105
ማላልስያ እስራኤልያ ታርክያ
(1 ኦዱዋ 16:8-22)
1 መꬍና ጎዳ ጋላትተ፤ አ ሱንꬃ ጼስተ።
እ ኦꬄዳዋ ካዉተꬃቱዋ ግዱዋን ኤርስተ።
2 አ ሳቢተ፤ ጋላታ የꬃ አዉ የጽተ።
አ ማላልስያ ኦሱዋ ኡባባ ኦድተ።
3 አ ጌሻ ሱንꬃን ጬቀትተ፤
መꬍና ጎዳ ኮይያ ዎዛናቱ ናሸትኖ።
4 መꬍና ጎዳነ አ ዎልቃ ጾሞስተ፤
ኡባ ገደ አ ስንꬃ ኮይተ።
5 እ ኦꬄዳ ማላልስያባ፥
አ ማላታነ እ ፕርዴዳ ፕርዳ ሀሳይተ።
6 ህንተኖ፥
አ ቆማ አብራሃማ ዘረꬃቶ፥
ዶረቴዳ ያቆባ ናቶ።
7 እ መꬍና ጎዳ ኑ ጾሳ፤
አ ቱሞ ፕርዳይካ ሳኣ ኡባ ቦላና።
8 እ ባረ ጫቁዋ መꬍናዉ፥
ባረ አዛዜዳ ቃላ ሻኡ የለታ ጋካናዉ ናጌ።
9 ሄዌነ፥ እ፥ አብራሃማና ጫቀቴዳ ጫቁዋ፥
ይሳቃዉ ጫቄዳ ጫቁዋ፥
10 ያቆባዉ ዎጋ፥
እስራኤልያዉካ መꬍና ጫቁዋ
ኦꬂደ ምንሴዳ።
11 ሀዋዳን ያጌዳ፤
“ነዉ ካናነ ቢታ እማና፤
እ ነ ዘረꬃቶ ላታ ግዳና” ያጌዳ።
12 ጾሳ አሳቱ ፓይዱዋን ጺ ጉꬃነ
ካናነ ቢታን በተ ግዲደ ደእያ ዎደ፥
13 እት ጋድያፐ ሀራ ጋድያ፥
እት ካዉተꬃፐ ሀራ ካዉተꬃ ዩዬድኖ።
14 ጾሳይ ኡንቱንታ ኦንነ ናቃናዉ እምቤና፤
ኡንቱንቱ ድራዉ ካተቱዋ ሴሪደ፥
15 “ታን ኦኬዳዋንታ ቦቾፕተ፤
ታ ትምቢትያ ኦድያዋንታ ቆሆፕተ” ያጌዳ።
16 ጾሳይ ቢታን ኮሻ የዲደ፥
ኡንቱንቱ ካꬃ ኡባ ꬋይሴዳ።
17 ሽን እ ባረ አሳ አሻናዉ፥
እት ብታንያ ግብጼ ኪቴዳ፤
ሄ ብታኒ አይለ ግዲደ ዛልኤቴዳ ዮሴፋ።
18 አ ገደቱ ብራታን ቃሸቴድኖ፤
ኡንቱንቱ አ ሳንሳላታን ቃቼድኖ።
19 እ ካሰ ኦዴዳዌ ፖለታና ጋካናዉ፥
መꬍና ጎዳ ቃላይ አ ፓጬዳ።
20 ግብጼ ካቲ ኪቲደ ቃሾ ጎልያፐ ከሴዳ፥
ጋድያ ሞድያዌ ብሌዳ።
21 እካ፥ አ ባረ ጎልያዉ ጎዳ ኦꬄዳነ።
ባረዉ ደእያዋ ኡባ ቦላ ሱንꬄዳ።
22 ባረዉ ዋና ካፖቱዋ አዛዛና ማላነ
ባረ ጭማቱዋ ዞራና ማላ ማታዬዳ።
23 ሄዋፐ ጉይያን፥ እስራኤሊ ግብጼ ገሌዳ፥
ያይቆበ ካመ ቢታን በተ ግዲደ ደኤዳ።
24 መꬍና ጎዳይ ባረ አሳ ዳሮ ጮራዬዳ፤
ኡንቱንቱ ሞርከቱዋፐ ኡንቱንታ አꬂደ ምንꬄ።
25 እ ግብጼ አሳይ ባረ አሳ እጻናዳንነ
ባረ ቆማቱዋ ጭማናዳን ኦꬄዳ።
26 ሄዋፐ ጉይያን፥ ባረ ቆማ ሙሳነ
ባረ ዶሬዳ አሮና ኡንቱንቱኮ ኪቴዳ።
27 ኡንቱንቱ ግብጼ አሳቱዋ ስንꬃን ጾሳ ማላታ፥
ካመ ቢታን ኦራꬃባ ኦꬄድኖ።
28 ጾሳይ ꬉማ ኪቲደ፥
ሄ ቢታ ꬉምሴዳ፤
ሽን ግብጼ አሳቱ አ አዛዙዋ እጼድኖ።
29 እ ኡንቱንቱ ሃꬃ ሱꬃዉ ላሚደ፥
ሞለቱዋ ዎꬌዳ።
30 ኡንቱንቱ ቢታ ኡባ፥
ካትያ ጎልያካ ሸꬊ ኩሜዳ።
31 እ አዛዝና፥ ኡዱንጺነ ቢኒ
ኡንቱንቱ ቢታ ኡባ ቦላ ሻምእሻምኤዳ።
32 ኡንቱንቱ ቢታ ቦላን እራ ድራዉ
ሻቻ ዋልቃንꬃና ቡክሴዳ።
33 እ ኡንቱንቱ ዎይንያ ቱራነ
ባላስያ ግያ ምꬃ ሾጬዳ፤
ኡንቱንቱ ቢታን ደእያ ምꬃካ ክንቼሬꬄዳ።
34 እ አዛዝና፥ ቦሊነ
ፓይዱ ባይና ቡምቡረꬃይ ከሴዳ።
35 ኡንቱንቱ ቢታን ዶሌዳ ካꬃ ኡባ ሜዳ፤
ሳኣፐ እርጻባ ኡባካ ም ꬋይሴዳ።
36 ጾሳይ ግብጼ አሳቱዋ ጎለ ባይራ ናናቱዋ ኡባ ዎꬌዳ፤
ኮይሮ የለቴዳ ኡባ ꬋይሴዳ።
37 ሄዋፐ ጉይያን፥ እ እስራኤልያ አሳ
ዎርቃነ ብራ አሌቁዋና ከሴዳ፤
ኡንቱንቱ ግዶፐ ኩንዲደ አቴዳዌ ኦንነ ባዋ።
38 ግብጼ አሳቱ ኡንቱንቶ ዳሮ ያዬዳ ድራዉ፥
ኡንቱንቱ ከሴዳዋን ናሸቴድኖ።
39 ጾሳይ ኡንቱንታ ካማናዉ ሻርያ ምጬዳ፤
ቃማ ኡንቱንቶ ፖእሳናዉ ታማ ጊግሴዳ።
40 ኡንቱንቱ ምያዋ ኦችና፥
አካ ማላትያ ካፎቱዋ ኡንቱንቶ የዴዳ፤
ኡንቱንታ ሳሉዋ ቁማ ካልሴዳ።
41 እ ሹቻ ጳልቂና፥
ሃꬃይ ፑልቴዳ፤
ሻፋዳን ባዙዋን ጎጌዳ።
42 እ ባረ ቆማ አብራሃማዉ፥
ገሌዳ ጌሻ ቃላ ሀሳዬዳ።
43 እ ባረ አሳ ናሸቻን፥
ባረ ዶሬዳዋንታ እልልሳን ከሴዳ።
44 እ ኡንቱንቶ ሀራ አሳቱዋ ቢታ እሜዳ፤
ኡንቱንቱ ሀራቱ ዳቡሬዳ ጎሻ ላቴድኖ።
45 ሄዋ እ ኦꬄዳዌ ኡንቱንቱ አ ዎጋ
ናጋናዳናነ አ ህግያ ኦꬃናዳና።
መꬍና ጎዳ ጋላትተ!