አꬂደ፥ ሳንቃዉ ጎርድያ ምꬃነ ምꬃ ገልስያ ኩልቡዋ ጊግሴዳ።
15 ኮልሆዛ ናአይ፥ ምጽጳ ዎራዳ ሞድያ ሻሉም ፑልቱዋ ፐንግያ ግምቢያ ድርሳ ዛረꬂደ ግምቤዳ። እ ፐንግያዉ ጼራ ጊግሴዳዋፐ ጉይያን፥ ሳንቃ አꬄዳ፤ ሳንቃዉ ጎርድያ ምꬃነ ምꬃ ገልስያ ኩልቡዋ ጊግሴዳ። ሄዋ ቦላካ ቃይ፥ ሸላሀ ጌተትያ ዳጋቴዳ ሃꬃይ ደእያ ባጋና ካትያ አታክልትያ ሳኣፐ ዶሚደ፥ ዳዊታ ካታማፐ ዬዳ አታክልትያ ጋካናዉ ደእያ ግምቢያ ግምቤዳ።
16 ሄዋፐ ካልያዋ አዝቡቃ ናአይ፥ ቤትጹራ ዎራዳ ሻኩዋ ሞድያ ናህሚ ግምቤዳ፤ እ ዳዊታ ዱፉዋፐ ስንꬃ ባጋና ደእያ ሳኣ ጋካናዉ፥ ዳጋቴዳ ሃꬃይ ደእያ ሳኣ ጋካናዉነ ዎልቃማቱዋ ጎልያ ጋካናዉ ደእያ ሳኣ ግምቤዳ።
ሌዋቱ ግምቢያ ድርሳ ድሬድኖ
17 ሄዋፐ ካልያዋ ባና ናኣ ረሁማ አዎተꬃ ግዶን ደእያ፥ ሌዋቱ ግምቤድኖ።
ኡንቱንቱ ጋጻን ደእያ ሳኣ ቃኢላ ዎራዳ ሻኩዋ ሞድያ ሀሻቢ ባረ ዎራዳ ሱንꬃን ግምቤዳ።
18 አፐ ካልያዋ ሄናዳዳ ናአይ፥ ቃኢላ ዎራዳ ላኤንꬆ ሻኩዋ ሞድያ ባዋይነ አ እሻቱ ግምቤድኖ።
19 ኡንቱንቱ ጋጻን ደእያ ሳኣ ኢያሱ ናአይ፥ ምጽጳ ዎራዳ ሞድያ ኤጼር ግምቤዳ፤ እ ኦላ ሚሻ ዎꬅያ ጎልያፐ ስንꬃ ባጋና ደእያ ሳኣ ጋካናዉነ ግምቢያዉ ዞዝያ ጋካናዉ ደእያ ሳኣ ግምቤዳ።
20 አፐ ካልያዋ ዛባያ ናአይ ባሩክ ግምቢያ ጋጻፐ ዶም፥ ቢደ ቄስያ ኡባቱዋ ካፑዋ ኤልያሽባ ጎልያ ፐንግያ ጋካናዉ፥ ምኖተꬃን ግምቤዳ።
21 አፐ ካልያዋ ሀቆጻ ናኣ ግዴዳ ኦርዮና ናአይ ማረሞት ኤልያሽባ ጎልያ ፐንግያፐ ዶም፥ ቢደ ጎልያ ዉርሰꬃ ጋካናዉ ግምቤዳ።
ቄሳቱ ግምቢያ ድርሳ ድሬድኖ
22 አፐ ካልያ ሄራ ጋድያን ደእያ ቄሳቱ ግምቤድኖ።
23 ኡንቱንቱፐ ካልያዋ ቢንያመነ ሀሹብ ባረንቱ ጎልያ ስንꬃን ደእያ ሳኣ ግምቤድኖ።
ኡንቱንቱፐ ካልያዋ አናንያ ናኣ ግዴዳ ማእሴያ ናአይ አዛረ ባረ ጎልያ ምይያን ደእያ ሳኣ ግምቤዳ።
24 አፐ ካልያዋ አዛርያ ጎልያፐ ዶም፥ ቢደ ግምቢ ዙቀት ስሞ ሳኣ ጋካናዉ ደእያ ሳኣ ሄናዳዳ ናአይ ቢኑይ ግምቤዳ።
25 ኡዛያ ናአይ ፓላል ግምቢያ ዙቀት ስሞ ሳፐ ዶም፥ ቢደ ናግያዋንቱ ዎችያ ማማፐ ቆሞ ባጋና ኦይቀት ኬጸቴዳ ካትያ ጎልያ ꬎቃ ግምቢያ ስንꬃ ጋካናዉ ደእያ ሳኣ ግምቤዳ።
አፐ ካልያዋ ፓርኦሻ ናአይ ፓዳይነ
26 ጌሻ ጎልያ ቆማቱ፥ ኦፌላን ደእያዋንቱ ግምቤድኖ፤ ኡንቱንቱ ሃꬃ ፐንግያ ግምቢያ ድርሳ ስንꬃና አዋይ ዶልያ ባጋና ደእያ ሳኣነ ማማ ግምቢያ ጋካናዉ ደእያ ሳኣ ግምቤድኖ።
ግምቢያ ድርሳ ድሬዳ ሀራ አሳቱዋ
27 ኡንቱንቱፐ ካልያዋ ታቆአ ካታማ አሳይ ግምቢያፐ ስንꬃን ሀራ ባጋና ደኢያሳፐ ቢደ፥ ኦፌላ ግምቢያ ድርሳፐ ሃክ ደእያ ዎልቃማ ማማ ግምቢያ ጋካናዉ ደእያ ሳኣ ግምቤድኖ።
28 እት እት ቄሳቱ ካ ፓራ ፐንግያ ግምቢያ ድርሳፐ ቆሞና ደእያ ባረንቱ ጎልያ ስንꬃና፥ ሁጲሳ ባጋና ደእያ ሳኣ ግምቤድኖ።
29 ኡንቱንቱፐ ካልያዋ እሜራ ናአይ ጻዶቀ ባረ ጎልያ ስንꬃን ደእያ ሳኣ ግምቤዳ።
አፐ ካልያዋ አዋይ ዶልያ ፐንግያ ናግያ ሻካንያ ናአይ ሻማኤ ግምቤዳ።
30 አፐ ካልያዋ ሸሌምያ ናአይ ሀናኒነ ጻላፋዉ ኡሱፑንꬃ ናኣ ግዴዳ ሀኑን ግምቤድኖ።
ኡንቱንቱፐ ካልያዋ በረክያ ናአይ ማሹላም ባረ ደእያ ክፍለቱዋ ስንꬃን ደእያ ሳኣ ግምቤዳ።
31 አፐ ካልያዋ ጾሞስያ ግምቢያ ድርሳ ፐንግያ ስንꬃን ደእያ ጌሻ ጎልያ ቆማቱነ ዛልአንቻቱ ጎልያ ጋካናዉ ደእያ ሳኣ ዎርቃ ትግያ ማልክ ግምቤዳ። ቃይካ እ ግምቢያ ጋጻን ቦላ ባጋና ደእያ ክፍልያ ጋካናዉ ደእያ ሳኣካ ግምቤዳ።
32 ዎርቃ ትግያዋንቱነ ዛልአንቻቱ ሄ ክፍልያፐ ዶሚደ፥ ዶርሳ ፐንግያ ግምቢያ ድርሳ ጋካናዉ ደእያ ሳኣ ግምቤድኖ።