141
ኦማርሳ ዎሳ
ዳውት ጻፌዳ ማዛሙርያ
1 አቤት መꬍና ጎዳዉ፥ ታን ኔና ጼሳይ፤
ታና ማዳናዉ ኤሌላ።
ታን ኔኮ ዋስያ ዎደ፥ ታ ኮሻ ስሳ!
2 ታ ዎሳይ እጻና ጩዋዳን፥
ነ ስንꬃ ሺቆ፤
ታን ታ ኩሽያ ምጭያዌ፥
ነዉ ኦማርሳ ያርሹዋ ማላ ግዶ።
3 አቤት መꬍና ጎዳዉ፥ ታ ዶና ናግያዋ ዎꬃ፤
ታ መተርሻቱዋ ፐንግያን ዛባይንያ ኤሳ።
4 ባይዙዋ ኦꬅያ አሳቱዋና፥
ኢታ ኦሱዋ ኦና ማላ፥
ታ ዎዛና ኢታባኮ ዛሮፓ።
ኡንቱንቱ ግብራካ ታና ሙዞፓ።
5 ጽሎ አሳይ ታና አገና ሲቁዋን
ሴራናዉነ ሙራናዉ ዳንዳዬ፤
ኡንቱንቱ ታና ባቆፐ ሄዌ ታ ሁጲያን ዛይትያ ኦክያዋ ማላ፤
አያዉ ጎፐ፥ ታን ኡባ ገደካ
ኢታቱዋ ኦሱዋ ቦላ ዎሳይ።
6 ኡንቱንቱ ዳናቱ ዛላ አፉዋና፥
ዱገ ኦለትያ ዎደ፥
ታ ቃላይ ቱማ ግድያዋ ኡንቱንቱ አሳይ ኤራና።
7 ቢታይ ጎሸትያዋዳንነ
ጉሉ መኤረትያዋዳን
ኡንቱንቱ መቀꬃይካ ዱፉዋ ዶናን ላለታና።
8 አቤት ኡባ ሞድያ መꬍና ጎዳዉ፥
ታ አይፊ ኔና ጼሌ፤
ታን ኔኮ ባቃታደ አታይ፤
ታና ሀይቆ አꬃደ እሞፓ።
9 ኡንቱንቱ ታዉ ዎꬄዳ ግትያፐነ፥
ኢታ ኦꬅያዋንቱ ጲርያፐ ታና ናጋ።
10 ታን ሳሮ አꬍያ ዎደ፥
ኢታቱ ባረንቱ ዎꬄዳ ግትያን ኦይቀትኖ።