9
እስራኤልያ አሳይ ባረንቱ ናጋራ ፓጼድኖ
1 ሄ አግናን ላታማነ ኦይደንꬆ ጋላሳን እስራኤልያ አሳይ ጾሚደ፥ ማቃ ማዪደነ ባረንቱ ሁጲያን ባና ቆሊደ፥ እት ሳኣ ሺቄድኖ።
2 ባረንታ አላጋ ጋደ አሳ ኡባፐ ሻኬድኖ። ሄዋፐ ጉይያን ደንድ ኤቂደ፥ ኡንቱንቱነ ካሰ ኡንቱንቱ አዎቱ ኦꬄዳ ናጋራ ኡባ ፓጼድኖ።
3 ሄዋን ኡንቱንቱ ኤቂደእሽን፥ ሄዙ ሳትያ ግድያዋ መꬍና ጎዳ ኡንቱንቱ ጾሳ ህግያ ማጻፋይ ኡንቱንቶ ናባበቴዳ። ቃይ ሀራ ሄዙ ሳትያ ግድያዋ ባረንቱ ናጋራ ፓጺድነ መꬍና ጎዳዉ፥ ባረንቱ ጾሳዉ፥ ጎይኒደ ጋምኤድኖ።
4 ሌዋቱዋፐ አማሬዳዋንቱ ሽቁዋ ቦላን ከሲደ፥ ኮሻ ꬎቁ ኦꬂደ መꬍና ጎዳኮ፥ ባረንቱ ጾሳኮ፥ ዋሴድኖ። ሄዋንቱካ ኢያሳ፥ ባና፥ ቃድምኤላ፥ ሻባንያ፥ ቡና፥ ሸረብያ፥ ባናነ ካናና።
5 ሌዋቱዋፐ ኢያሱ፥ ቃድምኤል፥ ባን፥ ሀሻባኔ፥ ሸረቤ ሆዴ፥ ሻባነነ ፓታሄ እስራኤልያ አሳ ሀዋዳን ያጌድኖ፤ “ደንድ ኤቂደ፥ መꬍናፐ መꬍናዉ ደእያ መꬍና ጎዳ ህንተንቱ ጾሳ ጋላትተ! ኡባፐነ ሳባ ኡባ ቦላና ꬎቁ ꬎቁ ጌዳነ ቦንቼቴዳ ጾሳ ሱንꬃ ሳቢተ” ያጌድኖ።
ናጋራ ፓጽያ ዎሳ
6 ሄዋፐ ጉይያን፥ እስራኤልያ አሳይ ሀዋዳን ያጊደ ዎሴድኖ፤ “መꬍና ጎዳዉ፥ ነ ጻላላይ ጾሳ! ኔን ሳሎቱዋነ ሳሎቱዋን ደእያ መታ ኡባ፥ ሳኣነ አ ቦላን ደእያ መታ ኡባነ አባቱዋነ ኡንቱንቱ ግዶን ደእያ መታ ኡባ መꬋዳ፤ ኡባዉ ሸምፑዋ እማዳ። ሳሉዋ መታቱ ኡባይ ነዉ ጎይኒኖ።
7 “ኔን መታ ኡባ ጎዳ! ኔን አብራማ ኡራ ጌተትያ ካላዳዋቱ ካታማፐ ዶራደ ከሳዳ፤ አ ሱንꬃካ ላማደ፥ አብራሃማ ያጋደ ሱንꬃዳ።
8 እ ነዉ አማነትያ አሳ ግድያዋ በኣደ፥ ካናነቱ፥ ሂተቱዋ፥ አሞራዋናቱዋ፥ ፓርዛዋናቱዋ፥ ያቡሳቱዋነ ገርጌሳቱዋ ጋድያ አ ዛረቶ ላታ ጋድያ ኦꬃደ እማናዉ አዉ ቃላ ጫቁዋ ገላዳ። ኔን ጽሎ ግድያ ድራዉ፥ ነ ጌዳ ቃላካ ፖላዳ።
9 “ኔን ካሰ ኑ ማይዛ አዎቱዋ ግብጼ ጋድያን ጋኬዳ ቱጋ በኣዳ፤ ቃይ ዞኦ አባ ጌተትያ አባ ማታን ደኢደ ኡንቱንቱ፥ ‘ኑና ማዳርኪ!’ ያጊደ ዋሴዳ ዋሱዋካ ስሳዳ።
10 ግብጼ ካቲ፥ አ ጋድያ ካፓቱነ ሄ ጋድያ አሳይ ኡባይ እስራኤልያ አሳ ቦላን ኦቶረቴዳ ድራዉ፥ ኡንቱንቱ ቦላን ማላታነ ማላልስያባ ኦꬃዳ። ሄዋፐ ደንዴዳዋን፥ ሀቼ ጋካናዉ፥ ነ ሱንꬃይ ቦንቹዋን ጼገታናዳን ኦꬃዳ።
11 አባ ያነ ሃነ ሻካደ፥ ግዱዋና ነ አሳ መላ ቢታና ፕንꬃዳ። ሽን ሹቻይ ጪሞ ሃꬃን ኦልና፥ ጪሙዋ ዱገ ዎꬍያዋዳን፥ ኡንቱንቱ የደርስያ ሞርከቱዋ አባን ምትሳደ ꬋይሳዳ።
12 እስራኤልያ አሳ ጋላስ ሻርያ ቱሳን ካለꬃደ፥ ቃማ ቃይ ኡንቱንቱ ሀመትያ ኦግያን ፖአና ማላ፥ ታማ ቱሳ ኡንቱንቱ ስንꬃን ኤሳደ ካለꬃዳ።
13 “ኔን ሳሉዋፐ ዎꬋደ፥ ነ አሳ ሲና ደርያ ቦላን ሃሳይሳዳ። ሱረ ፕርዳነ ቱማ ግዴዳ ህግያ ቃይ ሎኦ ዎጋነ አዛዙዋ ኡንቱንቶ እማዳ።
14 ጌሻ ነ ሳምባታ ኡንቱንቱ ቦንቻና ማላ፥ ኡንቱንታ ታማርሳዳ። ነ ቆማ ሙሴ ባጋና ኡንቱንቶ አዛዙዋ፥ ዎጋነ ህግያ እማዳ።
15 ኡንቱንቱ ኮሻቴዳ ዎደ ሳሉዋፐ ቁማ እማዳ፤ ቃይ ኡንቱንቱ ሳመቴዳ ዎደ ዛላፐ ሃꬃ ፑልትሳዳ። ኔን ኡንቱንቶ እማናዉ ጫቄዳ ጋድያ ገሊደ ላታና ማላ አዛዛዳ።
16 “ሽን ኑ ማይዛ አዎቱ ኦቶረቴድኖ። ኦድና ስሰና ሞርግያ ኦርዶ ግዲደ፥ ነዉ አዛዘትበይክኖ።
17 አዛዘተናን እጼድኖ፤ ቃይ ኔን ኡንቱንቶ ኦꬄዳ ማላልስያባ ኡባ ሀሳይበይክኖ። ኡንቱንቱ ሞርግያ ኦርዶ ግዴድኖ፤ ቃይ ባረንቱ ማካላፐ ደንዴዳዋን፥ ግብጼ ጋድያ ጉየ አይለተꬃዉ ዛሪደ ካለꬃና ማላ፥ ካፑዋ ባረንቶ ዶሬድኖ። ግዶ ሽን፥ ኔን አቶ ግያ ጾሳ፤ ኬካነ ማርያዋ። ሲቁዋን ኩሜዳዋነ ሀንቆ ኤሌለናዋ። ሄዋ ድራዉ፥ ነ ሲቁ መꬍናሳ፤ ኔን ኡንቱንታ አጋ በይካ።
18 “ኡንቱንቱ ማራ ማላትያ ኤቃ መꬊደ፥ ‘ህንተና ግብጼ ጋድያፐ ከሴዳ ህንተንቱ ጾሳይ ሀዋ’ ያጊደ ኔና ዎልቃማ ሸቃ ሸቆፐካ፥
19 ነ ዳሮ ማሮተꬃ ድራዉ፥ ኔን ኡንቱንታ ሄ ጋድያ ዎራን አጋ በይካ። ኡንቱንቱ ብያ ኦግያ ካለꬃና ማላ፥ ጋላስ ሻርያ ቱሳይ፥ ቃይ ኡንቱንቱ ኦግያ ፖእሳና ማላ፥ ቃማ ታማ ቱሳይ ኡንቱንቱፐ ሃክቤና።
20 ኡንቱንታ ታማርሳና ማላ፥ ነ ሎኦ አያና ኡንቱንቶ እማዳ። ማናዉ ማና ኡንቱንቱ ዶናፐ ፓጭሳበይካ፤ ቃይ ኡንቱንቱ ሳሞካ ሃꬃ እማዳ።
21 ኦይታሙ ላይꬃ ኡባ ኡንቱንቱ ዎራን ሀመትያ ዎደ፥ ኡንቱንቶ ኮሽያባፐ እትባነ ꬋይሳባካ። ኡንቱንቱ ማዩ ዉርቤና፤ ኡንቱንቱ ገዲካ ጋፍቤና።
22 “ባረንቱ ዛዋን ደእያ ጋጻ ቢታቱዋነ ካዉተꬃቱዋ ኡንቱንቱ ጾኒደ ኦይቃናዳን ኦꬃዳ። ስሆና ጌተትያ ካቲ ሞድያ ሀሰቦና ጋድያነ ኦጋ ጌተትያ ካቲ ሞድያ ባሳነ ጋድያ ኡንቱንቱ ላቴድኖ።
23 ኡንቱንቱ ዘረꬃቱዋ ፓይዱዋ ሳሉዋ ጾልንትያዳን ዳርሳዳ። ካሰ ኡንቱንቱ አዋቶ ገልሳናነ ላትሳና ጋደ ኔን ኦዴዳ ጋድያ ኡንቱንታ ገልሳዳ።
24 ኡንቱንቱ ካናነ ጋድያ ላቴድኖ፤ ሄ ጋድያን ደእያ ካናነ አሳ ኡባ ኡንቱንቱ ስንꬃን ኔን ካዉሻዳ። ኡንቱንቱ ካናነ አሳ ቦላን፥ ኡንቱንቱ ካተቱዋ ቦላንነ ሄ ጋድያን ደእያ አሳ ኡባ ቦላን ባረንቱ ዶሴዳዋ ኦꬃና ማላ፥ ኡንቱንቱ ኩሽያን አꬃ እማዳ።
25 ቃይ ኡንቱንቱ ዩሹ ግምበቴዳ ካታማቱዋነ አራዳ ቢታ ጾኒደ አኬድኖ፤ ቃይካ ሎኦባይ ኡባይ ኩሜዳ ጎልያ፥ ቦከቴዳ ሃꬃ ኦላቱዋ፥ ዎይንያ ቱራ ሳኣ፥ ዎጋራቱዋነ ሀራ አይፍያ እምያ ዳሮ ምꬃቱዋ ላቴድኖ። ሄዋፐ ም ካሊደ ኦርዴድኖ፤ ነ ዎልቃማ ኬካተꬃን ኡንቱንቱ ናሸቴድኖ።
26 “ግዶፐካ፥ ነ አሳቱ አዛዘተናን እጺደ፥ ነ ቦላን ማካሌድኖ፤ ነ ህግያዉካ ዞኪያ ዛሬድኖ። ኔኮ ኡንቱንቱ ስማናዳን ኡንቱንቶ ምንሲደ ኦዴዳ ትምቢትያ ኦድያዋንታ ዎꬌድኖ። ሎይꬅ ዎልቃማ ሸቃ ኔና ሸቄድኖ።
27 ሄዋፐ ደንዴዳዋን ኡንቱንታ ኡንኤꬅያ ሞርከቱዋ ኩሽያን አꬃ እማዳ፤ ሞርከቱ ኡንቱንታ ኡንኤꬄዳ ዎደ ኔኮ ዋሴድኖ። ኡንቱንቱ ዋሱዋ ሳሉዋን ግዳ ስሳደ ነ ማሮተꬃ ዳሩዋዳን፥ ኡንቱንታ ኡንቱንቱ ሞርከቱዋ ኩሽያፐ አሽያዋንታ ኪታዳ።
28 “ሽን ኡንቱንቱ ሸምፑዋ ደሚደ ዛረꬂደ፥ ነ ስንꬃን ናጋራ ኦꬄድኖ። ኔንካ ዛራደ ኡንቱንቱ ሞርከቱዋ ኩሽያን አꬃደ እምና፥ ኡንቱንቱ ሞርከቱ ኡንቱንታ ሞደድኖ። ሽን ሀእካ ኡንቱንቱ ኔኮ ዋስና፥ ኡንቱንቱ ዋሱዋ ሳሉዋን ግዳደ ስሳዳ። ነ ማሮተꬃን ኡንቱንታ ዛራ ዛራደካ አሻ አካዳ።
29 “ነ ህግያኮ ኡንቱንቱ ስማና ማላ፥ ኔን ኡንቱንቶ ምንሳደ ኦዳዳ፤ ሽን ኡንቱንቱ ኦቶረቴድኖ፤ ነ አዛዙዋካ እጼዶ ያጌድኖ። አሳይ አዛዘቶፐ ደኡዋ ደምያ ነ ህግያ አꬌድኖ፤ ቃይ ሞርግያ ኦርዶ ግድ፥ ነዉ ዞኪያ ዛሪደ፥ አዛዘተናን እጼድኖ።
30 ግዶፐነ፥ ዳሮ ላይꬃ ኡንቱንታ ዳንዳያዳ፤ ትምቢትያ ኦድያዋንቱ ባጋና ነ አያናን ኡንቱንቶ ምንሳደ ኦዳዳ፤ ሽን ኡንቱንቱ ስስበይክኖ። ሄዋፐ ደንዴዳዋን አይሁዳ ግደና ካዉተꬃቱ ኡንቱንታ ሞዳና ማላ፥ ኡንቱንቱ ኩሽያን አꬃ እማዳ።
31 ሽን ኔን ኬካነ ማርያ ጾሳ ግድያ ድራዉ፥ ነ ዎልቃማ ማሮተꬃን ኡንቱንታ ኡባና አጋበይካነ ꬋይሳባካ።
32 “ኑ ጾሳዉ፥ ዎልቃማዉ፥ ዎልቃማነ ያየቴዳ ጾሳዉ፥ ነ አገና ሲቁዋ ቃላ ጫቁዋ ናግያዋ፥ ኑ ቦላን ጋኬዳ መቱ ነ ስንꬃን ላፋባ ማላቶፖ። በን አሶረ ካተቱዋ ዎድያፐ ዶሚደ፥ ሀቼ ጋካናዉ፥ ኑ ቦላን፥ ኑ ካተቱዋ ቦላን፥ ኑ ካፓቱ ቦላን፥ ኑ ቄሳቱዋ ቦላን፥ ኑ ትምቢትያ ኦድያዋንቱ ቦላን፥ ኑ ማይዛ አዎቱዋ ቦላንነ ነ አሳ ኡባ ቦላን ዎልቃማ መቱ ጋኬዳ።
33 ኑና ጋኬዳዋን ኡባን ኔን ጽሉዋ። አያዉ ጎፐ፥ ኑን ኔና ናቆፐካ ኔን አማነትያዋ አጋ በይካ።
34 ኑ ካተቱ፥ ኑ ካፓቱ፥ ኑ ቄሳቱ ነ ኑ ማይዛ አዎቱ ነ ህግያ ናግበይክኖ፤ ቃይ ኔን ኡንቱንቶ እሜዳ አዛዙዋነ ነ ምንሳ ኦዴዳዋካ ስስበይክኖ።
35 ኔን ኡንቱንቱ ካዉተꬃን ኡንቱንቶ ዎልቃማ አንጁዋ እማዳ፤ ቃይ አኮነ ሞክያ ቢታካ ኡንቱንቶ እማዳ፤ ሽን ኡንቱንቱ ነዉ ጎይንበይክኖነ ባረንቱ ኢታ ኦሱዋፐ ስምበይክኖ።
36 “ሄዋፐ ደንዴዳዋን፥ ኑን ሀቼ አይልያ ግድያዋ በአ። ቃይ ሄዌካ ኡንቱንቱ አ አይፍያነ እ እምያ አንጁዋ ኡባ ማና ማላ፥ ኑ ማይዛ አዋቶ ኔን እሜዳ ሄ ጋድያን፥ ኑን አይልያ ግዴዶ።
37 ኑ ናጋራ ድራዉ፥ ኔን ኑ ቦላን ደንꬄዳ ካተቱ ጋድያ አንጁዋ ኡባ ኡንቱንቱ ጎኤቲኖ። ቃይ ኑ ቦላንነ ኑ መህያ ቦላን ባረንቱ ኮዬዳዋ ኦꬅኖ፤ ኑንካ ዎልቃማ መቱዋ ግዶን ደኤቶ” ያጌድኖ።
አሳይ ባረንቱ ማየቴዳ ቃላ ጫቁዋ ፓራሜዳ
38 ሀኔዳ የዉዋ ኡባ ድራዉ፥ ኑን ሃሳዪደ ጫቄዳ ጫቁዋ ጻፌዶ፤ ሄ ኑን ጻፌዳ ጫቁዋ ዋራቃታ ቦላን ኑ ካፓቱ፥ ኑ ሌዋቱነ ኑ ቄሳቱ ባረንቱ ማታፋ ዎꬄድኖ።