12
ሚርያማነ አሮን ሙሳ ኤቀቴድኖ
1 ሙሴ ቶጵያ ቢታ ምሽራቶ አኬዳ። እ አኬዳ ቶጵያ ማጫን ድራዉ፥ ሚርያማነ አሮን ሙሳ ቦሬድኖ።
2 ኡንቱንቱ፥ “መꬍና ጎዳይ ሙሴ ባጋ ጻላላና ሃሳዬደየ? ቃይ እ ኑ ባጋና ሃሳይቤኔየ?” ያጌድኖ። መꬍና ጎዳይ ሄዋ ስሴዳ።
3 ሙሴ ጋድያን ሳኣን ኡባን ደእያ አሳ ኡባፐ አꬍያ አሽከ አሳ።
4 መꬍና ጎዳይ ኤለካ ሙሴዉ፥ አሮናዉነ ሚርያምዉ፥ “ህንተ ሄዙካ ጋከትያ ዱንካንያኮ ከስተ” ያጌዳ፤ ኡንቱንቱ ሄዙካ ከሴድኖ።
5 ጾሳይ ሻርያ ቱሳን ዱገ ዎꬌዳ፤ ዱንካንያ ፐንግያን ኤቂደ፥ አሮናነ ሚርያሞ ጼሴዳ። ኡንቱንቱ ላኡካ አ ስንꬃ ሺቅና፥
6 እ ኡንቱንታ፥ “ታ ኦድያዋ ስስተ: ህንተ ግዱዋን ትምቢትያ ኦድያዌ ደኦፐ፥ ታን መꬍና ጎዳይ ታና አዉ ሳጻን ቆንጭሳይ፤ ታን አዉ አኩሙዋን ኦዳይ።
7 ሽን ታ ቆማ ሙሴና ሄዋዳን ግደና፤ እ ታ ጎልያ ኡባን አማነቴዳዋ።
8 ታን ሙሴና ስንꬃ ስንꬃን ሃሳያይፐ አትና፥ ሌምሱዋን ሃሳይከ። እ መꬍና ጎዳ ማላ በኤ። ያትና ታ ቆማ ሙሳ ቦራናዉ ህንተ አያዉ ያይበይክቴ?” ያጌዳ።
9 መꬍና ጎዳ ሀንቁ ኡንቱንቱ ቦላ ኤጽ ከሴዳ፤ መꬍና ጎዳይ ቤዳ።
10 ሻሪ ዱንካንያ ቦላፐ ደንዴዳ ዎደ፥ ሚርያማ ዎልቃማ ጋልባ ሀርግያን ምልጽ ጋደ ቦጻዱ። አሮን ኢኮ ስሚደ ጼልያ ዎደ፥ ዎልቃማ ጋልባ ሀርግያን ኦይቀቴዳኖ በኤዳ።
11 ያትና እ ሙሳ፥ “ሀይ ታ ጎዳዉ፥ ኑን ኤያተꬃን ኦꬄዳ ናጋራዉ ኑና ሙሮፓ።
12 ባረ ዳይ ኡሉዋፐ ከስያ ዎደ፥ አ አሹዋፐ ባጋይ ሜተት ክችና፥ ሀይቂ ክቺደ የለቴዳ ጋጭኖ ናኣ ማላ ግዶፓረኬ” ያጌዳ።
13 ሙሴ፥ “ሀይ ጾሳዉ፥ እዞ ፓꬃርኪ!” ያጊደ መꬍና ጎዳዉ ዋሴዳ።
14 መꬍና ጎዳይ ሙሳ፥ “እ አዉ እ ሶምእያን ጩቻ ጩቼዳዋ ግድንቶነ፥ ላፑን ጋላሳ እዛ ዬላ ማያደ ኡታና ግደኬየ? ሄዋ ድራዉ፥ ኔን እዞ ላፑን ጋላሳ ዱንካኔዳ ሳኣፐ ጋጻ ባጋና ዱማ ሳኣን ኡትሳ፤ ሄዋፐ ጉይያን፥ ስማደ ዩ” ያጌዳ።
15 ያትና ሚርያማ አሳይ ዱንካኔዳ ሳኣፐ ጋጻ ከሳደ ላፑን ጋላሳ ኡታዱ። አ ስማና ጋካናዉ አሳይ ባናዉ ደንድቤና።
16 ሄዋፐ ጉይያን፥ አሳይ ሀጸሮታ ግያ ሳፐ ደንዲደ፥ ፓራና መላ ቢታ ዱንካኔዳ።