1 ሙሴ እስራኤልያ ዛራቱ ካፓቱዋ ሀዋዳን ያጌዳ፤ “መꬍና ጎዳይ አዛዝያዌ ሀዋ። 2 እት አሳይ መꬍና ጎዳዉ እትባ ኦꬃናዉ ገፖፐ፥ ዎይ እትባ አጋናዉ ጫቆፐ፥ ባረ ዶናፐ ከሴዳዋ ኡባ ፖሎፐ አትና፥ ባረ ቃላ ብሎፖ። +

3 “ባረ አዉዋ ሶን ደእያ ዎዶሮ ናታ፥ መꬍና ጎዳዉ እትባ ኦꬃናዉ ገፖፐ፥ ዎይ እትባ አጋናዉ ጫቆፐ፥ 4 እ አዉ እ ገፋ ዎይ እ ጫቁዋባ ስሲደ፥ እዞ አይነ ጌናን አጎፐ፥ አ ኦꬃናዉ ገፔዳዋ ኡባነ አጋናዉ ጫቄዳዋ ኡባ ፖሉ። 5 ሽን እ አዉ ሄዋ ስሲደ ጳልቆፐ፥ አ ገፔዳ ገፋይነ አጋናዉ ጫቄዳ ጫቁ ፖለተናን አቴ። እ አዉ እዞ ድጌዳ ድራዉ፥ መꬍና ጎዳይ እዝዉ አቶ ጋና።

6 “ገላቤና ማጫውና ገፓ ኡታደ፥ ዎይ እትባ አጋናዉ ኤለካ ባረ ዶናፐ ጫቃ ኡታደ አስና ገሎፐ፥ 7 እ አስናይ ሄዋ ስሲደ፥ እዞ አይነ ጌናን አጎፐ፥ አ ኦꬃናዉ ገፔዳ ገፋነ እትባ አጋናዉ ጫቄዳ ጫቁዋ ፖሉ። 8 ሽን እ አስናይ ሄዋ ስሲደ ጳልቆፐ፥ አ ገፔዳ ገፋይ ዎይ እትባ አጋናዉ ኤለካ ጫቄዳ ጫቁ ፖለተናን አቴ። ሄዋ ድራዉ፥ መꬍና ጎዳይ እዝዉ አቶ ጋና።

9 “ሽን አምአታ ዎይ አስናይ የዴዳ ማጫውኖ ኦꬃናዉ ገፔዳዋ ዎይ እትባ አጋናዉ ጫቄዳዋ ፖሉ።

10 “ማቻታ ባረ አስና ሶን ደኣደ ገፖፐ፥ ዎይ እትባ አጋናዉ ጫቁዋ ጫቆፐ፥ 11 እ አስናይ ሄዋ ስሲደ እዞ አይነ ጌናን አጎፐ፥ አ ገፔዳ ገፋነ እትባ አጋናዉ ጫቄዳ ጫቁዋ ኡባ ፖሉ። 12 ሽን እ አስናይ ሄዋ ስሲደ ጳልቆፐ፥ እ ገፋይ ዎይ አ አጋናዉ ጫቄዳ ጫቁ አያይነ ፖለቶፖ። እ አስናይ ድጌዳ ድራዉ፥ መꬍና ጎዳይ እዝዉ አቶ ጋና። 13 እ አስናይ አ ገፕያ ገፋ ኡባ ዎይ አ ባረና ዝቂ ኦꬃናዉ ጫቄዳዋ ኡባ ጳልቃናዉ ዎይ ኤኖ ጋናው ዳንዳዬ። 14 ሽን እ አስናይ ሄ ጋላስ ዎይ ዎንተꬃ ጋላስ ሄዋ አይነ ጌናን አጎፐ፥ እ ገፋ ኡባ ዎይ እ ጫቁዋ ኡባ ማዬ። እ ሄዋ ስሴዳ ጋላስ ጮኡ ጌዳዋዳን እ ገፋ ኡባ ዎይ እ ጫቁዋ ኡባ ማይ ኡቴዳ። 15 ሽን እ ሄዋ ስሴዳ አማሬዳ ዎድያፐ ጉይያን ጳልቆፐ፥ እ ጎሚ አ ጋኬ” ያጌዳ።

16 አስና ገላቤና፥ ባረ አዉዋ ሶን ደእያ ዎዶሮ ናታነ እ አዉዋ ግዱዋን ዎይ ማቻትነ አስና ግዱዋን ደአና ማላ፥ መꬍና ጎዳይ ሙሳ አዛዜዳ ገፋ ዎጋይ ሀዋ።