2
ጾሳን ዶረቴዳ ካትያ
1 አማነናዋንቱ አያዉ ደንዲኖ?
ቃይ ካዉተꬃቱ አያዉ ፓናባ ማቀቲኖ?
2 ሳኣ ካተቱ ደንዴድኖ፤
አሳ ሞድያዋንቱ እትፐ ሺቄድኖ።
ኡንቱንቱ መꬍና ጎዳ ቦላነ
እ ኦኬዳዋ ቦላ እትፐ ሺቄድኖ።
3 ኡንቱንቱ፥ “ኑን ኡንቱንቱ ሳንሳላታ ዱꬆይተ፤
ኡንቱንቱ ኑና ቃችያዋካ ዎራ ኦሎይተ” ያጊኖ።
4 ሳሉዋን ባረ አራታን ኡቴዳዌ
ኡንቱንቱ ቦላ ሚጬ፤
ጎዳይ ኡንቱንቱ ቦላ ቅሊጬ።
5 እ ባረ ሀንቁዋን ኡንቱንታ ሴሬ፤
ባረ ዎልቃማ ሀንቁዋን ኡንቱንታ ያሽሴ።
6 ጎዳይ፥ “ታን ታ ጌሻ ደርያ ጽዮነ ቦላ
ታ ካትያ ካዉꬃድ” ያጌ።
7 ሄ ካቲ፥ “ታን መꬍና ጎዳ ህግያ አዋያና፤
እ ታና፥ ‘ኔን ታ ናኣ፤
ታን ሀች ነዉ አዉዋ ግዳድ።
8 ኔን ታና ኦቻ፤
ታን ካዉተꬃ ኡባ ነዉ እማና፤
ሳኣ ኡባይ ነባ ግዳናዋ።
9 ኔን ብራታ ጻምአን ኡንቱንታ መንሬꬃና፤
ኡንቱንታ ኔን ኡርቃ ሚሻ መንꬅያዋዳን ሊቅሳና’ ያጌ” ያጌዳ።
10 ሄዋ ድራዉ፥ ህንተኖ ካተቶ፥ ኤያቶፕተ፤
ሀ ሳኣ ሞድያዋንቶ፥ ህንተና ናግተ!
11 መꬍና ጎዳዉ ያሻተꬃን ኦꬅተ፤
ኮኮርሳን አዛዘትተ።
12 ጾሳይ ሀንቀትና፥ ኦግያን ህንተ ꬋየናዳን ሱረ ዎዛናን አዉ ጎይንተ፤
አያዉ ጎፐ፥ አ ሀንቁ ኤለካ ኤጽ ከሳና።
ባቃት አን ቆሰት አትያ ኡባቱ አንጀቴዳዋንታ።